1. Manuruknuruk

Molo sepakat sidoli dohot siboru ingkon mangalua nasida, somalna, sai ditinggalhon pangalua i do surat dohot hepeng ditoru ni lage podoman ni natorasna, songon napaboahon ma i, naung tumuntun lomona siboru i, jala unang pola disuru pangihutihut mangalului. Dung sahat pangalua i tu hutana, dijomput natoras ni sidoli ma boras sipirnitondi tu simanjujung ni pangalua i huhut didok ma hatana, ninna ma: Pir ma tondi ni anakhon, pir ma tondi ni parumaenhon.

      

Songon napatuduhon panjanghonon nasida dohot las ni rohana, dipatupa ma ulaon nametmet nanigoaranna Parajahon.     

      

Diontang/dijou ma Dongantubuna, Dongan sahuta dohot Boru diampuan, marpungu mandohoti ulaon i.      

      

Dipaadophon ma jolo Tudutudu ni sipanganon i, tu jolo ni pangalua i, laos dibagihon ma i ditingki mangan, tu angka na patut manjalosa, alai ianggo  Ihurihur, dipapulik do i laho taruhonon nasida tu pihak parboru.

*  Simbol ni Borua/Ina soripada do Ihurihur, ala ni ido umbahen na sai borhat Ihurihur tu Hulahula di adat parmateon, dang digoari upa suhut i, molo di ulaon adat parmateon.

       

Dung sidung mangan, ditutup ma jolo parmanganon i dohot tangiang simpul mangan, udut tusi marhata ma. Disungkun Dongantubu manang sian Dongan sahuta ma Hasuhuton taringot di parpunguan i, dia langkatna dia unokna, dia hatana dia nanidokna.     

      

Dung dipaboa hasuhuton i disialana, dipasahat nasida ma hata pasupasuan mardongan poda tu pangalua i, hombar tusi do umbahen na didok Pasupasu raja.

     

Sipata, tar dijua suhut parboru do manjalo Ihurihur/ juhut na tinaruhon ni paranak i, pasiding sarita sian angka Dongantubuna, sotung didok na marmihimmihim, gabe tu paidua ni suhut parboru i ma dipasahat utusan i Ihurihur panjuhutina i. Dijou suhut/paidua ni suhut parboru i ma Dongantubuna, Dongansahuta dohot Boru na adong dihuta i (boru diampuan) asa rampak marsaulihon sipanganon nabinoan ni utusan ni paranak i, ima sipanganon boaboa, paboa naung diparaja siboru.

*  Dipigapiga luat, sipata do dang sangkan tu roha ni parboru manjalo sipanganon i, ala holan ihurihur diboan utusan paranak, ai tupa do dang sarupa tu paradaton nasida, alai ala dang diboto paranak i dope adat namasa diluat i, tontu adat ni paranak do sombahonon ni paranak.

Mamereng tu ringkotna, olo do sipata siboru pangalua i ingkon tibu pajumpang dohot natorasna (isarana, ala ni sahit naposi), tarpaksa, ro ma nasida nadua (suami isteri) manopot natorasna i, sopola adong namangudurhon, jala dang pola ingkon mamboan  sipanganon, ima nanigoaranna Mangompas.

      

Molo naeng pasahat adat Manuruknuruk ma paranak tu Hulahula/parboru, dititi/ditontuhon nasida ma sada ari na suman tu rohana. Sangkap dohot tahi nasida i, dipaboa ma i tu parboru, asa rade nasida ditingki harorona i.

       

Diari naung binuhul i borhat ma nasida, naniudurhon ni natorasna, Dongantubu, Dongansahuta dohot pamoruanna dua tolu halak, alai ianggo Tulang, dang sipardohot di ulaon sisongon i. Diboan rombongan i do sipanganon masak (indahan las dohot lompanjuhut namar panggoari Tudutudu ni sipanganon), parboru pe nungnga diparade Dengke sahat/Dengke Simudurudur. 

      

Dung dapot tingki parmanganon dipasahat paranak ma Tudutudu ni sipanganon i, tu jolo ni suhut parboru, huhut didok hatana, ninna ma: Rajanami, dibagasan las ni roha, hupasahat hami dison Tudutudu ni sipanganonta;

Sitiktik ma na gompa, Hodong lais ni ruma.

Otik so sadia pe na tupa, sai godang ma pinasuna.

las ma rohamuna, imatutu.

      

Dung sidung dipasahat paranak Tudutudu ni sipanganon i, dipasahat parboru ma dengkena tu paranak pamoruanna huhut didok hatana, ninna ma :  Dison hupasahat hami Dengke sahat jala Dengke simudurudur, sai sahat ma nasininta ni rohanta, tumpahon ni amanta na martua Debata, sai rap mudur tu dolok hamu dapotan las ni ari, mudur tu toruan dapotan mual natio;

Sitiktik ma na gompa, golanggolang pangarahutna,

Otik so sadia pe na tupa, sai godang ma pinasuna.

las ma rohamuna, imatutu.

     

Dung sidung dipasahat parboru dengkena tu paranak/ pamoruanna, dipadalan/dibagihon ma panganan, sian paranak ma mambahen tangiang mangan dohot huhuasi ni sipanganon (Sitiktik ma na gompa ….dst.). Ditingki na mangan i, dibagihon paranak ma dengke na nilehon ni Hulahula/parboru i tu rombonganna mangihuthon horongna be. (Dongan tubu, Dongan sahuta dohot boru)

      

Dung sidung marsipanganon, ditutup ma jolo parmanganon i dohot tangiang simpul mangan, sidung i dipasahat parboru ma deba sian Tudutudu ni sipanganon i tu paranak, ima nanigoaranna Gaorgota. Mangihuthon na umum, dipasahat ma panamboli dohot soit, alai mar nabasa do Hulahula, sai adong do i na manambai. Dibagihon parboru ma Tudutudu ni sipanganon natinggal dinasida i dipihakna, mangihuthon horongna be, suang songon i nang paranak, dibagihon do gaorgota i tu angka uduranna mangihuthon horongna.

       

Dung simpan sude Tudutudu ni sipanganon i, diuduti ma tu na marhata. (Pb = parboru; Pa = Paranak).

Pb : Manghatai ma hita raja ni boru.

Pa : Manghatai ma hita tutu rajanami, nungnga rade hami.

Pb : Nungnga bosur hita mangan, mahap marlompan juhut,  pamurnas ma i tu daging, saudara tu bohi. Sipasindak panaili ma i, sipaneang holiholi. Taringot disipanganon i raja ni boru, dia ma i langkatna dia unokna, dia ma i hatana dia nanidokna.

Pa : Horas jala gabe ma hita rajanami, ia marpanungkun ma nuaeng raja i taringot di sipanganon na sosadia i, songon nidok ni situatua ma dohonon nami rajanami,

       godang sibutongbutong, otik sipirni tondi.

       Sitiktik ma na gompa, hodong lais ni ruma.

       Otik so sadia pe na tupa i, sai godang ma pinasuna.

       ianggo hata ni i, rajanami,

       sigabegabe sihorashoras do nanidokna, botima.

Pb : Gabe jala horas ma hita tutu raja ni boru,

       Bagot na marhalto ma i naniagatan di robean,

       sai horas ma amanta raja dohot inanta soripada namanganhon,

       tu tambana ma dihamu na mangalean.

       Alai raja ni boru, marangkup do nauli mardongan nadenggan, 

       asa tangkas uju purba tangkasan uju angkola,

       anggiat tangkas hita maduma tumangkasan ma na mamora; di sihombarna songon nahundul, di siudurna songon na mardalan, siangkup ni parhorasan di sirongkap ni panggabean i, tangkas ma raja ni boru marboaboa.

Pa : Gabe jala horas ma hita rajanami, manumpak ma sahala ni raja i songon i nang tondimuna, ia marpanangkasi ma nuaeng raja i disihombarna songon nahundul disiudurna songon na mardalan, siangkup ni parhorasan sirongkap ni panggabean i, ba tangkas ma tutu nang hami marboaboa;

Rajanami, marsomba hami dijarijari sampulu pasampulusada simanjujung, marsantabi hami di hata sidohonon nami; mauliate godang ma parjolo hudok hami, ala denggan do hami dijanghon hamu dibagasan jabu na marampang namarjual on, parembasan ni anak dohot boru sigomgom pangisina on.

Rajanami, unang pola sai lulululu be rohamuna diborumuna, ai nungnga huparaja hami gabe parumaen nami, ido alana umbahen na ro hami dison manuruknuruk manomba raja i Hulahulanami, patuduhon na tinangko. Taringot di sala ni anaknami i rajanami, songon nidok ni umpasa ma dohonon nami;

Galagala sitelluk ma i, telluk  mardaguldagul,

dihasalaan ni anaknami i, nanget ma i niapulapul.

Nuaeng pe rajanami, nungnga sapala naung denggan hami dijanghon hamu, ba laos jangkon hamu ma anaknami i gabe gellengmuna situtu, ba, i ma rajanami sitangkasna siangkup ni parhorasan sirongkap ni panggabean i, botima.

Pb : Raja ni boru, tingkos songon nanidokmuna i, ianggo patutna nian, dada pintor pahundulon nami dope hamu di amak tiar, alai marningot poda ni 0mpunta sijolojolo tubu, dang jadi tulahon namarsala molo ro manombanomba ; jadi, nuaeng pe asa boi tauduti panghataionta, pasahat hamu ma jolo :

       * Ungkap harbangan ( tu dongantubu )

       * Sangke hujur ( tu dongan sahuta).

       * Pangihutihut (tu boru)

       Udut tusi raja ni boru, molo holan na manuruknuruk sambing dope ulaonta dang pintor diihuthon adat nagok, ba, songon somba ni uhummuna, pasahat hamuma Bohi ni Sinamot tu suhut sihabolonan nami (dipasahat ma i). Udut tusi muse, pasahat hamu ma Pasituak natonggi. Parjoloma tu suhi ni ampang na opat (laos digoari ma i), dung i tu hami  pangalambungi dohot panauri na adong dison.

     * Boi do pungu dipasahat paranak i tu parboru molo satolop parboru, alai molo dang satolop, diparis ma i hombar tu panggoraon ni parboru i).

Pb : Raja ni boru, atik beha dang pir dope rohamuna mangido sipangidoon muna, ba sinungkun ma jolo suhut sihabolonan nami, atik tung adong nanaeng sipasahaton nasida tu boru dohot helanami. (laos didok ma tu suhut parboru i) : dihamu suhut nami, molo adong nanaeng sipasahatonmuna tu borunta dohot helanta, ba denggan ma i, pasahat hamuma. Dipasahat suhut parboru i ma ulos, nanigoaranna Ulos pargomgom, huhut didok hatana ninna ma : Dihamu Amang Hela dohot di ho Boru hasian, onma ulos pargomgom sian hami, songon partanda nasai tongtong digomgom tondinami hamu, nang pe dao hamu di luat muna. Dohonon nami ma songon nidok ni umpasa :

       Lomak ma silinjuang, lomak so binaboan.

       Sai dapot naniluluan, jumpang najinalahan.  

       Eme sitambatua, parlinggoman ni siborok,

       amanta Debata do pangalapantua,

       sai horas ma hamuna diparorot.

       (laos diuloshon ma i tu Hela rap dohot Boruna)

       

Udut tusi, marsagi masiaturan ma pihak Hulahula/parboru mandok hata sigabegabe tu pihak paranak. Mangihuthon nasomal niida, tar songon on ma dibahen parturena :

*  Hata sigabegabe sian Boru, Bere/Ibebere.

*  Hata sigabegabe sian Dongan sahuta.

*  Hata sigabegabe sian Hulahula/Tulang (molo tepat adong hadir).

*  Hata sigabegabe sian dongantubu.

*  Hata sigabegabe sian suhut/paidua ni suhut laos paampuhonsa tu pihak paranak, ninna ma :

Eme sitambatua, parlinggoman ni siborok.

Amanta Debata do pangalapan tua,

sai horas ma hamuna diparorot.

Naung sampulu pitu, jumadi sampulu ualu.

Hata nauli nadenggan i, ampu hamu ma i martonga ni jabu

Sahat ma solu, tinogu tu bontean.

Sai leleng ma hita mangolu,

diparhorasan nang di panggabean. Botima.

Dung sidung dipaampuhon parboru hata sigabegabe i, mangampu ma pihak paranak ninna ma:

Turtu ma ninna anduhur, tiotio ninna lote.

Hata parhorasan panggabean napinasahat muna,

sai unang ma muba unang mose        

Tingko ma inggiringgir, bulung na i ratarata.

Tagam do rohanami mangkirim,

sai pasauthon ma amanta namartua Debata.

Naung sampulupitu ma i, jumadi sampulu ualu.

Hata nauli napinasahat muna i,

huampu hami ma i martonga ni jabu.

Ampu ma i di ampuan nami, puak diabara nami.

Sahat ma solu tinogu tu bontean,

sai leleng ma hita mangolu,

di parhorasan di panggabean. Botima.

    Manimpuli ulaon i, dibahen ma tangiang panutup sian pihak Hulahula.

Tweet

Subscribe to receive free email updates: