5. Paias Papan / Mangalap Pahompu

Olo do sipata, boru i, hipas (melahirkan) dijabu ni natorasna (Hulahulana). Marlante papan do najolo jabu ni halak Batak, gabe Hulahulana i ma paias papan nakotor, gabe digoari ma adat i Paias papan. Dinadeba, mamereng sian tikar nakotor do, gabe digoari   Cuci tikar. Adong deba pihak pamoruan mamereng inganan hatubuanna/ parsorangna dang dijabuna, jadi ingkon alaponna; gabe digoari ma Mangalap pahompu.

     

Ditingki na halehetanna,ro ma pamoruan/nampuna iananghon mandapothon Hulahulana mandok mauliate; diboan nasida ma sipanganon masak (indahan las dohot lompan juhut na marpanggoari Tudutudu ni sipanganon), songon dalan parhitean pasangap Hulahulana, jala digoari do sipanganon i Sipanganon Surungsurung (sajian khusus).

      

Dung ro pamoruan i, dijou suhut/parjabu ma angka haha angina dohot boruna, donganna saama/donganna saompung na maringanan di huta i, jadi dang pola sahat tu tingkat Dongantubu, dohot Dongansahuta.

Dung dapot tingkina marsipanganon, dipasahat pamoruan i ma Tudutudu ni sipanganon i tu Hulahulana, huhut didok ma hatana ninna ma: Sidok mauliate godang ma hami dihamu Hulahulanami, diburju ni rohamuna marboruhon hami, rade rohamuna manjangkon/paloashon di jabu muna sorang pahompunta, ianangkon nami. Songon parhitean nami pasangap Raja i Hulahulanami, dison hupasahat hami Tudutudu ni sipanganonta;

Sitiktik ma na gompa, hodong lais ni ruma.

Otik so sadia pe sipanganon on natupa,

sai godang ma pinasuna.

lasma rohamuna. Imatutu.

       

Dung sidung dipasahat Tudutudu ni sipanganon i, dipadalan ma panganan, laos dibahen pamoruan i ma tangiang mangan dohot huhuasi ni sipanganon (Sitiktik ma nagompa …dst). Molo adong pe diparade Hulahula i dengke lompan, dang pola dihatahon/ dipaadophon i tujolo ni pamoruanna, tu angka panganan i do diparis, alai adong ma dengke na himpal mardongan indahan las, dipamasuk tu Pansi inganan ni Tudutudu ni sipanganon i, unang mulak kosong; jala, i do sigatan ni pamoruanna i dung mulak sahat ro dihutana. Dung sidung marsipanganon, ditutup ma jolo parmanganon i dohot tangiang simpul mangan sian pamoruan, udut tusi, sahat ma tu na marhata.

      

Sahalak sian haha anggi manungkun ma tu suhut parjabu taringot tu joujou nasida umbahen na marpungu. Dialusi  suhut parjabu ma, na ro do pamoruan nasida mamboan sipanganon masak; laos dipangido ma asa nasida langsung manungkun pamoruan taringot diharoronasida.

Jempek hata dohonon, disungkun ma pamoruan i taringot diharoro nasida. Dipatorang pamoruan ma nalaho mandok mauliate do nasida, ala marasiniroha Hulahula i manjanghon ianangkon nasida sorang di jabu i. Antong molo songon i ninna Hulahula si udut hata i ma, ba pasahat hamu ma amangboru/Raja ni boru nanionjar ni  rohamuna i, ninna.

Hehe ma pamoruan i pasahat hamauliateonna (hepeng) ima na nigoaranna Paias papan manang Cuci tikar namarlapatan Upa loja.

      

Dung sahat hamauliateon i tu suhut parjabu, dipasahat pamoruan i ma muse nanigoaranna Pasituak Natonggi, riris tu sude pihak Hulahula na dohot disi. Dung sidung i dipasahat/dihatahon pihak Hulahula ma angka hata nauli nadenggan mardongan hata pasupasu, anggiat horas jala gabe pamoruan i, songon i nang Posoposo i, rap dohot natorasna.

Parpudi ma suhut parjabu mandok hata laos paampuhon. Udut tusi mangampu ma pamoruan.

Mangujungi  ulaon i, dibahen Hulahula parjabu ma tangiang panutup.

* Mamereng tu hipas ni Posoposo i dohot natorasna, tupa do langsung diboan pamoruan i         ianangkonnasida tu hutana, hombar tusi do umbahen na tubu istilah mangalap pahompu.

* Taringot tu namargoar ni Tudutudu ni sipanganon i, dang pola adong mulak i tu pamoruan, ai   sipanganon surungsurung do goarna; dang masa disi istilah Gaorgota, ai dengke na pinamasuk tu   Pansi ni pamoruan i do ulak ni Tudutudu ni sipanganon i.

* Dilehon suhut parjabu ma deba sian namargoar ni Tudutudu ni sipanganon i tu angka haha   anggina dohot angka na asing na dianggap patut lehononna, ima nanigoaranna mamiring ; jadi,   dang na marbagi jambar disi).

* Molo dohot do dongan sahuta di jou parjabu tu ulaon i songon na masa di zaman saonari on, ba         naeng ma dohot Dongantubu, jala nasida nama mardosniroha gabe raja panungkun/panise, alai         molo songon i, dang toho be goar ni sipanganon i, sipanganon surungsurung. Napatutna do i,           laos    ditingki i ma di pasahat hulahula i ulos parompa ni pahompuna

Tweet

Subscribe to receive free email updates: