6. Mangongkal Holi

Songon naung niarbis dihata patujolo, adong do ulaon sisada hasuhuton i, na sakeluarga besar (mar saompu) suhut sihabolonanna, Umumna ulaon mangongkal holi (Panangkok/Patangkok Saringsaring), ulaon ni na marsaompu do i, jadi, sude do nasida na marsaompu i rampak suhut sihabolonan. Asa adong na manguluhon nasida laho mangula siulaon i, dipillit nasida ma sahalak nanigoaranna Partalitali bonang. (Pemilihan partalitali bonang, didasarkan pada skala prioritas yang tertua dan keturunan anak sulung). Dung mardos ni tahi nasida/ hasuhuton i laho mangongkal holi ni natuatua nasida, disusun ma program (angka holi ni ise ma siongkalon jala angka aha ma siparadeon/siulaon dohot angka na mardomu tusi).

6.1. Manopot Hulahula.

        

Borhat ma hasuhuton paboahon rencana nasida i tu  sude

Hulahula ni siongkalon i (Hulahula tangkas, Tulang, Bonatulang, Bona ni ari dohot Tulang rorobot) ; molo tu Hulahula panampin, boanon nasida do sipanganon masak na marpanggoari Tudutudu ni sipanganon. Dinadeba, adong do na pasahat hepeng tu Hulahula panampin laho manuhor ulos, alai dinadeba, ditingki pesta i do dipasahat, jadi mamereng di situasi dohot kondisi ni Hulahula i ma i.

6.2. Tonggo Raja.

     

Dung sahat Boa-boa tu sude Hulahula ni siongkalon i, mardalanma gonghon  dohot jou jou tu sude tutur dohot tondong, dung i, dipatupa ma ulaon tonggo raja pasahat ulaon panghobasion tu Dongantubu/Dongansahuta jala diatur/disepakati ma disi partording ni ulaon asa denggan mardalan sude.

6.3.  Pangongkalon.

     

Andorang so dapot dope ari pangongkalon, nungnga  dipasidung hinan Simin/Tugu na laho inganan ni saring-saring i, ima nanigoaranna Batu na pir; diparade poti marlampis abit na bontar dibagasan, bage mar anak kunsi. Diparade ma dohot Baskom inganan ni aek, Sangkul, Aek ni hunik, diparade Lampet dohot Kopi jala diboan Hulahula panampin ma Ulos tampin.

Mangihuthon hatorangan ni angka natuatua, hirahira songon on ma partording ni pangongkalon i:

*      Najolo andorang so hakristenon, marhata sise do jolo di udean  i, Dongantubu ma raja panise, paidua ni suhut ma raja pangalusi, panauri ma dongan sahuta, boru dohot Hula-hula. Jempek do parhataan disi, Dongantubu manungkun taringot tu siulaon, dialusi paidua ni suhut ma, nanaeng mangongkal holi ni ompunasida do, laho panangkokhon tu batu na pir.

*      Dung ro hakristenon, pangula ni huria nama mamungka ulaon i marhite ende dohot tangiang. Marragam do pandapot ni angka natuatua taringot tu ise na parjolo mamangkur. Adong namandok bona ni ari do parjolo, na deba mandok Hulahula panampin do parjolo, na asing muse mandok, hasuhuton do parjolo mamangkur, hombar tu hata na mandok :

       Martampuk do bulung, marbona sangkalan.

       Martanda do suhut, marnampuna ugasan 

       Tamba ni i, adong muse hata na mandok

       Mardangka salohot,

       Martanda do nasumolhot.

       (Jadi, guru di suhut do hasuhutonna).

      

Dung ris mamangkurhon 3x be, dipasahat ma tu boru ni hasuhuton, asa nasida paujunghon pangongkalon i. Dung tarida saringsaring i, manggora ma pamoruan na mangongkal i, Horas, ninna; laos sude ma nadohot disi mandok Horas. Tuat ma boru tangkas ni na ni ongkal i mangalap saring-saring i tu toru, jala nungnga rade anak sihahaan ni na ni ongkal i diginjang, manjalo Saringsaring i sian Laena.

       

Dung pungu sude rodi angka ruas-ruas ni holina, dipaias ma laho pasahathon tu Hulahula panampin. Ditampin Hulahula i ma dohot Ulos panampin laos dipamasuk tu poti naung rade disi, dung i ditutup ma poti i. Dinalaho borhat nasida tu inganan batu na pir, dihehe i Hulahula panampin ma soripada ni hasuhuton (Mulai sian sihahaan). Borhatma nasida, poti na marisi saring-saring ma dijolo, di pudina ma namangudurhon.

       

Dung sahat nasida di inganan batu na pir, dipeakhon ma jolo dijolo ni Simin i, laos paimahon angka saringsaring na asing (molo adong donganna na asing siongkalon).

       

Laho pamasuk saringsaring i tu Simin i, mandok hata ma sahalak sian hasuhuton (Partalitali bonang) ninna ma : Ale ompung, sian sada ni roha ni hami angka pomparanmu, hupahehe hami ma saringsaringmu panangkokhon tu batu na pir, inganan nauli jala na patar. Denggan ma roham mian di inganan na hupatupa hami on. Laos dipamasuk ma poti inganan ni saringsaring i tu bagasan Simin i.

       

Udut tusi, dipasahat ma tu Pangula ni Huria mambahen tangiang dohot pasupasu hombar tu na niaturhon ni Huria. Dung sidung acara Huria, dilehon ma tingki tu hasuhuton pasahathon hata huhuasi/hata mauliate laos paboahon udut ni acara i, ima marsipanganon di jolo jabu.

(Dinadeba daerah peradatan, marhata sigabegabe do dung sidung acara Huria, alai dinadeba holan mandok hata huhuasi do hasuhuton, ianggo na marhata sigabegabe, dung pe sidung marsipanganon).

Dung sidung hata huhuasi sian hasuhuton, ditutup Pangula ni Huria ma marhite ende dohot tangiang, laos marhehenauli ma mulak tu huta.

6.4.  Marsipanganon

     

Dung sahat nasida rodi huta, diatur ma parhundulon jala dipadalan ma panganan; dibahen hasuhuton ma tangiang mangan dohot huhuasi ni sipanganon, laos ditingki na mangan i do dipadalan hasuhuton, namargoar ni Tudutudu ni sipanganon, langsung sian jolo ni hasuhuton/Raja tinonggo jala mangihuthon adat ni hasuhuton.

Songon naung pinatorang di jolo ni on, ima di Ruhutruhut papangan, Tudutudu  ni sipanganon na bernilai penghormatan do mardalan di ulaon sisada hasuhuton dang jambar nabernilai hak jala berpeluang tuntutan. Diulaon sisada hasuhuton, berlaku ma prinsip sidapot solup do na ro, jadi dang ampit/dang relevan paadophononhon Tudutudu ni sipanganon i tu jolo ni angka raja mangido panolopion songon na marbagi jambar na bernilai hak. Porlu ingotonta, sada do solup ni adat sipangkeon/na berlaku di ulaon si sada hasuhuton,  ima solup ni adat ni suhut

6.5.  Marhata si gabegabe

     

Dung   salpu     marsipanganon  dohot  na  padalan  Tudu tudu ni sipanganon, ditutup ma jolo parmanganon i dohot tangiang simpul mangan sian pangula ni huria, laos diuduti ma tu na marhata sigabegabe, jala hirahira songon on ma partording na. (Raja panise sian dongantubu = Rs ; Raja pangalusi ima paidua ni suhut manang raja tinonggo = Ra.).

Rs : Manghatai ma hita suhut nami.

Ra : Manghatai ma hita tutu, nungnga rade hami.

Rs : Nungnga bosur hita mangan, mahap marlompan juhut,

pamurnas ma i tu daging saudara tu bohi,

sipasindak panaili ma i sipaneang holiholi,

taringot di sipanganon i suhut nami,

dia ma i langkatna dia unokna,

dia ma i hatana dia nanidokna.

Ra : Horas jala gabe ma hita raja nami tumpahon ni amanta na martua Debata, ia marpanungkun ma nuaeng raja i disintuhu ni indahan masak naso sadia i ;

       Sitiktik ma na gompa hodong lais ni ruma,

       otik sosadia pe natupa i, sai godang ma pinasuna,

ianggo hata ni i rajanami, panggabean parhorasan do nanidokna, botima.

Rs : Horas jala gabe ma hita tutu suhut nami,hami pe dohonon nami ma songon nidok ni umpasa,

Bagot na marhalto ma i na niagatan di robean,

horas jala gabe ma amanta raja dohot inanta soripada na manganhon, lam tu tambana   dihamu  na mangalean.

Alai amang suhut nami, songon nidok ni situatua, marangkup do nauli mardongan na denggan, asa tangkas uju purba tangkasan uju angkola, asa tangkas  hita maduma tumangkas ma namamora; di sihombarna songon na hundul, di siudurna songon na mardalan, siangkup ni parhorasan sirongkap ni panggabean i, tangkasma i dipaboa suhut nami, botima.

Ra : Horas jala gabe ma hita rajanami, ia marpanangkasi ma nuaeng raja i  disiangkup ni parhorasan panggabean i ba tangkas ma tutu nang hami marboaboa. Songon naung tangkas taboto, nungnga saut tapahehe saring-saring ni ompunta jala tapamasuk tu ingananna dibatu na pir, inganan nauli jala na patar, jadi ima na tahalashon saonari di parpunguanta on, asa rap martangiang hita mandok mauliate tu amanta Debata jala anggiat dipatiur nang ulaonta na marudut tuson dope ima di napatupahon pesta peresmian ni simin /tugu inganan ni ompunta i, ba ima rajanami sitangkasna siangkup ni panggabean parhorasan i, botima.

Rs : Gabe jala horas ma hita tutu suhut nami, nungnga tangkas hamu marboaboa jala nungnga sude naumbegesa umbotosa taringot diparpunguanta on, ala naung tapahehe do saringsaring ni angka ompunta ba napatutna ma i tutu martangiang hita mandok mauliate tu Tuhanta, laos mangido gogo dohot bisuk dibagasan dame dinanaeng patupahon pestana dope; nang dohonon nami, sai dilehon Debata ma dihamu hasadaon ni roha laho patupahon i, mardomu tusi dohonon nami ma songon nidok ni umpasa :

Urat ni pangkat ma i tu urat ni hotang,

tudia pe hamu mangalangka, tusi ma dapotan pansamotan.

Lomak ma silinjuang, lomak so binaboan.

Sai dapot na niluluanmuna, jumpang na jinalahan.

Eme sitambatua parlinggoman ni siborok,

Amanta Debata do pangalapan tua,

sai horas ma hamuna diparorot, Botima,

(Dung sidung Dongantubu mandok hata, dipasahat ma tu parhata ni suhut asa nasida mangaturhon parjojor ni sidok hata, ima : Boru,Bere/Ibebere,Dongan sahuta, panimpuli ma Hulahula pasahathon hata pasu-pasuan. Di pigapiga daerah, laos Hulahula do  paampuhon, atik pe ulaon sisada hasuhuton ).

       

Dung jolo dijalo paidua ni suhut/Raja tinonggo hata panggabean parhorasan rodi hata pasupasuan napinasahat ni Hulahula i, dipaampuhon ma tu suhut sihabolonan/partali-tali bonang asa diampu. Sidung i ditutup Pangula ni Huria ma marhite ende dohot tangiang.

       

Molo dang marudut tu na mamestahon Siminna, dipanangkok hasuhuton do Hula-hula panampin tu jabu laho paujunghon adat tu nasida, ima na pasahat Pisopiso songon diparmonding ni natuatua, alai molo laos dipadomu do dohot pesta peresmianna, ba di acara pesta i ma dipasahat Pisopisona.

Tweet

Subscribe to receive free email updates: