6. Buhubuhu (Kategori dan Kriteria) ni Hajolmaon

   6.1.  Buhubuhu ni partubuon.

Molo tubu jolma, mulamula digoari do i Posoposo (baoa didok si Ucok, borua didok si Butet). Dung lam magodang posoposo i, digoari ma Dakdanak (dakdanak baoa/dakdanak borua); dung lam balga dakdanak i, digoari ma Bajarbajar/Parsiajar. (marsiajar dolidoli/marsiajar namarbaju) ; dung matoras bajar bajar i (patut hot ripe/patut marhasohotan), digoari ma i Naposo bulung (Dolidoli/ Namarbaju). Dung hot ripe,  alai  dang  mar ianakkon dope, digoari ma i Natunggane (tunggane doli/tunggane boru); molo dung marianakkon, digoari ma i, mar Ama ni aha/mar Nai aha, jala molo dung  marpahompu, digoari ma i , mar  0mpu si aha. Gelar panjouon partimbo di halak Batak,  olat  ni  ompung  do, ai  mulak   mangulahi nama muse panjouon i tu toru, gabe Among/Inong mangulahi,  rodi  angka na mardomu tusi.

     

   6.2.  Buhubuhu ni parmateon.

Molo mate jolma (mulai sian  posoposo  sahat tu naung bajar bajar), digoari do parmateonna i, mateposo; molo naung naposo bulung mate,  di goari ma  parmateonna i, mate matipul, sipata didok mate di paralangalangan ; molo naung hot ripe mate, alai dang marianakkon dope, digoari ma i mate hatungganeon; molo naung marianakkon mate, alai dang marpahompu dope, digoari ma parmateonna i mate mangkar (Ama mate didok matipul ulu, alai molo ina didok marompas tataring). Molo mate naung marpahompu (pahompu sian anak manang pe pahompu sian boru, nang pe holan sahalak pahompuna) alai adong dope ianakkonna na so hot ripe, digoari ma parmateonna i mate sarimatua; molo dung marpahompu namate i jala sude ianakkonna nungnga hot ripe, digoari ma parmateonna i mate saurmatua; diginjang ni i, molo dang adong dope pinompar ni na mate saurmatua i na manjoloi ibana mate, di goari ma i mate saurmatua maulibulung. (dipatudos tu parbulungon ni hau, nasai parjolo marurus na tumua,  sai parjolo na parjolo hian.)

     

   6.3.  Buhubuhu ni adat  parmateon

Adat tu na mateposo (mulai sian posoposo sahat tu naung bajarbajar), dang adong goar ni adatna (najolo), ai langsung do na mate i diboan tu udean laos di tanom, jala dang pola dipaboa i tu angka tutur nang sisolhot, so ganda holan nasida nasahuta i. Molo mate matipul (Naposo bulung), dibahen ma adatna na nigoaranna Adat Parolangolangan; holan tu tulang ni namate i do sahat boa boa, dang pola sahat tu tulang ni suhut na tilahaon i.  Molo na mate hatungganeon dohot na mate mangkar, dibahen ma adatna na nigoaranna Adat Mardalan di Nabolon; sahat ma boaboa tu Tulang ni na mate, Hulahula tangkas dohot tu Tulang rorobot. (Tulang rorobot ni sada ama, ima Tulang ni ina soripada ni ama i ; dang martulang rorobot baoa nasomangoli dope, jala dang martulang rorobot borua).

Mulai sian na mate sarimatua, mate saurmatua sahat tu na mate saurmatua maulibulung di goari do adatna Adat na Gok, ai molo dung jolo marpahompu jolma asa mate, nungnga gok gelar panjouon partimbo ompung, nungnga berhak mamake pahean kebesaran/ Sijagaron, na ni goaranna Sanggul marata.

Dang sarupa sijagaron ni na mate sarimatua dohot na mate saurmatua, jadi si jagaron sanggulmarata i do na pataridahon tingkat ni parmateonna, alai ianggo goar ni adatna, sarupa do, Adat na Gok.

Tweet

Subscribe to receive free email updates: