2. Mangadati

Mangihuthon hatorangan ni angka natuatua, dianggap na pajolo gogo papudi uhum do halak na mangalua, jadi patutna do i pautangon diparadatan. Ala hata utang do diampehon tu pangalua i, tubu ma pandohan Manggarar utang.

Molo pasahat adat na gok halak na mangalua, alai dang adong dope ianakkonna, digoari do i, Mangadati.  Asa boi botoon nasida utang adat sigararonna/sipasahatonna tu parboru, jolo borhat do nasida manopot Hulahulana laho mangarundinghon i, i ma nanigoaranna adat Manungkun utang.

(di zaman saonari on, jotjot do didok halak istilahna Marhata hepeng, alai istilah umum do i, ianggo istilah na spesifik, Manungkun utang do).

       

Di loloan/forum perundingan i, ditontuhon ma partingkianna laho pasahathon angka naung nihataan nasida, ima nanigoaranna Pesta Mangadati. Prosedur/tatacara na mardomu tusi, ni paandarhon ma songon na di toruon :

2.1.  Manungkun Utang.

        

Molo naung dibahen hinan do adat panuruk nuruhon, borhat ma nasida manopot Hulahulana so pola mamboan sipanganon masak (indahan las dohot lompan juhut namar panggoari Tudutudu ni sipanganon) ; molo tung pe adong diboan  nasida sipanganon, ala dang hum rohana so adong tioptioponna manopot Hulahulana, digoari ma i singkat ni lampet, jadi dang pola dihatahon i laho  pasahathon tu Hulahula.

       

Parboru pe dang pola paradehon dengke, molo tung pe adong dengke diparade Hulaula i, sekedar holan lompan sambing do i, dang pola dihatahon i laho pasahathon tu pamoruonna.

       

Dang gararon ni pamoruon i be ungkap harbangan dohot sangke hujur, ai nungnga digarar hinan i ditingki na manuruknuruk ; alai, molo so dibahen hinan dope adat panuruknuruhon, mamboan sipanganon masak ma nasida (indahan las dohot lompan juhut namarpanggoari Tudutudu ni sipanganon). Dung sahat pamoruon/paranak i dijabu ni Hulahulana, mardosniroha ma jolo nasida laho mamulai acara, jala hirahira songon on ma partordingna:

Dipasahat pamoruon/paranak ma Tudutudu ni sipanganon i tujolo ni Hulahula, huhut ma didok hatana ninna ma: Rajanami, dison hupasahat hami Tudutudu ni sipanganonta, parhitean nami ma i pasangaphon raja i Hulahulanami;

Sitiktik ma na gompa, hodong lais ni ruma.

otik so sadia pe natupa, sai godang ma pinasuna.

Lasma rohamuna, imatutu.

Udut tusi, dipasahat Hulahula/parboru ma dengke Simudur udur huhut didok hatana ninna ma: Dihamu pamoruon nami, dison hupasahat hami dengke Simudurudur, sai rampak mudur hamu tu dolok dapotan las ni ari, mudur tu toruan  dapotan mual natio;

Sitiktik ma na gompa, golanggolang pangarahutna,

otik so sadia pe natupa, sai godang ma pinasuna.

Las ma rohamuna, imatutu.                         

       

Dung sidung na pasahathon Tudutudu ni sipanganon dohot dengke simudurudur, dipadalan/dibagihon ma panganan jala sian pamoruon/paranak ma mambahen tangiang mangan dohot huhuasi ni sipanganon (sitiktik ma na gompa ….dst.). Dung sidung mangan, ditutup ma jolo parmanganon i dohot tangiang simpul mangan sian paranak; udut tusi, andorang so manghatai /marhata, dipasimpan ma jolo Tudutudu ni sipanganon i.

       

Dilehon Hulahula parboru ma deba tu paranak, asa adong bagihonon nasida tu uduranna/rombonganna ima nanigoaranna Gaor gota; nadeba mandok Ulu ni dengke mulak do goarna, sarupa songon na marpudun saut, laos dibagihon ganup pihak ma i dipihaknabe mangihuthon horongna.

Dung singkop jala rade sude, diuduti ma tu na marhata.

(Raja sungkun sian parboru = Rs ; Raja alus sian paranak = Ra)

Rs : Manghatai ma hita raja ni boru.

Ra : Manghatai ma hita tutu rajanami, nungnga rade hami.

Rs : Nungnga bosur hita mangan mahap marlompan juhut, pamurnas ma i tu daging saudara tu bohi, sipasindak panaili ma i sipaneang holiholi, taringot disipanganon i raja ni boru, dia ma i langkatna dia unokna, dia ma i hatana dia nanidokna.

Ra : Horas jala gabe ma hita rajanami, tumpahon ni amanta namartua Debata, horas do hami na ro, horas do nang hamu Hulahulanami nahudapothon hami, ia marpanungkun ma nuaeng raja i disintuhu ni indahan masak naso sadia i, rajanami, didok situatua, godang sibutongbutong otik sipirni tondi;

       Sitiktik ma na gompa, hodong lais ni ruma.

       Otik sosadia pe natupa i, sai godang ma pinasuna,

       Las ma rohamuna, ima tutu;

       ianggo hata ni i rajanami, panggabean parhorasan do nanidokna, botima.

Rs : Horas jala gabe ma hita tutu raja ni boru, hami pe dohonon  

        nami ma songon nidok ni umpasa,

Bagot na marhalto ma i na niagatan di robean,

sai horas jala gabe ma amanta raja dohot inanta soripada na manganhon, lam tu tambana ma  dihamu na mangalean.

Alai amang boru/raja ni boru, songon nidok ni situatua, marangkup do nauli mardongan na denggan, asa tangkas uju purba tangkasan uju angkola, asa tangkas  hita maduma tumangkasan ma namamora; di sihombarna songon na hundul di siudurna songon na mardalan, di siangkup ni parhorasan di sirongkap ni panggabean i, tangkas ma i dipaboa raja ni boru.

Ra : Horas jala gabe ma hita rajanami, ia marpanangkasi ma nuaeng raja i di sitangkasna, disiangkup ni parhorasan panggabean i, ba tangkas ma tutu nang hami marboaboa.

Rajanami, bangko ni hita jolma do i molo balga anak pangolihononhon, magodang boru pamulion; ditingki naung salpu i, diari nauli diari nadenggan i, pajumpang anak nami dohot boru ni raja i, gabe masihaholongan nasida, jala sian dos ni rohana mangalua nasida, jadi nungnga huparaja hami boru ni raja i gabe parumaen nami.

Rajanami, nasai leleng na on sai marungkil do rohanami naeng ro mandapothon hamu Hulahulanami, ai manghilala do hami dihahurangan nami, alai mambege barita ni raja i Hulahula nami na burju jala na elek marboru, gabe huhabaranihon hami ro diari nauli di ari na denggan on mandapothon raja i Hulahula nami, manungkun utang somba ni uhum nami. Pos do roha nami, naso patuhukkonon ni raja i naso tartuhuk hami, ima rajanami sitangkasna di sihombarna songon nahundul di siudurna songon namardalan, disiangkup ni panggabean parhorasan i. botima.

Rs : Horas jala gabe ma hita amangboru/raja ni boru, tingkos songon nidok muna i, ianggo ninna adat dohot uhum, dang patutna dope pintor pahundulon nami hamu di lage tiar, ala i marningot tona ni 0mpunta sijolojolotubu, dang jadi tulahon halak nasala molo ro manomba nomba.

Nuaeng pe amangboru, nungnga huhalashon hami haroromu naon, alai asa boi udutanta panghataionta, ala dang dipatupa hamu dope adat panuruknuruhon, pasahat hamu ma jolo :

* Ungkap harbangan (tu dongan tubu)

* Sangke hujur (tu dongan sahuta)

* Pangihuihut (tu boru)

Udut tusi amangboru/raja ni boru, hombar tu boaboa muna, na manungkun adat somba ni uhum/manungkun utang do haroromuna, ba, pasahaton muna ma sinamot na godang na tau palashon rohanami Hulahulamuna, disima lombuna disima horbona, disima hodana disima dohot mas na; alai nidok pe songon i, boi do i gantion muna dohot ringgit na mardiring natinopa ni pamarentanta, asa ummura tiopon nami, ba lehon hamuma Rp.  …… juta.

Ra : Horas jala gabe ma hita rajanami, taringot tu pangidoan ni raja i,  dang napola manjua hami nian disi, aut na adong/boi patupaon nami, alai songon nidok ni situatua, hansit do tangan mandanggurhon na soada. Rajanami, marsomba hami dihata sidohonon nami, molo tung siat nian pangidoan nami andorang so tahatai gollitgollitna, parjolo ma jolo hupangido hami bentuk ni sinamot i, rambu pinungu ma goarna rajanami, botima. (nisurathon pe dison rambu pinungu, holan sekedar contoh do i)

Rs : Molo songon i ma pangidoan muna amangboru/raja ni boru, jolo hualap hata ma jolo sian angka Dongan tubungku, Dongansahuta, Boru, Pariban songon i nang sian Hulahula nami, lumobi sian Suhi ni ampang na opat sahat tu Suhut sihabolonan nami. (laos dipasungkunhon ma pangidoan ni pamoruon i tu sude pihak ni parboru, mangihuthon horong na be; molo dang satolop nasida, diparis ma jambar hata masibahen penawaranna be, alai molo satolop sude, dihatahon ma i tu paranak ninna ma)

       Amang boru/Raja ni boru, nungnga denggan hami masialapan hata jala nungnga satolop hami mangoloi pangidoan muna i, nuaeng pe undukhon hamuma amangboru/Rajani boru sinamot na hudok i si Rp…juta i, botima.

Ra : Rajanami, marsomba hami dijarijari sampulu pasampulusada simanjujung, suang songon nahudok sinangkiningan rajanami, hansit do tangan mandanggurhon nasoada, holan mangasahon asi ni roha do rajanami umbahen na barani hami ro mandapothon hamuna Hulahulanami.

       Rajanami, dinalaho borhat hami sian jabunami, jolo marpungu do hami dipapungu suhut nami, martangiang mangido pangurupion sian Debata parasiroha i; mardomu tusi rajanami, napinaborhat ni tangiang i ma naboi huhatahon hami, botima.

Rs : Molo songon i ma pangidoan muna amangboru/raja ni boru, jolo hualap hata ma jolo sian angka donganhu (laos dipasungkunhon ma pangidoan ni paranak i tu sude pihak parboru ninna ma) : Nuaeng pe dihita namarhaha mar anggi/na mar Dongantubu, Boru, Dongan sahuta, Pariban, songon i nang Hulahula nami, lumobi di suhi ni ampang naopat dohot suhut sihabolonan nami, nungnga rampak mambege hita dipangidoan ni pamoruanta, asa napinaborhat ni tangiang ma dipangido nasida sihatahonon nasida, songon dia dos ni rohanta, pinasahat ma hataon tu :

       * Dongantubu (dialusi)

       * Boru (dialusi)

       * Dongan sahuta (dialusi)

       * Pariban  (dialusi)

       * Hulahula (dialusi)

       * Suhi ni ampang na opat  (dialusi)

       * Suhut sihabolonan (dialusi) 

       (molo dang satolop nasida, diparis ma hata i masibahen pandapotna be, alai molo satolop do sude, dihatahon ma i tu paranak) ninna ma :

       Amangboru/rajani boru, nungnga denggan hami masialapan hata, jala nungnga satolop hami mangoloi pangidoan muna i, hatahon hamu ma napinaborhat ni tangiangmuna i dohot sude rencana naung ni konsep muna, botima.

Ra : Mauliate godang ma rajanami, sai horas ma hita jala gabe tumpahon ni amanta namartua Debata parholongroha i; jadi songon on ma rencana nami rajanami :

       * Sinamot (isarana rambu pinungu)

       * Godang ni sinamot Rp. …..

       * Bolahan amak (molo mangadati, nungnga pasti bolahanamak paranak)

       * Mata ni ulaon/Pesta (arina, bulan, taon, mulai pukul piga)

       * Inganan ni Pesta.

       * Torop ni undangan,

       * Parjuhutna.

       * Bentuk ni parjambaran.

       * Godang ni ulos herbang.

       (dohot angka na asing na mardomu tu pesta mangadati nanaeng sipatupaon); songon i ma rajanami naung hurencanahon  hami, botima.

Rs : Mauliate ma amangboru/rajani boru, nungga dipatorang hamu tu hami angka rencana muna, nuaeng pe pinangido ma paniroion sian angka dongan (laos dipaliat ma hata i tu sude pihak parboru asa masibahen tanggapanna/paniroionna be. Dung sidung masibahen tanggapan na be, didok ma muse hatana ninna ma) :

       Amangboru/rajani boru, nungnga singkop sude tahatai jala tatolopi angka namardomu tu ulaon pesta nanaeng sipatupaonta, molo tung adong angka natinggal angka nalupa, ba, sai naboi dope masipaingotan suhut sihabolonanta, jadi nuaeng pe paboa naung satolop hita diangka naung tahatai i, pasahat hamu ma patujolo ni sinamot, botima.

Ra : Nauli rajanami, nungnga rade hami (dijalo ma hepeng patujolo ni sinamot i sian suhut paranak, laos disuru ma sahalak pamoruan na pasahathon i tu parhata ni paboru) huhut didok ma hatana ninna ma : ima rajanami patujolo ni sinamot godangna Rp …, jala panggohina Rp. …. nari, pasahaton nami ma i di mata ni ulaon/ pesta, las ma roha ni raja i manjalo i, botima

Rs : Mauliate amangboru/raja ni boru, dison nungnga sahat hujalo hami patujolo ni sinamot godangna Rp. … jala panggohina Rp. … nari pasahaton muna dope di mata ni ulaon/pesta i, nungnga las rohanami manjalo i. (udut tusi dipasahat ma patujolo ni sinamot i tu suhut sihabolonan huhut didok ma hatana ninna ma) :

       Dihamu suhut sihabolonan nami, dison nungnga dipasahat pamoruanta marga… patujolo ni sinamot godang na Rp. … jala pasahaton nasida dope panggohina dimata ni ulaon/pesta godangna Rp…. nari, sai manumpak tu nauli manumpak tu nadenggan ma on sinamot ni borunta on pangkeon muna laho patulus ulaonta nanaeng ro, las ma rohamuna manjalo. (udut tusi didok ma muse hatana tu paranak ninna ma) : Amangboru/rajani boru, asa rasmi angka naung tahatai i, songon nidok ni situatua:  hori ihot ni doton, hata si ingoton, tapasahat ma Ingot ingot, asa dihatahon dongan sahutanta, lehon hamu ma nasian hamu asa hutambai hami, botima.

Ra : Nauli rajanami, nunga huparade hami, indion ma ingot ingot sian hami, godang na Rp…. (laos disuru ma sahalak pamoruanna pasahathon i tu parhata ni parboru)

Rs : Mauliate ma amangboru/rajani boru, (laos didok ma tu suhut parboru asa ditambai ingot ingot nasian paranak i satonga ni na nilehon nasida i, udut tusi dipasahat ma ingot ingot i tu dongan sahuta/STM (dongan tubu molo dibona pasogit). Dijalo Dongan sahuta ni parboru ma ingot ingot i jala dipangido ma asa dohot dongan sahuta ni paranak jongjong rap dohot nasida, alai dongan sahuta ni parboru do ianggo na manghatahon, ala di alaman/dijabu nasida do dipatupa ulaon manungkun utang. Dihatahon dongan sahuta/STM ma ingot ingot i ninna ma : Sadarion diari nauli diari na denggan on, ari… tanggal …bulan … taon …nungnga sahata satolop paranak marga… dohot parboru marga… patupahon pesta pangadation ni anak dohot boru di ari … tanggal… bulan…taon…inganan di…mulai pukul., sinamot rambu pinungu/sinamot hibul godangna Rp.., patujolo ni sinamot nungnga dipasahat paranak tu parboru godangna Rp…, panggohina Rp…. nari, pasahaton ni paranak ma i tu parboru dimata ni ulaon/pesta; torop ni undangan sian pihak parboru hirahira ….halak, parjuhutna….., bentuk ni parjambaran: ulu ni dengke mangihut/niadopan, ulos herbang sipasahaton ni parboru tu paranak godangna …lbr. Songon i ma naung husurathon hami dison, molo adong dope nahurang, masipaingotan hita (molo adong nahurang/sitambaan, dipasahat/dipaboa ma i tu dongansahuta asa disurathon /dihatahon), dung hira singkop sude, didokma hata nauli nadenggan ninna ma : Dihamu suhut nami nadua pihak, paranak dohot parboru, songon nidok ni umpasa ma dohonon nami :

Balintang ma pagabe, tumundalhon sitadoan,

ari muna do horas jala gabe,

ai tangkas do hamu masipaolo oloan.

Eme sitambatua parlinggoman ni siborok,

amanta Debata do pangalapantua,

sai horas ma hita saluhutna diparorot.

Sahat ma solu tinogu tu bontean.

sai leleng ma hita mangolu diparhorasan di panggabean

Dison nungnga hujalo hami ingot ingot sian suhut paranak dohot sian suhut parboru godangna Rp… , rap marningot ma hita di ulaonta nanaeng ro. Hori ihot ni doton, hata si ingoton, rap mandok ma hita 3x ingot ingot.

     Panimpuli ni ulaon i, sian Tulang/Hulahula ni parboru ma mambahen tangiang panutup, jala dung sidung tangiang, dibagihon ma ingot ingot:

*   Di ulaon manungkun utang, adong deba namambahen tandok namarisi indahan dohot dengke,boanon ni paranak songon na marpudun saut alai nadeba dang mambahen, hape mangihuthon hatorangan ni angka natuatua, simbol ni parhataan naung pinudun do tandok nanipudun i, manang simbol ni ketetapan do i songon nidok ni hata nuaeng.

*  Nisurathon pe dison bentuk ni sinamot rambu pinungu, holan tudosan (contoh) do i.

*  Dibeberapa daerah peradatan, dongansahuta do parjolo manise/manungkun pihak paranak, dung pe dialusi jala  dipaboa pihak paranak maksud dohot tujuan ni haroro nasida asa dipasahat Dongan sahuta i tu pihak parboru. Dung nipasungkunhon namasa on tu angka dongan natuatua/para kritisi adat, didok nasida, molo songon i, gabe tubu ma pangantusion, hira na tolu pihak suhut sihabolonanna, hape ulaon, sidua hasuhuton do.

*  Benarkah na mardongan sahuta /STM  itu sisada anak sisada boru ? Kalau benar, berarti tidak boleh saling mengawini.

2.2. Pesta pasahat adat na gok (Mangadati).

        

Dung salpu ulaon manungkun utang, mardalan ma gonghon dohot jou jou tu angka tutur dohot tondong, dipihak ni paranak nang dipihak ni parboru. Diari naung binuhul, dipartingkian naung tinontuhonna i, jongjong ma hasuhuton paranak rap dohot ianakhonna na mangadati i dilambung pintu, manomu/manjalo haroro ni angka tutur dohot tondong/undangan.

    

Digorahon protokol ma asa masuk parjolo sude undangan ni paranak so padohot Tulang, udut tu si, digora ma asa masuk uduran ni Hulahula laos mangihut ma di pudinasida uduran ni Tulang (sijalo tintin marangkup) jala di patudu Protokol ma inganan parhundulan nasida. Dung masuk sude tutur/undangan, hundul ma hasuhuton di inganan parhundulanna, songon i ma marpungu undangan i di inganan naung pinarade ni paranak (dijolo jabu manang pe di wisma). Mangalap hata ma paranak tu Hulahulana, manungkun manang na boi jolo martangiang mangan asa dipasahat Tudutudu ni sipanganon; umumna pintor dioloi Hulahula do i, ala manghilala di haporluan ni situan natorop. Dung sidung tangiang mangan, dipasahat paranak ma Tudutudu ni sipanganon, huhut didok ma hatana ninna ma: Dihamu Hulahula nami nahuparsangapi hami, dison hupasahat hami Tudutudu ni sipanganonta, parhitean nami pasangaphon raja i, Hulahula nami, songon nidok ni umpasa ma dohonon nami,

Sitiktik ma na gompa, hodong lais ni ruma.

Otik so sadia pe natupa, sai godang ma pinasuna.

las ma roha muna. Ima tutu.

Udut tusi dipasahat parboru ma dengkena tu pamoruanna huhut didok hatana ninna ma: Dihamu pamoruon nami, dison hupasahat hami Dengke sitiotio (ulu ni dengke simbol ni siboru muli) rap dohot dengke simudurudur (simbol ni panaru), sai tio ma parnidaan muna mangalului siluluan muna, rap mudur hamu tu dolok dapotan las ni ari, mudur tu toruan dapotan mual natio, songon nidok ni umpasa ma dohonon nami :

Sitiktik ma na gompa, golang golang pangarahutna,

otik so sadia pe na tupa, sai godang ma pinasuna,

las ma roha muna, ima tutu.

(masijalangan laos mulak tu angka ingananna be).

     

Udut tusi, dipasahat Tulang (sijalo tintin marangkup/ sijalo upa tulang) ma dengkena huhut didok hatana ninna ma : Di ho Bere/di ho Boru, dison ro do hami Tulangmu pasahathon Dengke sahat jala Dengke Simudurudur, nungnga sahat nasininta ni roha, sai rap mudur tu dolok ma hamu dapotan las ni ari, mudur tu toruan dapotan mual natio.

Sitiktik ma na gompa, golanggolang pangarahutna,

otik so sadia pe natupa, sai godang ma pinasuna,

las ma rohamuna, ima tutu.

(Molo naung disepakati hinan ditingki na manugkun utang bentuk ni parjambaran ulu ni dengke mangihut/jambar mangihut, pintor langsung nama hasuhuton nadua pihak masibagi parjambaranna be hombar tu adat ni suhut sihabolonanna, alai molo dang di seat hata hinan dope, berlaku ma marjambar niadopan, ingkon jolo hataan ma songon dia parbagina. Asa boi tatorushon, ta anggap ma jolo naung disepakati parjambaran ulu ni dengke mangihut/jambar mangihut).

     

Dung sidung marsipanganon, ditutup ma jolo parmanganon i dohot tangiang simpul mangan sian pihak paranak/ Pangula ni Huria (nasomal niida, sai jolo dibahen do ende sa ayat dua ayat). Dung sidung i, mangalap hata ma paranak tu parboru mangido tingki laho mangido /manjalo Pangurupion/Tumpak; udut tusi, diatur ma parhundulon, laos marudut ma tu na masiparenggetan mamillit raja parsinabung. Dung tarpillit raja parsinabung ni na dua pihak, dipaborhat paranak ma pinggan na marisi Boras siriburribur, Tangotanggo na bolon, Ringgit na mardiring dohot Napuran daonbari, tu raja parsinabung ni parboru, ima nanigoaranna Pinggan panungkunan. (=Parhitean manungkun). Dung sahat pinggan panungkunan i tu parsinabung ni parboru, dipungka /dimulai ma marhata. (Raja sungkun sian parboru = Rs.; Raja pangalusi sian paranak = Ra.).

Rs : Manghatai ma hita amangboru/raja ni boru.

Ra : Manghatai ma hita tutu rajanami, nungnga rade hami.

Rs : Ompu raja Ijolo, martugkot sialagundi.

       Adat napinungka ni parjolo, ido ihut ihuton ni na dipudi.

       Adat i do nataula, elek marboru somba marhulahula.

       Manat mardongantubu, burju mardongan sahuta.

       asa tu sanggar antong amporik, tu ruang ia satua.

       anggiat sinur napinahan, gabe naniula.

       Horas ma antong hita jolma.

       - Gonghon  sipaimaon, joujou sialusan.

          nungnga marpungu angka raja nanigonghon,

          rade maniroi di inganan hinundulan .

          diloloan na bolon, di antaran nabidang.

          pangantaran ni anak, pangantaran ni boru.

          asa balintang ma i pagabe, tumundalhon sitadoan.

            sai na horas do hita jala gabe, molo olo hita masipaolo oloan.

          -  Nungnga bosur hita mangan, mahap marlompan juhut. pamurnas ma i tu daging, sudara tu bohi.

            sipasindak panaili ma i, sipaneang holiholi. 

       Dison pinggan panungkunan, pinggan na hot di ojahan.

       panungkunan di panggabean, panungkunan di parhorasan.

       pinggan na marisi :

       * Boras siribur ribur, boras sipir ni tondi.

           asa pir ma tondi madingin, horas tondi matogu.

           saluhut na ma hita madingin, jala leleng mangolu.

       *  Tanggo tanggo nabolon, dalan patogu partuturon.

           sai tanggo jala togu ma partuturonta,

           tumpahon ni amanta namartua Debata.

           asa sinuan bulu ma i sibahen na las,

           sinuan ruhut partuturon sibahen na horas.

           Sitorop ma  bonana, sitorop nang bulung na.

           torop ma Hulahulana, mangihut ma dohot Boruna.

       *  Ringgit na mardiring, ringgit sitio soara.

           sai pasupasu nauli ma ro mariring iring,

           tu hita on saluhutna.

           tumpahon ni amanta, namartua Debata.

           asa lomak ma silinjuang, lomak so binaboan.

           sai dapot angka naniluluan, jumpang na jinalahan.

       * Napuran daonbari, atuk ni alumniate (napuran mauliate).

           sai manumpak ma Debata sibahen na jadi (Mulajadi),

           patutna ma antong dohononta mauliate.

           Eme sitambatua ma i, parlinggoman ni siborok.

           Amanta Debata do pangalapan tua,

           sai horas ma hita saluhutna diparorot.

           Mauliate ma di Tuhanta.

  (laos dilapik ma hata ni pinggan panungkunan i, manjaga atik tung adong na tading/nahurang/nasala, ninna ma) :

       Siup do mula ni tabas, hata marhuhuasi.

       mangunduk simanjujung, marsomba jarijari.

       jarijari sampulu, namarsiganjang ganjangi.

       Asa ampang ma i dijolojolo, panguhatan dipudi pudi.

       atik tung adong hata ni pinggan panungkunan on nahurang hupandohi,amanta namartua Debata ma na tangkas manggohi.

       Amang boru/raja ni boru, jolo hu pahot ma jolo hata i atehe, asa hupahehe pinggan panungkunan on tu hamu?

Ra : gabe rajanami.

Rs : (Dipangido/dijalo ma hepeng sian suhut parboru laho ulak ni pinggan panungkunan i satonga ni na nilehon ni paranak jala dibahen/dipamasuk tubagasan pinggan panungkunan i. Jongjong ma parsinabung i, ditiop pinggan i, huhut didok ma hatana ninna ma) :

       Martua hupahot, sai hot ma hata ni angka raja,

       napinahot ni amanta na martua Debata.

       Martua hupahehe, sai hehe ma panggabean parhorasan dihita on saluhutna, ima tutu.

    

    (laos dijou ma sahalak pamoruanna pasahathon pinggan panungkunan i tu parsinabung ni paranak), jala diuduti ma muse ninna ma : Amangboru/raja ni boru nungnga pinasahat pinggan panungkunan tu jolomuna, mangihut ma sungkun sungkun nami, dia ma i langkatna dia ma i unokna, dia ma i hatana dia ma i nanidokna.

Ra : Gabe jala horas ma hita rajanami, ia marpanungkun ma raja i di sintuhu ni indahan masak nasosadia i, songon nidok ni situatua ma dohonon nami rajanami, godang sibutong butong otik sipir ni tondi,

      

       sitiktik ma na gompa, hodong palupaluna,

       otik so sadia pe natupa, sai godang ma pinasuna;

       ianggo hata ni i rajanami sigabegabe sihorashoras do nanidokna, botima.

Rs : Horas jala gabe ma hita tutu amangboru/rajaniboru, ba dohonon nami ma songon nidok ni umpasa :

       Bagot namarhalto ma i naniagatan di robean,

       sai horas ma namanganhon,

       lam tu tambana dihamu na mangalean.

       Alai amangboru/rajani boru, songon nidok ni situatua, marangkup do nauli mardongan nadenggan, asa tangkas uju purba tangkasan uju angkola, anggiat tangkas hita maduma, tumangkas ma namamora; sihombarna songon na hundul, siudurna songon na mardalan, siangkup ni parhorasan panggabean i, tangkas ma rajani boru marboaboa, botima.

Ra : Horas jala gabe ma hita rajanami, ia marpanangkasi ma nuaeng raja i disihombarna songon na hundul di siudurna songon na mardalan, di siangkup ni panggabean parhorasan i, ba tangkas ma tutu nang hami marboaboa.

       Rajanami, dung huparaja hami boru ni raja i gabe parumaen nami, disangkapi rohanami do nian tibu  pasahaton nami somba ni uhum nami dibagasan adat na gok tu hamu Hulahula nami, alai songon nidok ni situatua rajanami: hatop adong niaduna, lambat adong pinaimana, ba saonarion ma rajanami dilehon amanta Debata parasiroha i tingki nauli tingki na denggan tu hami, laho pasahathon adat na gok tu hamu Hulahula nami; laos dalan nami mai mangido tangiang pasupasu sian hamu raja i Hulahulanami anggiat gabe rumatangga nahasea nasida nian dijolonta lumobi dijolo ni Tuhanta, ba i ma rajanami sitangkasna, siangkup ni panggabean parhorasan i, botima.

Rs : Mauliate amangboru/Rajani boru, nungnga pitu lilinami paualu jugia nami, nungnga uli nipinami ala ro hamu pasahat adat na gok tu hami, paborhat ma amangboru/raja ni boru Helanami rap dohot Boru nami palashon roha nami.

Ra : Nauli rajanami (laos dipaborhat/disuru ma naniadathon i manaruhon sinamot i. Molo na mangadati, langsung do ninna naniadathon i pasahathon sinamot i tu suhut parboru /natorasna).

Rs : Amang boru/ raja ni boru, pasahat hamu ma panandaon tu suhi ni ampang naopat:

       * Pamarai (sada sian haha anggi ni suhut)

       * Tulang (sada sian Tulang ni na muli/na niadathon)

       * Simolohon. (sada sian iboto ni na muli/na niadathon)

       * Pariban (sada sian pariban ni na muli/ naniadathon)

      Diuduti ma muse ninna ma: Amangboru/raja ni boru, nungnga sahat panandaon tu suhi ni ampang naopat i, ba sipasahaton muna dope panandaon tu angka pangalambungi dohot panauri, alai ala tumangkas ma i partording ni parsolhoton partuturon i di paidua ni suhut nami, didok roha, dumenggan ma paidua ni suhut i manggorahon i (laos didok ma hatana tu paidua ni suhut parboru ninna ma): Dihamu paidua ni suhut nami, nungnga dipasahat pamoruanta sinamot ni borunta jala nungnga sahat panandaon tu suhi ni ampang naopat, alai sipasahaton nasida pamoruanta dope panandaon tu angka hita pangalambungi dohot panauri. Ala tumangkas do dihamu partording ni parsolhoton di partuturon i, dihilala roha, dumenggan ma, molo hamu na manggorahon/ mangidohon i tu pamoruanta, nuaeng pe pinasahat ma tu hamuna, botima.

       Dijalo paidua ni suhut ma hata i ninna ma : mauliate ma dihamu parsinabung nami, hujalo hami ma hata i. Udut tusi didok ma hatana tu paranak: Amang boru/raja ni boru, nungnga sahat tu hami sinamot ni boru nami dohot panandaon tu suhi ni ampang naopat; andorang so tauduti panandaon tu angka hami pangalambungi dohot panauri, parjolo ma jolo pasahat hamu panggurguri tu raja parsinabung nami, (laos diuduti  paidua ni suhut i ma manggorahon panandaon i tu sude angka pangalambungi dohot panauri na patut manjalosa mulai sian na sumolhot. Tontu nungnga di konsep paidua ni suhut hinan i).

     

    Dung sidung dipasahat panandaon i tu angka pangalambungi dohot panauri di pihak parboru, dipasahat ma tu Hulahula/Tulang ni namuli, asa nasida manggorahon tu angka uduranna, ninna ma : Dihamu Hulahula/Tulang nami, hamu ma Tulang  manggorahon panandaon tu angka uduranmuna, nuaeng pe pinasahat ma tu hamu, botima.

       

    Dijalo Tulang ma hata i ninna ma : mauliate ma dihamu pamoruan nami, sai tongtong do dipasangap hamuna hami Hulahulamuna, hujalo hami ma hata i, (laos didok ma hatana tu pihak paranak ninna ma) : Dihamu berenami, pamoruan ni boru nami, pasahat hamu ma panandaon tu hami Tulang ni parumaenmuna (digoari ma angka na patut manjalo i dipihak ni Tulang), dung singkop sude, didok ma hatana tu pihak parboru ninna ma: Dihamu pamoruan nami, nungnga sahat hujalo hami panandaon tu hami Tulang/Hulahula muna, nuaeng pe pinasahat ma tu hamu, botima.

       

   Dijalo paidua ni suhut parboru ma hata i laos didok ma hatana tu paranak, ninna ma : Amangboru/rajani boru, nungga singkop be nian panandaon tu hami dohot tu Tulang/Hulahula nami, alai bangko ni jolma do sai adong nahurang gok, jadi pasahat hamuma jolo panggohi ni nahurang gok (sipata digoari do i Sirambe manis jala satonga ni ido muse panggohi ni ulos ulos / ulos tinonun sadari tu paranak), dung dipasahat paranak panggohina i, ninna ma: nungnga tung sirsir be amangboru /Raja ni boru, tauduti ma, botima.

Ra : Mauliate ma rajanami, songon nanidok muna i nungnga singkop be sude sahat, na aturan sipasahaton nami, nuaeng pe rajanami, andorang so hupangido hami sipangidoon nami, parjolo ma jolo nian tapasahat Tintin marangkup tu Tulang ni Helamuna, songon ima pangidoan nami rajanami, botima.

Rs : Nauli ma i amangboru/rajani boru, alai pasahat hamu ma jolo tu hami asa hutambai hami jala rap borhat ma hita raja ni boru asa patandahon hamu tu hami Tulang ni Helanami i naung gabe ampara nami, botima. (nasomal ni ida, satonga ni nasian paranak do ditambai parboru; dibahen ma hepeng Tintin marangkup i tubagasan pinggan, rap hehe borhat ma nasida mandapothon Tulang ni Hela, laho pasahathon Tintin marangkup i.).

       Laho pasahathon i didok parboru i ma hatana ninna ma :

       Didok situatua: hot do jabu i, dimpos margulanggulang

       boru ni ise pe dialap bere i, hot do i boru ni tulang.

       Ala naung dialap beremuna borunami, ba tong do borumuna nang boru nami i, gabe sisada boru ma hita; hami pangintubu hamu do ianggo painundun, haha nami ma hamu, anggimuna hami diparadatan. Nungnga hujalo hami sinamot ni borunta i sian pamoruanta, jadi songon tanda ni naung sisada boru hita, hupasahat hami ma tu hamu Tintin marangkup, jala songon nidok ni umpasa ma dohonon nami :

       Sitiktik ma nagompa, hodong lais ni ruma.

       otik so sadia pe na tupa, sai godang ma pinasuna.

       Las ma rohamuna, botima.

       (Dijalo Tulang ni hela i ma hepeng Tintin marangkup i laos didok ma hatana ninna ma):

       I do tutu nang mangihuthon ruhut ruhut ni paradatonta, hot do jabu i, dimpos margulanggulang, boru ni ise pe dialap bere i, hot do i boru ni Tulang; jadi, boru nami do tutu nang boru muna i. Toho ma i sisada boru hita, hamu pangintubu hami painundun. Dipasahat hamu Tintin marangkup tu hami, tanda naung sisada boru hita, mansai las rohanami manjaloi.

       Bagot na marhalto ma i naniagatan dirobean, horas ma hami namanjalo, lam tu tambana dihamu namangalean

      Nuaeng pe, mangido ma hami tu amanta namartua Debata anggiat disahaphon jala disampehon ma tu nasida songon nidok ni umpasa on :

       Marurat tu toru ma i borunta i, marpusuk tu ginjang.

       mangerbang tu siamun, mangerbang tu hambirang.

       tubuan laklak i tubu singkoru, solotan bunga bunga.

       tubuan anak i tubuan boru, togutoguon nasida sahat tu na saur matua.

       Giringgiring ma gostagosta,

       tibu nasida mangiringiring jala mangompaompa.

       Bintang na rumiris tu ombun na sumorop,

       anak dinasida riris dohot boru pe antong torop.

       Sahat ma solu tinogu tu bontean,

       nungnga sahat hujalo hami tintin marangkup on,

       sai sahat ma hita tu parhorasan panggabean, botima.

       (masijalangan ma nasida laos mulak hundul tu ingananna be.)

Ra : Rajanami, nungnga sahat be Tintin marangkup tu Tulang ni Helamuna, ima Hulahulanami, nuaeng pe nungnga rade hami parulosan muna; pasahat hamu ma jolo :

* Ulos pansamot.

* Ulos Hela. (+ Mandar)

* Ulos tu suhi ni ampang naopat:

- Pangamai/siungkap bahal (sada sian haha anggi ni Suhut)

- Parorot. (sada sian iboto ni suhut/namboru ni pangoli)

- Simandokhon. (sada sian haha anggi ni pangoli)

- Sihunti ampang (sada sian iboto ni pangoli).

(diuduti parsinabung ni paranak i ma muse ninna ma);

Rajanami, nungnga dipasahat hamu Ulos pansamot, Ulos Hela dohot Ulos tu sude suhi ni ampang naopat, mangido dope hami rajanami asa pasahaton muna nian Ulos tu angka hami pangalambungina dohot tu panaurina, alai ala tumangkas ma partording ni parsolhoton partuturon i di paidua ni suhut nami, didok roha tumangkas ma paidua ni suhut nami annon mangidohon i tu raja i . (laos didok ma hatana tu paidua ni suhut paranak ninna ma) : Dihamu paidua ni suhut nami, nungnga dipasahat Hulahulanta ulos tu Pansamot, Hela dohot tu sude suhi ni ampang naopat, udut tusi sipangidoonta dope Ulos sian Hulahula i, tu angka hita pangalambungi dohot panauri. Ala tumangkas do partording ni parsolhoton partuturon i di hamu, dihilala roha, tumangkas ma i molo hamu na mangidohon, nuaeng pe pinasahat ma tu hamu, botima.

(dijalo paidua ni suhut paranak ma hata i ninna ma: Mauliate ma dihamu raja parsinabung nami, hujalo hami ma hata i ; laos diuduti ma hatana tu parboru ninna ma:) : Rajanami, asa di tiur ni ari nian ulosan muna Hela dohot Borumuna, molo tung siat pangidoan nami rajanami, parjolo ma jolo Ulos panoropi/ Ulos holong pasahat hamu, botima.

Rs : Nauli raja ni boru. (laos diaturhon ma partording ni na pasahat Ulos holong/Ulos panoropi. Mangihuthon nasomal ni ida, tar songon on ma partordingna) :

* Kelompok suhut parboru.

* Dongantubu

* Boru.

* Dongan sahuta

* Hulahula (Tulang, Bona tulang, Bona ni ari dohot Tulang rorobot, masiaturan ma nasida).

Dung sidung na pasahat Ulos holong, dilapik ma hata, atik tung adong dope sian pihak parboru napasahat Ulos.

Molo dung singkop sude, dipaboa ma tu pihak paranak naung sidung napasahat Ulos sian nasida. Udut tusi, dilehon Parsinabung ni paranak ma tingki tu sude Hulahula nasida (pihak paranak) pasahat Ulosna. Dung sidung na pasahat Ulos holong, di uduti ma tu na pasahat, Ulos tinonun sadari/ulosulos, jala dung sidung na pasahat Ulosulos/Ulos tinonun sadari dohot panggohi ni nahurang gok (sirambe manis), sahat ma tu na marhata si gabegabe.

Najolo, ganup horong Hulahula do mandok hata sigabegabe tu pihak paranak, alai diangka tingki na parpudion, mardos ni roha ma pihak Hulahula, asa holan suhut parboru ma na pasahathon hata sigabegabe i laos paampuhonsa, jala hirahira songon on ma didok hatana :

Dihamu Hela dohot Borunami,songon nidok ni situatua ma dohonon nami:

Mardalan tu purbatua, jolo boluson do parsingkaman,

halak na burju marnatuatua, tiur tiur do dapotonna pandaraman.

Hushus do rugirugi, angur ia banebane,

sai tubu ma dihamu boru na uli jala boru sigodang eme,

dohot anak na pantas marroha, na bisuk jala na pande,

naboi patota gora, jala jolma sipardame,

asa luhut hita martua, sude ma hita gabe.

Songon i ma nang dihamu pamoruan nami marga …dohonon nami ma tu hamu songon nidok ni umpasa :

Tampuk ni si baganding didolok ni pangiringan,

Horas jala gabe hamu na marhaha maranggi

tu dolok tu toruan sai masipairing iringan.

Songon ansimun sisada holbung,

tu pege na sangkarimpang,

tu toru rampak manimbung,

mangangkat rampak tu ginjang.

Sitorop ma bonana, sitorop nang bulungna.

Torop ma Hulahulana, mangihut ma dohot boruna.

Nuaeng pe, paampuhonon nami ma hata panggabean parhorasan i tu hamu pamoruan nami,

Horbo sitingko tanduk ma i, sisapang na ualu

parbutuha mangalilit parmata mangalualu

Marjampal i di balian, mulak tu bara marngalungalu

angka hata parsaulian, namardongan hata pasupasu

sai ampu ma i diampuan muna, tangkas martonga ni jabu.

Sahat ma solu i tinogu tu bontean,

sai leleng ma hita mangolu di parhorasan di panggabean,

Gabe ma na manggabei, gabe ma nang nani gabean.

(Jolo dijalo parhata ni paranak ma jolo hata i dung i pe asa dipasahat tu suhutna ninna ma) :

Harbangan ma i dalan tu huta, balatuk dalan tu jabu.

Hata nauli napinasahat muna, ampuon nami ma i martonga ni jabu.

Turtu ma ninna anduhur, tiotio ninna lote,

hata pasupasuan na uli i, sai unang ma muba unang mose.

Tingko ma Inggiringgir, bulungna i ratarata,

hata pasupasuan nauli i, sai pasauthon ma amanta namartua Debata.

Nuaeng pe dihamu hasuhuton nami, rap jongjong ma hita asa ampu hamu ma panggabean parhorasan i, botima.

(Rampak jongjong ma hasuhuton paranak huhut ditiop rambu ni ulosna songon na pataridahon rasa hormatna somba marhulahula, diampu nasida ma hata pasupasuan i ninna ma)

Naung sampulu pitu ma i jumadi sampulu ualu,

hata pasupasuan na uli i,

huampu hami ma i martonga ni jabu.

Ampu ma i diampuan nami, puak di abara nami.

Sahat ma solu tinogu tu bontean,

nungnga sahat huampu hami hata pasupasuan i,

sai sahat ma hita tu parhorasan panggabean. Botima.

Udut tusi, dipasahat nadua pihak ma hepeng tu dongan sahuta/STM, ima nanigoaranna Olopolop. Rampak jongjong ma dongan sahuta/STM ni nadua pihak, alai bolahan amak ma ianggo na manghatahon olopolop i. Ditariashon dipaboa ma disi naung dipasahat paranak adat na gok tu parboru, laos didok ma tu situan natorop asa rampak mandok Olop olop 3x 

Manimpuli ulaon i dibahen Tulang ma tangiang panutup, sidung i dibagihon ma hepeng olopolop i.

Di ulaon mangadati, dang patut be bahenon adat paulak une dohot tingkir tangga (ulaon sadari), ai di jolo jabu ni paranak do inganan pangadationna, jadi nungnga laos disi dianggap tingkir tanggana. Tanggung jawab ni na mangaluahon do na niluahonna, manang songon dia pe i, naung une do i di ibana, jadi, dang patutna be pamasaon adat paulak une, songon i ma pandok ni angka natua tua/para kritisi adat

Tweet

Subscribe to receive free email updates: