2. Adat mardalan dinabolon/Mangido Tangiang (Mate hatungganeon dohot mate mangkar)

1.   Adat Mardalan Dinabolon (Najolo)

Molo  mate hatungganeon manang mate mangkar halak Batak, Ama  manang  Ina pe, dibahen  do adatna ima na nigoaranna adat Mardalan di nabolon. Mangihuthon adat najolo, sahat ma boaboa tu Hulahula tangkas, Tulang dohot Tulangrorobot, Dongantubu, Boru naposo, Bere/Ibebere dohot Dongan sahuta. (dang sahat tu Bona Tulang dohot Bonani ari). Mardalan do ulos Saput dohot Tujung sian Hulahula/Tulang. (dipahombarma i tu adat  ni luat).

Najolo diparmateon na songon on, dang pola diparade suhut sipanganon, molo tung adong pe sipanganon napinatupa ni Hahaanggi/Dongan tubu, Boru manang na Talup talupan (urunan), dung mulak sian udean pe asa mangan, jala dang mardalan Tudutudu ni sipanganon.

Dung mulak sian udean (sidung mangan molo adong tupa), marudut ma tu na pasahat hata apulapul, parpudi ma Hulahula tangkas pasahathon hata pasupasuan.

Di ari na mangihut, ro ma angka sisolhot manosoi mangan, diboan nasida ma Indahan Soso soso.

2.  Mangido Tangiang (Dung hakristenon)

Songon naung pinatorang dijolo ni on, dung masuk   hakristenon  tu  tano   Batak,   muba do paradaton i,  jala dibahen ma goarna mangido tangiang; gabe sarupa/sagoar dohot adat parolangolangan; alai atik pe sarupa goarna, marasing do ianggo pangulahonna.

Mangihuthon na niida jala naung pinaihutihut nasai leleng na on, hirahira songon on ma partordingna/ pangulahonna.

2.1. Ria raja

Salambat lambatna di borngin parpudi andorang so tu udean bangke i, di patupa ma loloan ria raja laho mangaranggi siulaon namarhadomuan tu na paborhathon na mate i, jadi diborngin dijolo ni i, nungnga dipabotohon hasuhuton hinan, manang andigan marria raja. Dipasahat suhut ma nadipingkiranna dohot sude data-data ni namate i tu paiduana (paidua ni suhut) asa dipatolhas tu Dongantubu. Dung hirahira dapot tingkina marria raja, manggora ma paidua ni suhut ninna ma: Dihita namardongan tubu, ala naeng mulaanta ma marria, pinangido asa tu jabu hita jolo masipasadaan tahi / pandapot laos mamillit parhata, botima.

Dung pungu nasida dijabu, didok paidua ni suhut ma hatana ninna ma: dihita hasuhuton pomparan ni ompunta Op…, sada ma rohanta pasahathon ulaon on tu hahadoli/anggidoli, asa nasida mardos ni roha nagabe parhata; asa jempek tingki, sahalak pe sian hita panangkokhon pangkataion on naung rap ma hita, disi (laos dipillit nasida ma sahalak panangkokhon panghataion i).

       

Dipanangkok napinillit i ma panghataion i, ninna ma: Dihamu hahadoli/anggidoli pomparan ni ompunta Op… dohot pomparan ni ompunta Op. …, nungnga dos rohanami hasuhuton asa hamuma mardos ni roha na gabe parhata diulaonta on, pinasahat ma tu hamu, botima. Dijalo hahadoli/anggidoli ma hata i, laos masialapan hata masipasangap sangapan nasida mamillit sahalak nagabe parhata,

(Diparmateon na songon on, dang pola ingkon dijolo ni angka raja masiparenggetan demi praktis ni ulaon, kecuali molo na mate Saurmatua, ala mompo di bot ni ari, jolo dipatupa adat parmompoon / ala na jolo marsipanganon do i, gabe di alaman jala dijolo ni angka raja ma marsiparenggetan mamillit parhata)

       

Dung i, didok parhata naung tarpillit i ma hatana tu hasuhuton ninna ma: Dihamu hasuhuton nami, patorang hamu ma jolo tuhami angka rencana naung ni konsep muna siboanon tu parriaan, botima.

Dialusi jala dipatorang paidua ni suhutma :

-  Tu angka ise ma naung dipasahat boaboa

-  Hatutubuna sahat tu parmatena/umur

-  Parsohotna dohot boru ni raja i . br..

-  Torop ni ianangkonna.

-  Status parmateon, matemangkar/ matehatungganeon

-  Goarni ulaon adat : Mardalan di nabolon/ mangido tangiang

-  Pamasukhon tu jabujabuna pukul piga

-  Pasahat Saput dohot Tujung, sahat tu na mangung kap Tujung

-  Manjalo haroro ni Hulahula

-  Marsipanganon

-  Tangiang pangidoan/doa syafaat sian dalihan natolu paopat sihalsihal.

-  Acara umum

-  Lokasi kuburan

-  Transportasi dohot angka na asing na mardomu tu   ulaon i.

Hirahira songon i ma naung hukonsep hami hombar tu arahan/ penggarisan ni suhut sihabolonan, botima.

Didok parhata i ma muse hatana, ninna ma: Mauliate ma dihamu hasuhuton nami, alai paima so manghatai hita dohot raja ni tuturta, dos ma rohanta na mardongan tubu/na marhaha maranggi, masipaingotan hita, atik tung adong dope nahurang singkop di konsep ni hasuhutonta, asa rap pasingkophon hita. Udut tusi didok parhata i ma muse hatana, ninna ma: nuaeng pe, nungnga dapot tingkina marria, rap ma hita tu jolo jabu  mangadopi angka raja ni tuturta, botima.

       

Dung tuat nasida tu jolo jabu, diatur ma parhundulon; boi do paidua ni suhut mangatur i, boi do nang parhata, ala naung tarpillit tingki na masipasadaan tahi/pandapot di jabu. Manggora ma parhata ni suhut, ninna ma: Santabi ma di amanta rajaraja nahuparsangapi hami, Dongantubu, Boru, Bere/Ibebere, Dongan sahuta, Pariban dohot Aleale, lumobi ma Hulahulanami marga… dohot Tulang nami marga …, hombar tu boa-boa nami nantoari, ba saonari ma hita marria. Mardomu ala naung dapot tingkina, hupangido hami asa di jolo jabu on ma hita marnatampak.  Dihita namardogan tubu/na marhaha maranggi, rap ma hita dijolo ni jabunta; di jolonami ma Dongan sahuta nami, asa tangkas hita masipaadopadopan; Hulahula nami dohot Tulang nami, disiamun nami ma hamu rajanami; pariban nami rap ma dohot hami dijolojabu on, Boru, Bere/Ibebere nami, dihambirang nami ma hamu raja ni boru, songon i ma jolo partording ni parhundulon di hita, botima.

       

Dung singkop jala denggan hundul di ingananna be, dipatangkas parhata ni suhut ma manungkun sude angka tutur, manang naung rade nasida jala manang naung boi mulaan manghatai. Molo dung sude satolop, didok parhata ni suhut ma hatana : Santabi ma di amanta rajaraja nahuparsangapi hami, didok situatua, molo mardalan raja ingkon jolo patiuron do dalan sidalananna, asa unang sungkotsungkot manang tartuktuk patna. Jadi, andorang so tamulai panghataionta, parjolo ma jolo hupaandarhon hami konsep partording ni parha taanta/susunan acara, jala songon on ma naung hukonsep hami :

- Hata huhuasi mandok mauliate tu sude angka raja ni tutur.

- Patoranghon latar belakang/maksud dohot tujuan ni parpunguan.

- Patorangkon konsep rencana ni suhut

- Mangido paniroion tu sude raja ni tutur/ komponen dalihan natolu paopat sihalsihal (dialog pembahasan)

- Pangurupion sian punguan punguan/organisasi rodi sude angka naringkot namardomu tu ulaon i.

(Laos dipangido ma panolopion sian sude raja ni tutur naliat nalolo. Molo dung satolop angka raja, di susunan ni acara, ipe asa dimulai acara manghatai.)

       

Dung sidung sude dihatai nasa naringkot na mar domu tu parmateon i, rampak jongjong ma hasuhuton na marhaha maranggi/na mardongantubu mandok mauliate tu sude raja ni tutur.

Mangihuthon nasomal, di ulaon adat mardalan dina bolon / mangido tangiang, dang  masa sipa nganon pandungoi.

2.2.  Pamasuk Bangke tu Jabujabuna.

Songon naung pinatorang dijolo ni on, mangihuthon adat najolo, dang pola mar acara laho pamasukhon bangke diparmateon na songon on, langsung do dipamasuk bangke i tu jabujabuna naso pinauli ni tanganna, alai diangka tingki na parpudi on jolo dibahen Pangula ni Huria do ende dohot tangiang, dung pe i asa di pamasuk bangke i tu jabujabuna, laos marudut ma tu na pasahat Saput dohot Tujung; jala dipatupa ma i ulaon i, di parnangkok ni mata ni ari.

2.3. Pasahat Saput dohot Tujung.

Dimata ni ulaon, diparnangkok ni mataniari, dung dipamasuk bangke i tu jabujabuna, ro ma Hulahula /Tulang sibahen saput mambahen saputna; sidung i, marudut ma muse tu Hulahula sipasahat Tujung.  

Mangihuthon na ni ida jala naung nidohotan, adong dua ragam (dua versi) partording ni ulaon pasahat Saput dohot Tujung.

Versi I.

Holan perwakilan ni Hulahula i do na pasahathon ulos i, parpudi do uduranna, dung ro goragora ni hasuhuton.

Versi.II.

Rampak masuk do Hulahula dohot uduranna. Dung masuk sibahen saput, masiaturan ma nasida mambahen acarana.

Mangihuthon na ni ida, songon on do dibahen :

-  Ende dohot tangiang pambukaan

-  Pasahat ulos saput huhut dihatahon. (Bereng  ditoru)

-  Mandok hata sian boru/bere/ibebere.

-  Mandok hata haha anggi ni panaput

-  Mandok hata mauliate /mangampu suhut

-  Ende dohot tangiang panutup.

Laho pasahat ulos saput i, hirahira songon on ma didok hatana : Dihamu Bere/Hela/Boru nami, dison ro do hami Tulang/ Hulahula muna pasahat Saput tu Bere/Hela/Boru nami naung parjolo monding/ marujung ngolu on, sai Tuhanta ma na mangapuli rohamuna, sai dilehon dihamu gogo dohot benget ni roha manaon sitaonon na dokdok on. Songon nidok ni umpasa ma dohonon nami:

Hotang binebebebe hotang pinulospulos.

Sai unang hamu mandele, godang do tudos-tudos.

(Laos diuloshon/ ditutuphon ma ulos i tu bangke i sian mata ni pat sahat tu andora; didok ma muse hatana ninna ma: hatangki hata tambaan/ditambai dongan)

Dung sidung napasahat Saput, digora hasuhuton ma sibahen ulos Tujung asa masuk nasida; (Mangarade hasuhuton manjalo boras); masiaturan ma nasida mambahen acarana, sarupa do songon na pasahat Saput :

- Ende dohot tangiang pambukaan

- Pasahat ulos Tujung huhut dihatahon. (Bereng  ditoru)

- Mandok hata sian Boru/Bere/Ibebere.

- Mandok hata haha anggi ni sibahen tujung.

- Mandok hata mauliate/mangampu suhut.

- Ende dohot tangiang panutup.

Laho  pasahat  ulos  Tujung i,hirahira songon on ma didok hatana : Dihamu Bere/Hela/Borunami, dison, ro do hami Tulang / Hulahula muna pasahathon Tujung, Simbol ni sitaonon nadokdok do on tutu, ala  naung songgop sitaonon nadokdok i tu hamu, alai marpos niroha ma hamu tu Tuhanta, ai ibana do na boi mangapuli hita jala mangapusi iluilu sian matanta. Marbenget ni roha ma hamu manaon jala marlas ni roha manghirim, nuaeng pe jalo ma tujungmon (Laos ditujunghon ma ulos i sian pudi tu jolo), didok ma muse hatana ninna ma :

Habang ambaroba diatas ni aek puli.

Debata do parasiroha, sai tibu ma hamu diapuli

Botima. (Laos didok ma : Hatangki hata tambaan/

ditambai  dongan)   

2.4. Manjalo haroro ni Hulahula.

Mulai di namanjalo haroro ni Hulahula (uduran), masiboan versina ma partording ni paradatan i, songon na di toru on :

Versi. I.

Hombar tu panggoraon ni Protokol, masuk ma uduran ni Hulahula pasahat boras na binoanna.

Ganup rombongan ni Hulahula naung masuk pasahat boras pir, dipatudu ma tu nasida inganan parhundulanna, jala dilehon ma i jolo minum paima joujou mar acara,

Versi. II.

Ditingki   na   pasahat    saput  i do   Hulahula  sibahen saput masuk rampak dohot uduranna, suang songon i nang Hulahula sipasahat Tujung. Dung dipasahat boras sipir ni tondi nabinoan nasida, langsung do ganup Hulahula masibahen acarana sandiri sandiri.

* Molo, binereng akibatna/pangkorhonna, gabe mulak ma dung sidung mangan; dang dohot be di acara umum; dang dohot be mambege hata huhuasi /jujurngolu ni na monding, holan 2-3 halak nama Hulahula tangkas na tinggal laho paampuhon, gabe hira na palua langkana ma  Hulahula i, asa hatop mulak. Diganup mar acara Hulahula, sai jolo mangampu do hasuhuton jala sarupa/ monoton do sude hata pangampuon i, tubu ma suasana kejenuhan /membosankan.

2.5. Mardaon pogu/Marsipanganon.

Dung dapot tingki mardaon pogu/mangan, dipadalan ma panganan, laos dibahen suhut/paidua ni suhut ma tangiang mangan dohot huhuasi ni sipanganon : sitiktik ma na gompa, dst. (Di ulaon mangido tangiang, dang pola digorahon namargoar ni Tudutudu ni sipanganon, jala dang masa hata/istilah jambar). Dung sidung mangan, ditutup ma jolo par manganon i dohot tangiang simpul mangan, nadeba adong do napasadahon dohot tangiang pangidoan/doa syafaat na hinatahon ni Dalihan natolu paopat sihalsihal.

2.6. Tangiang pangidoan/Doa syafaat.

Dung  sidung  mangan, dipangido  protokol ma asa rampak jongjong Dalihan natolu paopat   sihalsihal / dongan sahuta pandimposi, mambahen tangiang pangidoan/doa syafaat, mangidohon tu Debata asa unang masa be parmateon nasongon i di tongatonga ni keluarga i. Mardos ni roha ma nasida mambahen tangiang. (Nadeba mambahen tangiang berantai do).

            

2.7. Acara umum.

Dung sidung tangiang pangidoan/Doa syafaat, diuduti ma tu acara umum hombar tu tertib acara naung nisusun ni dongantubu rap dohot dongan sahuta jala na niboanhon ni protokol sian dongan sahuta.

* Songon naung pinatorang dijolo ni on, adong do deba ditingki na manjalo haroro ni Hulahula, pintor  langsung do nasida (sude horong Hulahula i) mambahen acarana sandirisandiri gabe mulak ma dung sidung mangan, holan 2-3 halak nama Hulahula tangkas na tinggal laho paampuhon. Jadi, molo nipingkir pingkiran, dang adong be gunana nang disurathon nasida  mandok hata di acara umum.

Taringot tu tertib acara umum nanisusun ni dongansahuta rap dohot dongantubu, mangihuthon nasomal niida hirahira songon on do dibahen :

    I.   Marende

   II.   Hata huhuasi sian paidua ni suhut laos patoranghon jujurngolu

  III.   Mandok hata  (I) :

         1. Sian dongantubu.

         2. Sian boru/bere/ibebere.

         3. Sian dongan sahuta/STM.

         4. Sian Pariban.      

         5. Aleale.

  IV.   Marende.

   V.   Mandok hata  (II) :

         6. Sian Punguan punguan:

             a.

             b.  

             c. dst.

         7. Sian Pamarenta setempat.

  VI.   Marende.   

VII.   Mandok hata  (III) :

         8. Sian Tulang.

         9. Sian Tulang rorobot.

         10. Sian Hulahula laos paampuhon

         11. Mangampu suhut.

VIII.   Pinasahat tu Pangula ni Huria.               

Pangula ni Huria nama na manguluhon acara sahat tu penguburan di udean. Dung sidung penguburan, somalna, sai dilehon pangula ni huria do tingki tu hasuhuton, mandok hata huhuasi/hata mauliate.

2.8. Mangungkap Tujung.

       

Dung mulak sian udean, nangkok ma Hulahula sibahen Tujung tu jabu laho mangungkap tujung i; tontu nungnga diparade hinan angka kelengkapanna na marhadomuan tusi, ima :

- Aek parsuapon (Air untuk cuci muka)

- Indahan dohot dengke.

- Mual si inumon.

       

Dung rade sude, dimulai ma acara, diungkap Hulahula/Tulang ma tujung i huhut didok hatana: Hu ungkap ma tujungmu na dokdok on, sai ungkap ma pingkiranmu mandalani dalan sidalananmu. Dibuat ma aek laos disuhaphon tu bohi ni na mabalui huhut didok hatana Husuhapi ma ho, sai tiur ma parnidaanmu, Tuhanta ma namangapusi iluilu sian simalolongmu.

       

Dilehon ma minum aek sitiotio huhut didok hatana: Inum ma aek sitiotio on, asa lambokma panghilala anmu; Disulanghon ma muse indahan dohot dengke huhut didok hatana: Pangan ma on indahan las dohot dengke sitiotio, asa margogo ho manalpuhon sude angka sitaonon i. Dibuat ma muse boras, dijomput ma i tu simanjujung ni namabalu i, huhut didok hatana: Pir ma tondim, unang ho mabiar, ai Tuhanta do mandongani ho mangula siulaonmu dohot mamingkiri sipingkiranmu, laos dijomput ma boras i tu simanjujung ni angka dakdanakna.

Mangujungi ulaon i, dibahen Hulahula ma tangiang panutup

Catatan :

1. Molo rade do sipanganon, jolo marsipanganonma
2. Boi do dipadenggan/dipasuman tertib acara on hombar tu haporluanna.
3. Diparmateon nasongon on, holan ulos Saput dohot  Tujung do sian Hulahula/Tulang,  jaladang mardalan pisopiso; dang mardalan ulos gabe, ala dang masuk kategori gabe naso marpahompu.
4. Di ari na mangihut, ro ma angka sisolhot  mangapuli/ manosoi, diboan nasida ma  sipanganon sosososo.

Tweet

Subscribe to receive free email updates: