10. Mangharoani na tammat singkola/Wisuda

Suang songon pesta mangharoani na malua sian panghangkungion/Lepas sidi, songon i do nang na mamestahon na Tammat sikola/Wisuda. Dung mulak sian Sikola/Kampus, dipatupa ma acara pangharoanion (syukuran); tontu angka tutur dohot tondong pe, nungnga marpungu di jabu paimahon.

Masisungkunan masipatangkasan ma jolo nasida, manang naung boi mulaan acara, manang na adong dope sipaimaon. Molo dung satolop laho mamulai acara, jongjong ma paidua ni suhut/Protokol, didok ma hatana, ninna ma :

Santabi godang ma di amanta Rajaraja dohot Inanta soripada, didok situa tua, molo mardalan Raja, ingkon jolo patiuron do dalan sidalananna, asa unang sungkotsungkot manang tartuktuk patna ; jadi, andorang so tamulai acara, parjolo ma jolo hupaandarhon hami konsep partording ni ulaonta sadarion.

Mangihuthon naung huhasomalhon hami, tar songon on ma partording na :

 *   Mangambangi/manubut na di wisuda/na tammat sikola.

-    Suhut/Paidua ni suhut pasahat Tudutudu ni sipanganon tu jolo    ni   na   tammat sikola/na di wisuda.

-    Hulahula (Tulang ni na tammat sikola/nadiwisuda) pasahat sipasahatonna (Dengke) laos marudut ma tu hahaanggi nasida  pasahat sipasahatonna.

*.Marsipanganon (makan bersama), tangiang mangan dohot huhuasi ni sipanganon, sian pihak suhut.

* Santabi ma di raja i Hulahulanami, dang namangorui disangap ni raja i, alai, ala ulaon sisada hasuhuton do ulaonta sadarion, na rap mangambangi do hita disi—(didok goar ni na tammat sikola i); mangihuthon adat naung huhasomalhon hami, ditingki na marsipanganon i ma hita, hupadalan hami namargoar ni Tudutudu ni sipanganonta, langsung ma i sian jolo nami, jala mangihuthon adat ni suhut nami.

*  Tangiang simpul mangan sian pihak suhut.

* Mangulon satongkin huhut mangalehon tingki tu angka dongan na naeng manjalang suhut.

*  Marhata sihorashoras/hata sigabegabe

*  Hata pasupasuan sian Hulahula.

*  Mangampu suhut.

Songon i ma konsep partording ni acara dihita, molo adong nahurang lobi, ba rap padengganhon hita (laos dipangido ma panolopion sian angka raja). Molo dung satolop angka raja, dimulai ma acara. Dipasahat suhut ma Tudutudu  ni sipanganon i tujolo ni na ni ambangan (na di wisuda) huhut didok hatana ninna ma : Sadarion di ari nauli di ari na denggan on, marlas ni roha do hami natorasmu rap dohot angka na manghaholongi hita, disiala naung tammat/di wisuda ho sian parsingkolaanmu. Songon na pataridahon las ni rohanami, dison hupasahat hami Tudutudu ni sipanganonta :

Sitiktik ma na gompa, hodong lais ni ruma.

Otik so sadia pe natupa, sai godang ma pinasuna. Ima tutu.

Udut tusi dipasahat Hulahula/Tulang ma dengkena, huhut didok hatana ninna ma: Dison hupasahat hami Dengke simudurudur jala dengke sahat, paboa las ni roha nami, ala naung tammat/diwisuda Bere/Ibebere nami. Anggiat ma marhite parbinotoan na niguruhon mi, gabe dapot na sininta ni rohanta, rap mudur tudolok hita dapotan las ni ari, mudur tu toruan dapotan mual natio, jala songon nidok ni umpasa ma dohonon nami:

Sitiktik ma nagompa, hodong lais ni ruma.

0tik so sadia pe natupa, sai godang ma pinasuna          

Las ma rohamuna. Ima tutu           

       

Dung sidung dipasahat Hulahula sipasahatonnai, dibagihon/ dipadalan  ma  panganan, jala sian pihak suhut  ma   mambahen tangiang mangan dohot hata huhuasi ni si panganon (sitiktik ma nagompa …dst). Ditingki  na  marsipanganon i, dipadalan ma namargoar ni Tudutudu ni  sipanganon,  tu  angka hasahatanna, hombar tu adat ni hasuhuton. Laho   pasahathon i ,  didok ma hatana : Onma namargoar ni Tudutudu ni sipanganon tu…. (dang didok “ jambar” )

Dung sidung marsipanganon, ditutup ma jolo   parmanganon i dohot tangiang simpul mangan, sian pihak  suhut/Pangula ni Huria. Udut tusi didok paidua ni suhut/Protokol ma hatana ninna ma : andorang so tauduti tu na marhata sigabegabe /sihorashoras, nilehon ma tingki tu angka dongan nanaeng parmisi/manjalang suhut.

       

Laho mamungka panghataion, sai tar jolo di sungkun paidua ni suhut do angka raja, manang songon dia partording ni parhataan sipamasaon (Pilih salah satu).

10.1. Sirambe manis/dang pola masisisean.

*      Hata huhuasi  sian  paidua  ni  suhut,  mandok mauliate tu angka Raja dohot Inanta soripada laos patorangkon maksud dohot  tujuan ni parpunguan, na manghalashon haroan lasniroha do, ala naung tammat sikola/di wisuda ianakkon nasida.

*      Mandok  hata  nauli   nadenggan sian horong  Boru/  Bere /Ibebere

*      Mandok hata nauli nadenggan sian Dongan sahuta.

*      Mandok hata nauli na denggan sian Dongantubu.

*      Dilehon kesempatan mandok hata tu raja na ro.  (diluar ni  Dalihan Natolu,  isara ni Organisasi  dohot  Aleale).

*      Pasahat  hata  sigabegabe  sian horong  Hulahula tarmasuk Tulangrorobot dohot  Pariban, marsagi   marsiaturan    ma    nasida mandok hata, alai parpudi ma Hulahula tangkas, laos paampuhonsa tu hasuhuton. (ianggo najolo ninna, paidua ni  suhut/Raja tinonggo sian dongantubu do na paampuhon tu  suhut sihabo lonan, hata pasupasu do sian Hulahula dohot mambahen tangiang panutup).

*      Jolo dijalo paidua ni suhut/Protokol ma hata sigabegabe i   asa dipasahat tu suhut sihabolonan. (Molo mangihuthon adat najolo, laos paidua ni suhut/Raja tinonggo i do paampuhon).

*      Jong jong ma suhut mangampu.

*      Dung sidung suhut sihabolonan  mangampu, dibahen  Hulahula   ma tangiang panutup.

10.2. Marhata sise/Masisisean.

         

Mardosniroha ma jolo Dongantubu dohot Dongan sahuta, manontuhon ise na gabe Raja sungkun;  denggan do nang sian Dongan sahuta, alai  sian    Dongantubu  ma jolo  na  gabe Raja sungkun binahen dison,   ianggo  Raja alus, paiduani suhut ma.

(Raja sungkun = Rs; Raja alus  = Ra).

Rs : Manghatai ma hita suhut nami

Ra : Manghatai ma hita tutu, nungnga rade hami

Rs : Nungnga bosur hita mangan mahap marlompan juhut, pamurnas ma i tu daging saudara tu bohi, sipasindak panaili ma i sipaneang holiholi. Taringot di sipanganon i suhut nami, dia ma i langkatna dia unokna, dia ma i hatana dia  nanidokna, botima.

Ra : Gabe jala horas ma hita raja nami, ia marpanungkun ma hamu taringot di sipanganon nasosadia i, songon nidok ni situatua ma dohonon nami :

godang sibutong butong otik sipir ni tondi.

Sitiktik ma na gompa, hodong lais ni ruma.

Otik so sadia pe sipanganon natupa i,

sai godang ma pinasuna.

ianggo hata ni sipanganon i raja nami, sigabegabe si horas horas do nanidok na, botima.

Rs : Gabe jala horas ma hita saluhutna tumpahon ni  Amanta na martua Debata, dohonon nami ma songon nidok ni umpasa:

Bagot na marhalto ma i naniagatan di robean,

Sai horas ma namanganhon,

lam tu tambana  di hamu suhut nami namangalean.

Didok situatua, marangkup do nauli mardongan nadenggan, asa tangkas uju purba, tangkasan uju angkola, asa tangkas hita maduma tumangkasan ma na mamora; disihombarna songon na hundul disiudurna songon na mardalan, disirongkap ni panggabean siangkup ni parhorasan i tangkas ma suhut nami marboaboa.

Ra : Gabe jala horas ma hita raja nami, ia marpanangkasi ma nuaeng hamu/raja i, disihombarna songon na hundul disiudurna songon na mardalan, di sirongkap ni pangga bean siangkup ni parhorasan i, tangkas ma tutu hami marboa boa.

Di nasadarion nasogotan, nungnga di wisuda ianakkonta  si…gabe…, dihilala rohanami napatutna do i halashononhon, ai pasupasu ni Tuhanta doi dirajumi rohanami; jala dipangido rohanami, asa rampak hita manghalashon i mandok mauliate tu Tuhanta, ima rajanami sitangkasna disirongkap ni panggabean siangkup ni parhorasan i, botima.

Rs : Mauliate ma di Tuhanta, mauliate ma nang di hamu suhut nami, nungnga  tangkas hamu marboaboa, naung tammat sikola/naung di wisuda do hape anakkonta si------gabe-----, nuaeng pe, dohonon nami ma hata poda sitiopon ni roha, songon nidok ni situatua :

 Pinantikkon hujur ma i ditopi ni tapian,

 tudia pe ibana mangalangka, disima dapotan parsaulian.

Pir ma pongki, bahulbahul pansalongan,

pir ma Tondi, tiurtiur ma pansamotan.

Sahat ma solu tinogu tu bontean,

nungnga sahat tammat sikkola ni anakta i,

sahat ma hita tu parhorasan panggabean, imatutu.

Suang songon i ma nang dihamu suhut nami, sai diparbisuhi jala di pargogoi Tuhanta ma hamu mamingkiri sipingkiran muna nang mangula ulaon muna, asa dapot songon nidok ni umpasa :

Lomak ma silinjuang, lomak so binaboan

Sai dapot naniluluan, jumpang na jinalahan

Hatangki hata tambaan (laos dipaliathon ma hata i tu dongan tubu molo adong dope na manambai) . 

        

Dung sidung sian dongantubu mandok hata, dipaulak ma panghataion i tu paidua ni suhut, asa nasida paliathon/ mangatur hon partording ni sidok hata.

Dijalo paidua ni suhut ma hata i sian dongantubu, laos dipaliat ma tu horong horong na mangihut songon parhataan di sirambemanis

*      Hata sigabegabe/sihorashoras sian Boru/Bere/ Ibebere

*      Hata sigabegabe/sihorashoras sian dongan sahuta

*      Hata sigabegabe/sihorashoras sian Aleale/ Organisasi

*      Hata si gabegabe/sihorashoras sian  horong Hulahula (tarmasuk  Tulang rorobot   dohot pariban)  marsagi  marsi aturan  ma  nasida  mandok hata,  alai parpudi ma Hulahula tangkas laos paampuhonsa tu suhut. (ianggo najolo ninna, paidua ni  suhut /Raja tinonggo   sian  Dongantubu  do  na paampuhon  tu  suhut   sihabolonan, hata pasupasu do sian Hulahula dohot mambahen tangiang panutup)

*      Jolo dijalo paidua ni suhut  ma  jolo  hata   panggabean parhorasan i, dung pe i asa di pasahat  tu suhut sihabolonan, ninna ma: Mauliate ma di amanta raja dohot inanta soripada na manghaholongi hami, namangalehon hata nauli na denggan/hata pasupasu panggabean parhorasan tu hami. Andorang so hupaampuhon saluhutna i tu suhut sihabolonan, dohononku ma songon nidok ni umpasa :

Harbangan ma i dalan tu huta,

Balatuk dalan tu jabu.

Hata panggabean parhorasan napinasahat muna,

huampu hami ma i martonga ni jabu.

Turtu ninna anduhur, tiotio ninna Lote.

Hata nauli na pinasahat muna,

sai unang ma muba unang mose.

Tingko ma inggiringgir, bulung na i ratarata.

Angka hata pangidoan nauli i, sai pasauthon ma amanta namartua Debata.

Nuaeng pe, di hamu hasuhuton nami, ampu hamu ma hata panggabean parhorasan i, botima.

       

Rampak jongjong ma suhut dohot ianakkonna na di wisuda i, diampu nasida ma hata sigabegabe sihorashoras i (dilehon ma kesempatan parjolo tu ianakkonna na di wisuda i, mandok mauliate tu sude angka tutur dohot tondong), dung i, ninna ma: Mauliate ma di amanta raja dohot inanta soripada na manghaholongi hami, na pasahathon hata nauli na denggan tu hami; Songon nidok ni umpasa ma dohonon nami :

Naung sampulupitu ma i, jumadi sampulu ualu.

Hata nauli napinasahat muna i ,

huampu hami ma i martonga ni jabu.

Ampu mai diampuan nami, puak di abara nami

Sahat ma solu tinogu tu bontean,

sai leleng ma hita mangolu di parhorasan di panggabean.

Botima.

Manimpuli ulaon i, dibahen Hulahula ma tangiang panutup.

•     Dizaman saonari on, nungnga ragat napasahat ulos tu na tammat sikkola/na di wisuda, alai molo nisungkun ulos aha goarna, didok ma “ulos holong”.
•   Mangihuthon hatorangan ni angka natuatua/pemuka adat, sude do ulos na mardalan diparadaton batak boi dohonon ulos holong, alai dang goar fungsi/tohonan ni ulos  i non i, ai ulos pansamot pe dohot ulos hela , ulos holong do nang i; molo tung pe adong napasahat ulos ditingki ulaon sisongon on, holan bernilai kenang-kenangan/cendramata do i manang sekedar kado .

Tweet

Subscribe to receive free email updates: