11. Adat napuran / Adat Marsantabi

Diparngoluon ni hita jolma, sipata masa do angka na masa, nahurang pas tu na pinarsinta ni roha. Marragam do namasa i na marhadomuan tu adat paradaton Batak. Dang sai sude tarpaboa, nipatedek ma manang na pigapiga ulaon, rap dohot pangulahon na.

1. Mangalangkai

Ianggo ninna roha nian, sai parjolo ma   angkangna/ hahana marhasohotan sian anggina, hape asing sian i do namasa, ai parjolo do anggina pajumpang dohot rongkapna.Manjaga unang tubu hansit ni roha ala mangalangkai nama ibana, marsantabi/parmisi ma tu hahana marhite napuran ma i simbol na (dilehon ma sekedar penghargaan). Mangihuthon na somal niida, ulaon sakeluarga do ulaon sisongon on (intern keluarga), jala dang pola diatas ni sipanganon.

2. Manjou Hulahula ni naso niadathon dope.

Diparmateon ni sahalak na tuatua, adong ma ianakkonna naso mangadati, manuruknuruk pe dang dope, gabe dang boi  Hulahula ni anakna i pasahat adat (Hulahula naposo). Ditingki na hapusohan  songon i, adong do jalan keluarna (solusi) naung pinamasa ni situatua, ima marhite adat pasahat napuran. Borhat ma anak ni namate i mandapothon Hulahulana , marsomba manopoti sala, huhut mangido asa ro nasida mangadopi parmateon ni natorasna i.

Napuran do parhitean, alai napuran na marisi hepeng olat ni na tarbahen, sekedar pataridahon somba marhulahula elek marboru.

3.  Mangganti goar.

Marpahompu ma sada natuatua, alai parjolo pahompu sian boruna, tubu ma muse pahompuna sian anakna alai tong parjolo borua, dung di tinodohonna, sorang ma pahompu baoa sian anak na  i. Dongan sagoar do pahompu sian boru, gabe digoari/di gelari  ma natuatua i ompu Ni Si…

Pahompu boru ni anak pe tong do i dongan sagoar alai asa adong perbedaan ni pahompu i sian anak manang sian boru, digoari/digelari ma natuatua i ompu Si…

Pahompu baoa sian anak do Siboan goar, na manorushon tarombo ni margana, mardomu tusi digoari/digelari ma natuatua i ompu…(langsung goar ni pahompuna baoa i, isarana ompu Togi). Laho mangganti goar sian ompu Ni Si…, asa gabe ompu Si…dipatupa do adat napuran/adat marsantabi. Ompungna namamangke goarna i do na patupahon i (Intern keluarga) dipasahat ompungna ma tandamata/ kenangkenangan sebagai tanda terima kasih, ala sehat do ibana mamangke goarna i.

Suang songon i do dibahen ditingki na marganti goar muse natuatua i sian ompu Si… gabe ompu… , dilehon do tanda kenangkenangan songon tanda terima kasih tu pahompu dongan sagoar naso pinangke na i be goarna.

Molo nipingkirpingkiran jala pinahusorhusor dibagasan roha, boi dohonon, pejabat sementara do pahompu dongan sagoar i (sian boru dohot boru ni anak) ianggo pejabat na definitip, pahompu baoa sian anak do. Pahompu baoa do sijalo dondontua, ai parumaen/ parumaen ni anak do Sihunti sanggul; molo pomparan  sian boru, digoari do i Siompa sanggul.

4. Manulangi Tulang (Parmisi mangalap boru na asing/boru ni halak).

Adat do i, napinungka ni ompunta sijolojolo tubu,dang tumagon tu halak ianggo adong do nasuman boru ni Tulang, alai molo ingkon boru ni halak nama alapon,ba tama do jolo parmisi iba sian Tulang niba; adat parmisi i ma nanigoaranna adat manulangi Tulang. Mangihuthon hatorangan ni angka natuatua nang mangihuthon na niida sandiri, songonon ma pangulahonna:

Marboaboa do pamoruon diharoro nasida, asa rade jala rampak pungu dijabu dapotonna Hulahulana (na marhaha maranggi)

Ditingki naung tinontuhon i, ro ma pamoruon rap dohot ianangkonna nanaeng marhasohotan i, diboan nasida do sipanganon masak, alai dang pola mardongan/ maruduran nasida, ai ulaon antar keluarga do ulaon sisongon i.

Dung sahat nasida dijabu ni Hulahulana, mardos ni roha ma laho mamulai acara; molo dung satolop, diatur ma parhundul. Dipasahat pamoruon ma sipanganon nabinoan nasida i tu Hulahulana, huhut didok hatana ninna ma: Dihamu Hulahulanami na huparsangapi hami,dison ro do hami pasahathon sulang-sulang ni beremuna si --, songon nidok ni umpasa ma dohonon nami:

Sitiktik ma nagompa, hodong lais ni ruma.

Otik so sadia pe sulang sulang ni beremuna on,

sai godang ma pinasuna.

Las ma rohamuna. Botima.

Udut tusi, dipasahat Hulahula ma dengke tu pamoruanna /Berena huhut didok hatana ninna ma:

Dihamu pamoruan nami/Lae, Ibotonami dohot Berenami, ia nungnga dipasahat hamu sulang sulang ni Bere nami tu hami jala nungnga las rohanami manjalo, hami pe, pasahaton nami do Dengke tu hamu, paboa las ni roha nami, ala sai tongtong do di ingot hamu pasangaphon hami Hulahula muna, songon nidok ni umpasa ma nang dohonon nami:

Sitiktik ma nagompa, golang golang pangarahutna.

Otik sosadia pe dengke on natupa,

sai godang ma pinasuna.

Las ma rohamuna,ima tutu.

       Masijalangan ma nasida laos mulak tu inganan parhun dulannabe. Udut tusi, dibahen pamoruon ma tangiang mangan dohot huhuasi ni sipanganon: sitiktik ma nagompa …dst. Dung sidung mangan, ditutup ma jolo parmanganon i dohot tangiang simpul mangan laos diuduti ma tu na manghatai/ marhata.

(Ala ulaon sekeluarga do ulaon i, boi ma panghataion disi langsung tu depoint; dipatorang pamoruon ma maksud dohot tujuan nasida, ba direspon Hulahulana ma/mangalehon doa restu; Mangihuthon pandok ni angka natuatua, ianggo najolo ninna, dilehon pamoruan/bere i do pasituak natonggi tu Hulahula, ipe asa dilehon Hulahula i doa restu)

Mangujungi ulaon i, dibahen Hulahula ma tangiang panutup.

Tweet

Subscribe to receive free email updates: