12. Mangupa na tarmali tondi

Olo do sipata songgot masa na masa, namambahen sampak mudar ni jolma, gabe sai songon na targogot ma panghilalaanna. Kondisi ni jolma nasongon i, digoari do i Tarmali tondi; molo dihata nuaeng, boi ma ra dohonon trauma.

     

Mangihuthon haporseaon ni ompu najolo, tarsonggot do nang tondi ni jolma i jala mabiar, dang sonang maringanan dibagasan daging, gabe sai songon na daodao  ma pingkiran ni na tarsonggot i; na deba mandok dang hot pingkiranna, lumobi ma halak partondi nagale, olo do gabe tumundahon parsahiton.

Laho manjou/pahothon tondi i di ingananna, dipatupa ma ulaon adat nanigoaranna Mangupa, na marlapatan mangelek /manubut tondi ni na tarsonggot i, asa mulak tu badan, hata na somal didok asa mulak tondi tu ruma. Ala songgot do haroro ni namasa i, ingkon laos songgot do ninna laho paulakhonsa; mardomu tu haporseaon/ keyakinan i do umbahen na sipata digoari adat i Pasahat sipanganon songgot songgot.

      

Molo adong halak na tarmali tondi, pintor dijomput sisolhotna nadiginjang ni partuturanna ma boras pir tu simanjujung ni na tarsonggot i, huhut didok hatana ”Pir ma tondim, sai na ramotan ni Debata do ho”, ima tutu.

Dalam keadaan darurat, molo so adong boras, diganti ma i dohot rihit manang tano, ima dijomput tu simanjujung ni na tarsonggot i. Nang pe naung dibahen songon i, tupa do dang pintor tiur roha ni jolma na tarsonggot i ala bagas ni biarna, jadi porlu ma ingkon mardongan, manonggoti ibana laos paposhon rohana.

      

Mangihuthon hatorangan ni angka natuatua, partuturan na tumimbo do na patut patupahon pangupaon/na mangupa, (dengke do diupahon angkup ni indahan las) molo na ditoru ni partuturon patupahon sisongon i (Pamoruan), digoari ma pasahat sulangsulang. (diparade ma lompan juhut angkup ni indahan las).

     

Hombar tu situasi dohot kondisi ditingki namasa i, olo do sipata, holan sakeluarga na parjolo mamboto barita ni namasa i; pintor humalaput ma borhat mangupa sisolhotna i; na deba jolo masipaboaan do asa rap nasida pasahathon pangupaon i. Jadi, boi dohonon marsiadu mambahen na denggan ma sisolhot ni si upaon i, jala unang palelenghu, unang sanga dao tondi ni jolma na tarsonggot i, songon i ma ninna.

     

Dang marboaboa pangupa i diharoro nasida, asa songgot roha ni siupaon i. Dung sahat pangupa (Dongantubu manang pe Hulahula/Tulang), diatur ma parhundulon asa suman laho pasahathon upaupa i.

      

Mangihuthon hatorangan ni angka natuatua, na niida jala naung hea ni ihuthon/niulahon, hirahira songon on ma partording ni ulaon i:

Parjolo ma dijomput boras si pir ni toni tu simanjujung ni si upaon i, huhut didok hatana ninna ma : “Pir ma tondim”… (laos didok goarna manang panjouon hombar tu partuturonna)digomgom tondinami ma ho jala sai diramoti Debata ma ho,ima tutu.

Dung i, dipasahat ma upaupa i tu jolo ni si upaon i, jala dihatahon ma i hombar tu ragam ni upaupa naung pinarade nasida.

*      Indahan las. Dison nungnga pinarade indahan las, sai las ma roham rap dohot tondim (disulanghon).

*      Sibahut panampar. Dison do nang sibahut panampar, sai ditamparhon Debata ma parmaraan sian ho songon i nang tahitahi ni parjahat. (disulanghon)

*      Dengke simudurudur. Rade do nang dengke simudurudur, sai rap mudur tudolok ma hita dapotan las ni ari, mudur tu toruan dapotan mual natio. (disulanghon).

*      Pira ni ambalungan. Dohot do pira ni ambalungan na puti sohaliapan asa unang ho mabiar dibagasan hapintoran (disulanghon)

*      Mual natio. Nungga rade dison mual natio, sai tio ma pingkiranmu, tio nang parnidaanmu mangaranapi angka naringkot di parngoluanmu (dipainumhon)

*      Ulos habonaran. Ulos pargomgom ma i ulos habonaran, parhitean ni ulos nasian Debata mangulosi tondim, sonang ma ho so hariboriboan dibagasan pangaramotion ni Debata, na songkal jala na bonar (laos di uloshon)

*      Sipilit. Nungnga dison sipilit, sai dipapilit Debata ma nasa parmaraan sian ho, songon i nang sian hitaon saluhutna. (laos dibahen ma sipilit i mamispishon aek naung diparade hinan di bagasan saoan).

Dung sidung dihatahon saluhutna i, dibahen pangupa i ma tangiang/tonggotonggo, mangidohon tu Debata, asa mulak tondi tu ruma/tu badan. Udut tusi, dipadalan ma panganan jala dibahen ma tangiang mangan. Ditingki na mangan i, didok ma huhuasi ni sipanganon, ninna ma : Rap marhatuahon ma hita di sipanganon naso sadia i, botima.

Dung sidung marsipanganon, marsagi marsiaturan ma mandok hata laho paposhon roha ni na ni upa i.

Manimpuli ulaon i, dibahen ma tangiang panutup.

*      Mangihuthon hatorangan na dapot pinapungu sian pigapiga luat, dang sarupa godang/ragam ni sipatupaon i/upaupa i, adong do holan tolu ragam adong na lima ragam.

*      Diangka tingki na parpudion, nungnga lam diparringkas adat pangupaon i, jala hira so tarida be unsur habadiaonna (nilai sakralnya).

Di ulaon adat pangupaon najolo, dang masa ninna paampuhon hata dohot mangampu hata, ala hata ni tangiang do napinasahat  tu namartua Debata, songon ima ninna alasanna.

Tweet

Subscribe to receive free email updates: