3. Mangharoani na tubu (Esekesehan)

Najolo, hira diganup huta do adong Sibaso, naboi mangurupi angka Ina nanaeng mangintubu; sarupa ma i songon Bidan Desa, sinuaeng on. Sambilu do dibahen Sibaso i  manggotap pusok ni posoposo i, jala nasa mudar na durus tu torubara ni jabu, ingkon dihuphupi do i dohot sirabun namohop. Dipansolothon do angka ranting ni unte diganup suhi ni jabu, asa unang masuk utiutian ni najahat, songon i ma ninna mangihuthon haporseaon nasida.

Dung sorang nadibortian i, pintor hibas do amana mambuat Takke manang Kapak, jala tuat ma ibana tu toru laho manaha soban. Dang apala soban i nian narumingkot ditingki i, soara ni soban natinahana i do; ai ido nagabe boaboa tu pangisi ni huta i. Dung dibege pangisi ni huta i soara ni soban natinahana i, ro ma sungkunsungkun sian naumbegesa, ninna ma: Songon dia ? Jadi dialusi ma: si Ucok/si Butet. Laos diborngin parsorang na i, pintor ro be do angka na sahuta i manjaga keamanan ni posoposo i rap dohot Inana, jala digoari do i Manganggapi (melekmelekan songon nidok ni halak Jawa).

      

Hombar tu haporseaon ni angka ompu najolo, pitu lampis do langit ni parlangitan jala pitu do tondi ni jolma, jadi pitu ari pitu borngin ma nasida manganggapi; digoari ma ari na pitu i Roboroboanna (masa penjagaan). Diborngin papituhon i dipatupa hasuhuton ma parmanganon paboa las ni rohana, laos parhitean mandok mauliate tu sude paranggap. Parmanganon ido nanigoaranna Mangharoan.

Diulaon mangharoan i,dang pola masa Tudutudu ni sipanganon jala dang pola masa marhata, holan suhut i do mandok hata mauliate tu natorop. 

      

Di zaman saonarion, dang boi be ari papituhon i gabe patokan patupahon ulaon mangharoan, lomo ni namarulaon nama manontuhon tingki ni ulaonna, jala dang masa be manganggapi di tano parserahan.

Ditingki naparpudion, jotjot do ulaon mangharoani i, dipadomu tu ulaon na asing, naumbalga sian i, umpamana ditingki haroro ni Hulahula laho mamoholi/pasahat aek ni unte; adong muse do napadomuhon tu na tardidi. Diangka ulaon napinadomu (sada tinembak dua hona) marsitiopan ma hita tu hata namandok: umbalga do nanilompa sian na pinangpanghon, jala marguru tu naumbalga do na ummetmet.

Tweet

Subscribe to receive free email updates: