1. Adat Parolangolangan / Mangido tangiang

1.1.  Adat parolangolangan (Adat najolo)

         

Dizaman animisme najolo, molo mate naposo bulung (dolidol/manang na marbaju) di bahen do adatna, ima na nigoaranna Adat par olangolangan. Holan tu Tulang ni na mate do sahat   boaboa, dang pola sahat tu Tulang ni natilahaon. Dang mardalan saput sian Hulahula/Tulang, Lampin do didok goarna jala natorasna sandiri do mambahen.   

        

Diseat do pinahan bahen lompan angkup ni indahan las, alai dang dipangan jolma natorop/na maningkir i sipanganon i, ai mabiar do nasida, sotung songgop parmateon na songon i tu ianakkonna; Dibolonghon do sude sipanganon i tu lombang, manang diauphon tu sunge, jala di sirsirhon /disaburhon do sira huhut didok hatana ninna ma: On ma  par olangolangan tu ho adui ( didok goar ni na mate i) sai dao ma ho sian hami jala  unang ro be ho tu huta on, ninna.  

        Mangihuthon haporseaon ni angka ompu najolo i, olo do ro begu ni namate i tu huta, jadi mangambat / manangkal i do ninna umbahen na dibahen adat i.

1.2.  Mangido Tangiang (Dung hakristenon).  

          

Dipudian ni ari, dung ro hakristenon tu tano Batak, dang dipamasa halak Batak be adat parolang olangan, ai gabe diangap magopo do sipanganon i, alai gabe tubu ma adat naimbaru na marojahan tu hakristenon, ima na nigoaranna adat Mangido tangiang; lapatanna, marpangidoan ma suhut tu angka rajaraja (Dalihan Natolu paopat Sihalsihal) asa martangiang nasida mangidohon tu Debata, anggiat unang masa be parmateon nasongon i tu keluarga ni hasuhuton.   

         Mangihuthon na niida jala naung nipasungkunhon tu angka natuatua, hirahira songon on ma partording ni acara di ulaon adat mangido tangiang di namate matipul/mate di paralang alangan.

  

     1.2.1. Mangido paniroion.

       

Diborngin parpudi, andorang  so  ditaruhon  dope bangke i tu udean, (hira hira pukul 21.00, unang jolo sanga mulak angka paningkir/pelayat), jongjong ma protokol/paidua ni suhut mandok hata, ninna ma:  Santabi ma  di Amanta rajaraja dohot Inanta soripada  nahuparsangapi hami, jongjong ahu dison    mewakili hasuhuton, parjolo ma hudok hami  mauliate tu hamu, disiala haradeon ni rohamuna ro maningkir ianangkon nami naung jumolo marujung ngolu on. Tangkas huboto hami datung ala ni uli lagu  manang nijou ni tuanami i, tung ala ni asi dohot holong ni rohamuna do i, marpanatap hamu tuhami na marsitaonon on.

     

Amang raja, inang namora boru,dang tarbalos hami angka nauli nadenggan nabinahen muna i tu hami, Tuhanta ma na mamaloshon i marhite pasupasuna tu hamuna, ianggo sian hami, holan hata mauliate do na tarpasahat hami.

       

Amang raja, Inang namora boru, songon i ma jolo huroha partingkianna jala songon i ma jolo pangalahona, mangihuthon adat napinungka ni ompunta sijolojolo tubu, dang tarparia dope raja diparmateon na songon on, alai na patutna do nanggo apala boaboa, songon  dalan nami  mangido paniroion sian angka amanta  raja,  taringot tu na  paborhathon ianangkon nami naung jumolo mondingon tu ingananna   parsatongkinan i.

       

Amang raja, Inang namora boru, taringot tu bonsir parmateon ni anak/boru nami si ……….. on, na songon on do : (dipatorang ma sialana, sahit manang kecelakaan). Taringot di partording ni ulaonta marsogot dinalaho paborhathon tu udean, nungnga hubahen hami nian konsepna songon on :

- Goar ni ulaon adatna Mangido tangiang(versi agama

-  Mangan/mardaon pogu ma, hira hira pukul 13.00 WIB

   (dang martudutudu ni sipanganon)

-  Dung  sidung  mangan, dipangido   rohanami  asa   rade dalihan na tolu paopat sihasihal  mambahen tangiang pangidoan (doa syafaat) anggiat dipadaoTuhanta parmate on na songon on  sian tongatonga  ni keluarga on.

-  Acara umum ; manusun tertib acara pinasahat tu dongan tubu  rap  dohot dongan sahuta, jala nagabe  protokol di ulaonta, hupasahat hami ma tu dongan   sahuta/STM.

-  Dung sidung acara umum, pinasahat ma tu  pangula ni Huria hirahira pukul…. sahat tu na sidung acara di udean.

  

Amang raja, Inang namora boru, songon i ma konsep acara nahubahen hami, jadi nuaeng pe hupangido   hami ma paniroion sian hamu angka raja na  huparsangapi hami.

(laos dipaliat ma pangidoan i tu angka raja na berkompeten: Dongan tubu, dongan sahuta, Boru, Pariban, Hulahula/Tulang ni   namonding). Dung ditolopi raja tertib acara, dipasahat  protokol/ paidua ni suhut ma hata mauliate.

1.2.2. Pamasuk Bangke tu Batang.

      

Mangihuthon nasomal, jala na niida, langsung do dipamasuk hasuhuton bangke i tu batangna, jala dibahen dohot ulos lampinna. Dang pola adong  acara. (diangka tingki na parpudion, nungnga adong sian Tulang namambahen ganti ni ulos lampin, ulos lage/ulos parsirangan ma i didok goarna).

1.2.3. Acara umum.

      

Dimata ni ulaon, mardalan ma acara demi acara hombar tu tertib acara umum nanisusun ni dongan sahuta raphon dongantubu, dung i dipasahat ma tu Pangula ni Huria, laos nasida ma manguluhon acara i sahat tu udean. Dung sidung penguburan di udean, somalna dilehon Pangula ni Huria do tingki tu hasuhuton laho mandok hata huhuasi/hata mauliate.   Mangihuthon na niida, hirahira songon on ma dibahen susunan ni Tertib acara umum, di ulaon adat Mangido tangiang di na mate matipul/mate di paralangalangan

  

I.          Marende.

II.        Hata huhuasi sian paidua ni suhut, laos  

       patoranghon jujur ngolu

III.   Mandok hata  (1):

       1. Sian dongantubu.

       2. Sian boru

       3. Sian dongan sahuta/STM.

       4. Ale-ale.

IV.   Marende.

V.    Mandok hata  (2):

       5. Sian Punguan-punguan:

            a,  b, c, dst.

       6. Sian Pamarenta setempat.

VI.   Marende.

VII.  Mandok hata  (3):

       7. Sian Tulang,Laos paampuhon.

       8. Mangampu suhut.

VIII. Pinasahat tu Pangula ni Huria.

Laos Pangula ni Huria nama manguluhon acara sahat tu udean.        

Diari na mangihut, ro ma angka sisolhot mangapuli natilahaon i, laos mamboan  Indahan sipaetpaet.

     Molo sian huria do na ro, manang sian punguan/ organisasi na asing, didok ma marhata                     togartogar jala dang mamboan sipanganon masak.

Tweet

Subscribe to receive free email updates: