BAB. III PARTORDING NI ADAT SISADA HASUHUTON

A. Haroan las ni roha.

1. Ulaon  namarhadomuan tu  Bagas / Jabu.

Ditingki nagalia, hirahira di taon 1380-1480, di liang batu (gua) dope halak Batak Toba maringanan, jala digoari do inganan parmianan nasida i Hamondul na bagas, alai asa ummomo dohononna sipata ma didok Hamondul sipata didok Bagas. (Liang Raja Uti, Liang Siogung ogung, Liang si Bisa, Liang Silindur, Liang Sipege dohot angka na asing dope). Diangka sundut na dipudina, ala lam tamba do torop ni jolma pinompar nasida, dang haluluan be liang batu bahen inganan parmianan, tubu ma pamingkirion paulihon panisioan na imbaru; Diparrahuthon ma angka hotang dohot andorandor tu angka hau, jala dibahen tarupna sian angka bulungbulung, digoari ma inganan panisioan na imbaru i Undung undung, nadeba mandok Parlapelapean. (Tontu, marlengkuk do Bungkulan dohot Jenggar; sian bentukna on, dikemudian hari, muncullah  motip jabu Batak).

Diholangholang ni hau nabolon do dipauli nasida undungundung i, jala tar holang do i sian tano, asa unang boi didungdung babiat panoro. (najolo, godang do babiat di tano Toba).

       

Diangka sundut nadipudina muse, lam mandao do Babiat panoro i ala ni jolma i, gabe lam barani ma nasida paulihon panisioan diginjang ni tano, digoari ma i Soposopo, na deba mandok Lopolopo, alai bornginna i, sai disoroi babiat do pinahan nasida sian alaman/ pekarangan i.

       

Hirahira di ujung ni taon 1500 M manang dibona ni taon 1600 M, dung lam torop jolma maringanan di sada luat, tubu ma muse pamingkirion paulihon inganan parmianan na dumimpos jala na boi inganan ni pinahan dohot eme, dipauli nasida ma i sian angka hau nabolon jala na pir, digoari ma inganan na dumimpos i Sopo, na deba mandok Jabu, na asing muse mandok Jabu Sopo.

       

Dung marsaor halak Batak dohot halak Malai (Melayu) masa ma hata Ruma (Marharoroan sian hata Melayu “Rumah”); sahat ma tu na manggorga, masa ma goar Ruma Gorga; sahat ma muse tu na mambahen ragi/cat; marbaganding ma dibereng nasida rupa ni  jabu i ala ni cat na i, masa ma goar Sibaganding Tua.

       

Songon naung tinaringotan dijolo ni on, sian angka hau nabolon jala hau na pir do parhau ni jabu Batak i, jadi, hau na dokdok situtu do i, laos sian i do tubu hata tudostudos namandok Dang tartuhuk sahalak pandingdingan. Molo nirimang rimangan hata on, tontu ulaon na maol do paulihon jabu Batak, ingkon jolma na torop do mangula i jala ingkon na masiurup urupan do i. Ala ulaon na maol do mambahen jabu Batak i, masa ma najolo sampe opat, sipata lobi sian opat keluarga mar inganan di sada jabu, gabe adong ma i parjabu Bona, Jabu Soding, Tampar Piring, Jabu suhat dohot Jambur.

       

Mangihuthon barita, ditingki masa najolo opat keluarga maringanan di sada jabu, jotjot do tubu hagunturon di tongatonga ni keluarga na sajabu i; nionjar ni i ma gabe tubu pamikirion paulihon jabu di ianakhon naung hot ripe. Molo so tarbahensa dope paulihon jabu Batak, dibahen ma songon jabu ni halak Malai, adong emperemperna, jadi masa ma Jabu Emper.

       

Dipaojak natorasna ma ianakhonna naung hot ripe i, tu jabu naimbaru napinauli i, asa pulik jabu sian nasida, ima nanidokna Mangarerak, nadeba mandok Manjae. Ditingki na paojakhon i, laos dipasahat natorasna ma Hauma Panjaean, jala dipasahat Hulahula ma Hauma Pauseang.

       

Najolo, dang masa martigatiga jabu/sigadis jabu, molo naeng pajongjong jabu halak Batak, ingkon na dijou do Tukang/Pande lao paulihon i. (ianggo nuaeng asal adong hepeng tinggal mamillit nama). Andorang so disuruk manang diompoi nampunasa jabu na pinauli ni Tukang i, jolo dipatupa suhut do ulaon na metmet, ima na ni goaranna Paulak Tukang.

*. Molo jabu naung sidung do dituhor songon na masa nuaeng on, dang pola bahenon be ulaon Paulak Tukang, langsung nama ulaon manuruk manang mangompoi.

       

Ditingki na parpudion, nungnga samak (samarsamar) pangantusion ni halak Batak taringot tu na Manuruk jabu dohot na Mangompoi jabu, ai nungnga tubu goar pandohan (istilah) na imbaru. ima : Mamasuki manang Mambongoti jabu; jadi, jabu na so singkop sidung dope, boi ma dianggap sidung, jala naung singkop sidung pe, boi ma dianggap dang sidung.

       

Ala naung sanga masa na songon i, dihilala roha dang pola sai rihitan be i, sian bidang ni ulaon i ma hita mamereng; molo sahat do gonghon tu Tulang, Bona Tulang, Bona ni Ari dohot  Tulang Rorobot, ba, naung “Mangompoi” ma goar ni ulaon i, alai molo olat ni Hulahula tangkas do nanijou sian sude horong Hulahula, na “Manuruk” jabu ma goar ni ulaon i.

1.1. Paulak Tukang.

Mangihuthon hatorangan ni angka natuatua, ala ulaon na metmet dope ulaon Paulak Tukang, dang pola piga ninna napatut dohot  disi, sae ma dua rodi tolu  halak dongan tubu, songon i nang dongan sahuta, tamba ni i molo adong boru di huta i (boru di ampuan), jadi, dang pola dohot disi pihak Hulahula (molo kebetulan adong hadir Hulahula disi, dang sebagai Hulahula  kapasitasna). Dipatupa suhut do lompan juhut na marpanggoari Tudutudu ni sipanganon angkup ni indahan las. Dung dapot tingkina marsipanganon, dipadalan ma panganan. Dipasahat suhut parjabu ma Tudutudu ni sipanganon i tu jolo ni Tukang, huhut didok  hatana ninna ma: Amang Tukang/Pande nami, dison hupasahat hami tudutudu ni sipanganonta tu hamu, patuduhon las ni roha nami;

Sitiktik ma na gompa, hodong lais ni ruma.

Otik so sadia pe na tupa, sai godang ma pinasuna.

Las ma rohamuna, ima tutu.

Dung sidung dipasahat suhut i Tudutudu ni sipanganon i, dibahen pihak suhut ma tangiang mangan, laos diuduti dohot hata huhuasi ni sipanganon, ninna ma: Songon i ma da ale angka Amang dohot hamu Inang, rap marhatuahon ma hita di sipanganon naso sadia i.

Sitiktik ma na gompa, hodong lais ni ruma. 

Otik so sadia pe na tupa i, sai godang ma pinasuna.

Las ma rohamuna, ima tutu.

Dung sidung marsipanganon, dibahen pihak suhut ma tangiang simpul mangan. Andorang so manghatai (marhata), dipadalan/ dipasimpan ma jolo angka namargoar ni Tudutudu ni si panganon i. Dipasahat Tukang ma deba tu hasuhuton asa adong  lehononna tu angka raja na niontang na, ima na nigoaranna Gaorgota, lapatanna, upa mang hobasi. Mangihuthon ruhut (kepatutan/ kepantasan) dipasahat Tukang ma tu hasuhuton:

Panamboli (tu dongan tubu)

Soit (tu dongan sahuta)

Namarngingi sambola (Panahui/Namarsanggulan) manang osang sambola mamereng daerahna ma i (tu boru diampuan).

Pusu pusu (tinggal di suhut )

Upa suhut (tinggal di suhut )

Binereng sipata dinadeba, holan na patut di Tukang i do dipasahat tu Tukang, ianggo na asingna i, langsung do dipasahat sian jolo ni suhut tu angka hasahatanna.

Dung simpan angka namargoar ni Tudutudu ni sipanganon i sahat tu angka hasahatanna, diuduti ma tu na marhata, jala tarsongonon ma partording na :

*      Disungkun Tukang ma hasuhuton taringot tu hata ni sipanganon i (apa maksud dan tujuan)

*     Dialusi/dipaboa suhut ma, nanaeng inganan nasida do jabu i, napinauli ni Tukang i;  laos dipasahat ma  upa loja ni Tukang hombar tu naung nihataan nasida.

*   Dung dijalo Tukang upalojana, dipasahat ma anak hinsu (kunci) tu suhut, huhut didok ma hata nauli hata gabe, anggiat horas jala gabe hasuhuton mangingani jabuna.

*    Ditambai angka raja na ro ma hata panggabean parhorasan i (Boru, Dongan sahuta, Dongan tubu) laos dongan tubu manang dongan sahuta ma paampuhon tu suhut, ninna ma :

Eme sitambatua, parlinggoman ni siborok.

Amanta Debata do pangalapan tua,

sai horas ma hamuna diparorot.

Naung sampulu pitu, jumadi sampulu ualu.

Hata nauli nadenggan i,

ampu hamu ma i, martonga ni jabu.

Sahat ma solu, tinogu tu bontean.

Sai leleng ma hita mangolu,

diparhorasan nang di panggabean. Botima.

*      Diampu suhut ma hata panggabean parhorasan i, ninna ma :

Turtu  ninna anduhur, tiotio ninna lote.

Hata parhorasan napinasahat muna,

sai unang ma muba unang mose.

Tingko ma inggiringgir, bulung na i ratarata.

Tagam do rohanami mangkirim,

sai pasauthon ma amanta namartua Debata.

Naung sampulupitu ma i, jumadi sampulu ualu.

Hata nauli napinasahat muna i,

huampu hami ma i martonga ni jabu.

Sahat ma solu tinogu tu bontean,

sai leleng ma hita mangolu,

di parhorasan di panggabean. Botima.

*      Manimpuli ulaon i, dibahen ma tangiang panutup sian dongan tubu manang sian dongan sahuta.

1.2. Manuruk Jabu

       

Olo do sipata ala ni haporluan na manosak, ingkon inganan ma jabu na holan asal boi inganan dope. (dang impas sidung).   

Laho mangingani jabu na songon i, (na so singkop sidung) dipatupa suhut  ma ulaon adat na metmet ima nanigoaranna manuruk jabu.

       

Ala ulaon na metmet dope adat manuruk jabu, dang pola sahat tu namambahen surat gonghon, olat ni hata manjou dope. Tontu boi do joujou i marhite surat, telpon dohot angka alat komunikasi na asing. Angka na patut jouon di ulaon i ima:

       Dongan tubu (minimal 2-3 halak)

       Dongan sahuta/STM (minimal pangurus harian)

       Boru (minimal boru diampuan/ na di huta i)

Hulahula tangkas dohot haha anggina rodi angka tubuna

(Di ulaon nasongon on, dang patutna dope marhara Hulahula sahat tu Dalihan Natolu paopat Sihalsihal).

      

Diparade suhut do sipanganon parsaoran, ima : indahan las dohot lompan juhut na marpanggoari Tudutudu ni sipanganon.   

       

Dung dapot tingki parmanganon diparnangkok ni mata ni ari, jongjong ma si buka hata (paidua ni suhut) didok ma hatana nina ma: Santabi ma di amanta Rajaraja dohot di inanta soripada nahuparsangapi hami: Didok situatua, molo mardalan raja, ingkon jolo patiuron do dalan sidalananna, asa unang sungkotsungkot manang tartuktuk patna; nuaeng pe, andorang so tamulai ulaonta, parjolo ma jolo hupaandarhon hami konsep partording ni ulaonta sadarion. Mangihuthon adat naung huhasomalhon hami songon on ma partondingna :

*      Paojakhon suhut na manuruk jabu.

     Na paojakhon nasida ima natoras ni suhut dohot Hulahula ni Suhut, laos diacara paojakhon i ma dipasahat nasida angka sipasahatonna.

*      Marsipanganon parsaoran (makan bersama); tangiang mangan dohot huhuasi ni sipanganon sian pihak suhut.

*      Santabi ma di raja i Hulahula nami, dang na mangorui sangap ni raja i, alai ala ulaon sisada hasuhuton do ulaonta sadarion jala suhut do na niambangan (na ni subut/na ni pele), laos di tingki na mangan i ma hita padalanon nami angka na marpanggoari ni Tudutudu ni sipanganon i tu angka hasahatanna, langsung ma i sian jolo ni suhut, jala mangihuthon adat ni suhut.

*      Dung sidung marsipanganon, ditutup ma jolo parmaganon i dohot tangiang simpul mangan; sibahen tangiang sian pihak suhut/pangula ni Huria.

*      Mangulon/istirahat satongkin songon na mangalehon kesempatan tu angka dongan nanaeng manjalang suhut (parmisi/pamit).

*      Marudut ma muse tu acara marhata sigabegabe; Raja panungkun sian dongan sahuta manang dongan tubu, mardos ni roha ma nasida, paidua ni suhut ma raja pangalusi.

*      Dung sidung na pasahat hata sigabegabe, dohot hata pasupasu sian Hulahula, dijalo jala dirimpun paidua ni suhut ma hata sigabegabe/pasupasuan i, laos di paampuhon  tu hasuhuton.

*      Mangampu suhut.

*      Pangujungi ni ulaonta, dipangido roha nami haradeon ni raja i, Hulahula nami, mambahen tangiang panutup.

       

Songon i ma konsep partording ni ulaonta sadarion/ dimanogot on (laos dipangido si ungkap hata/paidua ni suhut i ma panolopion sian angka raja). Molo dung satolop di konsep na pinatolhas ni sibuka hata i, dimulai ma acara.

       

Ro ma natoras ni suhut tu jolo ni ianakhonna, dipasahat ma Tudutudu ni sipanganon, huhut didok hatana ninna ma: Sadarion, di ari nauli di ari na denggan on, diparnangkok ni mata ni ari on, ojak ma hamu mian maringanan di bagas sibagandingtua muna on.

Eme si tamba tua ma parlinggoman ni siborok,

Amanta Debata do pangalapan tua,

sai horas ma hamuna diparorot.

       

Marlasniroha do hami ditingkion manghalashon pasupasu na pinasahat ni Debata tu hita, jala songon hataridaan ni las ni roha nami, hupasahat hami dison Tudutudu ni sipanganonta. 

Sitiktik ma na gompa, hodong lais ni ruma. 

Otik so sadia pe natupa, sai godang ma pinasuna.

Las ma rohamuna. Ima tutu.

       

Mulai sadarion pulik jabu ma hamu sian hami, alai nang pe pulik jabu hamu, sai digomgom tondi nami do hamu.

On ma ulos Pargomgom, partanda na sai digomgom tondi nami hamu (diampehon ma ulos i tu suhut sekeluarga. Molo adong dope ulos na asing sipasahatonna, isara ni ulos parompa, dipasahat/ diuloshon ma i disi).

       

Dung sidung dipasahat ulos i, dijomput ma boras pir tu simanjungjung ni suhut na sekeluarga i, huhut didok hatana ninna ma: Pir ma tondi ni anakhon, parumaen rodi sude pahompu nami on, ima tutu.  Dihaol jala di umma nasida ma ianakhonna na sekeluarga i.

        

Dung sidung natoras ni suhut paojakhon ianakhonna, ro ma Hulahulana paojakhon nasida, dipasahat ma Dengke huhut didok hatana ninna ma: Amang Hela dohot di ho Boru hasian, rodi sude Pahompu, mulai sadari on ma tutu, di ari na uli di ari na denggan on, diparnangkok ni mata ni ari on, ojak ma hamu mian maringanan di bagas sibagandingtua muna on.

Eme si tamba tua parlinggoman ni siborok,

Amanta Debata do pangalapan tua,

sai horas ma hamu diparorot.  Ima tutu.

       

Marhiras ni roha do hami Hulahula muna,  borhat sian huta nami mandapothon hamu, jala songon tanda ni las ni roha nami huboan/ hupasahat hami dison Dengke sahat, jala Dengke simudurudur , sai rap mudur tu dolok  hamu dapotan las ni ari, mudur tu toruan dapotan mual na tio.

Sitiktik ma na gompa, hodong lais ni ruma 

Otik so sadia pe natupa, sai godang ma pinasuna.

Las ma rohamuna.  Ima tutu.

       

Dung i, dibuat ma ulos sipasahatonna, huhut didok ma hatana ninna ma: On ma ulos pargomgom  sian hami, paboa na tongtong digomgom tondi nami  hamu, nang pe dao hami diluat nami sian hamuna di luat muna on (laos diuloshon ma i tu Hela, Boru  rodi sude Pahompu na i).

       

Udut tusi dijomput ma boras pir tu simanjunjung ni suhut sekeluarga i, huhut didok hatana, ninna ma: Pir ma tondi ni Helangkon, Borungkon rodi sude Pahompu nami on, sai dihorasi Debata ma hamu, ima tutu; laos dihaol jala diumma nasida ma ianakhon na i / suhut na sekeluarga i.

      

Dung singkop sude hundul di ingananna, dibagi/ dipadalan ma panganan, laos dibahen pihak hasuhuton ma tangiang mangan dohot huhuasi ni sipanganon (Sitiktik ma na gompa … dst). Ditingki na marsipanganon i, dijou paidua ni suhut ma sahalak sian pamoruon nasida mangirisi satonga aliangaliang dohot sabagian ateate sian tudutudu ni sipanganon i, dibagi ris ma i tu natorop, alai jumolo ma tu Hulahula; laos ditingki na mangan i do dipadalan angka na margoar ni Tudutudu ni sipanganon i tu angka hasahatanna be, mangihuthon adat ni hasuhuton, alai tinggal di hasuhuton do ianggo Upa suhutna.

     

Dung sidung mangan, ditutup ma jolo parmanganon i dohot tangiang simpul mangan sian pihak suhut/pangula n i Huria; udut tusi, dilehon paidua ni suhut/protokol ma tingki mangaso/ istirahat satongkin. (Molo adong naringkot di tingki/ naeng mulak, ditingki na istirahat i ma dijalang nasida hasuhuton). Laho mamungka panghataion, sai tar jolo di sungkun paidua ni suhut do angka raja, manang songon dia partording ni parhataan sipamasaon. (Pilih  satu)

1.2.1. Sirambe manis (dang pola masisisean)

*. Hata huhuasi sian paidua ni suhut, mandok mauliate tu  angka Raja dohot Inanta soripada, laos patorangkon maksud dohot tujuan ni parpunguan, na manghalas hon haroan las niroha do, ala na manuruk jabuna do hasuhuton.

*      Hata nauli nadenggan sian Boru/Bere/Ibebere.

*      Hata nauli nadenggan sian dongan sahuta.

*      Hata nauli nadenggan sian dongantubu.    

*     Dilehon kesempatan mandok hata tu angka raja na ro (diluar ni dalihan natolu, isara ni organisasi dohot  Aleale)

*      Hata sigabegabe/pasupasu sian Hulahula.

*   Jolo dijalo paidua ni suhut ma hata sigabegabe i, dung i, dipasahat/dipaampuhon ma tu suhut sihabolonan asa  diampu.

*      Jongjong ma suhut sihabolonan mangampu.

1.2.2. Marhata sise/Masisisean

Mardos ni roha ma jolo Dongantubu dohot   Dongansahuta, manontuhon, ise na gabe Raja sungkun. Molo laos paidua ni        suhut  do mewakili Dongantubu, sian Dongan sahuta ma na gabe Raja sungkun, alai molo adong do hadir Dongantubu asing ni paidua ni suhut, denggan ma Dongan tubu gabe raja panungkun, raja pangalusi ma Paidua ni suhut. (Raja sungkun = Rs; Raja alus  = Ra),

Rs : Manghatai ma hita suhut nami.

Ra : Manghatai ma hita tutu, nungnga rade hami.

Rs : Nungnga bosur hita mangan mahap marlompan juhut, pamurnas ma i tu daging saudara tu bohi, sipasindak panaili ma i sipaneang holiholi. Taringot di sipanganon i suhut nami, dia ma i langkatna dia unokna, dia ma i hatana, dia  nanidokna, botima.

Ra : Gabe jala horas ma hita raja nami, ia marpanungkun ma hamu taringot di sipanganon nasosadia i, songon nidok ni situatua ma dohonon nami :

       Godang sibutong butong otik sipir ni tondi

       Sitiktik ma na gompa, hodong lais ni ruma.

       Otik so sadia pe sipanganon natupa i,

       sai godang ma pinasuna.    

       ianggo hata ni sipanganon i, sigabegabe si horashoras do nanidokna, botima.

Rs : Gabe jala horas ma hita saluhutna, tumpahon ni amanta namartua Debata, dohonon nami  ma songon nidok ni umpasa :

Bagot na marhalto ma i naniagatan di robean,

Horas ma namanganhon,

sai tu tambana  di hamu suhut nami namangalean.

Alai songon nidok ni situatua:

       Marangkup do nauli, mardongan nadenggan.

       asa tangkas uju purba tangkasan uju angkola,

       anggiat tangkas  hita maduma,

       tumangkasan ma na mamora.

       Di sihombarna songon na hundul,

       di siudurna songon na mardalan,

       di sirongkap ni panggabean parhorasan i,

       tangkas ma suhut nami marboaboa. Botima.

Ra : Gabe jala horas ma hita raja nami, ia marpanangkasi ma nuaeng hamu/raja i di sihombarna   songon na hundul di siudurna songon na mardalan, di sirongkap ni panggabean, siangkup ni         parhorasan i, tangkas ma tutu nang hami marboaboa :

 Dinasadarion diparnangkok ni mataniari on, nungnga husuruk hami bagas sibagandingtua nami   on, mardomu tusi rajanami, dipangido rohanami asa rappak hita martangiang mandok mauliate   tu Tuhanta, laos mangido pangaramotionna, asa sonang sohariboriboan hami mangingani bagas   nami on. Ba ima sitangkasna rajanami, siangkup ni panggabean  parhorasan i, botima. 

Rs : Mauliate ma di Tuhanta, nungnga tangkas hamu marboaboa, jala nungnga sude hami umbotosa, naung disuruk hamu do hape bagas sibagandingtua muna on, diparnangkok ni mata  ni ari, di ari nauli di ari nadengan on; nang  dohonon nami, sai didongani Tuhanta ma hamu jala diramoti, sonang so hariboriboan  hamu songon i nang sude pangisina. Dohonon nami ma songon nidok ni umpasa :

       Eme sitambatua, parlinggoman ni siborok.

       Amanta Debata do pangalapan tua,

       sai horas ma hamu saluhutna diparorot. Ima tutu.

       Lomak ma silinjuang, lomak so binaboan.

       Sai dapot naniluluan, jumpang na jinalahan.

       Sahat ma solu tinogu tu bontean,

       sai leleng ma hita mangolu,

       diparhorasan, dipanggabean. Ima tutu.

(laos dipaliathon ma hata i tu dongan tubu molo adong dope na manambai ninna ma : hatangki ditambai dongan/hata tambaan).

Dung sidung sian Dongantubu mandok hata, dipaulak ma panghataion i tu paidua ni suhut, asa nasida paliathon/mangaturhon partording ni sidok hata. Dung dijalo paidua ni suhut hata i sian Dongantubu, dipaliat ma tu horonghorong na mangihut, songon parhataan di sirambe manis :

*      Hata nauli nadenggan sian Boru/Bere/Ibebere

*      Hata nauli nadenggan sian dongan sahuta

*      Hata nauli nadenggan sian raja na ro.            

*      Hata sigabegabe sian horong Hulahula, marsagi marsiaturan  ma  nasida mandok hata.

Jolo dijalo paidua ni suhut ma hata  panggabean par horasan i, dung i, di pasahat/dipaampuhon ma tu suhut  sihabolonan asa diampu, ninna ma :

Mauliate ma di amanta raja dohot Inanta soripada na manghaholongi hami, na mangalehon hata nauli na denggan/hata pasu-pasu panggabean parhorasan tu hami. Andorang so hupaampuhon saluhutna i tu suhut sihabolonan, dohononku ma songon nidok ni umpasa :

Harbangan ma i dalan tu huta,

Balatuk dalan tu jabu.

Hata panggabean parhorasan napinasahat muna,

huampu hami ma i martonga ni jabu.

Turtu ninna anduhur, tiotio ninna Lote.

Hata nauli na pinasahat muna,

sai unang ma muba,unang mose.

Tingko ma Inggir inggir, bulung na i ratarata.

Angka hata pangidoan nauli i,

sai pasauthon ma amanta namartua Debata

Nuaeng pe, di hamu hasuhuton nami, ampu hamu ma hata panggabean parhorasan i, botima.

Jongjong ma suhut mangampu, ninna ma :

Mauliate ma di amanta raja dohot inanta soripada na manghaholongi hami, na pasahathon hata nauli na denggan tu hami. Songon nidok ni umpasa ma dohonon nami :

Naung sampulupitu ma i, jumadi sampulu ualu.

Hata nauli napinasahat muna i,

huampu hami ma i martonga ni jabu.

Ampuma i diampuan nami, puak di abara nami

Sahat ma solu tinogu tu bontean,

sai leleng ma hita mangolu,

di parhorasan di panggabean.Botima.

Dung sidung pangampuon sian suhut sihabolonan, dibahen Hulahula ma tangiang panutup.

*      Molo manuruk jabu halak Batak naung Kristen, jolo dipatupa nasida do acara kebaktian, na ni uluhon ni pangula ni Huria. Jolo dilehon suhut do anak kunci ni jabu i tu pangula ni Huria i, asa nasida parjolo mambuka pintu ni jabu i. Diulaon adat manuruk jabu, ditonahon situatua do unang mangharuari hepeng suhut, pantang do i ninna, ai na patut urupan dope nasida pasidunghon jabuna i.

*      Diangka tingki naparpudion, sai sian horong Hulahula do dibahen paampuhon, nang pe di ulaon sisada hasuhuton, hape mangihuthon pandok ni situatua, marbeda do napasahat hata pasupasu dohot na paampuhon. Molo sian horong Hulahula do paampuhon, gabe hira sidua hasuhuton ma ulaon i, olo ma dipaksahon Hulahula i adat namasa di nasida, gabe dang berlaku be prinsip sidapot solup na ro.

1.3. Mangompoi jabu

Molo naeng inganan ma jabu naung singkop sidung dipauli tukang, patupaon ma ulaon adat nanigoaranna Mangompoi jabu. Andorang so dipatupa ulaon i, tontu naung jolo dipatupa do ulaon Paulak Tukang   Adat nabalga do ulaon mangompoi jabu, mardalan ma  Gonghon dohot jou jou sahat tu Bonaniari, jadi nungnga  patutna  mamotong sigagat duhut bahen lompan, laos mamalu Ogung sabangunan pe, nungnga patut, alai nidok pe songon i, tong  do  marguru tu hagiot  dohot kemampuan ni suhut. Mardomu tu bidang ni panggonghonon i, tontu torop ma tutur/tondong sitamuean/siladenan; hombar tusi, sai jolo dipatupa suhut do Riaraja/Tonggoraja, dalan pasahathon ulaon i tu Dongantubu/Dongansahuta, asa nasida gabe parhobas manghobasi sihobasan namardomu tu ulaon i. Hombar tu kemampuan ni suhut na mangompoi jabu, tarida do dua ragam pangulahon ni adat i :

1.3.1.  Mangompoi jabu sopola manghuling Ogung

Molo so manghuling  Ogung di ulaon mangompoi jabu, sarupa do  partording   ni  pangulahonna   songon   na  manuruk  jabu,  alai tamba  ma bidangna. Ala sahat do gonghon tu tingkat Bonaniari, tontu sahat ma  namargoar  ni Tudutudu ni sipanganon tu   nasida.

1.3.2.  Mangompoi jabu ni iringhon ni Ogung

Hombar tu pangulahonna, digoari do ulaon i, ulaon            Dua saihot. Sada do nian  ulaon i, alai dua bagian pangu lahonna (berganda), ima :

1.3.2.1. Ulaon di jabu (Acara khusus Paojakhon Suhut)

Dung dapot tingki na tinontuhon,diparnangkok ni Mata ni ari (Molo halak Kristen, dung sidung Kebaktian), jongjong ma sibuka   hata /paidua ni suhut/Protokol didok ma hatana, ninna  ma :  Santabi ma di amanta Rajaraja dohot Inanta soripada na huparsangapi hami;  Didok situatua, molo mardalan  Raja, ingkon jolo patiuron do dalan sidalananna, asa unang sungkotsungkot manang tartuktuk patna. Nuaeng pe, andorang so tamulai acara, parjolo ma jolo hupaandarhon hami konsep partording ni ulaonta dimanogot on.

Mangihuthon adat naung huhasomalhon hami, songon on ma partording na :

*  Parjolo ma natoras ni suhut/na mewakili, paojakhon ianakkonna (suhut) huhut pasahat angka sipasahatonna. (Tudutudu ni   sipanganon, Ulos, manjomput boras pir dohot angka na asing molo   adong dope)

*  Dung sidung i, ro ma Hulahula tangkas/ na mewakili paojakhon ianakkonna (suhut) huhut pasahathon sipasahatatonna

(Dengke, Ulos, manjomput boras pir, dohot angka na asing molo adong do pe).

Dung sidung acara paojakhon suhut, marudut ma tu Acara Umum (Ulaon di alaman) Songon i ma konsep partording ni ualaonta dimanogot on.- (Laos dipangido Protokol i ma panolopion sian angka Raja; molo dung satolop nasida, dimulai ma Acara.

-     Hata sidohonon sian natoras ni suhut dohot Hulahula dinalaho paojakhon, sarupa do dohot hata ditingki paojakhon namanuruk jabu.

-     Adong deba mambahen, patujolo ni ulaon Pesta do na paojakhon, jala dipatupama i secara khusus (hari pertama), dimarsogot na, (Mata ni ulaon /Pesta), langsung nama ulaon di Alaman (Acara Umum). 

1.3.2.2. Ulaon di Alaman (Acara Umum)

Mangihuthon na ni ida jala naung hea nidohotan, songon na ditoru on ma  partordingna: (Tontu nungnga disusun hinan Tertib Acara)

(1). Manjalo  haroro  ni  Hulahula.       

Dijouhon Protokol ma asa masuk uduran ni Hulahula tangkas,   Tulang Rorobot dohot Pariban, Tulang, Bona tulang, Bona ni ari,  Hulahula ni Haha anggi dohot Hulahula naposo. Dung dipasahat nasida boras si pir ni tondi, mangulon ma  jolo nasida di inganan parhundulan naung pina rade ni Hasuhuton.

(2). Acara Manortor.

Hombar tu Tertib acara panortoron naung disusun berdasarkan kesepakatan ditingki na martonggo raja, digorahon Protokol ma ganup ganup rombongan panortor.

*     Manortor Hasuhuton (Mambuat tua ni Gondang).

   Dung rade hasuhuton naeng manortor, mambuat Tua ni gondangna, parjolo ma dihatahon Hata huhuasi  taringot tu Ulaon i, (Apa maksud dan tujuan), dung  pe i, asa dipangido Gondang na.

*     Manortor horong Hulahula.

*     Manortor horong Boru, Bere/Ibebere.

*     Manortor horong Aleale/Organisasi.

*  Manortor Dongantubu/Dongan sahuta; mardos ni roha ma nasida, laos paampuhonsa melalui Paidua ni suhut /Raja Tinonggo.

    Jolo dijalo/dirimpun paidua ni suhut  ma  jolo  hata panggabean parhorasan i, dung i, di pasahat/ dipaampuhon ma tu suhut sihabolonan asa diampu, ninna ma :

Mauliate ma di amanta raja dohot inanta soripada na manghaholongi hami, namangalehon hata nauli na denggan/ hata pasupasu panggabean parhorasan tu hami; andorang so hupaampuhon saluhutna i tu suhut sihabolonan,songon nidok ni umpasa ma dohononku :

                Harbangan ma i dalan tu huta,

Balatuk dalan tu jabu.

Hata panggabean parhorasan na pinasahat muna, huampu hami ma i martonga ni jabu.

Turtu ninna anduhur, tiotio ninna Lote.

Hata nauli na pinasahat muna i ,

sai unang ma muba, unang mose.

Tingko ma inggir inggir, bulung na i ratarata.

Angka hata pangidoan nauli i,

sai pasauthon ma amanta namartua Debata.

Nuaeng pe, di hamu hasuhuton nami, ampu hamu ma hata panggabean parhorasan i, botima.

Jongjong ma suhut mangampu, ninna ma:Mauliatema

di Amanta raja dohot Inanta soripada  na manghaholo

ngi hami,  na    pasahathon   hata nauli na denggan tu

hami. Songon nidok ni umpasa ma dohonon nami:

Naung sampulupitu ma i, jumadi sampulu ualu.

Hata nauli napinasahat muna i ,

huampu hami ma i martonga ni jabu.

Ampu ma i diampuan nami, puak di abara nami

Sahat ma solu tinogu tu bontean,

sai leleng ma hita mangolu,

di parhorasan, di panggabean. Botima.

Dung sidung pangampuon sian suhut sihabolonan, dipitta paidua ni suhut/Raja tinonggo ma gondang hasahatan, laos rampak mandok ma :

Horas, (3X).

*      Marsipanganon (Sesuai kesepakatan pada waktu Tonggo Raja).

*      Tudutudu ni sipanganon dipadalan ditingki parmanganon, manang ditingki panortoron (mangihut tu tortor), dipahombarma i tu adat ni Hasuhuton, marojahan tu prinsip sidapot solup do na ro.

*      Dung sidung tangiang simpul mangan, dilehon tingki tu Undangan umum lao manjalang/ pasahat tumpakna).

Mangihuthon pandok ni angka natuatua, disude ulaon sisada hasuhuton, Raja tinonggo sian dongantubu manang paidua ni suhut do na paampuhon hata panggabean parhorasan i tu suhut sihabolonan.Diangka tingki na parpudi on, jotjot do ni ida Hulahula paampuhon, alai dung nitangkasan i tu angka natuatua, asing do ninna na mangalehon hata pasupasu sian na paampuhon. Dang hea paampuhon pangula ni Huria, mamasumasu do. Jadi, molo di ulaon sisada hasuhuton, songon kedudukan ni pangula ni Huria i do  nang kedudukan ni Hulahula mangalehon hata pasupasu, dang paampuhon, songon i ma pandok nasida.

Najolo, hata horashoras i do panutup ni ulaon, alai dang na pola mansalai tu adat molo tung pe dibahen tangiang panutup.

Ianggo najolo, ninna angka natuatua,, jolo ditonggohon / ditangianghon /dihatahon Raja Tinonggo do Boras satti, dung ipe asa di paampuhon tu suhut sihabolonan.

Tweet

Subscribe to receive free email updates: