3. Adat na Gok Sarimatua (Partangiangan)

1. Adat na gok (najolo).       

Mangihuthon   hatorangan  ni  angka   natuatua/pemuka adat, ia na nigoaranna mate Sarimatua (Kriteria sari matua), ima: molo na mate i nungnga marpahompu, agia pe holan sahalak pohompuna i, pahompu sian anak manang pe pahompu sian boru, alai adong dope anakkonna naso marhasohotan/naso hot ripe, jadi, dang dikaitkan tu torop ni pahompuna.  (Bab. II poin  6.2).

          

Nanidokna Gabe diadat Batak (Kriteria gabe) ima: molo dung marpahompu. Dang dikaitkan tu toropna ; ianggo hatoropon, marhadomuan tu klasifikasi ni hagabeon do i ninna. Jadi, molo mate sarimatua sada halak, mardalan ma ulos gabe sian Hulahula naposo, di uloshon  tu Hela,Boru rap dohot pahompuna.

(Molo holan Saput dohot Tujung do mardalan, na mate hatugganeon manang na mate mangkar do i, dang dianggap na gabe dope i, songon i ma ninna.)

          

Najolo, molo mate halak Batak, Borta/Bagot (Aren) do dibahen gabe batangna, nang pe namate sarimatua. Dibola dua ma i jala di hubak (dikorek bagian dalamnya yang lunak) asa adong inganan ni bangke i. Batang/Abalabal ni namate sarimatua, digoari do i  Rumaruma.

          

Molo namate sarimatua, dibahen do Sanggul marata sijagaronna (Pahean  kebesaran do i sanggul marata i, asa jagar berengon ni na mamereng, dang adong kaitan ni on tu kepercayaan / ugamo, holan media ni paradaton sambing do ).  Ia sijagaron sanggul marata ni na mate sarimatua songon on ma :

1.  Ampang namarisi eme.         2. Ompu ompu/Raja ni duhutduhut.

3.  Sanggar sanggar.                 4. Silinjuang.

5.  Sipilit.                                  6. Jabi jabi.

7.  Pira ni ambalungan/pira ni manuk (simbol do i laho pataridahon bilangan ni anak/boru naso hot ripe, simbol ni anak disiamun, simbol ni boru di hambirang)

          

Andorang so mompo bangke i tu Rumarumana, di ondasondasi do jolo manang na pigapiga borngin. Dung sidung dipature jabujabu/rumarumana, diparnangkok ni mata ni ari dipamasuk ma bangke i tu bagasan ; udut tusi, ro ma Hulahula/Tulang mambahen saputna dohot Sampesampe (=Tujung) ni namabalu i, laos ditutup ma batang/rumarumana i, ima nanigoaranna Mompo. Dung sidung mompo, dirahut jala di lem/dirapot ma dohot damar manang puli asa unang muap/unang bau (di tingki i, dang masa dope suntik formalin) Acara mangarahut dohot na manga lem i, ido nanigoaranna Mangarapot. Dung sidung mangarapot (di rahut jala di lem dohot puli/damar), dipatuat ma bangke i tu alaman, didok ma i Partuatna manang Maralaman.

          

Laho patuathon bangke i sian jabu, songon on ma ninna partordingna :

- Dihehe i dongantubu/Raja tinonggo ma parumaen sihunti sanggul (Parumaen sian anak sihahaan), dipudina ma angka anggina dohot angka anakkonna, udut ma muse tu boru si ompa sanggul rap dohot ianakkonna.

- Dung dihunti sanggul i, dihalianghon nasida ma i sahat tu na pitu hali mangaliathon, (na sanga ni ida holan tolu hali do). Dung sidung diliathon, dipatuat ma bangke i tu alaman, laos udur ma di pudina mangihut sijagaronna; dihalianghon ma muse sijagaron sanggul marata i di alaman, pitu hali, dung i pe asa dihehei jala dipeakhon dingkan halangulu ni na monding i.

          

Dung singkop mangarade sude hasuhuton, marudut ma tu na manjalo haroro ni Hulahula mulai sian uduran ni Hulahula/Tulang panaput, sibahen Ulos Sampe sampe (=Tujung), jojor sahat tu Bona ni ari, laos dipasahat Hulahula ma boras si pir ni tondi nabinoan nasida. Dung masuk sude Hulahula, marsipanganon ma laos padalan namargoar ni Tudutudu ni sipanganon, langsung sian jolo ni suhut jala mangihuthon adat ni hasuhuton, marojahan tu prinsip  sidapot solup do na ro. Dung sidung marsipanganon dohot na padalan Tudutudu ni sipanganon, marudut ma tu na manjalo tumpak dohot na marhata sigabe gabe.

          

Dung sidung mangampu hasuhuton, dihehei Hulahula panaput ma sihunti sanggul, dihalianghon ma tolu hali manang na sampe pitu hali, laos diboan ma masuk sanggul marata i tu jabu, dihalianghon ma muse di jabu tolu manang na pitu hali, dung i dihehei Dongantubu/ Raja tinonggo ma di jabu. (dang dohot boru siompa sanggul tu jabu). Dung tuat nasida sian jabu, ditaruhon ma bangke i tu udean jala boru siompa sanggul ma uluan ni namamboan sijagaron sahat tu udean (arti simboliknya, boru ma namanuhuk/ manghallung bangke ni natorasna i sahat  tu  udean, jala laos tinggal diudean do  sijagaron naniompa ni boru i).

          

Nang pe naung adat na gok goar ni adat di parmateon sarimatua, alai ianggo manghuling ogung, di anggap dang patut dope. Dang masa ninna najolo manghuling  ogung di parmateon sarimatua.

          

Najolo ninna, pulik do adat parmompoon, pulik adat pangarapoton jala pulik muse do adat partuatna/ maralaman, jadi ingkon tolu hali ma marsipanganon jala ingkon tolu hali ma mardalan namargoar ni Tudutudu ni sipanganon (tolu hosa ingkon seaton), jadi tung mansai dokdok do boban situhuhon ni hasuhuton.

2. Partangiangan (Dung hakristenon)

Diangka tingki na parpudion,godang do paradatan i dipengaruhi hakristenon, disirai ugamo i do adat I, tubu ma pemikiran paneanghon na dokdok; diganti ma dohot goar ni adat na gok gabe adat Partangiangan; prosedur pelaksanaan ni paradatan i pe adong ma na muba; laos mardomu ma i tu kondisi ni tempat, umumna, gabe dipasada nama adat parmompona , pangarapotna dohot partuatna, alai dialap hata ma i. (Didokma : Laos on ma Parmompona, Pangarapotna dohot Partuatna, ninna).

2.1.  Pasada tahi.

     

Mangihuthon adat na masa diangka tingki na parpudion dung ro hakristenon, molo mate sarimatua halak Batak, marpungu ma sude  ianakkon dohot hahaanggi ni na monding i di tonga jabu, mardos ni roha pasada tahi mangarangrangi nasa na ringkot namardomu tu parmondingon i; tontu ingkon adong ma disi dongantubu nasumolhot, naumboto paradaton di parmateon sarimatua. Disagi ma angka petugas penanggung jawab :

-     Manusun dohot manjaha jujur ngolu.

-     Mangurus udean, Rumarumana, Ambulan dohot mobil pengiring.

-     Paboahon/manjou sude Hulahula (Hulahula tangkas, Hulahula ni haha  anggi, Hulahula naposo, Tulang, Bona tulang, Bona ni ari dohot Tulang rorobot)

-     Boaboa tu sude Dongan tubu, Dongan sahuta,   

-     Dongan  saulaon rodi Aleale.

-     Paradehon sipanganon di keluarga dohot sipanganon paradatan

-     Bendahara

-     Andigan marria raja

-     Aha boanna.

-     Mompo, Mangarapot, Partuatna, pasahat Saput dohot Sampesampe (=Tujung).

-     Manjalo haroro ni Hulahula.

-     Mangalusi Hulahula/ulaon sadari ?

-     Mangurus/Paradehon sijagaron sanggul marata dohot angka na asing naringkot tu ulaon i.

2.2. Ria raja.

     

Salambat lambatna  di borngin parpudi andorang so tu udean  bangke i, dipatupa ma loloan ria raja laho mangaranggi siulaon namarhadomuan tu na paborhathon na mate i, jadi, diborngin dijolo ni i, nungnga dipabotohon hasuhuton hinan, manang andigan marria raja.

     

Dung hirahira dapot tingkina marria raja, manggora ma paidua ni suhut ninna ma: Dihita namardongan tubu, ala naeng mulaanta ma marria, pinangido asa tujabu hita jolo masipasadaan tahi manang pandapot laos mamillit si udut hata/parhata, botima. (Parhata manang siudut hata do didok goarna najolo, alai nuaeng on, parsinabung ma i didok istilahna, gabe sarupa songon na di ulaon sidua hasuhuton).

     

Dung pungu nasida dijabu, didok paidua ni suhut ma hatana ninna ma : dihita hasuhuton pomparan ni ompunta Op…, sada ma rohanta pasahathon ulaon on tu hahadoli/anggi doli asa nasida mardos ni roha nagabe siudut hata; asa jempek tingki, sahalak pe sian hita panangkokhon pangkataion on naung rap ma hita disi. (laos dipillit nasida ma sahalak panangkokhon panghataion i). Dipanangkok napinillit i ma panghataion i, ninna ma : Dihamu Hahadoli/Anggidoli pomparan ni ompunta Op……dohot pomparan ni ompunta Op. …, nungnga dos rohanami hasuhuton asa hamu ma mardos ni roha, na gabe siudut hata diulaonta on, pinasahat ma tu hamu, botima. Dijalo Hahadoli/Anggidoli ma hata i laos masialapan hata masipasang pasangapan nasida mamillit sahalak nagabe si udut hata. Dung i didok siudut hata naung tarpillit i ma hatana tu hasuhuton, ninna ma : Dihamu hasuhuton nami, patorang hamu ma jolo tu hami angka rencana naung nikonsepmuna siboanon tu parriaan, botima. Dialusi jala dipatorang paidua ni suhut ma songon naung nihataan nasida ditingki na pasadahon tahi :

-    Tu angka ise ma naung dipasahat boa-boa

-    Hatutubuna sahat tu parmatena/umur

-    Parsohotna dohot boru ni raja i . br…….

-    Torop ni ianangkonna.

-    Status parmateon, mate sarimatua

-    Goar ni ulaon adat : Adat nagok/ Partangiangan.

-    Mompo/Pamasukhon tu jabujabuna pukul piga

-    Pasahat saput dohotsampe-sampe/tujung, sahat tu na mangungkap tujung molo tujung didok goarna.

-    Manjalo haroro ni Hulahula

-    Boanna, Pukul piga marsipanganon

-    Acara umum

-    Lokasi kuburan

-    Marsijagaron manang dang.

-    Transport dohot angka na asing  na  ringkot tu ulaon i.

Didok parhata i ma muse hatana ninna ma : Mauliate ma dihamu hasuhuton nami, alai paima so manghatai hita dohot angka raja ni tuturta, dos ma rohanta na mardongantubu/na marhaha maranggi, masipaingotan hita, atik tung adong dope nahurang singkop di konsep ni hasuhutonta, asa rap pasingkophon hita. (laos disempurnahon nasida ma konsep nabinahen ni paidua ni suhut i). Udut tusi didok ma muse hatana: nuaeng pe nungnga dapot tingkina marria, rap ma hita tu jolo jabu mangadopi angka raja ni tuturta, botima.

Dung tuat nasida tu jolo jabu, diatur ma parhundulon; (boi do paidua ni suhut mangatur i, boi do nang parhata, ala naung tarpillit  di na masipasadaan tahi/pandapot di jabu).

Manggora ma parhata ni suhut/parsinabung ninna ma: Santabi ma di amanta rajaraja nahuparsangapi hami, Dongantubu, Boru, Bere/Ibebere, Dongan sahuta, Pariban dohot Alele, lumobi ma Hulahula nami marga…Tulang nami marga …, Bona tulang marga …, Bona ni ari marga …, Hulahula ni haha anggi marga …, marga… dohot marga … Hulahula naposo marga … dohot marga … suang songon i, nang Tulang rorobot nami marga …, hombar tu boaboa nami nantoari, ba saonari ma hita marria. Mardomu ala naung dapot tingkina, hupangido hami asa di jolo jabu on ma hita marnatampak.

Dihita namardogantubu/na marhaha maranggi, rap ma hita dijolo ni jabunta; di jolonami ma dongan sahuta nami asa tangkas hita masipaadopadopan; Hulahula nami dohot Tulang nami, disiamun nami ma hamu rajanami; Pariban nami rap ma dohot hami dijolojabu on, Boru, Bere/Ibebere nami, dihambirang nami ma hamu raja ni boru ; songon i ma jolo partording ni parhundulon di hita, botima.

     

Dung singkop jala denggan hundul di ingananna be, dipatangkas parsinabung/parhata ni suhut ma manungkun sude angka tutur, manang naung rade nasida jala manang naung boi mulaan manghatai. Molo dung sude satolop, dipungka parhata ni suhut ma panghataion :

-     Hata huhuasi mandok mauliate tu sude angka raja ni tutur.

-     Patoranghon latarbelakang/maksud dohot tujuan ni    parpunguan.

-     Patorangkon konsep rencana ni suhut

-     Mangido paniroion tu sude raja ni tutur/ komponen dalihan natolu paopat sihalsihal (dialog pembahasan)

-     Pangurupion sian punguanpunguan rodi   sude angka naringkot namardomu tu ulaon i.

Dung sidung sude dihatai nasa naringkot na mardomu tu parmateon i, rampak jongjong ma hasuhuton na marhaha maranggi /namar Dongan tubu, mandok mauliate tu sude raja ni tutur. Udut tusi, dibahen ma boaboa, na adong diparade nasida sipanganon pandungodungo i, laos dibahen ma tangiang mangan.

Dung sidung mangan, dilehon ma tingki tu angka  punguan punguan nanaeng mambahen acara.

*      Mangihuthon pandapot ni angka dongan  natuatua /dongan saparsaoran, molo di parmateon sarimatua, dang pola ingkon sai dijolo ni angka raja ni tutur masi parenggetan na marhaha maranggi/ na mardongan tubu laho mamillit Parsinabung, alai molo diparmate on saurmatua, ala di bot ni ari do dipatupa adat parmompoonna, tontu dialaman jala dijolo ni angka raja ni tutur ma marsiparenggetan dung sidung mar sipanganon.

2.3. Mompo

     

Dimanogotna, diparnangkok ni mataniari, dijou/digora Protokol/ Paidua ni suhut ma Dongantubu/ Dongansahuta/Boru/Bere/Ibebere, pamasukhon bangke i tu rumarumana.

     

Ditingki na marria raja, nungnga dipangido pihak hasuhuton hinan asa mangarade Pangula ni Huria ditingki parmompoon. Dibuka Pangula ni Huria ma jolo marhite ende dohot tangiang, dung i pe asa dipamasuk bangke i tu rumarumana.

Di nadeba, jolo dipamasuk do bangke i tu Rumarumana asa dibahen Ende dohot tangiang pambukaan, dungi, marhata sise dohot hata sigabegabe).

2.4. Pasahat Ulos Saput dohot Ulos Sampe sampe.

     

Dung masuk bangke i tu Rumarumana, dilehon ma tingki tu Hulahula sibahen saput.

Laho pasahat ulos saput i, hirahira songon on ma didok hatana :

Dihamu Bere/Hela/Boru nami,dison ro do hami Tulang/Hulahula muna pasahat saput tu Bere / Hela /Boru nami naung parjolo monding/ marujung ngolu on, sai Tuhanta ma na mangapuli rohamuna, sai dilehon  dihamu gogo dohot benget ni roha manaon sitaonon na dokdok on. Songon nidok ni umpasa ma dohonon nami :

Hotang binebebebe, Bonang pinulospulos.

Sai unang hamu mandele, godang do tudostudos, .

(Laos diuloshon/ ditutuphon ma ulos i tu bangke i sian mata ni pat sahat tu andora ).

       

Dung sidung na pasahat Saput, dilehon ma tingki tu Hulahula  silehon Sampesampe.

Laho pasahat ulos Sampesampe  i, hirahira songon on ma didok hatana :

Dihamu Bere/Hela/Borunami, dison ro do hami Tulang/Hulahula muna pasahathon ulos Sampe sampe (=Tujung). Simbol ni sitaonon nadokdok do on tutu, ala naung songgop sitaonon nadokdok i tu hamu, alai marpos niroha ma hamu tu Tuhanta, ai ibana do na boi mangapuli hita jala mangapusi iluilu sian matanta. Marbenget ni roha ma hamu manaon jala marlas ni roha manghirim, nuaeng pe jalo ma Sampesampe mon (Laos diampehon ma tu abarana), didok ma muse hatana ninna ma :

Habang Ambaroba diatas ni aek puli.

Debata do parasiroha, sai tibu ma hamu diapuli, Botima.

Mangihuthon hatorangan ni angka Rajaraja adat/angka dongan natuatua, di ulaon adat na gok, parmateon sarimatua, ulos Sampe sampe do goar ni ulos sipasahaton tu namabalu,dang Tujung be goarna, jala dipelaksana anna pe, tu abarana nama diampehon, dang ditujunghon be tu simanjujungna; jadi, dang masa be ungkap tujung,  jala dang dung hea masa ungkap Sampesampe; jadi, dang pola panangkohon be Hulahula tu jabu, di alaman do alusan Hulahula, ima nanigoaranna Ulaon sadari 

2.5. Manjalo haroro ni Hulahula.

     

Mulai di namanjalo haroro ni Hulahula (uduran) marbeda versi ma partording ni paradatan i songon na di toru on :

Versi.I.

Hombar tu panggoraon ni Protokol, masuk ma uduran ni Hulahula, pasahat boras. Ganup rombongan ni Hulahula naung masuk pasahat boras pir, dipatudu ma tu nasida inganan parhundulanna jala dilehon ma i jolo minum, paima masuk sude uduran ni Hulahula. Dung masuk sude Hulahula pasahathon boras, marhata huhuasi ma paidua ni suhut laos patoranghon jujur ngolu ni na monding. Udut tu si, digora ma ganup ganup uduran ni Hulahula mambahen acarana pasahat adat na.

Versi.II.

Hombar tu panggoraon ni Protokol, masuk ma uduran ni Hulahula; dung dipasahat boras sipir ni tondi nabinoan nasida, langsung do dibahen nasida acarana sandiri sandiri pasahat adatna. (laos pasahat ulos).

2.6. Marsipanganon, Manjalo Tumpak.

     

Dung dapot tingkina marsipanganon, dipadalan dibagihon ma panganan, laos dibahen hasuhuton ma tangiang mangan dohot huhuasi ni sipanganon, sitiktik ma na gompa ..dst., dipadalan ma tahungan/tahuan tu sude horong Hulahula ro di sude angka na dianggap patut manjalosa. Dung sidung marsipanganon, ditutup ma jolo parmanganon i dohot tangiang simpul mangan sian pangula ni Huria, udut ma muse tu na manjalo tumpak/pangurupion, na ni jouhon ni protokol.

(Nungnga diparade hinan baskom namarisi boras laho inganan ni tumpak)

Dinalaho padalan Tudutudu ni sipanganon, marasing`asing do partording ni paradatan i songon na di toru `on :

Versi - I.

Laos ditingki na mangan i do dipadalan Tudu-tudu ni   sipanganon, langsung sian jolo ni hasuhuton/ paidua ni suhut/raja tinonggo jala mangihuthon adat ni hasuhuton, marojahan tu prinsip, diulaon sisada hasuhuton, sidapot solup do naro.

Versi - II.

Dang ditingki na marsipanganon i dipadalan Tudutudu ni sipanganon. Dung sidung manjalo tumpak dohot na pasahat hata mauliate, di jou hasuhuton ma angka raja ni tutur mangadopi Tudutudu ni sipanganon i ; diajuhon hasuhuton ma konsep parbagina hombar tu adat namasa dinasida. Dung jolo ditolopi raja ni tutur, ipe asa dipadalan songon na marbagi parjambaran.

(sipata digoari do i marjambar niadopan, gabe sarupa ma pangantusion ni Tudutudu ni sipanganon dohot jambar).

Dung sidung mardalan Tudutudu ni sipanganon, diuduti ma tu na marhata sigabe-gabe ; dung sidung marhata sigabe-gabe, marudut ma muse tu Acara na mangihut.

Nadeba berpendapat, dang ampit/dang relevan pangkeon hata sigabegabe di ulaon arsak ni roha/parmateon,ai dang sigabean be namate, ninna. Alai ro do alus namandok:  keluarga na tinggal na mangolu i do na ni gabean, ninna.

Porlu ingotonta, dang sarupa mamasumasu dohot na manggabei.

2.7. Tertib Acara Umum.

      

Mangihuthon na ni ida jala naung ni ihuthon, marragam do tertib acara di parmateon sarimatua, boi dohonon, hira ganup luat do masibahen versi na be :

Versi-I.

Laos ditingki na pasahat ulos saput i do Hulahula panaput mambahen acarana sandiri pasahat adatna, udut ma muse Hulahula sipasahat ulos Sampesampe/Tujung, songon i ma sude uduran ni Hulahula masibahen acara na sandirisandiri pasahat adatna.

Versi - II.

Dung sidung mompo, manggora ma paidua ni suhut, asa masuk sude uduran ni Hulahula, dimulai sian uduran ni Hulahula panaput.

Dung masuk sude uduran ni Hulahula, pintor langsung do marudut tu acara Umum; marhata huhuasi ma paidua ni suhut laos patoranghon jujurngolu ni na monding;.udut tu si, digora paidua ni suhut i ma Hulahula i jojor laho pasahathon adatna.

Versi - III.

Ditingki panjaloon di haroro ni Hulahula, langsung do ganup uduran ni Hulahula mambahen acarana

Sekedar perbandingan, pinarade do dison dua versi Tertib Acara  na paling umum diberlakukan.

Versi A

I.     Marende.

II.   Hata Huhuasi sian paidua ni suhut laos  patoranghon jujur 

       ngolu/Riwayat Hidup singkat.

III.  Mandok Hata (I).

       1. Sian Dongantubu.

       2. Sian Boru, Bere, Ibebere, Simatua ni Boru.

       3. Sian Dongan sahuta/STM

       4. Aleale.

IV.  Marende

 V.    Mandok Hata (II)

         5. Sian Punguanpunguan.:

           a……

           b. ..

           c. .. dst

         6. Pamarenta setempat

VI.    Marende.

VII.   Mandok Hata (III)

          7. Hulahula naposo.

          8. Hulahula ni haha anggi.

          9. Bonania ari

        10. Bona Tulang.

        11. Tulang.

VIII. Marende

IX.    Mandok Hata 

         12. Tulang Rorobot.

         13. Pariban.

         14. Hata pasupasuan sian Hulahula tangkas        

        15. Mangampu.       

         16. Mardondontua

X.     Pinasahat tu pangula ni Huria.

* Berdasarkan kenyataan na binereng dilapangan, Tertib  Acara No, 7 sahat tu No 13, dang adong be halakna namandok hata, ai nungnga mulak nasida dung sidung acara nasida pasahat adatna. Molo nipingkirpingkiran jala pinahusor husor dibagasan roha, dang adong be gunana pamasuhon nasida mandok hata di Acara Umum, ai nungnga adong acara khusus tu nasida. Ditingki Acara khusus Hulahula, ganup Hulahula do pa ampuhon hata pasupasuan tu hasuhuton, jala sude hata pasupasuan napinasahat ni ganup Hulahula i, nungnga di ampu hasuhuton, beasa ingkon tinggal Hulahula tangkas laho paampuhon hata di Acara Umum ? Tarmasuk tu ulaon sisada hasuhuton do parmateon, mestinya, Dongantubu/ Raja tinonggo do paampuhon, hata pasupasuan do sian Hulahula, beasa pola ingkon tinggal/ingkon gabe pulik Hulahula sian uduranna?

Versi B

I. Persiapan tu Acara.

Dung dapot tingki (Dung tuat tu alaman), digora Protokol ma asa masuk sude uduran ni Hulahula, mulai sian uduran ni Hulahula panaput tarmasuk Tulang rorobot dohot Pariban, Hulahula sipasahat Sampe sampe, Tulang, Bonatulang, Bonani ari, Hulahula ni Haha anggi, Hulahula naposo; dung dipasahat nasida boras pir nabinoan nasida, hundul/istirahat ma jolo di inganan naung pinarade ni hasuhuton, paimahon acara berikutna na ni aturhon ni Protokol. (Bandingkon tu Parmasuk ni Hulahula pasahathon boras Pir di ulaon Pesta Parbagason /Unjuk)

II. Pembukaan

Hata huhuasi sian paidua ni suhut, laos patoranghon jujurngolu ni na monding

(Najolo ninna: dung masa gondang/musik/keyboard di parmateon sarimatua laos ditingki pembukaan on do diondasondasi (acara keluarga).

III. Acara khusus Hulahula.

Hombar tu panjouon/goragora ni Protokol, masuk ma ganup uduran ni Hulahula mambahen Acarana laho pasahathon adatna, alai parpududi do uduran ni Hulahula tangkas, ai nasida do napasahathon hata pasupasuan panimpuli/paampuhon. Dung diampu hasuhuton hata pasupasuan i, laos i do panutup ni acara ni Hulahula. (Istilah na populer, didok: Marhata sigabe gabe).

IV. Acara Umum.

Tertib acara umum, disusun songon na di Versi.I, alai dang parsidohot be sude Hulahula. 

Panimpuli ni ulaon adat na gok diparmateon sarimatua, ima: Mardondontua. Dung sidung mardondontua, dipasahat ma tu pangula ni Huria, laos pangula ni huria nama maniop ulaon i sahat tu penguburan di udean. 

* Dung sidung acara penguburan, somalna dilehon pangula ni huria do tingki tu hasuhuton laho mandok hata huhuasi/hata mauliate.

* Di angka tingki na parpudi on, lumobi di tano parserahan, gabe Hulahula do paampuhon tu suhut sihabolonan, hape nian, ulaon sisada hasuhuton do adat parmateon.

* Diangka ari na mangihut, ro ma sisolhot manise, dang pola mamboan indahan masak ; nasomal niida, sekedar buah tangan do diboan nasida berupa buah-buahan/kue.

2.8. Manuan  Ompu ompu

      

Dimanogot ni ari,dung dikubur na monding i,borhat ma hasuhuton nasakeluarga tu udean, laho  manuan ompuompu, diboan nasida ma angka  naringkot na marhadomuan tusi, isara ni Panggu/Cangkul, Bibit ni ompuompu, Aek laho parsuhapon, Pengki laho mangangkat Pasir/Tano dohot angka na asing. Dung sahat nasida di Udean, dipature/dipaias ma jolo kuburan i, dung i pe asa disuan ompuompu i; pomparan sian anak manuan di siamunna, pomparan sian boru manuan dihambirang na. Dung sun disuan nasida i, disaburhon dipararak ma Rihit, laos udutma ditaburhon bunga tabur. Dung sidung saluhutna i, dibuat ma Aek, laos marsuhap be ma nasida huhut didok hatana, angka ninna ma : Dijolo ni jolo ma ho, dipudi ni pudi ma hami. Dung sidung saluhut na i, mulak ma nasida tu huta. 

Tweet

Subscribe to receive free email updates: