7. Martutuaek
Najolo ninna, andorang ugamo Malim ugamo
hatopan ni halak Batak, masa do adat
paias daging dohot tondi, ima nanigoaranna Martutuaek. Dung sidung roboroboan ni posoposo i (pitu ari pitu borngin) diboan natorasna
ma ibana tu Pansur paridian (umbul air),
diboan do dohot daupa na marisi Api dohot Haminjon. Dung sidung dipaias badan
ni posoposo i dohot aek, didadang ma tu atas ni daupa i. Dijabu, nungnga
mangarade Ihutan ni Parmalim, laho pasahat pangidoan tu Mulajadi nabolon (Debata) marhite acara nanigoaranna Parbue satti/Boras satti napinulung
sian:
*
Boras di Pinggan pasu
*
Gambiri pamiahi
*
Pira ni ambalungan (telur ayam)
*
Bane bane pamispisi
*
Abit nabontar
*
Ringgit namardiring /ringgit sitio soara
*
Napuran daonbari/napuran mauliate.
Hombar tu simbol ni pulungpulungan i,
dihatahon Ihutan ni Parmalim ma hata pangidoan tu Mulajadi nabolon sitompa nasa
na adong. Dung sidung ulaon paias tondi (ulaon
nabadia), rampak mangan ma nasida na sakeluarga i, jala dang pola diparade
Tudutudu ni sipanganon.
Molo
holan ulaon martutuaek do ulaon i, sidung ma olat ni i; alai jotjotan do
dipadomu ulaon i dohot ulaon na asing, umpamana mamoholi, didok ma hatana (istilahna) sada tinembak dua hona
Ditingki masa onan (sahali saminggu), diboan natorasna ma Posoposo i mar onan, dituhori
ma godang tuhortuhor, pisang dohot angka na asing, jala diparlehon ma i tu
angka tutur dohot tondong najumpang di Onan i. Sude silehonlehon i, dianggap ma
i silehonlehon ni Posoposo i, anggiat sogot dung magodang ibana, gabe jolma na
basa/naulilagu. Dung masuk ugamo Kristen tu tano Batak, lam ditinggalhon halak
Batak ma adat martutuaek, lam leleng lam leleng, sahat tu zaman saonarion, dang hea be
binereng halak Batak mangulahon adat i;
marganti ma i dohot adat namarhadomuan tu hakristenon.
0 Response to "7. Martutuaek"
Post a Comment