13. Manulangi Natuatua

Dang sarupa pandapot ni halak Batak Toba (perorangan) taringot tu adat manulangi natuatua, adong namandok holan dua ragam do ulaon adat manulangi, ima sulang-sulang hapun jungan/ tohontohonan dohot sulang-sulang hariapan, alai na deba mandok, adong do opat tingkatan/klasifikasi ni adat manulangi. Ala holan pengelompokanna do na marbeda, sopola mangorui makna, ba ni ihuthon ma dison pengelompokan na opat tingkatan i, ima :

1. Sulang sulang  pomparan (Sipanganon natabo)

      Dung masa namangaranto, marserak ma ianakkon ditano parserahanna, olo ma leleng di parlelengan lalap diparlalapan dang pajumpang be dohot natuatuana, tupa barita ni parmateon nama namanjou nasida tarpaksa mulak. Pangalaman nasongon i ma patubuhon pingkiran tu angka ianangkon na holang sian natorasna, masisunggulan masipaingotan ma nasida di kondisi kesehatan ni natuatuana; dititi nasida ma sada ari pardomuan di jabu ni natuatuana i (somalna dipillit ma hari-hari libur panjang).

       Dung sahat nasida dijabu ni natuatua i, disusun nasida ma rencana patupahon sipanganon natabo di natorasnasida, laos diajari natuatua i do nasida disipatupaonna i.

Dung dapot tingkina marsipanganon, rap ma nasida hundul dijolo ni natuatua i, dipasahat nasida ma sipanganon i huhut didok hatana ninna ma : Among dohot  ho Inong, di ari nauli diari nadenggan on,  ro do hami ianangkon muna patupahon sipanganon natabo dihamu, dalan nami ma i pasangaphon hamu natuatua nami. Tung so sadia pe nuaeng nahuboan hami on, ba sai pamurnas ma i tu pamatangmuna saudara tu bohimuna; manumpak ma tondimuna jala manuai sahala muna, sai pasauthon ma amanta namartua Debata, anggiat lam tu dengganna antong ngolungolu nami saluhutna ianangkon muna, asa boi patupaon nami muse sipanganon natumabo di hamu natoras nami. Laos na rap mangido do hami tu amanta Debata anggiat leleng dope nian hamu mangolu paihutihuton nami; nuaeng pe songon nidok ni umpasa ma dohonon nami :

Sitiktik ma na gompa,

golanggolang pangarahutna.

Otik so sadia pe nahupatupa hami on,

sai godang ma pinasuna,

las ma rohamuna, ima tutu.

(Anak sihahaan do na somal dipajolo laho manghatahon i, alai dang napola mansalai  molo dipasahat tu anggina).

Natuatua i pe, dipatupa do sipanganon di angka ianangkonna, ima Dengke simudurudur. Dipasahat/ dipeakhon ma i tu jolo ni angka ianangkonnai huhut didok hatana ninna ma:

Dihamu ianangkon nami, parumaen, hela, boru, ro di sude pahompu nami, nungnga dipasahat hamu sipanganon natabo dihami natuatua muna, patuduhon holong ni rohamuna di hami, ba hami pe antong, hupatupa hami do saotik sipanganon dihamu, paboa na tongtong huhaholongi hami hamu. Jadi, nungnga dison dengke simudurudur, sai rap mudur tu dolok hamu dapotan las ni ari, mudur tu toruan dapotan mual natio. Songon nidok ni umpasa ma dohonon nami:

Sitiktik ma nagompa, golanggolang pangarahutna.

Otik so sadia pe na hupatupa hami on,

sai godang ma pinasuna.

Las ma rohamuna, botima.

Udut tusi, dibahen sahalak sian ianangkon ma tangiang mangan dohot huhuasi ni sipanganon. (Sitiktik ma nagompa …dst). Atik pe dang pola mardalan Gonghon, alai ianggo Jou jou tu pomparan ni ompung na marhaha maranggi, perwakilan ni dongan sahuta dohot boru diampuan dipasahat do. (laos gabe saksi do antong angka nanijou i disi, paboa na diparsangapi nasida natorasna).

     Dung sidung marsipanganon, adong  do deba jolo mambahen tangiang simpul mangan, ipe asa manghatai/marhata, alai adong do na langsung marhata.

Masisungkunan ma jolo na nijou dohot na manjou taringot di parpunguan i, ba dipaboa na manjou (parjabu) ma, na ro do ianangkonnasida mamboan sipanganon na tabo, laos dipangido ma asa langsung nasida manungkun ianangkon na patupahon sipanganoni i, jala hirahira songon on ma partording ni parhataan i. (Raja sungkun sian haha anggi ni namanjalo sipanganon natabo/ sulangsulang = Rs ; Raja alus sian pihak ianangkon = Ra.).

Rs : Dihamu ianangkon nami, Anak/Parumaen, Hela/ Boru, manghatai ma hita.

Ra : Manghatai ma hita tutu, nungnga rade hami ianangkon muna.

Rs : Nungnga bosur hita mangan,mahap marlompan juhut,

       pamurnas ma i tu daging, saudara tu bohi,

       Sipasindak panaili ma i sipaneang holiholi.

       Taringot tusi ma nahusungkun hami,

       dia ma i langkatna dia unokna, dia ma i hatana,

       dia ma nanidokna. Botima.

Ra : Horas jala gabe ma hita angka amang/ompung, songon nidok ni situatua:

       godang sibutong butong, otik si pir ni tondi.

       Sitiktik ma na gompa, golanggolang pangarahutna.

       Otik so sadia pe natupa, sai godang ma pinasuna.

       Taringot di sipanganon   nasosadia  i,   angka    Amang/

       Ompung sigabegabe sihorashoras do nanidokna, Botima.

Rs : Nauli ma i tutu amang/anaha, hami pe dohonon nami ma songon nidok ni umpasa:

       Bagot na marhalto ma i naniagatan di robean,

       sai horas ma namanganhon,

       lam tu tambana dihamu na mangalean.

       Alai Amang/Anaha, didok situatua: marangkup do nauli mardongan na denggan, asa tangkas uju purba, tangkasan uju angkola, anggiat tangkas hita maduma, tumangkasan ma na mamora. Siangkup ni panggabean parhorasan i, tangkas ma damang marboaboa.

Ra : Gabe jala horas ma hita Amang/Ompung, tumpahon ni amanta namartua Debata, ia marpanangkasi ma hamu nuaeng disihombarna songon na hundul disiudurna songon na mardalan, ba tangkas ma tutu nang hami marboaboa.

       Tangkas songon na binoto muna, ia hami ianangkon ni natuatua nami on, daodao do parserahan nami, na maol mura do hami boi marpungu songon on. Diharap rohanami nian, sai leleng dope natuatua namion mangolu paihuihuton nami, alai songon nidok ni situatua :

       Ndada simanukmanuk manang sibontar andora,

       ndada sitodo turpuk siahut lomo ni roha,

       tung sae do saguru diamanta namartua Debata.

       Jadi, binsan boi hami pungu jala binsan denggan dope pandaian ni natuatua nami on, ba satahi saoloan hami pasahathon sipanganon na tabo di nasida. Dalan nami ma on patuduhon holong ni roha nami marnatuatua huhut mangido pasupasu sian nasida dohot sian hamu sude natuatuanami, ba ima da amang/ompung sitangkasna siangkup ni panggabean parhorasan i, botima.

Rs : Nauli jala na denggan ma i Amang/Anaha, nungnga tangkas hubege hami lapatan ni sipanganon nabinoan muna i, dipataridahon hamuna do nasai tongtong diparsangapi hamu natorasmuna; pos ma rohamuna, sai namartua do hamuna jala leleng mangolu bahenon ni Tuhanta; angkup ni i, ba hami pe antong namangido ma tu Debata, anggiat dapot nian dihamu songon nidok ni umpasa :

       Lomak ma silinjuang, lomak so binaboan

       Sai dapot angka naniluluanmuna jumpang najinalahan.

    

       Pangkat ma i marbunga hotang,

       tudia pe hamu mangalangka,

       disima dapotan pansamotan. Botima.

       (laos didok ma : Hatangki hata tambaan/ditambai angka   dongan).

Marsagi masiaturan ma sidok hata jala dipaliat ma hata i; parpudi sahali ma natuatua i (namanjalo sipanganon natabo i) mandok hata pasupasuan tu sude pomparanna laos paampuhonsa.

Dung diampu ianangkon/pomparan hata pasupasuan i, dibahen dongantubu ma tangiang panutup.

* Diulaon pasahat sipanganon natabo, dang patutna dope jouon Hulahula, alai molo tongon/tepat adong di huta i/diinganan i, dengganan do dipiringhon sipanganon i tu nasida

* Hata pangampuon (paampuhon dohot mangampu), sarupa do di sude ulaon adat Batak, ima songon na di Bab III.

* Olo do sipata ala ni situasi/kondisi, holan sakeluarga sian pomparan ni natuatua i pasahathon sipanganon na tabo tu natorasna, berpedoman tu prinsip :

   Disi las ari, disi pinanjomurhon.

     Sadihari boi tarpajadi, unang be sai niundurhon.

2. Sulang sulang  saompu (Martumbur ni arung).

      Pangulahon/prosedur pelaksanaan ni adat martumbur ni arung/ sulangsulang saompu, sarupa do songon pelaksanaan ni adat pasahat sipanganon natabo/ sulangsulang pomparan, holan na umbidang do na manghasuhuthon.

Molo sulangsulang pomparan, ba holan pomparan ni nasinulangan i do na manghasuhuthon, alai molo sulang sulang saompu, ba nasida na saompu ma na mang hasuhuthon.  Dongan tubu, satingkat di ginjang ni ompu nasida nasahasuhuton i ma nagabe Raja panise/ panungkun. Prioritas manulang, berpedoman tu prinsip mardangka salohot, martanda na sumolhot, mulai sian Anak, Parumaen, Hela, Boru, Pahompu sian anak dohot Pahompu sian boru.

Taringot tu biaya ni sipatupaon, tergantung kesepakatan ni na manghasuhuthon ma i, ai gabe andor sipaihutihuton do i dinasida diangka tingki na mangihut.

3. Sulang sulang hapunjungan (Tohontohonan).

     Mardomu tu kondisi kesehatan ni sada natuatua naung sai jotjot targanggu, marpingkiri ma ianangkonna dohot angka sisolhotna laho pasahat sipanganon nahinalomohon ni natuatuai (makanan kesukaan/ makanan favorit songon nidok ni hata nuaeng). Diusahahon angka ianangkonna ma manulingkit roha ni natorasna taringot di sipanganon apala nasinolom ni rahana i, asa tung tangkas sonang roha ni natuatua i, i ma nagabe Sulangsulang hapunjungan na, sipata didok Sulang sulang Tohontohonan.

Molo dung satahi saoloan angka ianangkon ni natuatua i, diranggi/disusun nasida ma rencana na mardomu tu ulaon i; dibuhul ma ari nauli ari na denggan laho pasahathon i. Dung dapot tingki na binuhul, marpungu ma ianangkon ni natuatua i, jala nungnga diparade nasida sipanganon apala nahinalomohon ni natuatuai, angkup ni i diparade nasida do dohot sipanganon umum.

Dung hirahira singkop sude, hundul ma nasida dijolo ni natuatua i, jala dipillit nasida ma sahalak laho manghatahon sipanganon i. (somalna sai anak sihahaan do nian manghatahon i alai boi do molo dipasahat tu anggina)

Manghuling ma ianangkon napinillit i laho pasahathon sipanganon i, ninna ma: Among, nungnga huboan hami/huparade hami sipanganon hapunjungan mi, alai jolo martangiang ma hita asa pangan. (laos dibahen ma tangiang mangan). Dung sidung tangiang mangan, diatur ma partording ni panulang :

*      Anak/parumaen jojor sian sihahaan sahat tu siampudan

*      Hela/boru, jojor sian sihahaan sahat tu siampudan.

*      Marudut ma muse pahompu naung hot ripe, mulai pahompu sian anak laos udut ma pahompu sian boru.

Ditingki manulang didok ma hatana ”Onma amang/ Ompung sulangsulang hapunjungan sian ahu anakmu/ parumaen muna/ helamuna/borumuna/ pahompu muna si…, las ma rohamuna manjalo, jala manghorhon las ni roha nang di hami. Disulanghon ma muse sipanganon i huhut didok hatana: Martua husulang Damang on/Amangnami on/Daompung on, manumpak ma tondina manuai sahalana sai pasauthon ma amanta namartua Debata.

Dung sidung disulanghon sipanganon, dilehon ma minum aek ni harambir manang aek natio, huhut didok hatana ninnama: On ma amang/ompung aek natio inumonmu, sai lam tu tio na ma parnidaanmuna, jala tu tio na ma nang parngoluan nami, botima. Songon i ma dibahen sude na manulang i sampe tolu hali .

Dung sidung disulangi natuatua i, mangulon ma jolo satongkin. Ditingki na magulon i ma manghatahatai jala marunungunung nasida na sakeluarga i, adong namanungkun tona, adong namanungkun warisan dohot angka na asing dope. Udut tusi, dipasupasu natuatua i ma pomparanna i ninna ma: Ima tutu, sai saut ma pangidoan ni angka pomparanhon, sai gabe ma hamuna sude, jala mamora, tumpahon ni amanta namartua Debata, botima.

Dung i, ditutup ma dohot tangiang panutup.

*      Sulangsulang hapunjungan on umumna dipasada do tu sulangsulang na asing, isarana Sulangsulang hariapan.

*      Molo dang adong sipanganon hapunjungan (makanan favorit) ni natuatua i, disulanghon ma sipanganon nasomal (umum) ima juhut na dicincang halus tamba ni i dengke.

*      Diulaon pasahat sulangsulang hapunjungan, adong do namanjou tutur na dihuta i, adong naso pola manjou ala berprinsip tu hata/istilah na pasahat sulangsulang  hapunjungan do.

*      Molo dijou do tutur tu ulaon i, masa ma marhata songon na di ulaon pasahat sipanganon na tabo, alai molo dang pola manjou tutur, dang pola be masa marhata, langsung nama tangiang panutup.

4. Sulang sulang hariapan (Pasidung Ariari).

Adong deba natuatua/pemuka adat mandok ianggo pandohan/istilah aslina najolo, sulangsulang hariaan do. Sipata do laos dibagasan sada ari dipasahat sulang sulang hapunjungan dohot sulangsulang hariapan.

Diari pangaradeon, dipadalan ma gonghon dohot joujou tu angka tutur dohot tondong, diparade ma nang angka na marhadomuan tu sipanganon sulangsulang dohot sipanganon umum. Di ari nabinuhul ni hasuhuton, ro ma angka tutur dohot tondong/angka nanigonghon, marpungu tu bagas ni natuatua sisulangan i.

Dung dapot tingki natinontuhon nasida, jongjong ma paidua ni suhut mandok hatana ninna ma: Santabi ma diamanta rajaraja dohot di inanta soripada nahuparsangapi hami; didok situatua, molo mardalan raja, ingkon jolo patiuron do dalan sidalananna, asa unang sungkotsungkot manang tartuktuk patna. Jadi, andorang so tamulai acara, parjolo ma jolo hupaandarhon hami, konsep partording ni ulaonta sadarion. Mangihuthon nasomal huulahon hami, tar songon on ma partordingna :

*.   Pasahat Sulang sulang;

-  Parjolo ma manulang sian anak/ parumaen jojor sian

  Sihahaan sahat tu  siampudan.

-  Udut ma muse  sian Hela/Boru, jojor sian sihahaan

  sahat tu siampudan.

-  Udut ma muse manulang,angka pahompu naung hot  ripe

  sian anak dohot   pahompu   naung  hot   ripe sian   Boru.

-  Perwakilan sian dongan tubu.

-  Perwakilan sian boru ni marga.

-  Perwakilan sian dongan sahuta.

-  Udut tusi, roma Hulahula marmeme pamoruanna

*.   Marsipanganon  (makan bersama).

Santabi ma di raja i Hulahula nami, dang na mangorui sangap ni raja i, alai ala ulaon sisada hasuhuton do ulaonta  sadarion, jala na rap mangambangi do hita di natuatua i pamoruanmuna na husulangi hami, jadi rajanami, ditingki namangan i ma annon hupadalan hami Tudutudu ni sipanganonta, langsung ma sian jolo nami jala mangihuthon adat na masa di  hami.

*.   Marhata sigabegabe.                                                

 *.  Tangiang panutup

       Songon i ma konsep partording ni ulaonta sadarion, molo adong sipadengganon, rap padengganhon ma hita, (laos dipangido ma panolopion sian angka raja).  Molo dung satolop di konsep, dimulai ma acara.

       Hombar tu na niaturhon ni Paidua ni suhut/Protokol, ro ma panulang sadasada tu jolo, disulang ma natuatua i tolu hali huhut didok hatana ninna ma : Martua husulang Damang on/Natuatua nami on/Ompung on/.. manumpak ma tondina manuai sahalana dihami pomparanna saluhutna, sai horas ma ibana manggomgom hami jala horas nang hami gomgomonna; tanggal ma sahitna so sian panghilalaanna, peut so sian parbinotoanna, ima tutu. (sarupa do hata sidohonon ni panulang, panjouon do na marbeda adong na mar among adong na mar simatua adong na mar ompung dohot angka na asing).

       Dung sidung disulang Ama/natuatua i, laos mangihut ma disulang dohot Inanta boru/ina soripadana.  Parpudi/ panutup ni acara manulang, ro ma Hulahula pasahat sipasahatonna, digoari ma i  Marmeme. (dang masa di halak Batak Toba Hulahula manulang boruna, jadi, didokma marmeme).

       Dung sidung acara manulang dohot marmeme, dibagi dipadalan ma panganan, dibahen hasuhuton ma tangiang mangan dohot huhuasi ni sipanganon.

Laos ditingki na mangan i do dipadalan angka namargoar ni Tudutudu ni sipanganon mangihuthon adat ni hasuhuton.

*.   Dinadeba, dipaadophon do  jolo Tudutudu ni sipanganon i tu jolo ni Hulahula, alai dung sidung mangan, dipaulak Hulahula ma muse tu suhut pamoruanna, asa nasida pasahathon tu angka hasahatanna. Adong muse do na mambahen hira na marbagi jambar niadopan, atik pe Tudutudu ni sipanganon na bernilai penghormatan do na pinadalan ni suhut, dang parjambaran na bernilai hak na berpeluang tuntutan.

       Dung sidung marsipanganon, ditutup ma jolo par manganon i dohot tangiang simpul mangan, sian Pangula ni Huria/Hasuhuton. Udut tusi, masuk ma tu na marhata sigabegabe.

(Raja sungkun sian dongantubu = Rs ; Raja alus ima paidua ni suhut/Raja Tinonggo = Ra)

Rs : Manghatai ma hita suhut nami.

Ra : Manghatai ma hita tutu, nungnga rade hami.

                

Rs : Nungga bosur hita mangan, mahap marlompan juhut, pamurnas ma i tu daging saudara tu bohi.

Sipasindak panaili ma i sipaneang holiholi.

Taringot tusi ma nahusungkun hami,

dia ma i langkatna dia unokna,

dia ma i hatana, dia ma nanidokna. Boima.

Ra : Horas jala gabe ma hita Hahadoli/Anggidoli, ia marpanungkun ma hamu disintuhu ni indahan masak naso sadia i, songon nidok ni situatua ma dohonon nami: godang sibutongbutong, otik si pir ni tondi.

       Sitiktik ma na gompa, golanggolang pangarahutna.

       Otik so sadia pe natupa, sai godang ma pinasuna.

       Taringot disipanganon nasosadia i, sigabegabe sihoras horas do nanidokna, botima.

Rs : Nauli jala na denggan ma i suhut nami, hami pe dohonon nami ma songon nidok ni umpasa:

       Bagot na marhalto ma i naniagatan di robean,

       sai horas ma namanganhon, lam tu tambana dihamu na mangalean.

       Alai tahe suhut nami, songon nidok ni situatua, marangkup do nauli mardongan na denggan, asa tangkas uju purba, tangkasan uju angkola, asa tangkas hita maduma tumangkasan ma na mamora, siangkup ni panggabean parhorasan i, tangkas ma suhut nami marboaboa.

Ra : Gabe jala horas ma hita Hahadoli/Anggidoli tumpahon ni amanta namartua Debata, ia marpanangkasi ma hamu nuaeng di sihombarna songon na hundul disiudurna songon na mardalan, ba tangkas ma tutu nang hami marboaboa.

       Tangkas songon na binoto muna, ia amanta natuatua i, nungnga leleng na sai marsahitsahit. Umpasa ni ompunta mandok:

       Ompu raja ijolo, martungkot siala gundi.

       adat na pinungka ni parjolo, ido ihutihuton ni nadipudi.

       Jadi, molo marsahit matua amaniba, pasahaton ni ianangkonna ma sulangsulang hariaan/hariapan. Ia amanta natuatua on, siihuthon adat do nasai leleng na on, alai nuaeng nungnga marsahitsahit ibana, dang tarbahensa be mangihuthon adat i songon naniulahonna siapari, ba ima Hahadoli/Anggi doli sitangkasna, siangkup ni panggabean parhorasan i, botima.

Rs : Horas jala gabe ma hita suhut nami, nungnga tangkas hamu marboaboa jala nungnga sude hami umbotosa, na pasahat sulangsulang hariapan do hape hita tu amanta natuatua i, laos pasidung ariarina sian paradaton siapari.

       Nauli jala na denggan ma i suhut nami nabinahenmuna tu natuatuanta i, ingkon sai parsangapan do tutu natorasniba asa martua jala leleng mangolu ditano on; sai horas ma nasinulangan, horas ma namanulangi, horas ma hita napungu on saluhutna.

       Andor hadumpang ma togutogu ni lombu,

       andor hatiti togutogu ni horbo.

       Nangnang saur matua nauatuanta on pairingiring pahompu,  sahat tu na marnini marnono, ima tutu.

       Sitorop ma dangkana, sitorop nang rantingna,

       sitorop ma nang bulung na.

       Sai gabe ma hahana, gabe dohot anggina,

       mangihut ma dohot boruna, ima tutu.

       Lomak ma silinjuang, lomak so binaboan.

       Sai dapot angka naniluluan,

       jumpang najinalahan, ima tutu.

       Pangkat ma i marbunga hotang,

       tudia pe hamu mangalangka,

       disima dapotan pansamotan. Botima.

       Hatangki hata tambaan/ditambai angka dongan.

Dung sidung sian dongantubu mandok hata, dipaulak ma  panghataion i tu paidua ni suhut, asa nasida paliathon /mangaturhon partording ni sidok hata.

Dijalo paidua ni suhut ma hata i sian dongantubu, laos dipaliat ma tu horong horong na mangihut :

*      Hata sigabegabe/sihorashoras sian boru/Bere/ Ibebere/ Sima tua  ni boru. 

*      Hata sigabegabe/sihorashoras sian dongan sahuta

*      Hata sigabegabe/sihorashoras sian aleale/organisasi

*      Hata si gabegabe/Pasupasuan  sian  horong  Hulahula :

-     Tulang

-     Bona Tulang

-     Bona ni ari .

-     Hulahula ni haha anggi

-     Hulahula naposo

-     Pariban

-     Tulang rorobot

-     Hulahula tangkas

Adong do namambahen Hulahula tangkas paampuhon, hape, ianggo najolo, ninna angka natuatua/ pemuka adat, ala ulaon sisada hasuhuton do ulaon i, paidua ni suhut /Raja tinonggo sian dongan tubu do paampuhon, hata pasupasu do ninna sian Hulahula tangkas, laos mambahen tangiang panutup

Jolo dijalo paidua ni suhut  ma  hata   panggabean

parhorasan i, dung pe i asa di pasahat  tu suhut sihabolonan, ninna ma : Mauliate ma di amanta raja dohot inanta soripada na manghaholongi hami, namangalehon hata nauli na denggan/hata pasupasu panggabean parhorasan tu hami.

Andorang so hupaampuhon saluhutna i tu suhut sihabolonan, dohononku ma  songon nidok ni umpasa :

Harbangan ma i dalan tu huta,

Balatuk dalan tu jabu.

Hata panggabean parhorasan napinasahat muna,

huampu hami ma i martonga ni jabu.

Turtu ninna anduhur, tiotio ninna Lote.

Hata nauli na pinasahat muna,

sai unang ma muba unang mose.

Tingko ma Inggir-inggir, bulung na i ratarata.

Angka hata pangidoan nauli i, sai pasauthon ma amanta namartua Debata

Nuaeng pe, di hamu hasuhuton nami/suhut sihabolonan, ampu hamu ma hata panggabean parhorasan i, botima.

Rampak jongjong ma suhut sihabolonan/bona ni hasuhuton, diampu nasida ma hata sigabegabe sihorashoras i (dilehon ma kesempatan parjolo tu  boru suhut mandok mauliate tu sude angka tutur dohot tondong), dung i, ninna ma: Mauliate ma di amanta raja dohot inanta soripada na manghaholongi hami, na pasahathon hata nauli na denggan tu hami. Songon nidok ni umpasa ma dohonon nami:

Naung sampulupitu ma i, jumadi sampulu ualu.

Hata nauli napinasahat muna i ,

huampu hami ma i martonga ni jabu.

Ampu mai diampuan nami, puak di abara nami:

Sahat ma solu tinogu tu bontean,

sai leleng ma hita mangolu,

di parhorasan di panggabean. Botima.

Manimpuli ualon i, dibahen Hulahula ma tangiang panutup.

Hira sarupa do hata sigabegabe sian pangalambungi dohot panauri, jadi dang pola be nisurathon jojor dison, alai pinarade do pigapiga umpasa namardomu tusi songon na ditoru on.           

Nisandehon sigesige, tu bungkulan ni sopo.

Dang pola be iba manise, ai nungnga tangkas binoto.

Andor hadumpang togutogu ni lombu,

andor hatiti togutogu ni horbo.

Sai nangnang hamu saurmatua pairingiring pahompu,

sahat tu namarnini marnono.

Mardalan tu Purbatua,

jolo boluson do parsingkaman.

Halak naburju marnatuatua,

sai tiur do dapotonna pandaraman.

Ansim songon sira, tonggi songon tobu.

Haroan marharoan ma dihita, torop ma anak dohot boru.

Pinantikhon hujur, ditopi ni tapian.

Tudia pe hamu mangalangka,

disi ma dapotan parsaulian.

Eme sitambatua, parlinggoman ni siborok.

Amanta Debata do pangalapan tua,

sai horas ma hamuna diparorot.

Sahat ma solu, tinogu tu bontean.

Nungnga sahat ulaonta on jala tulus,

sai sahat ma hamu tu parhorasan, sahat tu panggabean.

Tweet

Subscribe to receive free email updates: