2. Mangirdak / Mambosuri

Dibonapasogit, tar holang do sada huta sian huta na asing, jala angka na mardongantubu do sahuta, jadi, molo muli siboru sian sada huta, ingkon tu anak ni parhuta na asing do, na tar holang daona sian huta ni siboru i. Dung muli siboru, sai tinggil do parboru managam barita ni boruna, andigan begeonna barita las niroha. Mangihuthon buhubuhu ni bortian di halak Batak Toba, opat do goar pandohan (istilah) namarhadomuan tu siboru na mamboan bortian (empat tingkat kehamilan) ima:

- Mardokdok pat (umur 2 bln)

- Denggan pamatang (umur 4 bln) 

- Manghunti pagar (umur 6 bln)

- Manggora pamuro/managam haroan (umur 7 bln)

Dung marumur nadibortian i hirahira onom bulan, borhat ma nasida mandapothon natorasna, didokma i masihol, alai ianggo maksud dohot tujuanna, na patuduhon/paboahon do tu natorasna naung managam haroan ibana.

Ditingkina, dung jonok haroan lasniroha i, borhat ma parboru rap dohot haha anggina mamboan sipanganon masak, manopot boruna, ima nanigoaranna Mangirdak/Mambosuri/Pasahat ulos tondi, mangihuthon luatna ma i angka goar pandohan (istilah) i.

     

Dung sahat parboru dijabu ni pamoruanna, diparnangkok ni mataniari, dipasahat nasida ma sipanganon i tu Boruna rap dohot Helana  huhut didok ma hatana ninna ma: Di ho Boru hasian dohot dihamu amang Hela, dibagasan las ni roha do hami ro mandapothon hamu, dinahubege hami naung managam haroan lasniroha borunami;  Dison huboan hami do dengke simudurudur, anggiat nian gabe  donganmuna i nanaeng ro i, rap mudur tudolok hamu dapotan lasniari, mudur tu toruan dapotan mual natio; 

Sitiktik ma nagompa, hodong lais ni ruma.

otik so sadia pe dengke on naung tupa,

sai godang ma pinasuna. Las ma rohamuna,  ima tutu.

     

Dung dipasahat nasida dengke i, dipasahat ma ulos (ulos tondi/ulos mulagabe) huhut didok ma hatana ninna ma: Onma ulos sian hami Hulahula muna, partanda na sai digomgom tondinami hamu, marposniroha ma hamu managam haroan ro, sai na ramotan ni Tuhanta do hamu jala pargogoanna. (molo adong ulos pandongani sian haha anggi ni Hulahula tangkas, udut ma i dipasahat disi).

Sidung i, dipadalan ma panganan, laos dibahen Hulahula ma tangiang mangan dohot huhuasi ni sipanganon (sitiktik ma nagompa…dst). Dung sidung mangan, ditutup ma jolo par manganon i dohot tangiang simpul mangan sian Hulahula.

Udut tusi, marsagi marsiaturan ma nasida pasahat hata sigabe gabe/sihorashoras, huhut paposhon/pagomoshon roha ni boruna, asa tongtong marhiras ni roha managam haroan nanaeng ro i, laos di paampuhon ma hata nauli na denggan i tu pamoruanna, ninna ma:

Lomak ma silinjuang, lomak so binaboan.

Sai dapot ma naniluluan, jumpang na jinalahan.

Eme Sitambatua,parlinggoman ni siborok.

Amanta Debata do pangalapan tua,

sai horas ma hamuna diparorot.

Horbo sitingko tanduk ma i sisapang na ualu,

parbutuha mangalilit parmata mangalualu.

Marjampal i di balian, mulak tu bara marngalungalu.

Angka hata parsaulian na mardongan hata pasupasu,

ampu ma i diampuan muna, tangkas martonga ni jabu.

Sahat ma solu tinogu tu bontean,

nungnga hupasahat hami hata nauli mardongan pasupasu,

sai sahat ma hamu tu parhorasan, sahat tu panggabean.

Ima tutu.

Ala na marhaha maranggi do Hulahula na ro i (dang marhara), laos na marhaha maranggi do nang pamoruanna mangadopi nasida.

Rampak jongjong ma pamoruon na marhaha maranggi i, jala mardos niroha marsiaturan ma mangampu hata sihoras horas/sigabe gabe  na pinasahat ni Hulahula i, ninna ma :

Turtu ma ninna anduhur, tiotio ninna lote.

Hata parhorasan napinasahat muna i,

sai unang ma muba unang mose.

Tingko ma inggiringgir, bulung na i ratarata.

Tagam do rohanami mangkirim,

sai pasauthon ma amanta namartua Debata.

Naung sampulupitu ma i, jumadi sampulu ualu.

Hata nauli napinasahat muna i,

huampu hami ma i martonga ni jabu.

Sahat ma solu tinogu tu bontean,

sai leleng ma hita mangolu,

di parhorasan di panggabean. Ima tutu.

Mangujungi ulaon i dibahen Hulahula ma tangiang panutup.

*    Adat do i, sai diparade pamoruan i do indahan las manambai nabinoan ni Hulahulana, unang padokdokhu boanon nasida sian hutana, jala diparade do lompan juhut namarpanggoari Tudutudu ni sipanganon dalan pasangaphon Hulahulana i.

*  Najolo, dibonapasogit, molo ulaon sakeluarga, holan setingkat na marhahamaranggi do na mandohoti ulaon, dang pola sahat i tu tingkat Dalihan natolu. Jadi, langsung do Hulahula paampuhon hata sigabegabe tu  boruna.

*     Di zaman saonarion, lumobi ditano parserahan, nungnga torop na pabidanghon ulaon on sahat tu tingkat dalihan natolu, gabe padokdok ulaon tu pamoruanna sandiri, ai tarpaksanama jouon ni pamoruanna i dalihan natoluna mangadopi dalihan natolu nabinoan ni Hulahula naroi. Alai, nang pe naung parsidohot dongantubu dohot dongan sahuta, tong do langsung Hulahula paampuhon hata tu boruna. Ala ni namasa songon on ma gabe tubu anggapan, ingkon Hulahula do na paampuhon hata nang pe di ulaon sisada hasuhuton.

*     Mangihuthon hatorangan sian angka natuatua, najolo ninna, ala dang  mardalihan natolu haroro ni Hulahula, dang pola dipaadophon Tudutudu ni sipanganon i tu jolo ni Hulahula; sude namargoar ni Tudutudu ni sipanganon i, dipamasuk do i tu Pansi inganan ni dengke i, unang kosong mulak, jala sigatan ni Hulahula i ma i dung mulak nasida sahat di hutana; dohot ma natinggal  dihuta marsauli honsa, lumobi dakdanak, sai ingotonna ma i, sipanganon juhut sian namboruna.

*    Mungkin do dang sarupa klasifikasi /tingkat kehamilan i di sude luat ni halak Batak, mungkin juga adong na lupa, jadi masimakluman ma hita taringot disi)

Tweet

Subscribe to receive free email updates: