9. Malua sian panghangkungion / Lepas Sidi

Suang songon pesta adat tardidi, songon i do nang na mamestahon na malua sian panghangkungion/Lepas sidi. Dung mulak sian Gareja, dipatupa ma acara pangharoanion (syukuran); angka tutur dohot tondong, nungnga marpungu di jabu paimahon. Masisungkunan masipatangkasan ma jolo nasida, manang naung boi mulaan acara manang na adong dope sipaimaon. Molo dung satolop laho mamulai acara, jongjong ma paidua ni suhut/protokol didok ma hatana ninna ma :

Santabi godang ma di Amanta rajaraja dohot Inanta soripada; didok situatua, molo mardalan Raja, ingkon jolo patiuron do dalan sidalananna, asa unang sungkotsungkot manang tartuktuk patna; jadi, andorang so tamulai acara, parjolo ma jolo hupaandarhon hami konsep partording ni ulaonta sadarion. Mangihuthon naung huhasomalhon hami tar songonon ma partording na :          

* Mangambangi na malua/lepas sidi.

- Suhut/paidua ni suhut pasahat Tudutudu ni sipanganon tu jolo  ni na malua.

- Hulahula (Tulang ni na malua) pasahat sipasahatonna (Dengke) Laos marudut ma tu hahaanggi nasida, pasahat sipasahatonna.  (molo adong).

* Marsipanganon (makan bersama), tangiang mangan dohot huhuasi ni  sipanganon sian pihak suhut.

Santabi ma di raja i Hulahulanami, dang namangorui disangap ni raja i, alai ala ulaon sisada hasuhuton do ulaonta sadarion, na rap mangambangi do hita di si--- (didok goar ni na malua); mangihuthon naung somal huulahon hami, ditingki namarsipanganon i ma hita, hupadalan hami namargoar ni Tudutudu ni sipanganon, langsung ma i sian jolo nami, jala mangihuthon adat ni suhut nami. (Porlu ingotonta: dang na marbagi jambar di ulaon sisada hasuhuton)

*        Tangiang simpul mangan sian pihak suhut.

*        Mangulon satongkin huhut mangalehon tingki tu angka    dongan    na naeng manjalang suhut.

*        Marhata sihorashoras/hata sigabegabe

*        Hulahula paampuhon (ianggo najolo ninna, paidua ni suhut/Raja tinonggo sian dongantubu do na paampuhon tu suhut sihabolonan, hata pasupasu do sian Hulahula).

*        Mangampu suhut   

      

Songon i ma konsep partording ni acara dihita, molo adong nahurang lobi, ba rap padengganhon ma hita. (laos dipangido ma panolopion sian angka raja.).

Molo dung satolop angka raja, dimulai ma acara i. Dipasahat suhut ma Tudutudu  ni sipanganon i tujolo ni na malua  huhut didok hatana ninna ma : Sadarion di ari nauli diari na denggan on, marlas ni roha do hami natorasmu rap dohot angka na manghaholongi hita, disiala naung malua ho sian panghangkungi on nami. Songon na pataridahon las ni rohanami, dison hupasahat hami Tudutudu ni sipanganonta,

Sitiktik ma na gompa, hodong lais ni ruma.

Otik so sadia pe natupa, sai godang ma pinasuna. Ima tutu.

Udut tusi dipasahat Hulahula/Tulang ma dengkena huhut didok hatana ninna ma: Dison hupasahat hami Dengke simudurudur/ Dengke sahat, paboa las ni roha nami ala naung malua Bere/Ibebere nami sian panghangkungion; anggiat ma rap mudur  tudolok hamu dapotan las ni ari, mudur tu toruan dapotan mual natio, jala songon nidok ni umpasa ma dohonon nami:

Sitiktik ma nagompa, hodong lais ni ruma.

Otik so sadia pe natupa, sai godang ma pinasuna.

Las ma rohamuna. Ima tutu.           

       

Dung sidung dipasahat Hulahula sipasahatonna i, dibagihon/di padalan ma panganan   jala   sian pihak  suhut ma tangiang mangan  dohot huhuasi ni sipanganon (sitiktik ma nagompa …dst).  Ditingki na marsipanganon i, dipadalan ma namargoar ni Tudutudu ni sipanganon i tu angka hasahatanna, hombar tu adat ni hasuhuton. Laho pasahathon  i didok ma hatana :

Onma  namargoar ni Tudutudu ni sipanganon tu…. (dang didok “jambar”). Dung sidung marsipanganon, ditutup ma jolo   parmanganon i dohot tangiang simpul mangan, sian pihak Suhut/ Pangula  ni Huria;  udut tusi didok paidua ni Suhut/Protokol ma hatana, ninna ma : andorang so tauduti tu na marhata sigabegabe/ sihorashoras, nilehon ma tingki tu angka dongan nanaeng parmisi/ manjalang suhut.

     

Laho mamungka panghataion, sai tar jolo di sungkun paidua ni suhut do angka raja, manang songon dia partording ni parhataan sipama saon : (pilih  satu).

9.1. Sirambe manis/dang pola masisisean:

*      Hata huhuasi sian paidua ni suhut, mandok mauliate tu  angka raja dohot inanta soripada, laos patorangkon maksud dohot tujuan ni parpunguan, na manghalashon haroan lasniroha do, ala naung malua sian panghangkungion  ianakkon nasida.

*      Mandok hata nauli nadenggan sian horong Boru/Bere       /Ibebere.

*      Mandok hata nauli nadenggan sian dongan sahuta.

*      Mandok hata nauli na denggan sian dongantubu.

*      Dilehon kesempatan mandok hata tu raja na ro. (diluar ni  dalihan na tolu, isara ni organisasi dohot Aleale).

*      Pasahat hata sigabegabe sian horong Hulahula tarmasuk Tulang rorobot dohot pariban, marsagi marsiaturan ma nasida mandok hata, alai parpudi ma Hulahula tangkas laos paampuhonsa tu  hasuhuton. 

     (ianggo najolo ninna, paidua ni suhut/Rajatinonggo sian

     Dongantubu do na paampuhon tu suhut sihabolonan,

     hata pasupasu do sian Hulahula)

 

*      Jolo dijalo paidua ni suhut / protokol ma hata  sigabegabe i,  dung i pe asa dipasahat tu suhut sihabolonan.

(Molo  mangihuthon adat najolo, laos paidua ni suhut/Raja tinonggo i do paampuhon)

*      Jongjong ma suhut mangampu. 

*      Dung sidung suhut sihabolonan  mangampu, dibahen Hulahula ma tangiang panutup.

9.2. Marhata sise/Masisisean.

     Mardosniroha ma jolo Dongantubu dohot Dongansahuta manontuhon ise na gabe Raja sungkun; denggan do nang sian dongan sahuta alai sian dongantubu ma jolo nagabe Raja sungkun binahen dison, ianggo Raja alus, paidua ni suhut ma. (Rajasungkun = Rs; Raja alus = Ra).

Rs : Manghatai ma hita suhut nami

Ra : Manghatai ma hita tutu Rajanami, nungnga rade hami.

Rs : Nungnga bosur hita mangan mahap marlompan juhut, pamurnas ma i tu daging, saudara tu bohi; sipasindak panaili ma i sipaneang holiholi. Taringot di sipanganon i suhut nami, dia ma i langkatna dia unokna, dia ma i hatana dia  nanidokna, botima.

Ra : Gabe jala horas ma hita rajanami, ia marpanungkun ma hamu taringot di sipanganon nasosadia i, songon nidok ni situatua ma dohonon nami :

godang sibutong butong otik sipir ni tondi

Sitiktik ma na gompa, hodong lais ni ruma.

Otik so sadia pe sipanganon natupa i,

sai godang ma pinasuna.

ianggo hata ni sipanganon i, sigabegabe si horashoras do nanidokna, Botima.

Rs : Gabe jala horas ma hita saluhutna, tumpahon ni Amanta,  na  martua Debata, dohonon nami  ma songon nidok ni   umpasa :

Bagot na marhalto ma i naniagatan di robean,

Sai horas ma namanganhon,

Lam tu tambana  di hamu namangalean.

Didok situatua, marangkup do nauli mardongan nadenggan; asa tangkas uju purba tangkasan uju angkola, asa tangkas hita maduma tumangkas ma na mamora; di sihombarna songon na hundul di siudurna songon na mardalan, di sirongkap ni panggabean siangkup ni parhorasan i, tangkas ma suhut nami marboaboa.

Ra : Gabe jala horas ma hita rajanami, ia marpanangkasi ma nuaeng hamu/raja i, di sihombarna songon na hundul di siudurna songon na mardalan, di sirongkap ni panggabean siangkup ni parhorasan i, tangkas ma tutu nang hami marboaboa. Di nasadarion/ nasogotan, nungnga malua sian panghangkungion ianakkon nami si---, dihilala rohanami napatutna do i halashononhon, ai pasupasu ni Tuhanta do i dirajumi rohanami; jala dipangido rohanami asa rampak hita manghalashon i, mandok mauliate tu Tuhanta, ima rajanami sitangkasna, di sirongkap ni panggabean siangkup ni parhorasan i, botima.

Rs : Mauliate ma di Tuhanta, mauliate ma nang di hamu suhut nami, nungnga tangkas hamu marboaboa, na malua sian panghangkungion do hape ianangkonta.

       Nuaengpe, dohonon nami ma hata poda sitiopon ni rohana, songon nidok ni situatua :

Disi situngguk, disi do sitata.

disi hita juguk, disi do ompunta namartua Debata.

Haporseai ma hata i, ai ido hangoluanmu.

Suang songon i ma nang dihamu suhut nami, sai diparbisuhi jala di pargogoi Tuhanta ma hamu mamingkiri sipingkiran muna, nang  mangula siulaon muna, asa songon nidok ni umpasa ma dohonon nami:

Lomak ma silinjuang, lomak so binaboan.

Sai dapot naniluluan, jumpang na jinalahan.

(Laos didok ma: Hatangki hata tambaan, jala dipaliathon ma hata i tu dongan tubu molo adong dope namanambai).

Dung sidung sian Dongantubu mandok hata, dipaulak ma panghataion i tu paidua ni suhut asa nasida paliathon/ mangaturhon partording ni sidok hata.

Dijalo paidua ni suhut ma hata i sian Dongantubu, laos dipaliat ma tu horonghorong na mangihut songon  parhataan di sirambe manis :

* Hata sigabegabe/sihorashoras sian Boru/Bere/Ibebere

* Hata sigabegabe/sihorashoras sian Dongan sahuta

* Hata sigabegabe/sihorashoras sian Aleale/0rganisasi

* Hata si gabegabe / sihorashoras  sian  horong  Hulahula   (tarmasuk  Tulang rorobot dohot Pariban),  marsagi  marsi aturan  ma  nasida  mandok hata, alai parpudi ma Hulahula tangkas, laos paampuhonsa tu suhut. (ianggo najolo ninna, paidua ni suhut/Raja tinonggo sian dongantubu do na paampuhon tu suhut sihabolonan, hata pasupasu do sian Hulahula dohot mambahen tangiang panutup)

* Jolo dijalo paidua ni suhut ma hata panggabean parhorasan i, dung i pe asa di pasahat/di paampuhon  tu suhut sihabolonan, ninna ma : Mauliate ma di amanta raja dohot inanta soripada na manghaholongi hami, namangalehon hata nauli na denggan/hata pasupasu panggabean parhorasan tu hami. Andorang so hupaampuhon saluhutna i tu suhut sihabolonan, dohononku ma tu hamu songon nidok ni umpasa :

Harbangan ma i dalan tu huta,

Balatuk dalan tu jabu.

Hata panggabean parhorasan napinasahat muna,

huampu hami ma i martonga ni jabu.

Turtu ninna anduhur, tiotio ninna Lote.

Hata nauli na pinasahat muna,

sai unang ma muba unang mose.

Tingko ma Inggiringgir, bulung na i ratarata.

Angka hata pangidoan nauli i,

sai pasauthon ma amanta namartua Debata.

Nuaeng pe, di hamu hasuhuton nami, ampu hamu ma hata panggabean parhorasan i, botima.

* Rampak jongjong ma suhut dohot ianakkonna na malua i, diampu nasida ma hata sigabegabe sihorashoras i, (dilehon ma kesempatan parjolo tu ianakkonna na malua i, mandok mauliate tu sude angka tutur dohot tondong), dung i ninna ma: Mauliate ma di amanta raja dohot inanta soripada na manghaholongi hami, na pasahathon hata nauli na denggan tu hami. Songon nidok ni umpasa ma dohonon nami :

Naung sampulupitu ma i, jumadi sampulu ualu.

Hata nauli napinasahat muna i,

huampu hami ma i martonga ni jabu.

Ampu ma i diampuan nami, puak di abara nami

Sahat ma solu tinogu tu bontean,

sai leleng ma hita mangolu,

di parhorasan di panggabean. Botima.

Manimpuli ulaon i, dibahen Hulahula ma tangiang panutup.

Dizaman saonarion nungga ragat napasahat ulos tu na malua sian panghangkungion, ia nisungkun ma i, ulos aha goarna, didok ma ulos holong; hape mangihuthon hatorangan ni angka natua tua/pemuka adat, sude do ulos na mardalan diparadaton batak, boi dohonon ulos holong, alai dang goar fungsi/tohonan ni ulos i non i, ai ulos Pansamot pe dohot ulos Hela, ulos holong do nang i. Molo tung pe adong napasahat ulos ditingki ulaon sisongon on, holan bernilai kenangkenangan/ cendramata do i manang sekedar kado, songon i ma hatorangan nasida.

Tweet

Subscribe to receive free email updates: