4. Mamoholi / Pasahat Aek ni Unte

Mangihuthon ruhut paradaton ni halak Batak Toba, Tulangna do mangombus parsambubuhan ni Bere/ Ibeberena, dang Ompungbao; marhadomuan tusi do umbahen na Tulang, sijalo Tintin marangkup manang sijalo upa Tulang.

Najolo, molo borhat Tulang mamoholi Bere/Ibeberena, dang pola marhara nasida sahat tu tingkat Dalihan natolu, holan nasida na marhaha maranggi do borhat, na ni udurhon ni Ompung bao. (Tarida dope adat i dipigapiga luat dibonapasogit). Molo sorang posoposo disada keluarga ni halak Batak Toba, pintor hobas do Tulang ni posoposo i na marhahamaranggi, manopot pamoruanna; diboan nasida ma sipanganon masak (indahan las, dengke, Bangun bangun nanidugu dohot Ulos na marrambu). Mangihuthon hasomalan ni halak Batak Toba, diparnangkok ni mataniari do ulaon i dipatupa, ai marlapatan (mempunyai arti khusus) do istilah parnangkok ni Mataniari di halak Batak, simbol/lambang ni pengaharapan do i, anggiat lam nangkok (meningkat) panggabean parhorasan.

      

Dung sahat nasida dibagas jabu ni pamoruanna, diparnangkok ni mataniari, dimulai ma acara, jala songon on ma partordingna: Dipasahat Tulang ma dengke Simudurudur huhut didok hatana ninnama: Dison hupasahat hami dengke simudurudur tu bere/ibebere nami, rap mudur tudolok ma hamu dapotan las ni ari, mudur tu toruan dapotan mual natio.

Sitiktik ma na gompa, hodong lais ni ruma.

Otik so sadia pe dengke on natupa,

sai godang ma pinasuna. Las ma rohamuna. Ima tutu.

      

Dihilhil Tulang na i ma napuran, huhut dilompit ulos na marambu ditanganna, dijalo/ditampin ma Posoposo i sian abingan ni natorasna, laos diabing.

Dibursik ma parsambubuhan ni Posoposo i dohot hua ni napuran i, langsung sian pamanganna, laos diapusapus songon na padosdoshon, laos dilehon ma abingon ni Nantulangna. Dung diabing nantulangna satongkin, dipaulak ma muse tu Tulangna asa Tulangna i ma paulakhon tu natorasna huhut didok  ma hatana nina ma: On ma ulos parompa sian tulang, sai ompa ma parsaulian dihamu tumpahon ni amanta na martua Debata, lumobi di bere/ibebere nami, jala sai siganjang umur ma i sogot pairing iringon muna sahat tu na saur matua, ima tutu. (Molo adong dope napasahat ulos,  dipasahat ma disi).

      

Ala naung dibursik Tulangna Posoposo i dohot hua ni napuran, dang pola be jomputonna boras si pir ni tondi tu simanjujung na. Dung sidung i, diuduti ma tu acara marsipanganon (makan bersama); dipadalan ma panganan jala sian pihak Tulang ma tangiang mangan dohot huhuasi ni sipanganon, ala nasida do na patupahon sipanganon i diboruna/Bere/Ibeberena.

      

Adat do i sai diparade pamoruan do lompan juhut na marpanggoari Tudutudu ni sipanganon, dalan pasangaphon Hulahulana. Dung sidung mangan, ditutup ma jolo parmanganon i dohot tangiang simpul mangan sian Hulahula; udut tusi marsagi marsiaturan ma Hulahula pasahat hata horashoras dohot tona (amanah), laos dipaampuhon ma tu pamoruanna, ninna ma :

Lomak ma silinjuang, lomak so binaboan.

Sai dapot ma naniluluan, jumpang na jinalahan.

Eme si tambatua, parlinggoman ni siborok.

Amanta Debata do pangalapan tua,

sai horas ma hamuna diparorot.

Horbo sitingko tanduk ma i, sisapang na ualu.

parbutuha mangalilit, parmata mangalualu.

Marjampal i di balian, mulak tu bara marngalungalu.

Angka hata parsaulian, na  mardongan hata pasupasu,

ampu ma i diampuan muna, tangkas martonga ni jabu.

Sahat ma Solu i tinogu tu Bontean,

nungnga hupasahat hami hata Pasupasuan nauli i,

sai sahat ma hamuna tu parhorasan, sahat tu panggabean.

Ima tutu.

Ala na marhaha maranggi do Hulahula naro i, laos na marhaha maranggi do nang pamoruanna nanidapothonna.

Rampak jonjong ma nasida laho mangampu, alai dang pola ingkon dohot jongjong ina ni Posoposo i. Mardos ni roha ma nasida mangampu huhut mandok mauliate. Boi do laos holan sahalak mewakili nasida mangampu, didok ma hatana nina ma:

Turtu ma ninna anduhur, tio tio ninna Lote

Hata nauli napinasahatmuna,

sai unang ma muba unang mose.

Tingko ma inggir inggir, bulung na i rata rata.

Tagam do rohanami manghirim,

sai pasauthon ma amanta namartua Debata

Naung sampulu pitu ma i, jumadi sampulu ualu.

Hata nauli na pinasahatmuna i,

huampu hami ma i martonga ni jabu.

Sahat ma solu tinogu tu Bontean

Sai leleng ma hita mangolu

diparhorasan dipanggabean. Ima tutu.

Mangujung i ulaon i, dibahen Hulahula ma tangiang panutup.

*      Najolo ninna, holan Tulang namarhaha maranggi do na ro mamoholi bere/ibebere na, naniudurhon ni ompung bao, dang sahat tu tingkat dongan tubu. Pamoruanna i pe natinopotna i, holan nasida na marhaha maranggi do, jadi ulaon sakeluarga dope ulaon i. Molo na pinungka ni sijolojolo tubu i do taihuthon, dang pola paadophononhon Tudutudu ni sipanganon i tu jolo ni Hulahula, tu pansi inganan ni dengke i do dipamasuk songon ulakna, ima sigatan nasida na marhahamaranggi dung mulak sahat dihuta nasida.

Molo mardalihan natolu do Hulahula i di harorona, dengan pemikiran asa pintor tandi jala tongam berengon ni halak, tarpaksa ingkon jouon ni pamoruanna i nama dalihan natoluna paopat sihalsihal/dongan sahuta, jala ingkon pataridahononna ma Tudutudu ni sipanganon i songon na masa di zaman saonari on, gabe repot ma.

Tweet

Subscribe to receive free email updates: