4. Adat na Gok Saurmatua (Partangiangan)

1. Adat nagok (najolo)

Nanigoaranna  mate Saurmatua  (Kriteria   Saurmatua)  

Ima : molo nungnga sude anakkon ni namate i, hot ripe, jala nungnga marpahompu, manang pahompu sian anak pe i manang pahompu sian boru, agia pe holan sahalak  pahompuna, jadi, dang dikaitkan tu toropna, ai klasifikasi ni hagabeonna do ianggo hatoroponna.

     

Najolo, molo dung hot ripe sude ianakkon, dipasahat ma Sulangsulang hariapan/pasidung ariari sian kewajiban adat (semacam pernyataan pensiun). Songon naung pinatorang dijolo ni on, umumna najolo, sian Borta/ Bagot do batang ni namate, alai ianggo angka naung sanga manjalo Sulangsulang hariapan, molo adong dope tingkina, diparade hinan do Rumarumana, na pinauli sian Hau hibul, nadeba mandok Hau tata. Asa boi paulion Rumaruma sian hau tata, ingkon ditaba do sada hau na bolon. Laho manaba dohot paulihon Rumaruma i, dipatupa suhut do sipanganon, laos dilehon do pasituak natonggi tu parhobasna. Dung sidung dipauli Rumaruma i, ingkon tutungon do sude hompakhompak pambarbaran ni hau i, asa unang patubu sahit di huta i ninna ; jala ingkon marsipanganon do laho manutung i, ima nanigoaranna adat Manutung hompak.

Dung diparade Rumaruma ingananna i, tupa do leleng nari asa marujung ngolu ni natuatua i, jadi olo do ibana sipata modommodom dibagasan rumarumana i, hira na pasumansumanhon.

     

Mangihuthon adat napinungka ni si jolojolotubu, di bot ni ari do mompo molo na mate Saurmatua, ala nungnga sungkot timbona disuhatsuhat ni parngoluonna , dang adong be sinangkohanna.Molo mompo na saurmatua di bot ni ari, dipaboa do i tu Hulahula sibahen ulos saput dohot sibahen ulos Sampetua; dung pe ro nasida, asa dipamasuk bangke i tu Rumarumana, tanganna pe dang dilompit be, laos tigor nama, ima songon simbol ni tangan mangeal / mangembal. Ala di bot ni ari do mompo, jala laos disi do dipasahat Hulahula/Tulang ulos Saput dohot ulos Sampetua, gabe pulik ma dibahen adat parmompoon na ; marsipanganon ma disi jala mardalan ma Tudutudu ni sipanganon na bernilai penghormatan.(Dang jambar na bernilai Hak jala na berpeluang tuntutan)

     

Taringot tu sijagaron sanggul marata tu namate Saur matua songon on do ninna angka natuatua/Rajaraja Adat :

- Ampang namarisi eme.

- Ompu ompu/Raja ni duhutduhut.

- Sanggarsanggar.

- Silinjuang.

- Sipilit.

- Gambiri pamiahi

- Baringin.

* Taringot tu hasomalan marsipanganon, di adat mompo najolo, porlu do rimangrimanganta. Dang sarupa be pangantusion ni mompo najolo dohot mompo zaman saonari. Nanidokna mompo najolo, ima pamasukhon bangke tubagasan Rumarumana sahat tu na manutup batang/Rumarumana, udut ni i, ulaon pangarapotna nama. Dung ro hakristenon, pangula ni Huria nama manutup batang/Rumarumana, jadi dang masuk di ulaon mompo be manutup batang, olat ni pasahat saput dohot ulos sampetua nama.

* Najolo, ulos tutup batang do sude ulos na ro sian Hulahula, kecuali Hulahula Panaput dohot napasahat Ulos Sampetua, jala  dihembanghon/ditutuphon/dipeakhon  do i tu batang i; buaton ni Boru ma i, tingki na laho pasahat Tumpakna, alai dung ro hakristenon, Pangula ni Huria nama manutup batang dung sidung acara Umum ; jadi, dang mungkin be Ulos Tutup batang i, tutuphonon ni Hulahula / Tulang tu batang/Rumaruma na so ditutup dope. gabe tubu ma goar “Ulos Holong”. Na gabe sungkun sungkun tu roha ima : apakah tepat “Ulos Tutup batang” diganti namanya menjadi ”ulos Holong”, ai gabe dang spesifik be goar ni ulos i; tubu ma dohot pangantusion na sala, gabe mangulosi ma dohot na ni hara/ na so berkompeten.

2. Partangiangan (Dung hakristenon)     

     

Mulak songon naung tinaringotan di jolo ni on, dung masuk hakristenon tu tano Batak, godang do na muba paradaton i, tarmasuk ma disi parmateon saurmatua; gabe sira ni adat i do ugamo i.

Molo mate Saurmatua halak Batak najolo, digoari do adatna adat nagok alai dung ro hakristenon gabe digoari ma Partangiangan, jala songon on ma partordingna : 

2.1. Pasada tahi

     

Molo mate  Saurmatua  natuatua, marpungu ma sude ianakkon dohot haha anggi ni na monding i di tonga jabu, mardosniroha mangaranggi/mangarangrangi nasa na ringkot namardomu tu parmondingon i, ima nanigoaranna pasada tahi. Tontu ingkon adong ma disi dongantubu nasumolhot naumboto paradaton di parmateon Saurmatua; disagi nasida ma angka petugas na boi bertanggung jawab diangka bidang siulaonna, isarana :

-     Manusun dohot manjaha jujur ngolu.

-     Mangurus udean, Rumarumana, Ambulan  dohot mobil   pengiring.

-     Paboahon tu sude Hulahula (Hulahula tangkas, Hulahula ni haha anggi, Hulahula naposo, Hulahula ni pahompu (Hulahula sijungkot), Tulang, Bona tulang, Bona ni ari,  Tulang rorobot dohot Pariban)

-     Boaboa tu sude Dongantubu, Dongansahuta, Dongan   saulaon, rodi Aleale.

-     Paradehon sipanganon di keluarga dohot   sipanganon paradatan

-     Bendahara khusus pisopiso ni ulos dohot bendahara umum

-     Andigan marria raja/Tonggo raja

-     Aha boanna.

-     Mompo, mangarapot, partuatna, pasahat Saput dohot  Sampetua.

-     Paradehon sijagaron Sanggul marata

-     Manjalo haroro ni Hulahula.

-     Mangalusi Hulahula/ulaon sadari ?

-     Mangalap Pargonsi/Musik

-     dohot angka na asing naringkot tu ulaon i

Songon naung tinaringotan di jolo ni on, marbeda/ marasing do partording ni ulaon adat na gok di par mateon Sarimatua dohot di parmateon Saurmatua.

Molo mate Saurmatua halak Batak, di bot ni ari do parmompoonna, ala nungnga gok suhatsuhat ni parngoluonna, dang adong be si nangkohanna. Songon naung niarbis dijolo nion, ianggo najolo, berdasarkan kronologisnya,  jolo mompo do asa mangarapot, udut tusi,  Partuatna nama/Mar alaman, alai diangka tingki na parpudion, lumobi di tano parserahan, gabe jolo martonggoraja do asa mompo.

(Molo nipahusorhusor dibagasan roha, lebih tepat do nabinahen ni angka ompunta naparjolo i, dang muap be uap ni namate i ditingki parmanganon).

     

Dung mate na saurmatua i, pintor hobas ma hasuhuton paboahon namasa i tu Hulahula sibahen Saput dohot sibahen Sampetua, laos dipaboa ma, andigan/sadihari martonggo raja/pangarapotna dohot parmompoonna, asa boi dipahombar nasida harorona.

2.2. Tonggo Raja/Mangarapot.

      

Dung hirahira dapot tingki naung tinontuhon laho mar tonggo raja, parjolo ma marsipanganon. Ditingki parmanganon   i, dipadalan ma na margoar ni Tudutudu ni sipanganon, langsung sian jolo ni Suhut/ Raja Tinonggo jala mangihuthon adat ni suhut sihabolonan, marojahan tu prinsip : di ulaon sisada hasuhuton, sidapot solup do na ro. Dung sidung marsipanganon, ditutup ma jolo parmanganon i dohot tangiang simpul mangan, udut tusi, diatur ma parhundulon, laos dipungka ma marhata. Dimulai ma sian na masiparenggetan mamillit raja parhata dohot na marsisisean. Sian Dongantubu manang Dongan sahuta ma raja panise, paidua ni suhut/Raja Tinonggo ma raja pangalusi. Disungkun raja parhata/raja panungkun ma paidua ni suhut/Raja Tinonggo/raja pangalusi, maksud dohot tujuan ni parpunguan.

Dialusi jala dipatorang paidua ni suhut/Raja Tinonggo ma songon naung nihataan nasida ditingki na pasadahon tahi :

-     Tu angka ise ma naung dipasahat boaboa

-     Hatutubuna sahat tu parmatena/umur

-     Parsohotna dohot boru ni raja i .br..

-     Torop ni ianangkonna.

-     Status parmateon, mate saurmatua

-     Goar ni ulaon adat : Adat nagok/ Partangiangan.

-     Mompo, pukul piga

-     Pasahat saput dohot sampetua sahat tu na Mangungkap hombung

-     Manjalo haroro ni hulahula

-     Boanna, Pukul piga marsipanganon

-     Acara umum

-     Lokasi kuburan

-     Marsijagaron manang dang.

-     Transportasi dohot angka na asing na ringkot tu ulaon i.

Udut tusi, didok siudut hata/raja parhata i ma hatana  tu angka  raja ni tutur : (Sarupa songon parhataan dina marria raja di parmateon Sarimatua)

- Hata huhuasi mandok mauliate tu sude angka raja ni tutur.

- Patoranghon latarbelakang/maksud dohot tujuan  ni parpunguan.

- Patorangkon konsep rencana ni suhut

- Mangido paniroion tu sude raja ni tutur/ komponen dalihan natolu paopat sihalsihal (dialog pembahasan)

- Pangurupion sian punguanpunguan/0rganisasi rodi sude angka naringkot namardomu tu ulaon i.

Dung sidung sude dihatai nasa naringkot namardomu tu parmateon i, rampak jongjong ma hasuhuton na marhaha maranggi/ namardongantubu mandok mauliate  tu sude raja ni tutur.

2.3. Mompo, pasahat Saput dohot ulos Sampetua.

     

Dung sidung ulaon Tonggo raja, laos marudut ma tu ulaon/Acara parmompoonna. Dibuka Pangula ni Huria ma jolo marhite ende dohot tangiang, dung i pe asa dipamasuk bangke i tu Rumarumana. Dang lompit tangan ni na monding i, tigor do dibahen, ima simbol ni naung bulus pardalanna/mangeal

     

Udut tusi, dilehon ma tingki tu Hulahula sibahen saput.  Laho pasahat ulos Saput i, hirahira songon on ma didok hatana: Dihamu Bere/Hela/Boru nami, dison ro do hami Tulang/Hulahula muna pasahat saput tu Bere /Hela/Boru nami naung parjolo monding/marujung ngolu on, sai Tuhanta ma mangapuli rohamuna, sai dilehon dihamu  gogo dohot benget ni roha. Songon nidok ni umpasa ma dohonon nami :

Balga tiang ni ruma, balgaan ma tiang ni sopo.

Nungnga gabe na tumua,

sai unggabean ma naumposo

Eme Sitambatua, parlinggoman ni siborok.

Amanta Debata do pangalapantua,

sai horas mahamu saluhutna diparorot.

Sahat ma Solu, tinogu tu bonten.

Sai leleng ma hita mangolu,

diparhorasan nang di panggabean.

(Laos diuloshon/ ditutuphon ma ulos i tu bangke i sian mata ni pat sahat tu andora)

Dung sidung napasahat Saput, dilehon ma tingki tu Hulahula sipasahat ulos Sampetua.

Laho pasahat ulos i, hirahira songon on ma didok hatana: Dihamu Bere/Hela/Borunami, dison ro do hami  Tulang/Hula-hula muna pasahathon ulos sampetua. Marbenget ni roha ma hamu manaon jala marlas ni roha manghirim, nuaeng pe jalo ma ulos Sampetua on sian hami Hulahula/Tulangmu.  Didok ma muse hatana ninna ma:  Songon nidok ni umpasa ma dohonon nami:

Balga tiang ni ruma,balgaan ma tiang ni sopo.

Nungnga gabe na tumua, sai unggabean ma

naumposo.

Eme Sitambatua, parlinggoman ni siborok.

Amanta Debata do pangalapantua,

sai horas ma hamu saluhutna diparorot.

Sahat ma Solu, tinogu tu bontean.

Sai leleng ma hita mangolu,

diparhorasan nang di panggabean.

(Laos diampehon ma ulos i tu abarana)

2.4. Mambonai Gondang.

     

Dung sidung mompo, molo so manghuling Ogung, dilehon ma tingki tu angka punguanpunguan nanaeng mambahen acara, alai molo manghuling do 0gung, dang dibahen be acara ni punguanpunguan, pintor langsung nama tu acara manortor, ima na nigoaranna Mambonai gondang.

     

Mangihuthon turiturian hariara Sundung dilangit taringot tu gombaran ni pargondangon, songon on ma partording ni panortoron i:

-     Manortor ma hasuhuton. (Mambonai Gondang)

-     Manortor Dongantubu.

-     Manortor Boru (Boru suhut, boru tubu, boru di ampuan, Bere/Ibebere).

-     Manortor dongan sahuta.

-     Manortor Hulahula (Bunga gondang)

-     Molo adong dope tingki, boi ma dibahen gondang riaria/bebas.

2.5. Maralaman/Partuatna.

     

Dimanogot ni ari dimata ni ulaon, laho patuathon bangke i sian jabu, songon on do ninna partordingna :

- Dihehe i Dongantubu/Raja tinonggo ma parumaen sihunti sanggul (Parumaen sian anak sihahaan), dipudi na ma angka anggina dohot angka anakkonna, udut ma muse tu boru si ompa sanggul rap dohot ianakkonna.

- Dung dihunti sanggul i, dihalianghon nasida ma i tolu manang pitu hali mangaliathon, (na sanga ni ida holan tolu hali do). Dung sidung diliathon, dipatuat ma bangke i tu alaman, laos udur ma di pudina mangihut sijagaronna; dihalianghon ma muse sijagaron sanggul marata i di alaman, tolu rodi pitu hali, ipe asa dihehe i  jala dipeakhon dingkan halangulu ni na monding i.

* Molo tung so tuat pe tu alaman ala ni situasi dan kondisi, ba dialap hata ma, naung mar alaman ma i.

* Mangihuthon hatorangan ni angka natuatua, dongantubu/ Rajatinonggo do manghehei sihunti sanggul .

2.6. Mambuat Tua ni gondang.

     

Dung dipeakhon sijagaron sanggul marata i dingkan halangulu ni namonding i, pintor hobas ma hasuhuton laho manortor mambuat tua ni gondangna. Mangihuthon turiturian hariara sundung dilangit, songon i nang hatorangan ni angka natuatua, holan hasuhuton do na manortor mambuat tua ni gondangna, alai, boi do paidua ni suhut/Raja tinonggo dohot mandongani molo dipangido nasida.

Dung sidung hasuhuton manortor mambuat tua ni gondangna, mangarade ma nasida manjalo haroro ni hulahula, hombar tu naniaturhon ni protokol/Raja tinonggo/Paidua ni suhut.

(Mangarade ma boru ni hasuhuton manjalo boras pir nabinoan ni Hulahula i).

2.7. Manjalo haroro ni Hulahula.

     

Di nalaho manjalo haroro ni Hulahula (uduran), marbedabeda versi ma partording ni paradatan i songon na di toru on:

Versi. I.

Hombar tu panggoraon ni Protokol masuk ma uduran ni Hulahula pasahat boras na binoanna. Ganup rombongan ni hulahula naung masuk pasahat boras pir, dipatudu ma tu nasida inganan parhundulanna jala dilehon ma i jolo minum paima masuk sude uduran ni Hulahula.

Dung masuk sude uduran ni Hulahula, dipahombar ma tu tingki parmanganon; molo adong dope tingki, andorang so dapot tingki parmanganon, diuduti ma tu acara khusus Hulahula. Parjolo ma hata huhuasi sian paidua ni suhut laos patoranghon jujurngolu ni na monding; udut tusi, di gora ma ganupganup uduran ni Hulahula i asa masuk masibahen acarana be laos pasahat adatna. Di ganup acara ni hulahula, ro ma hasuhuton manombanomba, laos disi ma dialusi nasida  hulahula na i. (manombahon hepeng, nanigoaranna nuaeng on Pisopiso ni ulos). Dung sidung uduran ni Hulahula pasahathon adatna, diuduti ma tu na marhata sigabegabe. Dipaampuhon hulahula ma panggabean parhorasan  i tu hasuhuton, jala diampu hasuhuton ma hata panggabean parhorasan i. Dung sidung na marhata sigabegabe, diuduti ma tu acara umum.

Dung sidung acara umum, diuduti ma tu acara mardondontua, dung i, dipasahat ma tu pangula ni Huria, jala pangula ni huria nama namanguluhon acara i sahat tu udean.

*      Di Acara khusus Hulahula, molo dung dapot tingki parmanganon, dipaulon do jolo acara i, di uduti ma muse dung sidung mangan.

*      Molo ni pingkirpingkir jala pinahusorhusor dibagasan roha, dang pola dohot be nian Hulahula mandok hata di acara umum i, ai nungnga sidung acara nasida; nungnga di gabe i Hulahula i pamoruan na, jala nungnga di paampuhon panggabean parhorasan. Angkup ni i, Pangula ni Huria nama manutup acara di Acara Umum.

Versi. II.

Hombar tu panggoraon ni Protokol masuk ma uduran ni Hulahula; dung dipasahat boras sipir ni tondi nabinoan nasida, langsung do dibahen nasida acarana sandiri sandiri laos pasahat adat na. (ulos gabe dohot ulos panoropi nasai   nigoaranna ulos holong).

*      Panghorhon ni acara na songon on,gabe mulak do uduran ni hulahula i dung sidung mangan, dang dohot be mambege hata huhuasi dohot jujur ngolu ni na monding.

     Gabe hira na palua langkana ma  hulahula asa hatop mulak.

*      Diganup mar acara Hulahula, sai mangampu do  hasuhuton jala sarupa do sude hata pangampuon i. (monoton). Molo sampulu rombongan ni Hulahula na mambahen acara, ba sampulu hali ma mangampu hasuhuton jala molo dihalihon sekian menit, sudah menjadi sekian lama.

*      Mulak mardebadeba ma angka tutur, gabe tinggal saotik ma na dohot mengikuti acara umum/na mambege jujur ngolu ni na monding).

2.8. Marsipanganon, ManjaloTumpak.

     

Dung dapot tingki parmanganon, dipadalan di bagihon ma panganan, laos dibahen hasuhuton ma tangiang mangan dohot huhuasi ni sipanganon, sitiktik ma na gompa ... dst, dipadalan ma tahungan/tahuan tu sude horong Hulahula, boru dohot dongantubu. (nadeba mandok Sulangsulang do goarna, jala holan tu Hulahula do hasahatanna).

Dung sidung marsipanganon, ditutup ma jolo par manganon i dohot tangiang simpul mangan sian Pangula ni Huria, udut ma muse tu na manjalo tumpak /pangurupion na ni jouhon ni protokol.

(Nungnga diparade hinan baskom namarisi boras laho inganan ni tumpak)

Dinalaho padalan Tudutudu ni sipanganon, marasing asing do versi partording ni paradatan i songon na di toru on:

Versi. I.

Laos ditingki na mangan i do dipadalan Tudutudu ni  sipanganon,  langsung sian jolo ni hasuhuton/paidua ni suhut/raja tinonggo jala mangihuthon adat ni hasuhuton, marojahan tu prinsip diulaon sisada hasuhuton sidapot solup do naro; jadi dung mandok hata mauliate hasuhuton sidung manjalo tumpak, pintor marudut nama muse tu acara ni Hulahula naso sanga sidung hinan dope.

Versi. II.

Dung sidung manjalo tumpak dohot na pasahat hata mauliate, di jou hasuhuton ma angka raja ni tutur mangadopi Tudutudu ni sipanganon.

Diajuhon hasuhuton ma konsep parbagina hombar tu adat namasa dinasida. Dung jolo ditolopi raja ni tutur, ipe asa dipadalan songon na marbagi parjambaran. (sipata digoari do i marjambar niadopan, gabe sarupa ma pangantusion ni Tudutudu ni sipanganon dohot jambar/parjambaran)

Dung sidung mardalan Tudutudu ni sipanganon, marudut ma muse tu acara ni Hulahula naso sanga sidung hinan dope Dung sidung sude uduran ni Hulahula mar acara/pasahat adatna,marudut ma tu na marhata sigabegabe, laos hata sigabegabe ido panutup ni acara khusus Hulahula. Ala naung sidung acara khusus Hulahula, marudut ma tu acara Umum; dang parsidohot be disi Hulahula.

2.9. Acara Umum

     

Ditingki ria raja/tonggo raja, nungnga dipasahat ulaon manusun tertib acara umum tu Dongantubu rampak dohot Dongan sahuta, jala nungnga dipasahat tu dongan sahuta asa sian nasida Protokol.

Format ni Tertib Acara di ulaon adat na Gok parmateon Saurmatua, sarupa do songon tertib acara di parmateon Sarimatua, holan di adat Mompo do di bot ni ari , laos marudut tu na mambonai gondang. 

*      Dung mardondontua, Pangula ni Huria nama na manguluhon acara sahat tu penguburan di udean; dung sidung acara penguburan, somalna, dilehon pangula ni huria do tingki tu hasuhuton laho mandok hata huhuasi/hata mauliate.

*      Di angka tingki na parpudi on, lumobi di tano parserahan, gabe Hula-hula do paampuhon tu suhut sihabolonan, nang pe ulaon sisada hasuhuton do adat parmateon.

*      Marragam do tertib acara na masa nuaeng on, dang adong dope tertib acara na baku.

*      Diangka ari na mangihut, ro ma sisolhot manise, dang pola mamboan indahan masak ; nasomal niida, sekedar buah tangan do diboan nasida isarana buah-buahan/kue.

2.10. Mangungkap Hombung.      

       

Dung sidung dikubur bangke  ni  na saurmatua  i, mulak ma angka namanaruhon i tu huta. Hombar tu boaboa ni hasuhuton ditingki na marria  raja/ Mar tonggo raja, panangkohonna do Hulahula dohot Tulang tu jabu laho pasidungkon adatna ima mangungkap hombung.. 

Dung dapot tingkina, manggora ma paidua ni suhut, asa nangkok tu jabu Hula-hula, Tulang, dongantubu, boru, bere/ibebere, songon i dohot dongan sahuta, laos diatur ma parhundulon. Udut tusi, dibagi/ dipadalan ma panganan, laos dibahen hasuhuton ma tangiang mangan dohot huhuasi ni sipanganon (sitiktik ma na gompa ..dst). Dung sidung mangan, ditutup ma jolo parmanganon i dohot tangiang simpul mangan, laos marudut ma tu na manghatai/marhata.

Nasomal ni ida, hirahira songon on ma partording ni parhataan disi :

-     Dipangido Hulahula/Tulang panaput ma kunsi ni hombung tu hasuhuton. (hepeng sekedarna untuk membuka)

-     Disombahon hasuhuton ma sabagian sian arta napinungka ni namonding i (dalam bentuk hepeng)

-     Udut tusi mardalan ma piso-piso/piso na ganjang tu Hulahula /tulang sipasahat ulos  sampetua.

-     Marudut ma muse tu na pasahat daon sihol tu  dongantubu, Boru/Bere/Ibebere dohot dongan sahuta.

-     Tangiang panutup sian Hulahula panaput, laos i nama  pangujungina.

*      Hombung, ima inganan ni arta na arga isara ni  perhiasan Mas, hira sarupa ma fungsina songon Brankast sinuaeng. Ia inganan ni pahean abit,   digoari do gopuk ; jadi tung mansai sederhana do ianggo perabot rumatangga ni ompu i najolo.)

*      Nahea binereng diulaon sisongon on, adong do napadalan Tudutudu ni sipanganon adong naso mambahen, jadi tergantung  tu pambahen ni hasuhuton do, songon dia ma na tarbahensa pasangaphon Hulahulana.

*      Laho mambuka parhataan, adong do deba marsisisean /marhata sise, adong do na langsung tu tujuan/tu depoint ninna hata nuaeng, sirambe manis ninna nadeba.

*      Di nadeba daerah peradatan,dang masa ungkap hombung molo na mabalu, jadi holan sahali do ninna ungkap hombung, ima di tingki ni naparpudi mate. (Molo asing do sibahen saput sian silehon sampetua, hira na nasip nasipan ma Hulahula dohot Tulang). Di nadeba daerah muse mandok, hak ni sibahen saput do mangungkap hombung di ulaon adat nagok, jadi, molo asing sibahen saput sian sibahen ulos sampetua, gabe dua hali ma masa ungkap hombung, ima diparmate ni ama dohot parmate ni ina. (Tulang manaputi berena, Hulahula manaputi boruna, berarti, asing hombung ni ama, asing hombung ni ina), tubu ma hata: Ditangkari Amanta do Inanta.

*      Di ulaon mangungkap hombung, somalna, sai jolo dipatangkas Hulahula /Tulang do manang naung dos roha ni ianakkon ni namonding diangka parbagianna, molo adong nahurang tangkas, nasida ma nagabe raja panimbangi jala pandamei).

2.11. Manuan Ompu ompu.

      

Dimanogot ni ari, dung  dikubur  namonding i, borhat ma hasuhuton nasekeluarga tu udean, laho manuan Ompuompu, diboan nasida ma angka na  ringkot, namarhadomuan tusi, isarani panggu/ sangkul, bibit ni Ompuompu, aek laho parsuhapon, pengki mangangkat pasir/tano dohot angka na asing.Dung sahat nasida di udean, dipature/dipaias ma jolo kuburan i, ipe asa disuan ompu-ompu i. Pomparan sian anak manuan ompu-ompu disiamunna, pomparan sian boru manuan dihambirangna. Dung sun disuan nasida i, disaburhon dipararak ma rihit laos udut ma ditaburhon bunga tabur. Dung sidung saluhutna i, dibuat ma aek laos marsuhap be ma nasida huhut didok hatana angka ninna ma : di jolo ni jolo ma ho, di pudi ni pudi ma hami. Dung sidung marsuhap, mulak ma nasida tu huta.

2.12. Mar Sipitu dai

      

Dung sidung ulaon manuan ompu-ompu, marsipanganon ma nasida di jabu, manganhon simbol/ boan ni namate natinggal i, ima nanigoaranna Sipitu dai/ Sitarahuak.

Dung sidung marsipanganon, dibahen nasida ma paretongan ni biaya na haruar dohot tumpak pangurupion na masuk, termasuk boras dohot ulos; mardos ni roha ma nasida pasidungkon paretongan i. (Makna ni ulaon sipitu dai, ima na patuduhon sisada panghilalaan/ sada songon daion mual).

2.13. Mar Itak gurgur.

      

Dung dipasidung nasida paretongan ni biaya,diduda nasida ma Eme nadibagasan ampang sijagaron i gabe Itak; disaburhon ma tusi Gula mera (Gula sakka) dohot Kalapa na nihurhur, dipohuli ma i laos dipangan nasida, ima nanidokna  Itak gurgur. Dung sidung na manganhon Itak gurgur, dibahen ma tangiang panutup, dung i marhehe nauli ma.

* Mangihuthon hatorangan ni angka natuatua: Najolo ninna, molo di ulaon adat na gok saurmatua, tinggal di hasuhuton do Ulu ni Tudutudu ni sipanganon boan ni namate i, dipangan hasuhuton nasekeluarga i ma i dung mulak sian udean manuan 0mpu-ompu, digoari ma i, manganhon Sipitudai, nadeba mandok mangan. sitarahuak.

   (2 pinggol + 2 mata + 2 ruang ni igung + 1 dila/ pangabas = 7, namarlapatan asa sisada panghilalaan)

* Mangihuthon hatorangan ni angka natuatua, songon on do lapatan ni mar itak gurgur : Molo manganhon itak, ingkon hohom do, dang boi manghatai asa unang sabur itak i sian pamangan. Jadi ima simbol ni naung sidung parkiraan/ paretongan ni biaya/tutup buku (gurgur = melimpah ruah) ima simbol ni pasupasu sihirimon sian Debata marhite tangiang naung pinasahat ni angka raja.

Najolo, dung sidung mar sipitudai dohot na mar itak gurgur, dipantikhon do tanduk ni pinahan Tudutudu ni sipanganon i di kuburan ni na monding i, tontu ala na sigagat duhut do boanna. Di angka tingki na parpudion, ala naung jumotjot na marmiakmiak dibahen halak boan ni na mate sarimatua/saurmatua/saurmatua maulibulung, torop ma na lupa di pardalan ni Tudutudu ni sipanganon sian sigagat duhut, gabe tubu ma hata na mandok : Dang masa di hami marsipitudai, ninna.

Tweet

Subscribe to receive free email updates: