5. Solup ni Adat na Berlaku di Ulaon

Dipigapiga ulaon, sipata tubu do “suasana tak enak”, sampe haruar hata na so tabo begeon ni pinggol/sipareon, otik do nian bonsirna, na dirimpu do i tingkosna, mampartahanhon solup ni adatna, hape ndada na suhut parhundulna, horong Tulang do umpamana. Umpasa ni halak Batak mandok:

Gaja pinagajagaja, duhut duhut do gagatonna.

Raja pinarajaraja, guru di suhut do hasuhutonna.

Mangihuthon hata ni umpasa na di ginjang i, solup ni suhut do sipangkeon di ulaon, sidapot solup do na ro. Molo sada (sapihak) do suhut/namanghasuhuthon ulaon i, ba holan sada do solup ni adat si pangkeon (na berlaku) disi; alai molo dua (dua pihak) suhut/na manghasuhuthon ulaon i (suhut paranak dohot suhut parboru), dua ma solup ni adat pangkeon (na berlaku). Di sude ulaon adat sisada hasuhuton, songon naung nigoaran di ginjang i, ala holan sada do solup ni adat sipangkeon (na berlaku), ima solup ni adat ni suhut, berlaku ma prinsip sidapot solup do na ro; manang songon dia pe adat namasa dihasuhuton i, mangihut tusi do sude pardalan ni paradatan i; tarmasuk manontuhon na margoar ni Tudutudu ni si panganon: namargoar dia tu Hulahula, dia tu Boru, dia tu Dongantubu, Dongan sahuta dohot angka na asing.

Hombar tu prinsip na diginjang i (si dapot solup naro), ianggo najolo ninna, sai ditingki parmanganon i do di padalan na margoar ni Tudutudu ni sipanganon, langsung sian jolo ni suhut/Paidua ni suhut manang Raja tinonggo; dang pola jolo dikonsep i mangido persetujuan ni angka raja naro, holan boaboa do sian pihak ni hasuhuton, manang songon dia adat namasa di nasida; alai tutu, andorang so dihatahon boaboa i tu adopan ni angka raja naro, sai jolo masipatangkasan masipaingotan do nasida na mardongan tubu, manjaga unang silap unang sala.

Disude ulaon adat sidua hasuhuton, ala dua (dua pihak) suhut na manghasuhuthon ulaon i, rap marpangke (rampak berlaku) do solup ni adat ni suhut na dua pihak i; hombar tusi, berlaku ma prinsip:

Aek godang tu aek laut, dos ni roha sibahen na saut.

jolo diseat hata ma, asa diseat raut.

Mangihuthon hata ni umpasa na diginjang i, molo di ulaon sidua hasuhuton, ingkon jolo tangkas do hataan nasa hak dohot kewajiban ni ganup suhut (musyawarah untuk mufakat songon nidok ni hata nuaeng).

Tweet

Subscribe to receive free email updates: