3. Pasahat sulang sulang ni pahompu

Molo pasahat adat na gok namangalua dung jolo adong ianakkonna, digoari do i  Pasahat  Sulangsulang ni Pahompu. Andorang so ulaon i, jolo borhat do nasida manopot Hulahulana mangarundinghon i. Diloloan/forum perundingan i, dihatai/ ditontuhon ma sadia godang na batu ni sulang dohot tingkina laho pasahathon i. Prosedur/tatacara namardomu tusi, nipaandarhon ma songon naditoru on.

3.1. Pasahat Natinutungan / Situtungon.

      

Molo naung dibahen hinan do adat panuruknuruhon, borhat ma nasida manopot Hulahulana so pola mamboan sipanganon masak (indahan las dohot lompan juhut namarpanggoari Tudutudu ni sipanganon); molo tung pe adong diboan nasida sipanganon ala dang hum rohana so adong tioptioponna manopot Hulahulana, digoari ma i singkat ni lampet, jadi dang pola dihatahon i laho pasahathon tu Hulahula. Parboru pe dang pola paradehon dengke; molo tung pe adong dengke diparade Hulahula i, sekedar holan lompan sambing do i, dang pola dihatahon i laho pasahathon tu pamoruonna; Dang gararon ni pamoruon i be ungkap harbangan dohot sangke hujur ai nungnga digarar hinan i ditingki na manuruknuruk.

       

Molo so dibahen hinan dope adat panuruknuruhon, mamboan sipanganon masak ma nasida (indahan las dohot lompan juhut namarpanggoari Tudutudu ni sipanganon). Dung sahat pamoruon/paranak i dijabu ni Hulahulana, mardosniroha ma jolo nasida laho mamulai acara, jala songon on ma partordingna. Dipasahat pamoruon/ paranak ma Tudutudu ni sipanganon i tujolo ni Hulahula huhut ma didok hatana, ninna ma: Rajanami, dison hupasahat hami Tudutudu ni sipanganonta parhitean nami  pasangaphon raja i Hulahulanami;

Sitiktik ma na gompa, hodong lais ni ruma,

otik so sadia pe natupa, sai godang ma pinasuna.

Lasma rohamuna, imatutu.

Udut tusi, dipasahat Hulahula/parboru ma Dengke Simudur udur huhut didok hatana, ninna ma; Dihamu pamoruon nami, dison hupasahat hami Dengke Simudurudur, sai rampak mudur hamu tu dolok dapotan las ni ari, mudur tu toruan dapotan mual natio;

Sitiktik ma na gompa, golang golang pangarahutna,

otik so sadia pe natupa, sai godang ma pinasuna.

Las ma rohamuna, imatutu. 

Dung sidung napasahathon Tudutudu ni sipanganon dohot Dengke Simudurudur, dipadalan/dibagihon ma panganan jala sian pamoruon/paranak ma mambahen tangiang mangan dohot huhuasi ni sipanganon (sitiktik ma na gompa ….dst.) Dung sidung mangan, ditutup ma jolo parmanganon i dohot tangiang simpul mangan sian paranak. Udut tusi, andorang so manghatai/marhata, dipasimpan ma jolo Tudutudu ni sipanganon i. Dilehon Hulahula parboru ma deba tu paranak asa adong bagihonon nasida tu uduranna/rombonganna ima nanigoaranna Gaor gota  alai nadeba mandok Ulu ni dengke mulak do goarna, sarupa songon na marpudun saut, laos dibagihon ganup pihak ma i dipihaknabe mangihuthon horongna. Dung singkop jala rade sude, diuduti ma tu na marhata : (Raja sungkun sian parboru = Rs : Raja alus sian paranak = Ra)

 

Rs : Manghatai ma hita raja ni boru.

Ra : Manghatai ma hita tutu rajanami, nungnga rade hami.

Rs : Nungnga bosur hita mangan mahap marlompan juhut, pamurnas ma i tu daging saudara tu bohi, sipasindak panaili ma i sipaneang holiholi, taringot disipanganon i raja ni boru, dia ma i langkatna dia unokna dia ma i hatana dia nanidokna.

Ra : Horas jala gabe ma hita rajanami tumpahon ni amanta namartua Debata, horas do hami na ro horas hamu Hulahulanami nahudapothon hami, ia marpanungkun ma nuaeng raja i disintuhu ni indahan masak nasosadia i, rajanami, didok situatua, godang sibutongbutong otik sipirni tondi;

       Sitiktik ma na gompa, hodong lais ni ruma,

      otik sosadia pe na tupa i, sai godang ma pinasuna, ima tutu; ianggo hata ni i rajanami, panggabean parhorasan donanidokna, botima.

Rs : Horas jala gabe ma hita tutu raja ni boru, hami pe dohonon nami ma songon nidok ni umpasa,

       Bagot na marhalto ma i na niagatan di robean,

     sai horas jala gabe ma amanta raja dohot inanta soripada na manganhon, sai tu tambana ma  dihamu pamoruan nami na mangalean,

    Alai amang boru/raja ni boru, songon nidok ni situatua, marangkup do nauli mardongan na denggan, asa tangkas uju purba tangkasan uju angkola, anggiat tangkas  hita maduma tumangkas muse ma namamora; di sihombarna songon na hundul di siudurna songon na mardalan, di siangkup ni parhorasan di sirongkap ni panggabean i, tangkas ma i dipaboa raja ni boru.

Ra : Horas jala gabe ma hita rajanami, ia marpanangkasi ma nuaeng raja i di sitangkasna disiangkup ni parhorasan panggabean i, ba tangkas ma tutu nang hami marboaboa. Rajanami, tangkas songon naung binoto ni raja i, nungnga gabe Helamuna anak nami, jala boru ni raja i nungnga gabe Parumaen nami; Asi roha ni Tuhan dioloi pangidoan, manubuhon anak i…….manubuhon boru….jadi … halak ma i pahompu i.

     Alai rajanami, songon i ma jolo pangalahona songon i partingkianna, hatop adong na niaduna lambat adong pinaimana, disangkapi rohanami naeng pasahaton nami ma nian sulangsulang ni pahompu i tu hamu Hulahula nami, laos dalan nami ma i mangido tangiang pasupasu sian hamu Hulahula nami, asa anggiat lam mangerbang i tu siamun mangerbang tu hambirang tumpahon ni amanta namartua Debata, tamba ni naung adong i, ima rajanami sitangkasna, siangkup ni panggabean parhorasan i, botima.

Rs : Horas jala gabe ma hita amangboru/raja ni boru, ianggo ninna adat dohot uhum nian, dang patutna dope pintor pahundulon nami hamu di lage tiar, ala i marningot tona ni ompunta sijolojolotubu, dang jadi tulahon halak nasala molo ro manombanomba. Nuaeng pe amangboru, nungnga huhalashon hami haroromunaon alai ala dang dipatupa hamu dope adat panuruknuruhon; asa boi udutanta panghataionta, pasahat hamu ma jolo :

       * Ungkap harbangan. (dipasahat ma i tu dongan tubu).

       * Sangke hujur (dipasahat ma i  tu dongan sahuta).

       * Pangihutihut (dipsahat ma i tu boru)

       Udut tusi amangboru/raja ni boru, hombar tu boaboa muna, na manungkun adat somba ni uhum do hamuna laho pasahat sulangsulang ni pahompunta i,  ba balga ma pasahat hamu batu ni sulang muna, laho palashon rohanami Hulahulamuna, Botima

Ra : Horas jala gabe ma hita rajanami, taringot tu pangidoan ni raja i, dang napola manjua hami disi, olat ni na boi patupaon nami, sai na bahenon nami do i, pos ma roha ni raja i, botima.

Rs : Mauliate amangboru/raja ni boru, alai dada holan tu Hulahula suhut sihabolonan pasahaton muna batu ni sulang muna, dohot do tu suhi ni ampang naopat, jala ingkon tangkas do tandaon muna sude pangalambungi dohot panauri nami, botima .

Ra : Gabe jala horas ma hita  rajanami, pos ma roha ni raja i, sai na patupaon nami do i, botima.

Rs : Amangboru/raja ni boru, songon na adong dihusiphon dongan tu ahu, sadia balga do batu ni   sulang i sipasahaton muna tu hami, dihatahon amangboru ma asa hubege hami, botima.

Ra : Rajanami, marsomba hami dijarijari sampulu pasampulusada simanjujung jala marsantabi dihata sidohonon nami, taringot di balga ni batu ni sulang i, tung marsuhat diampang ma hita rajanami, botima. (Lapatan ni marsuhat diampang, holan suhut ma naumbotosa)

Rs : Amang boru/raja ni boru, molo songon i ma ninna amangboru, nauli nadenggan ma i, nuaeng pe dipaandarhon amangboru ma songon dia ma huroha rencana napiningkiran muna,botima.         

Ra : Mauliate ma rajanami, (laos dipaandarhon ma napatut paandarhononna namarhadomuan tu   pesta nanaeng sipatupaon nasida : hari/tanggal, bulan, tahun, tempat/lokasi, mulai pukul piga,  dohot angka naasing dope namardomu tu ulaon i, rap mambahas ma nasida paturehon na hurang na lobi).

Rs : Amangboru/raja ni boru, ia nungnga simpul tarangrangi angka naringkot namarhadomuan tu ulaonta nanaeng patupaon i, molo adong dope na tinggal na lupa, sai na boi dope hita masipaingotan andorang so ulaon i, jadi asa laos sude hita naliat naloloon marningot angka naung tahata i, ba pasahat hamu ma ingot ingot, botima.

Ra : Nauli rajanami, nunga huparade hami, indion ma ingotingot sian hami godang na Rp….

Rs : Mauliate amangboru raja ni boru. (laos di pasahat ma ingot ingot i tu Dongan sahuta/STM/Dongantubu molo dibona pasogit.   

       Dijalo jala dihatahon dongan sahuta/STM ma ingotingot i ninna ma : Sadarion diari nauli diari na denggan on, ari… tanggal … bulan … taon …nungnga sahata satolop paranak marga… dohot parboru marga… patupahon pesta pasahat sulangsulang ni pahompu di ari … tanggal …bulan … taon … inganan di… mulai pukul…., batunisulang, godangna Marsuhat diampang, parjambaran mangihut/niadopan, ulos herbang sipasahaton ni parboru tu paranak marguru di suhutma i, songon i ma naung husurathon hami dison, molo adong dope nahurang manang na lobi, masipaingotan hita asa tapature. 

     Dung hira singkop sude, didokma hata nauli nadenggan ninna ma : dihamu suhut nami na dua pihak paranak dohot parboru, songon nidok ni umpasa ma dohonon nami :

       Balintang ma pagabe

       tumundalhon sitadoan,

       ari muna do horas jala gabe

       ai nungnga hubereng hami,

       tangkas do hamu masipaolooloan.

       Eme sitambatua parlinggoman ni siborok,

       amanta Debata do pangalapantua,

       sai horas ma hita saluhutna diparorot.

      Dison nungnga hujalo hami ingot ingot sian suhut paranak dohot sian suhut parboru godang na Rp… , rap marningot ma hita di ulaonta nanaeng ro.

       Hori ihot ni doton, hata si ingoton, rap mandok ma hita 3x ingot ingot.

      Manimpuli ulaon i, dibahen ma tangiang panutup sian Tulang/Hulahula, jala dung sidung tangiang dibagihon ma hepeng ingotingot i.

3.2. Pesta adat Pasahat Sulang sulang ni pahompu.

        

Dung salpu ulaon pasahat natinutungan/situtungon, mardalan ma gonghon dohot joujou tu angka tutur dohot tondong, dipihak ni paranak songon i nang dipihak ni parboru.

      

Diari naung binuhul dipartingkian naung tinontuhonna i, jongjong ma hasuhuton paranak rap dohot ianakhonna dilambung pintu, manomu/ manjalo haroro ni angka tutur dohot tondong/ undangan.

      

Digorahon protokol ma, asa masuk parjolo sude undangan ni paranak so padohot Tulang, udut tusi, digora ma asa masuk uduran ni Hulahula laos mangihut ma dipudi nasida uduran ni Tulang (sijalo Tintin marangkup), jala dipatudu protokol ma inganan parhundulan nasida.

     

Dung masuk sude tutur/undangan, hundul ma hasuhuton di inganan parhundulanna; songon i ma marpungu undangan i di inganan naung pinarade ni paranak (dijolo jabu manang pe di wisma). Mangalap hata ma paranak tu Hulahulana, manungkun manang na boi jolo martangiang mangan asa dipasahat Tudutudu ni sipanganon, umumna pintor dioloi Hulahula do i, ala manghilala di haporluan ni situan natorop. Dung sidung tangiang mangan, dipasahat paranak ma Tudutudu ni sipanganon, huhut didok ma hatana ninna ma: Dihamu Hulahula nami nahuparsangapi hami, dison hupasahat hami Tudutudu ni sipanganonta, parhitean nami pasangaphon raja i Hulahula nami, songon nidok ni umpasa ma dohonon nami :

Sitiktik ma na gompa, hodong lais ni ruma,

otik so sadia pe natupa, sai godang ma pinasuna,

las ma roha muna, ima tutu.

     

Udut tusi dipasahat parboru ma dengkena tu pamoruanna huhut didok hatana ninna ma: Dihamu pamoruon nami, dison hupasahat hami Dengke sitiotio (ulu ni dengke simbol ni siboru muli) rap dohot Dengke simudurudur (simbol ni panaru), sai tio ma parnidaan muna mangalului siluluan muna, rap mudur hamu tu dolok dapotan las ni ari, mudur tu toruan dapotan mual natio, songon nidok ni umpasa ma dohonon nami :

Sitiktik ma na gompa golanggolang pangarahutna,

otik so sadia pe na tupa, sai godang ma pinasuna,

las ma roha muna, ima tutu.

(masijalangan laos mulak tu angka ingananna be).

Udut tusi dipasahat Tulang (sijalo tintin marangkup dohot sijalo upa tulang) ma dengkena huhut didok hatana ninna ma: Di ho Bere/di ho Boru, dison, ro do hami pasahathon dengke Sahat ala naung sahat nasisinta ni rohanta; sai rap tu dolok ma hamu dapotan las ni ari rap tu toruan dapotan mual natio.

Sitiktik ma na gompa golanggolang pangarahutna,

otik so sadia pe natupa, sai godang ma pinasuna,

las ma rohamuna, ima tutu.

(Molo naung disepakati hinan ditingki na pasahat Natinutungan /Situtungon, bentuk ni parjambaran ulu ni dengke mangihut /jambar mangihut, pintor langsung nama hasuhuton nadua pihak masibagi parjambarannabe hombar tu adat ni suhut sihabolonanna, alai molo dang diseat hata hinan dope, berlaku ma marjambar niadopan, ingkon jolo hataan ma songon dia parbagina. Asa boi tatorushon, ta anggap ma jolo naung disepakati parjam baran ulu ni dengke mangihut/jambar mangihut).

     

Dung sidung marsipanganon, ditutup ma jolo parmanganon i dohot tangiang simpul mangan sian pihak paranak/Pangula ni Huria (somalna/na niida, sai jolo dibahen do ende sa ayat dua ayat). Udut tusi mangalap hata ma paranak tu parboru, mangido tingki laho manjalo pangurupion (Tumpak), sidung i diatur ma parhundulon laos marudut ma tu na masiparenggetan mamillit raja parsinabung.

     

Dung tarpillit raja parsinabung ni na dua pihak, dipaborhat paranak ma pinggan na marisi Boras siribur-ribur, Tangotanggo na bolon, Ringgit na mardiring dohot Napuran daonbari, tu raja parsinabung ni parboru, ima nanigoaranna Pinggan panungkunan. Dung sahat pinggan panungkunan i tu parsinabung ni parboru, dipungka /dimulai ma marhata. (Raja sungkun sian parboru = Rs. ; Raja pangalusi sian paranak = Ra.)

Rs : Manghatai ma hita amangboru/raja ni boru.

    

Ra : Manghatai ma hita tutu rajanami, nungnga rade hami.

Rs : Nungnga bosur hita mangan mahap marlompan juhut, pamurnas ma i tu daging saudara tu bohi, sipasindak panaili ma i sipaneang holiholi ;

Nungnga dison pinggan panungkunan,

pinggan na hot di ojahan.

Panungkunan di panggabean,

panungkunan di parhorasan.

Pinggan na marisi:

* Boras siribur ribur, boras sipir ni tondi,

   asa pir ma tondi madingin, horas tondi matogu,

   saluhut na ma hita madingin, jala leleng mangolu.

* Tanggo tanggo nabolon dalan patogu partuturon,

   sai tanggo jala togu ma partuturonta,

   tumpahon ni amanta namartua Debata.

   asa sinuan bulu ma i sibahen na las,

   sinuan ruhut partuturon sibahen na horas.

         

* Ringgit na mardiring, ringgit sitio soara,

   sai pasupasu nauli ma ro mariring iring,

   tu hita on saluhutna,

   tumpahon ni amanta, namartua Debata,

Lomak ma silinjuang, lomak so binaboan

sai dapot angka naniluluan, jumpang na jinalahan

        

       * Napuran daonbari atuk ni alumniate/napuran mauliate,

          sai manumpak ma Debata sibahen na manjadi (Mulajadi),      

          patutna ma antong dohononta mauliate,

  Eme sitambatua ma i, parlinggoman ni Siborok,

  Amanta Debata do pangalapan tua,

  sai horas ma hita diparorot,

  Mauliate ma di Tuhanta.

(laos dilapik ma hata ni pinggan panungkunan i, manjaga atik tung adong na tading/nahurang/ nasala, ninna ma):

Siup do mula ni tabas, hata marhuhuasi,

mangunduk simanjujung, marsomba jarijari,

jarijari sampulu, namarsiganjangganjangi.

Asa ampang ma i dijolojolo, panguhatan dipudi pudi,

atik tung adong hata ni pinggan panungkunan on nahurang hupandohi,

Amanta namartua Debata ma na tangkas manggohi.

Amang boru/raja ni boru, jolo hupahot ma jolo hata i atehe, asa hupahehe pinggan panungkunan on tu hamu?

Ra : gabe rajanami.

Rs : Dipangido/dijalo ma hepeng sian suhut parboru laho ulak ni pinggan panungkunan i, satonga ni na nilehon ni par anak, jala dibahen/dipamasuk tubagasan pinggan panungkunan i; jongjong ma parsinabung i, ditiop pinggan i huhut didokma hatana ninna ma) :

Martua hupahot, sai hot ma hata ni angka raja

napinahot ni amanta, na martua Debata.

martua hupahehe, sai hehe ma panggabean parhorasan

dihita on saluhutna, ima tutu.

(laos dijou ma sahalak pamoruanna pasahathon pinggan panungkunan i tu parsinabung ni paranak, jala diuduti ma muse ninna ma) :

Amangboru/raja ni boru: nungnga pinasahat pinggan panungkunan tu jolomuna, mangihut ma sungkun sungkun nami, dia ma i langkat na dia ma i unok na, dia ma i hatana dia ma i nanidokna.

Ra : Gabe jala horas ma hita rajanami, ia marpanungkun ma raja i di sintuhu ni indahan masak nasosadia i, songon nidok ni situatua ma dohonon nami rajanami,

Sitiktik ma na gompa, hodong lais ni ruma,

otik so sadia pe natupa, sai godang ma pinasuna

ianggo hata ni i rajanami,sigabegabe sihorashoras do nanidokna  

botima.

Rs : Horas jala gabe ma hita tutu amangboru/rajaniboru, ba dohonon nami ma songon nidok ni umpasa:

Bagot namarhalto ma i naniagatan di robean,

sai horas ma namanganhon, lam tu tambana dihamu  namangalean; Alai amangboru/rajani boru, songon nidok ni situatua, marangkup do nauli mardongan nadenggan, asa tangkas uju purba tangkasan uju angkola, anggiat tangkas hita maduma tumangkas ma namamora;, disihombarna songon na hundul, siudurna songon na mardalan, siangkup ni parhorasan panggabean i, tangkas ma rajani boru marboaboa, botima.

Ra : Horas jala gabe ma hita rajanami, ia marpanangkasi ma nuaeng raja i disihombarna songon na hundul di siudurna songon na mardalan, di siangkup ni panggabean parhorasan i, ba tangkas ma tutu nang hami marboaboa.

Rajanami, nasai leleng na on, sai disangkapi rohanami do nian tibu  pasahaton nami somba ni uhum nami dibagasan adat na gok tu hamu Hulahula nami, alai songon nidok ni situatua rajanami, hatop adong naniaduna, lambat adong pinaimana; ba,  saonarion ma rajanami dilehon amanta Debata parasiroha i tingki nauli tingki na denggan tu hami, laho pasahathon adat na gok, sulangsulang ni pahompu tu hamu Hulahula nami; laos dalan nami ma i mangido tangiang pasupasu sian hamu Hulahula nami, anggiat lam mangerbang i tu siamun mangerbang tu hambirang tumpahon ni amanta na martua Debata; tamba ni naung adong i, ba ima sitangkasna rajanami, siangkup ni panggabean parhorasan i, botima.

Rs : Mauliate amangboru/Rajani boru, nungnga pitu lilinami paualu jugia nami, nungnga uli nipinami ala ro hamu pasahat adat na gok tu hami, paborhat ma amangboru/raja ni boru pahompu nami naniudurhon ni Helanami rap dohot Boru nami, asa dipasahat batu ni sulang na i tu ompungna, botima.

Ra : Nauli rajanami (laos dipaborhat/disuru ma nasida; molo na pasahat sulangsulang ni pahompu, langsung do ninna pahompuna i pasahathon hepeng/batu ni sulang i tu suhut parboru).

Rs : Amang boru/raja ni boru, nungnga dipasahat hamu batu ni sulang tu suhut sihabolonannami, pasahat hamu ma muse batu ni sulangmuna  tu suhi ni ampang naopat :

* Pamarai (sada sian haha anggi ni suhut)

* Tulang (sada sian Tulang ni na muli/ na niadathon)

* Simolohon (sada sian Iboto ni na muli/na niadathon)

* Pariban (sada sian pariban nina muli/ naniadathon)

Diuduti ma muse ninna ma: Amangboru/raja ni boru, nungnga sahat batu ni sulang tu suhi ni ampang naopat i, ba sipasahaton muna dope Pasituak na tonggi (panandaon) tu angka pangalambungi dohot panauri, alai, ala tumangkas ma i partording ni parsolhoton partuturon i di paidua ni suhut nami, didok roha dumenggan ma paidua ni suhut i manggorahon i (laos didok ma hatana tu paidua ni suhut parboru ninna ma): Dihamu paidua ni suhut nami, nungnga dipasahat pamoruanta batu ni sulang tu suhut siha bolonan dohot tu suhi ni ampang naopat, alai sipasahaton nasida pamoruanta dope Pasituak natonggi/panandaon tu angka hita pangalambungi dohot panauri; ala tumangkas do dihamu partording ni parsolhoton di partuturon i, dihilala roha dumenggan ma molo hamu na manggorahon /mangidohon i tu pamoruanta, nuaeng  pe pinasahat ma tu hamuna, botima.

Dijalo paidua ni suhut ma hata i, ninna ma : mauliate ma dihamu parsinabung nami, hujalo hami ma hata i;, udut tusi didok ma hatana tu paranak : Amangboru/raja ni boru, nungnga hujalo hami Batu  ni sulang, sahat tu suhi ni ampang naopat, udut tusi amang boru/ rajani boru, pasahat hamu ma jolo parjolo, Panggurguri tu raja parsinabung nami. (laos diuduti, digorahon paidua ni suhut i ma angka pasituak natonggi/panandaon tu sude pangalambungi dohot panauri na patut manjalosa mulai sian na sumolhot, tontu nungnga di konsep paidua ni suhut hinan i).

Dung sidung dipasahat Pasituak natonggi/panandaon i tu angka Pangalambungi dohot Panauri di pihak parboru, dipasahat ma tu Hulahula/Tulang, asa nasida manggorahon tu angka uduranna, ninna ma : dihamu Hulahula/Tulang nami, hamu ma Tulang na manggorahon Pasituak natonggi /panandaon tu angka uduran muna, nuaeng pe pinasahat ma tu hamu, botima. Dijalo Tulang ma hata i, ninna ma: mauliate ma dihamu pamoruan nami, sai tongtong do dipasangap hamuna hami Hulahulamuna, hujalo hami ma hata i, (laos didok ma hatana tu pihak paranak ninna ma) : Dihamu berenami, pamoruan ni boru nami, pasahat hamu ma Pasituak natonggi/panandaon tu hami Tulang (digoari ma angka na patut manjalo i dipihak ni Tulang).

Dung singkop sude, didok ma hatana tu pihak parboru, ninna ma: Dihamu pamoruan nami, nungnga sahat hujalo hami Pasituak na tonggi /panandaon tu hami Tulang /Hulahula muna, nuaeng pe pinasahat ma tu hamu, botima.

Dijalo paidua ni suhut parboru ma hata i, laos dilapik hata ma, atik tung adong dope panggoraon nahurang, asa masipaingotan, udut tusi, didok ma hatana tu paranak, ninna ma : Amangboru/rajani boru, nungga singkop be nian Pasituak natonggi (panandaon) tu hami dohot tu Tulang/Hulahula nami, alai bangko ni jolma do, sai adong nahurang gok, jadi pasahat hamuma jolo panggohi ni nahurang gok (sipata digoari do i Sirambe manis jala satonga ni ido muse panggohi ni ulosulos/ulos tinonun sadari tu paranak), dung dipasahat paranak panggohina i, ninna ma: nungnga tung sirsir be Amangboru/Raja ni boru, tauduti ma, botima.

Ra : Mauliate ma rajanami, songon nanidok muna i nungnga singkop be sude sahat, na aturan sipasahaton nami, nuaeng pe rajanami, andorang so hupangido hami sipangidoon nami, molo dipasiat raja i pangidoan nami, parjolo ma jolo nian tapasahat Tintin marangkup tu Tulang ni Helamuna, songon i ma pangidoan nami rajanami, botima.

Rs : Nauli ma i Amangboru/Rajani boru, alai pasahat hamu ma jolo tu hami, asa hutambai hami, jala rampak borhat ma hita raja ni boru, asa patandahon hamu tu hami Tulang ni Helanami i, naung gabe ampara nami, botima. (nasomal ni ida, satonga ni nasian paranak do ditambai parboru; dibahen ma hepeng Tintin marangkup i tubagasan pinggan, rap hehe borhat ma nasida mandapothon Tulang ni hela laho pasahathon Tintin marangkup i). Laho pasahathon i didok parboru i ma hatana ninna ma :

Didok situatua :

Hot do jabu i, dimpos margulang gulang,

boru ni ise pe dialap bere i, hot do i boru ni Tulang.

Ala naung dialap beremuna borunami, ba tong do borumuna nang boru nami i, gabe sisada boru ma hita; hami pangintubu, hamu do ianggo painundun; haha nami ma hamu, anggimuna hami diparadatan. Nungnga hujalo hami Sinamot ni borunta i sian pamoruanta, jadi songon tanda ni naung sisada boru hita, hupasahat hami ma tu hamu Tintin marangkup, jala songon nidok ni umpasa ma dohonon nami :

Sitiktik ma nagompa, hodong lais ni ruma,

otik so sadia pe na tupa, sai godang ma pinasuna,

las ma rohamuna, botima

(Dijalo Tulang ni hela i ma hepeng Tintin marangkup i laos didok ma hatana ninna ma): I do tutu nang mangihuthon ruhutruhut ni paradatonta, Hot do jabu i, dimpos margulanggulang, boru ni ise pe dialap bere i, hot do i boru ni Tulang, jadi, boru nami do tutu nang boru muna i, toho ma i sisada boru hita, hamu pangintubu, hami painundun; dipasahat hamu Tintin marangkup tu hami, tanda naung sisada boru hita, mansai las rohanami manjaloi.

.

Bagot na marhalto ma i naniagatan di robean,

sai horas ma hami namanjalo,

lam tu tambana dihamu namangalean.

Nuaeng pe, mangido ma hami tu amanta namartua Debata, sai disahaphon jala disampehon ma tu nasida songon nidok ni umpasa on:

Marurat tu toru ma borunta i, marpusuk tu ginjang,

mangerbang tu siamun, mangerbang tu hambirang,

Bintang na rumiris tu ombun na sumorop,

anak dinasida riris dohot boru pe antong torop

.

Sahat ma solu tinogu tu bontean,

nungnga sahat hujalo hami Tintin marangkup on,

sai sahat ma hita tu parhorasan panggabean, botima.

(masijalangan ma nasida laos mulak hundul tu ingananna be.)

Ra : Rajanami, nungnga sahat be Tintin marangkup tu Tulang ni helamuna ima Hulahulanami, nuaeng pe nungnga rade hami parulosan muna; pasahat hamu ma jolo:

* Ulos pansamot.

* Ulos Hela.

* Ulos tu suhi ni ampang naopat :

-     Pangamai/siungkap bahal (sada sian haha anggi ni suhut)

-     Parorot (sada sian iboto ni suhut)

-     Simandokhon. (sada sian haha anggi ni pangoli)

-     Sihunti ampang(sada sian iboto ni pangoli).      

(Diuduti parsinabung ni paranak i ma muse, ninna ma); Rajanami, nungnga dipasahat hamu Ulos pansamot, Ulos hela dohot Ulos tu sude suhi ni ampang naopat, mangido dope hami rajanami, asa pasahaton muna nian Ulos tu angka hami pangalambungina dohot tu panaurina; alai ala tumangkas ma partording ni parsolhoton partuturon i di paidua ni suhut nami, didok roha tumangkas ma paidua ni suhut nami annon mangidohon i tu raja i Hulahulanami. (laos didok ma hatana tu paidua ni suhut paranak ninna ma) Dihamu paidua ni suhut nami, nungnga dipasahat Hulahulanta Ulos tu pansamot, Hela dohot tu sude suhi ni ampang naopat, udut tusi sipangidoonta dope ulos sian Hulahula i, tu angka hita pangalambungi dohot panauri. Ala tumangkas do partording ni parsolhoton partuturon i di hamu, dihilala roha, tumangkas ma i molo hamu na mangidohon tu Hulahulanta, nuaeng pe pinasahat ma tu hamu, botima. (dijalo paidua ni suhut paranak ma hata i ninna ma: Mauliate ma dihamu raja parsinabung nami, hujalo hami ma hata i ; laos diuduti ma hatana tu parboru ninna ma) :

Rajanami, asa di tiur ni ari nian ulosan muna Hela dohot Borumuna/Parumaen nami, molo tung siat pangidoan nami rajanami, parjolo ma jolo Ulos panoropi/Ulos holong pasahat hamu, botima .

Rs : Nauli raja ni boru (laos diaturhon ma partording ni na pasahat Ulospanoropi/Ulos holong; (mangihuthon nasomal ni ida tar songon on ma partording na) :

* Kelompok suhut parboru.

* Dongantubu

* Boru .

* Dongan sahuta

* Hulahula (Tulang, Bona Tulang, Bona ni ari dohot Tulang rorobot, masiaturan ma nasida).

       Dung sidung na pasahat Ulos panoropi/Ulos holong, dilapik ma hata, atik tung adong dope sian pihak parboru napasahat ulos. Molo dung singkop sude, dipaboa ma tu pihak paranak, naung sidung napasahat ulos sian nasida. Udut tusi, dilehon parsinabung ni paranak ma tingki tu sude Hulahula nasida (pihak paranak) pasahat ulosna. Dung sahat sude Ulos panoropi/Ulos holong, di uduti ma muse mulak tu na pasahat ulos herbang (molo adong dope) dohot Ulos tinonun sadari/Ulosulos. Dung sidung na pasahat Ulosulos/Ulos tinonun sadari dohot panggohi ni nahurang gok (Sirambe manis), sahat ma tu na marhata si gabegabe.

Najolo, ganup horong Hulahula do mandok hata sigabegabe tu pihak paranak, alai diangka tingki na parpudion, mardos ni roha ma pihak Hulahula, asa holan suhut parboru ma na pasahathon hata sigabegabe i laos paampuhonsa, jala hirahira songon on ma didok hatana.  

Dihamu Hela dohot Borunami, rodi sude pahompunami, songon nidok ni situatua ma dohonon nami:

Mardalan tu Purbatua, jolo boluson do Parsingkaman.

halak na burju marnatuatua,

Tiur tiur do dapotonna pandaraman.

Hushus do rugirugi, angur ia bane bane,

sai ditambai Debata dope dihamu

boru na uli jala boru sigodang eme,

dohot anak na pantas marroha, na bisuk jala na pande,

naboi patota gora, jala jolma sipardame,

asa luhut hita martua, sude ma hita gabe.

Songon i ma nang dihamu pamoruan nami,dohonon nami ma tu hamu songon nidok ni umpasa:

Tampuk ni si baganding didolok ni pangiringan,

horas jala gabe hamu na marhaha maranggi

tu dolok tu toruan, sai masipairingiringan.

Songon ansimun sisada holbung,

tu pege na sangkarimpang ,

tu toru rampak manimbung,

mangangkat rampak tu ginjang.

Pinantikkon hujur ditopi ni tapian,

tudia pe hamu mangalangka,

disi ma dapotan parsaulian

Nuaeng pe, paampuhonon nami ma hata panggabean parhorasan i tu hamu pamoruan nami,

Horbo sitingko tanduk ma i , sisapang na ualu,

parbutuha mangalilit, parmata mangalualu,

Marjampal i di balian, mulak tu bara marngalungalu,

angka hata parsaulian i, na mardongan hata pasupasu,

sai ampu ma i diampuan muna, tangkas martonga ni jabu.

Sahat ma solu, tinogu tu bontean,

sai leleng ma hita mangolu, di parhorasan di panggabean,

Gabe ma na manggabei, gabe ma na nigabean.

(Jolo dijalo parhata ni paranak ma jolo hata i asa dipasahat tu suhutna ninna ma):

Harbangan ma i dalan tu huta, balatuk dalan tu jabu.

Hata nauli napinasahat muna,

ampuon nami ma i martonga ni jabu.

Turtu ma ninna anduhur, tiotio ninna Lote,

hata pasupasuan na uli i, sai unang ma muba unang mose.

Tingko ma inggir inggir, bulungna i ratarata,

Nasa hata pasupasuan nauli i,

sai pasauthon ma amanta namartua Debata.

Nuaeng pe dihamu hasuhuton nami, rampak jongjong ma hita, ampu hamu ma panggabean parhorasan i, botima.

Rampak jongjong ma hasuhuton paranak huhut ditiop rambu ni ulosna, songon na pataridahon rasa hormatna, somba marhulahula, diampu nasida ma hata pasupasuan i ninna ma :

Naung sampulu pitu ma i, jumadi sampulu ualu.

hata pasupasuan na uli i, huampu hami ma i martonga ni jabu. Ampu ma i diampuan nami, puak di abara nami.

Sahat ma Solu i, tinogu tu bontean,

nungnga sahat huampu hami hata pasupasuan i,

sai sahat ma hita tu parhorasan panggabean. Botima.

Udut tusi, dipasahat nadua pihak ma hepeng tu dongan sahuta/STM ima nanigoaranna Olop olop. Rampak jongjong ma dongan sahuta/STM ni nadua pihak alai STM bolahan amak ma ianggo na manghatahon olopolop. Di tariashon ma disi paboa naung dipasahat paranak adat na gok tu parboru, (sarupa songon na di ulaon mangadati), laos didok ma tu situan natorop asa rampak mandok :

0lop olop  3x .

Manimpuli ulaon i dibahen Tulang ma tangiang panutup, sidung i dibagihon ma hepeng olop olop i.

* Di ulaon pasahat Sulangsulang ni pahompu, dang patut na be bahenon adat paulak une dohot tingkir tangga (ulaon sadari), ai di jolo jabu ni paranak do pesta adatna, jadi nungnga laos disi dianggap tingkir tanggana, jala tanggung jawab ni na mangaluahon do na niluahonna. Manang songon dia pe i, naung une do i di ibana, songon ima pandok ni angka dongan natuatua dohot angka  para kritisi adat.

* Diulaon pasahat sulangsulang ni pahompu, diganti do istilah panandaon gabe pasituak natonggi,       jala istilah sinamot, diganti gabe batu ni sulang, jadi adong do spesifikasi istilah).

Tweet

Subscribe to receive free email updates: