7. Mamestahon Simin/Tugu partanda

Hombar tu situasi dohot kondisi ni hasuhuton, adong do sipata namambahen pulikpulik ulaon mangongkal holi sian ulaon pesta peresmian ni Simin/Tugu na, gabe dua hali ulaon ma i (dua hali tu mual ninna istilahna).

       

Molo ingkon pulik nama bahenon peresmian ni Simin/Tugu partanda, ingkon ulahan ma muse padalan Gonghon, manopot Hulahula mamboan sipanganon masak, songon i nang na martonggo raja. Diangka tingki na parpudi on, umumna dipasada nama ulaon i, dung sidung mangongkal holi, pintor marudut nama tu acara peresmian/pesta, jala songon on ma partordingna:

7.1. Manjalo pargonsi.

        

Somalna,   dibot ni ari    hirahira    pukul 17.00   nungnga

sahat pargonsi dihuta ni suhut; dung sidung dipature angka ulaula gonsina, dijou hasuhuton ma  nasida tu jabu asa mangan laos manghatai. Dung sidung pargonsi marsipanganon, hobas ma hasuhuton laho manortor ima nanigoaranna mambonai gondang.

7.2. Mambonai gondang.

       

Mangihuthon turi-turian hariara sundung di langit taringot tu mula ni pargondangon, songon on ma partording ni panortoron di tingki na mambonai gondang :

*    Dung jolo marhata huhuasi mandok mauliate dohot patoranghon maksud ni hasuhuton mambahen ulaon, dipitta ma gondang/gonsi jojor mulai sian na manatti/ mangalualuhon, gondang somba, gondang mula, pitta-pitta manang na piga gonsi laos ditutup ma dohot gondang sitiotio udut tu hasahatan. (Taringot tu sikap di  panortoron, nungnga nisurathon di Bab.II Mangihuthon na ni ida, rampak manortor do suhut dohot paiduana/ Raja tinonggo).

*      Udut tu tortor ni hasuhuton, manortor ma Dongantubu.

*  Manortor ma muse horong ni Boru. Simatua ni boru, Boru naposo, Boru natuatua, Boru di ampuan/Boru na gojong rampak dohot Bere nang Ibebere.

*      Udut ma muse manortor Dongan sahuta.

*   Panimpuli/pangujungi ni panortoron i, manortor ma Hulahula panampin, ima na nigoaranna Bunga gordang.

   Dung sidung mambonai gondang, dipadalan ma panganan. Tangiang mangan dohot huhuasi ni sipanganon sian pihak hasuhuton. Laos ditingki na mangan i do dipadalan Tudutudu ni sipanganon. Dung sidung acara mambonai gondang, boi ma acara bebas molo adong angka namangido manortor, isara ni Parhobas, Naposo dohot angka na asing.

*    Najolo ninna mamboan doal do Hulahula, dipalu ma i dung sahat nasida di harbangan ni huta, gabe marsialusalusan ma soara ni doal ni Hulahula dohot soara ni gondang ni hasuhuton, ala ni suara namasialus-alusan i do umbahen na didok Hulahula bunga gondang. Di angka tingki na parpudi on, hira so hea be binereng na mangulahon i, holan goarna nama bunga gondang.

*     Adong do deba namambahen jolo mangan/marsi panganon asa masuk tu acara manortor, adong muse namambahen parmanganon diselipkan diantara acara tortor, asal dapot tingki na tinontuhon, ba, mangan; dung sidung mangan, diuduti muse acara panortoron, jadi, porlu do tangkas hataan i ditingki marria raja/Tonggo raja

*    Porlu ingotonta, di ulaon sisada hasuhuton, Tudutudu ni sipanganon do sipadalanon, dang jambar sibagion.

*   Di nadeba daerah peradatan, holan na mangan sambing do di acara mambonai gondang, dang mardalan Tudutudu ni sipanganon. Mangihuthon pandok nasida, dimata ni ulaon marsogotna i do mardalan Tudutudu ni sipanganon.

7.3. Mambuat tua ni gondang.

     

Di mata ni ulaon/Pesta dimanogot na i, hobas ma hasuhuton laho manortor mambuat tua ni gondangna; holan hasuhuton do rap dohot paiduana/Raja tinonggo manortor mambuat tua ni gondangna.

7.4. Manjalo haroro ni Hulahula

     

Dung sidung hasuhuton mambuat tua ni gondangna, pintor udur ma nasida marbaris manjalo haroro ni Hulahula. Hombar tu panggoraon ni Protokol, masuk ma uduran ni Hulahula, pasahat boras na binoanna, alai ianggo ulos, ditingki na mandok hata di acara umum do dipasahat.

Ganup rombongan ni hulahula naung masuk pasahat boras pir, dipatudu ma tu nasida inganan parhundulanna jala dilehon ma i jolo minum dohot mangan lampet (molo adong) paima masuk sude uduran ni Hulahula.

Dinadeba daerah, jolo masuk do uduran ni  Hulahula, ipe asa mambuat Tua ni gondang Hasuhuton.

7.5. Marsipanganon, dohot manjalo tumpak.

     

Dung dapot tingkina marsipanganon, dipadalan dibagihon ma panganan, laos dibahen hasuhuton ma tangiang mangan dohot huhuasi ni sipanganon (sitiktik ma na gompa ..dst) Dipadalan ma tahungan/tahuan tu sude horong Hulahula (nadeba mandok sulangsulang do goarna)

Dung sidung marsipanganon, ditutup ma jolo parmanganon i dohot tangiang simpul mangan sian Pangula ni Huria, udut ma muse tu na manjalo Tumpak/Pangurupion na ni jouhon ni Protokol. (Nungnga diparade hinan baskom namarisi boras laho inganan ni tumpak)

Dinalaho padalan Tudutudu ni sipanganon, marasingasing do partording ni paradatan i songon na di toru on :

*  Laos ditingki na mangan i do dipadalan Tudutudu ni sipanganon i langsung sian jolo ni hasuhuton/Paidua ni suhut/Raja tinonggo, jala mangihuthon adat ni hasuhuton, marojahan tu prinsip diulaon sisada hasuhuton    sidapot solup do naro.

*    Di nadeba daerah peradatan, dipanortoron di acara umum do dipasahat namargoar ni Tudutudu ni sipanganon i, ima nasomal di goari Tortor mangalap jambar/jambar mangihut tu tortor.

*   Di na asing muse, jolo dipapungu do angka raja ni tutur mangadopi Tudutudu ni sipanganon i, diajuhon pihak  suhut ma jolo konsep mangido panolopion sian angka raja, dung pe ditolopi raja asa dipadalan songon na marbagi jambar (laos adong do deba namandok marjambar niadopan, adong na mandok jambar niadophon, gabe samak ma pangantusion ni jambar dohot tudutudu ni sipanganon).

*      Mandabu sian Pansa (dang masa be ni ida nuaeng on)

*   Dung sidung mardalan Tudutudu ni sipanganon dohot na manjalo Tumpak/Pangurupion, diuduti ma tu na marhata si gabegabe, dung i pe asa acara umum.

     Dinadeba muse, langsung do tu acara umum; mangihuthon pandok nasida, ditingki napasahat ulos i do dihatahon hata panggabean parhorasan, jadi dang pola mulakhulak dohonon hata, pasuda suda tingki, songon i ma ninna nasida.

                       

7.6. Acara umum.

       

Hombar tu kesepakatan ditingki Tonggo raja, nungga dikonsep hinan tertib acara umum nanisusun ni Dongan sahuta rap dohot Dongantubu/Raja tinonggo. Mangihuthon na ni ida, marragam do partording ni ulaon dinamangarasmihon Simin/Tugu partanda, boi dohonon, dang adong dope na baku. Di deba daerah peradatan, dung sidung hasuhuton mambuat Tua ni Gondangna, pintor marudut do tu Tortor ni Dongantubu, jala parpudi do Hulahula laos paampuhon; alai di nadeba daerah nari muse, parjolo do manortor Hulahula sian Dongantubu jala Dongantubu i do paampuhon. Sian angka partording ni ulaon na marbedabeda versi i,  nipaandarhon ma dison dua versi apala na paltak tarida songon na ditoru on.

Versi I.

A.   Persiapan.

      - Mangarade Hasuhuton

      - Manjangkon angka Tutur, asing ni  Hulahula 

      - Manjalo uduran ni Hulahula, (Hulahula pasahat Boras Pir) 

B.   Acara Pokok.

      - Hata huhuasi sian Hasuhuton laos manortor mambuat Tua ni gondang

      - Manortor Hulahula ni suhut namangolu(Pasahat Ulos)

      - Manortor Hulahula ni na niongkal (Pasahat Ulos

      - Manortor Boru/Bere/Ibebere (Pasahat Tumpak)

      - Manortor Dongansahuta (Pasahat Tumpak)

      - Manortor Dongantubu (Pasahat Tumpak, laospaampuhon)

      - Mangapu Hasuhuton, ni uluhon ni Raja Tinonggo

      - Tangiang panutup sian Pangula ni Huria  

Versi II 

I.       Hata huhuasi sian Hasuhuton, laos manortor mambuat Tua ni Gondang

II.      Manjalo haroro ni Hulahula,(Pasahat Boras Pir laos mar acara pasahat Adatna)

         - Hulahula ni namangolu.

         - Hulahula ni namate/nanianogkal

III.     Manortor Boru, Bere/Ibebere    (Pasahat Tumpak)

IV.     Manorot Dongan sahuta (Pasahat Tumpak)

V.      Manortor Dongantubu (Pasahat Tumpak)

VI.     Mandok hata Hulahula tangkas los paampuhon

VII.    Mangampu Hasuhuton

VIII.   Tangiang Panutup sian Pangula ni Huria

Catatan  :  

Acara marsipanganon, padalan namargoar ni Tudutudu ni sipanganon dohot na manjalo tumpak, 

sebagai selingan.

*  Najolo, dang dohot hinan Hulahula ni namangolu pasahat ulos, alai nuaeng on nungnga sude pasahathon ulos.

*  Mangihuthon na ni ida, parjolo masuk ma Bona ni ari ni saringsaring na tumimbo statusna, udut ma tu Bona tulang dohot tulang, parpudi ma sude Hulahula tangkas ni saringsaring/na ni ongkal, na rap paampuhon ma nasida atik pe Hulahula ni saring saring na tumimbo statusna na manghatahon).

*  Dipahombar ma panjouon tu torop ni Hulahula i jala  diatur manang na piga hali masuk nasida.

*  Ditingki panortoron i, ro ma hasuhuton manomba nomba  angka Hulahula.

*  Najolo, dipanangkok hasuhuton do sude Hulahula ni na ni ongkal, tu jabu ni hasuhuton partalitali bonang, laho pasidungkon adat tu nasida, ima pasahat Piso piso ni ulos, alai di angka tingki na parpudion nungnga hira gumodangan na mangalusi di alaman, ala ringkot ni partingkian, digoari ma i, Ulaon sadari.

Mangihuthon turiturion Hariara Sudung di langit na gabe gombaran ni panortoron, dung mambuat Tua ni gondang Hasuhuton, pintor mangihut nama tu acara   ni Hulahula, ai mulak do Batara guru tu hutana di langit ni parlangitan; jadi sian i tarida, Dongan tubu do parpudi manortor laos paampuhon.

Tweet

Subscribe to receive free email updates: