4. Marunjuk

Andorang so sahat tu pesta adat marunjuk, martangga tangga do loloan (forum) parhataan sidalanan, mulai sian na marhorihori dingding/patuahonhata/marhusip, manggoli sinamot /marpudun saut, martumpol sahat tu pesta pasahat adat na gok nanigoaranna Marunjuk. Molo na mangalua tu jolo ni Huria, alai pintor di ihuthon adat, tarmasuk tu ulaon adat marunjuk do i ninna nadeba, alai nadeba mandok tarmasuk tu kategori mangadati do. Hombar tu tanggatangga ni forum/parhataan i, pinatedek ma prosedur pelaksanaanna songon na ditoru on :

4.1. Marhorihori dingding      

         

Dung sahat informasi sian naposo tu natorasna, disuru par anak ma Pamoruanna dohot Dongantubuna manopot parboru, na ni wakilan ni Pamoruan dohot  Dongantubuna, manang boi dohonon, pajumpang manghatai ma delegasi ni paranak dohot delegasi ni parboru. (dang marsipanganon).

Dung jolo marsirarion satongkin, sahat ma tu bona ni sihataan, jala tar songon on ma partording ni parhataan disi (Delegasi ni Parboru = Pb ; Delegasi ni Paranak = Pa)

Pb : Santabi ma dihamuna Lae, tar songon dia do haroromuna tu bagas on (maksudna, ise do hamu jala aha do naniharohon muna)

Pa : Ia hami Lae, suruan/utusan ni natoras ni si …..(sidoli) do hami, (laos dipatandahon nasida ma dirinasida dohot parsolhotonna.

Pb : Dia ma lae naniharohon muna, dipaboa lae ma asa hubege hami.

Pa : Ima da lae, didok paramanhu si doli, adong ninna boru ni datulang parjabu on nasinolom ni rohana jala nungnga masiunduhan hata nasida, ba ido da lae nahupatangkas hami, botima.

Pb : Antong molo songon i do lae, ba nisungkun ma jolo siboru manang songon dia pandokna (laos hehe ma sahalak sian pamoruan ni parboru i manungkun siboru, laos dihatahon ma songon dia pandok ni siboru i,);

       ninna ma manguduti : Tingkos do lae nang pandok ni siboru, nungnga masiunduhan hata nasida, ba nuaeng pe songon dia ma muse udutna, botima.

Pa : Mauliate ma lae/Rajanami, nungnga tangkas rampak umbotosa hita angka natuatua naung masihaholongan jala masiunduhan hata naposo, pangidoan nami, rampak mamingkiri ma hita rajanami songon dia sibahenonta patulus sangkap ni naposo i, botima.

Pb : Nauli do lae nanidokmuna i, hami pe satolop ma disi, alai hamu ma jolo parjolo paboahon napiningkiranmuna, tontu nungnga adong garisgarisna dohot buhubuhuna sian raja i namarsuru hamuna, botima.

Pa : Mauliate ma  rajanami, tanda do hamuna anak ni raja pahompu ni namora, anak ni nabisuk pahompu ni namarroha, namalambok pusu naboi mandodo roha, apala tung tingkos do songon nanidok muna i, adong do tutu garisgarisna dohot buhubuhuna sian raja i namarsuru hami, jala songon on ma nian ianggo pangidoan ni raja i. (laos ditariashon ma angka rencana nanitonahon ni paranak; bentuk ni ulaon ditaruhon/dialap jual, bentuk ni sinamot, sinamot hibul/rambu pinungu/sitombol) godang ni sinamot, andigan marpudun saut, martumpol dohot pesta adatna, rodisude naringkot namarhadomuan tu parunjuhon

       Direspon/ditanggapi pihak parboru ma usul napinasahat ni pihak paranak i, rampak ma nasida mangalului solusi, huhut manusun konsep/rancangan kesepakatan, siboanon tu loloan /forum natumimbo ima di na marpudun saut, untuk disempurnakan dan disahkan.

Pb : Lae, nungnga rimpun sude tarangrangi jala tasimpulhon angka sangkap dohot tahi (rencana ) i, molo tung adong dope angka natading, sai naboi dope hita masipasungkunan, andorang so sahat dope tu na marpudun saut. Molo tung adong nahurang lobi dipanjaloon nami manang na pasintak patebur panghataion nami ba songon nidok ni situatua ma dohonon nami :

Gala gala sitelluk, telluk mardaguldagul,

Diangka nahurang lobi, nanget ma i niapulapul, botima.

Pa : Mauliate ma rajanami, nungnga tung gok lasniroha nami, di siala panjanghonon muna dihami, lumobi di siala haradeon ni rohamuna di nanaeng mamungka partuturon hita. Nungnga hubereng hami tangkas, elekmuna i marboru, las ma tutu nang roha ni raja i namarsuru hami, ai barita las niroha ma antong siboanon nami tu jolo ni rajai.

Molo tung pe songon na hurang somba hami maradophon hamu, ba marpanganju ma hamu dihami rajanami, jala suang songon nidok muna i ma tutu nang dohonon nami:

Galagala sitelluk, telluk mardaguldagul,

diangka nahurang lobi, nangetnanget ma i niapulapul,

botima.

Songon i ma marujung panghataion i, dung i marhehe nauli ma, huhut masijalangan, alai dumenggan nian molo ditutup dohot tangiang sian pihak parboru, asa anggiat horas na mardalan horas nang na tinggal.

*   Diangka pembahasan na songon on, boi ma nian saling  ulur tarik, tenggang  rasa, kendalikan emosi.

*    Konsep kesepakatan (Rancangan ketetapan/ Rantap) na ni susun ni delegasi/domudomu i, nungnga boi langsung boanon tu forum persidangan na tumimbo ima “marpudun saut” untuk disempurnakan dan disahkan.

*   Di kota-kota besar khususna di Jakarta, sipata marganti goar do loloan/forum parhataan marhori-hori dingding gabe digoari Patuahon hata ala adong saotik perbedaanna; di forum marhorihori dingding, dang adong dope perkenalan antara orangtua ni sidoli dohot orangtua ni siboru; molo di na patuahon hata, nungnga jolo adong perkenalan ni orangtua kedua belah pihak jala nungnga adong kesepakatan prinsip (iming-iming) taringot tu sinamot. Untuk memformilkan kesepakatan (iming-iming) i, ditontuhon nasida ma pertemuan antar delegasi/domu-domu terdiri dari Boru dohot Dongantubu laho manusun konsep kesepakatan umum/Rancangan Ketetapan (Rantap) siboanon tu forum barikutna/na tumimbo ima marpudun saut, jadi, pada dasarnya, sarupa do songon na marhorihori dingding.

*     Diangka tingki na parpudi on, masa do forum parhataan/adat Marhusip didok goarna, mar indahan masak lengkap martudutudu ni sipanganon dohot dengke simudurudur, alai  gabe pandokdohi do tu suhut nadua pihak.

*   Molo tapatangkas tapamanat fungsi dohot tingkat ni parhataan di loloan/forum natolu i (marhorihori dingding, patuahon hata dohot marhusip), sarupa do, rap siboanon dope tu forum na tumimbo ima marpudun saut, jadi jotjot do nibege sungkunsungkun na mandok: apakah adat marhusip yang justru menambah beban ni suhut perlu dilestarikan ? Unang lupa hita, disada tingki, suhut do nang hita. Asa ummura timbanganta, pinarade do tabel perbandingan ni na tolu forum i di Bab.V. Sipahusorhusoron ni roha.

4.2. Marpudun saut.

     

Songon naung tinaringotan dijolo ni on, najolo, olo do sundat parbagason ala ni sinamot na hurang godang; mardomu tusi sai adong do lohot anggapan holan sinamot i do na manontuhon, saut manang so saut parbagason i. Ala ni ido umbahen na sipata digoari ulaon marpudun saut i Marhata sinamot. Sabagian sian sihataan di na marpudun saut do manghatai sinamot, ipe, holan na patangkashon nama, ai nungnga dihatai hinan i di ulaon na di jolona ima ditingki na marhorihori dingding; jadi ianggo goar/judul ni ulaon i na paling ampit (relevan) Marpudun saut do.

     

Ditingki na marhori hori dingding, nungnga dibuhul hinan ari laho patupahon ulaon marpudun saut. Dung dapot ditingkina, borhat ma rombongan ni paranak tu huta ni parboru mamboan sipanganon masak lengkap dohot lompan juhut na marpanggoari Tudutudu ni sipanganon; parboru pe nungnga diparade dengkena.

     

Dung sahat rombongan ni paranak tu jabu ni parboru, songon na masipatangkasan ma jolo nasida manang na adong dope sipaimaon; molo naung singkop hadir sude angka tutur dohot tondong, dimulai ma acara.

Dipasahat paranak ma Tudutudu ni sipanganon i tu jolo ni suhut parboru, huhut didok hatana, ninna ma: Rajanami, dison ro hami pasahat Tudutudu ni sipanganonta, dalan nami ma i pasangaphon rajai;

Sitiktik ma na gompa, hodong lais ni ruma,

otik so sadia pe na tupa, sai godang ma pinasuna,

las ma rohamuna, imatutu.

Udut tusi, dipasahat parboru ma Dengke huhut didok hatana, ninna ma; Dihamu pamoruan nami, dison hupasahat hami Dengke sahat/Dengke simudurudur,

Sitiktik ma na gompa, hodong lais ni ruma,

otik sosadia pe na tupa, sai godang ma pinasuna.

las ma rohamuna, ima tutu.

Dung sidung napasahat Tudutudu ni sipanganon dohot Dengke, dibagihon/dipadalan ma panganan, jala sian paranak ma mambahen tangiang mangan dohot huhuasi ni sipanganon (Sitiktik ma nagompa …dst). Dung sidung marsipanganon, ditutup ma jolo parmanganon i dohot tangiang simpul mangan, sian pihak paranak /Pangula ni Huria. Marudut ma muse tu na marbagi Tudutudu ni sipanganon.

Ala holan dengke simudurudur dope naung dipasahat parboru tu paranak, dibagi ma Tudutudu ni sipanganon i, dilehon parboru ma deba tu paranak, ima na gabe singkat ni dengke sitiotio/Ulu ni dengke, jala digoari ma i Ulu ni dengke mulak, (Ala laos sian Tudu tudu ni sipanganon i do na gabe Ulu ni dengke/dengke Sitiotio, berobah ma goarna gabe Jambar/pajambaran na bernilai hak jala berpeluang tuntutan).

Dung sidung marbagi jambar juhut/ parjambaran, diuduti ma tu na marhata.

Adong tolu ragam partording ni parhataan di ualon marpudun saut ima:

* Masitawaran secara bertingkat-tingkat, gabe godang mangallang tingki, jadi lam ditinggalhon halak Batak ma i, ala dang sesuai be tu zaman na serba praktis.

*  Mambahas/menyempurnakan konsep kesepakatan napinatupa ni delegasi/boru domudomu ditingki/ diforum marhorihoridingding/ patuahon hata/ marhusip.

     Sitaringotan dope on di Bab.V. Sipahusorhusoron ni roha.

*   Manghatahon napinaborhat ni tangiang, alai gabe mago do fungsi ni delegasi/boru domudomu, marisuang ma nahinataan ni boru/domudomu di tingki ulaon marhorihori dingding/ patuahonhata/ marhusip. Dang digubris parhata ni nadua pihak be konsep kesepakatan na nisusun ni boru na padomuhon rencana ni suhut nadua pihak i.Dang mardalan be jambar juhut tu domudomu.

Ala holan dua ragam/dua versi nama nuaengon na tarida di loloan/forum parhataan, pinatedek ma dison partording ni parhataan nadua versi i, songon na di toru on: (Raja sungkun sian parboru = Rs : Raja alus sian paranak = Ra.

Versi I.

Rs : Manghatai ma hita raja ni boru.

Ra : Manghatai ma hita tutu rajanami, nungnga rade hami.

Rs : Nungnga bosur hita mangan, mahap marlompan juhut, pamurnas ma i tu daging, saudara tu bohi, sipasindak panaili ma i, sipaneang holiholi. Taringot di sipanganon i raja ni boru, dia ma i langkatna dia unokna, dia ma i hatana, dia ma i nanidokna, botima.

Ra : Gabe jala horas ma hita rajanami tumpahon ni amanta namartua Debata, ia marpanungkun ma nuaeng raja i disintuhu ni indahan masak na sosadia i, Rajanami, songon nidok ni situatua ma dohononnami, godang sibutong-butong, otik sipir ni tondi,

Sitiktik ma nagompa, hodong lais ni ruma,

otik so sadia pe natupa i, sai godang ma pinasuna,

ianggo hata ni i rajanami, panggabean parhorasan do nanidokna, botima.

Rs : Horas jala gabe ma hita tutu raja ni boru, hami pe dohonon nami ma songon nidok ni umpasa :

Bagot na marhalto ma i na niagatan di robean,

sai horas ma na manganhon, lam tu tambana dihamu namangalean. Alai amang boru didok situatua, marangkup do nauli, mardongan nadenggan, asa tangkas uju purba, tangkasan uju angkola, anggiat tangkas hita maduma, tumangkasan ma na mamora. Disihombarna songon na hundul, disiudurna songon na mardalan, siangkup ni parhorasan panggabean i, tangkas ma dipaboa raja ni boru, botima.

Ra : Horas jala gabe ma hita rajanami, tumpahon ni amanta na martua Debata, ia marpanangkasi ma nuaeng raja i disiangkup ni panggabean parhorasan i, ba tangkas ma tutu nang hami marboaboa.

Rajanami, bangko doi di hita jolma, molo balga anak pangolihononhon, magodang boru pamulion; Ditingki nasalpu i, di ari nauli di bulan nadenggan i, di na mardalani anak nami, ba pajumpang dohot boru ni raja i; jempek hata dohonon, masihaholongan nasida jala masiunduhan hata laho mamungka parsaripeon naimbaru, anak nami nanaeng helamuna jala borumuna nanaeng parumaen nami. (molo naung parjolo martumpol didokma : nungnga marpadan nasida dijolo ni huria i, ima na taudurhon nangkiningan i tu Gareja),

Mardomu tu si do rajanami, ro hami nuaeng mandapothon raja i, manungkun adat sipasahaton nami tu raja i Hulahula nami, ba ima rajanami sitangkasna, siangkup ni panggabean parhorasan i, botima

Rs : Horas jala gabe hita amangboru/raja ni boru, ido tingkosna songon nanidokmuna i, balga anak pangolihononhon, magodang boru pamulion, ia nungnga tangkas dipaboa amangboru taringot di ulaonta sadarion, ima di naung masihaholongan anakmuna nanaeng helanami dohot borunami nanaeng parumaen muna (molo naung parjolo martumpol didokma: jala nungnga marpadan nasida dijolo ni Debata nang dijolo ni huria i, ima na taudurhon nangkiningan i tu Gareja) marsangkap naeng mamungka parsaripeon na imbaru, mardomu tu si amangboru/raja ni boru, songon nidok ni umpasa ma dohonon nami:

Dangka ni hau dapdap ma i tu dangka ni arirang,

sai saut do na marrongkap, tung naso jadi sirang.

Sai marrongkap ma nasida songon bagot,

marsibar songon ambalang,

masigomgoman tondina, saut nasinangkap niroha.

Nuaeng pe amangboru/ raja ni boru, ala marpanungkun ma hamu diadat sipasahaton muna tu hami nanaeng Hulahulamuna, ba pasahaton muna ma tuhami sinamot na godang, dalan palashon rohanami, disima horbona, disima lombuna, disima hodana disima dohot Mas na, botima. 

Ra : Horas jala gabe ma hita rajanami, taringot tu pangidoan ni raja i, dang pola namanjua hami disi, ianggo olat ni na tarpatupa hami, sai na patupaon nami do, pos ma roha ni raja i. Laos namardomu tusi do Rajanami, diari nasalpu i, nungnga husuru hami nian delegasi/borunami laho manghatahon tuk ni gogonami rodi sude rencana nahupingkiri hami, molo satolop Raja i, asa ditariashon nasida konsep rencana naung pinatupa nasida. (Konsep rencana napinatupa ni kedua delegasi ditingki marhori horidingding)  , Botima.

Rs : Horas jala gabe ma hita Amang boru/Raja ni boru, las situtu rohanami mambege hatamunai, ala rade do hamu mangoloi pangidoan nami. Amangboru/Raja ni boru,  asa unang mulahulak tutu panghataion songon na mangusa botohon, jala asa unang  marisuang nanihalojahon ni angka boru domudomu napadomuhon rencana ni suhut na dua pihak, ba, denggan do i nian didok roha, alai jolo pinangido ma jolo pandapot sian angka dongan. (Laos dipangido ma panolopion sian angka raja. Molo satolop nasida, dipangido ma asa jongjong boru domudomu manghatahon konsep rencana naung pinarade nasida. Rap jongjong ma boru domudomu ni nadua pihak,  boru sian pihak paranak ma namanghatahon konsep  rencana i, ima taringot tu :                           

*  Bentuk ni Sinamot (rambu pinungu/sitombol)

* Godang ni sinamot Rp. …..

*  Bolahan amak

* Mata ni ulaon/Pesta (arina, bulan, taon,mulai pukul piga)

* Inganan ni Pesta.

* Torop ni undangan,

* Parjuhutna.

* Bentuk ni parjambaran.

* Godang ni ulos herbang.

* Ulaon sadari (dohot angka na asing na mardomu tu pesta unjuk nanaeng sipatupaon); songon i ma rajanami naung hurencanahon hami, botima).

Diuduti raja parsinabung/Raja sungkun sian parboru i ma muse hatana, ninna ma : Mauliate ma dihamu pamoruon nami, nungga dipatorang hamu tu hami konsep rencana muna. Nuaeng pe dihita namarhaha maranggi /namar Dongantubu, Boru, Dongan sahuta, Pariban, songon i nang Hulahula nami, lumobi di Suhi ni ampang naopat dohot Suhut sihabolonan nami, nungnga rampak mambege hita di konsep rencana na pinarade ni boru/delegasi ni nadua pihak, molo adong nahurang singkop, rampak ma hita pasingkophon; di angka sitiroan, rampak ma hita maniroi. (laos dipaliat ma hata i tu sude pihak parboru asa masibahen tanggapanna /paniroi onna) Songon dia dos ni rohanta, pinasahat ma hataon tu :

* Dongantubu (dialusi)

* Boru (dialusi)

* Dongan sahuta (dialusi)

* Pariban  (dialusi)

* Hulahula (dialusi)

* Suhi ni ampang na opat  (dialusi)

* Suhut sihabolonan (dialusi) 

(Dung sidung pembahasan, diuduti parhata ni parboru i ma muse hatana ninna ma) : Amangboru/rajani boru, nungnga singkop sude tahatai jala tatolopi angka namardomu tu ulaon nanaeng sipatupaonta, molo tung adong angka natinggal angka nalupa, ba sai naboi dope masipaingotan suhut sihabolonanta, jadi nuaeng pe, paboa naung satolop hita diangka naung tahatai i, pasahat hamu ma patujolo ni sinamot, botima.

Ra : Nauli rajanami nungnga rade hami (dijalo ma hepeng patujolo ni sinamot i sian suhut paranak, laos disuru ma sahalak pamoruanna pasahathon i tu parhata ni paboru) huhut didok ma hatana ninna ma : ima rajanami patujolo ni sinamot godangna Rp…, jala panggohina Rp…. nari, pasahaton nami ma i di mata ni ulaon/pesta, las ma roha ni raja i manjalo i, botima

Rs : Mauliate amangboru/raja ni boru, dison nungnga sahat hujalo hami patujolo ni sinamot godangna Rp… jala panggohina Rp…..   nari pasahaton muna dope di mata ni ulaon/pesta i, nungnga las rohanami manjalo i. (udut tusi dipasahat ma patujolo ni sinamot i tu suhut sihabolonan, huhut didok ma hatana ninna ma). Dihamu suhut sihabolonan nami, dison nungnga dipasahat pamoruanta marga… patujolo ni sinamot godang na Rp…..…jala pasahaton nasida dope panggohina dimata ni ulaon/pesta gadangna Rp. ………. nari, sai manumpak tu nauli manumpak tu nadenggan ma on sinamot ni borunta on pangkeon muna laho patulus ulaonta nanaeng ro, las ma rohamuna manjalo; (udut tusi didok ma muse hatana tu paranak ninna ma) 

Amangboru/rajani boru, asa rasmi angka naung tahatai i, songon nidok ni situatua  Hori ihot ni doton, hata si ingoton, tapasahat ma ingotingot, asa dihatahon dongan sahutanta. Lehon hamu ma nasian hamu asa hutambai hami, botima.

Ra : Nauli rajanami, nunga huparade hami, indion ma ingotingot sian hami godang na Rp…. (laos disuru ma sahalak pamoruanna pasahathon i tu parhata ni parboru)

Rs : Mauliate ma amangboru/rajani boru, (laos didok ma tu suhut parboru asa ditambai ingotingot nasian paranak i satonga ni na nilehon nasida i ), udut tusi dipasahat ma ingotingot i tu dongan sahuta/ STM/ dongantubu molo dibona pasogit. Dijalo Dongan sahuta ni parboru ma ingotingot i, jala dipangido ma, asa dohot Dongan sahuta ni paranak jongjong rap dohot nasida, alai Dongan sahuta ni parboru do ianggo na manghatahon, ala di alaman /dijabu nasida do dipatupa ulaon marpudun saut i. Dihatahon dongan sahuta/STM ma ingotingot i, ninna ma: Sadarion, diari nauli diari na denggan on, ari… tanggal …bulan … taon …nungnga sahata satolop paranak marga… dohot parboru marga… patupahon pesta unjuk/parunjuhon ni anak dohot boru di ari … tanggal …bulan … taon … inganan di… mulai pukul….;sinamot rambu pinungu/sitombol/sinamot hibul godangna Rp.., patujolo ni sinamot nungnga dipasahat paranak tu parboru godangna Rp…, panggohina Rp…. nari, pasahaton ni paranak ma i tu parboru dimata ni ulaon/pesta; torop ni undangan sian pihak parboru/paranak hirahira ….halak, parjuhutna….., bentuk ni parjambaran: ulu ni dengke mangihut/niadopan, ulos herbang sipasahaton ni parboru tu paranak godangna …bulung/Lembar/Helai.

Songon ima naung husurathon hami dison, molo adong dope nahurang, masipaingotan hita.

(molo adong nahurang/sitambaan, dipasahat /dipaboa ma i tu dongansahuta  asa disurathon /dihatahon), dung hira singkop sude, didokma hata nauli nadenggan, ninna ma:

Dihamu suhut nami nadua pihak, paranak dohot parboru, songon nidok ni umpasa ma dohonon nami:

Balintang ma pagabe tumundalhon sitadoan,

ari muna do horas jala gabe, ai  tangkas do hamu

masipaolooloan.       

       Eme sitambatua, parlinggoman ni siborok.

amanta Debata do pangalapantua,

sai horas ma hita saluhutna diparorot.

Sahat ma Solu , tinogu tu Bontean.

Sai leleng ma hita mangolu,

diparhorasan nang dipanggabean

Dison nungnga hujalo hami ingot ingot, sian suhut paranak dohot sian suhut parboru, godang na Rp… , rap marningot ma hita di ulaonta nanaeng ro. Hori ihot ni doton, hata si ingoton, rap mandok ma hita 3x ingot ingot

Panimpuli ni ulaon i, sian Tulang/Hulahula ni parboru ma mambahen tangiang panutup, jala dung sidung tangiang, dibagihon ma ingotingot..

Dinalaho borhat mulak paranak, dipahuntihon parboru ma tandok naung ditimpus/dirahut, namarisi indahan dohot dengke, dipataru calon parumaen i ma sahat tu harbangan. Tandok i ma na gabe tanda/simbol  paboahon naung dipudun hata saut, naso jadi muba naso jadi mose.

Versi II.

Rs : Manghatai ma hita raja ni boru.

Ra : Manghatai ma hita tutu rajanami, nungnga rade hami.

Rs : Nungnga bosur hita mangan, mahap marlompan juhut, pamurnas ma i tu daging, saudara tu bohi sipasindak panaili ma i, sipaneang holiholi.

       taringot di sipanganon i raja ni boru,

       dia ma i langkatna dia unokna,

       dia ma i hatana, dia ma i nanidokna,botima.

Ra : Gabe jala horas ma hita rajanami, tumpahon ni amanta namartua Debata, ia marpanungkun ma nuaeng raja i, disintuhu ni indahan masak na sosadia i, Rajanami, songon nidok ni situatua ma dohononnami, godang sibutongbutong otik sipir ni tondi;

Sitiktik ma nagompa, hodong lais ni ruma,

otik so sadia pe natupa i, sai godang ma pinasuna,

ianggo hata ni i rajanami, panggabean parhorasan do nanidokna, botima.

Rs : Horas jala gabe ma hita tutu raja ni boru, hami pe dohonon nami ma songon nidok ni umpasa:

Bagot na marhalto ma i na niagatan di robean,

sai horas ma na manganhon,

lam tu tambana dihamu namangalean.

Alai amang boru, didok situatua, marangkup do nauli mardongan nadenggan, asa tangkas uju Purba, tangkasan uju Angkola, anggiat tangkas hita maduma, tumangkasan ma na mamora; Disihombarna songon na hundul disiudurna songon na mardalan, siangkup ni parhorasan panggabean i, tangkas ma dipaboa raja ni boru, botima.

Ra : Horas jala gabe ma hita rajanami, tumpahon ni amanta na martua Debata, ia marpanangkasi ma nuaeng raja i, disiangkup ni panggabean parhorasan i, ba tangkas ma tutu nang hami marboa boa.

Rajanami, bangko doi di hita jolma, molo balga anak pangolihononhon, magodang boru pamulion; Ditingki nasalpu i di ari nauli di bulan nadenggan i, di na mardalani anak nami, ba pajumpang dohot boru ni raja i; jempek hata dohonon, masihaholongan nasida jala masiunduhan hata laho mamungka parsaripeon naimbaru, anak nami nanaeng Helamuna jala borumuna nanaeng Parumaen nami. (molo naung parjolo martumpol didokma: nungnga marpadan nasida dijolo ni Huria i, ima na taudurhon nangkiningan i tu Gareja),

Mardomu tu si do rajanami, ro hami nuaeng mandapothon raja i, manungkun adat sipasahaton nami tu raja i Hulahula nami, ba ima rajanami sitangkasna, siangkup ni panggabean parhorasan i, botima

Rs : Horas jala gabe ma hita amangboru/raja ni boru, ido tingkosna, songon nanidokmuna i, balga anak pangoli hononhon, magodang boru pamulion, ia nungnga tangkas dipaboa amangboru taringot di ulaonta sadarion, ima di naung masihaholongan anakmuna nanaeng Helanami dohot borunami nanaeng parumaen muna (molo naung parjolo martumpol didokma: jala nungnga marpadan nasida dijolo ni Debata nang dijolo ni Huria i, ima na taudurhon nangkiningan i tu Gareja) marsangkap naeng mamungka parsaripeon na imbaru, mardomu tu si amangboru/raja ni boru, songon nidok ni umpasa ma dohonon nami :

Dangka ni hau dapdap ma i tu dangka ni arirang,

sai saut do na marrongkap, tung naso jadi sirang.

Sai marrongkap ma nasida songon bagot,

marsibar songon ambalang,

masigomgoman tondina , saut nasinangkap niroha.

Nuaeng pe amangboru/ raja ni boru, ala marpanungkun ma hamu diadat sipasahaton muna tu hami nanaeng Hulahulamuna, ba pasahaton muna ma tuhami sinamot na godang, dalan palashon rohanami, disima Horbona, disima Lombuna, disima Hodana disima dohot Mas na.  Molo tung ringgit sitio soara pe dilehon hamu, nauli do i asa ummura tiopon nami, jadi lehon hamu ma Rp….., botima. 

Ra : Horas jala gabe ma hita rajanami, taringot tu pangidoan ni raja i, dang napola manjua hami nian disi aut na adong/boi patupaon nami, alai songon nidok ni situatua rajanami, hansit do tangan mandanggurhon na soada. Rajanami, marsomba hami dihata sidohonon nami, molo tung siat nian pangidoan nami andorang so tahatai gollitgollitna, parjolo ma jolo hupangido hami bentuk ni sinamot i rambu pinungu/sitombol ma goarna rajanami, botima.

Rs : Molo songon i ma pangidoan muna amangboru/raja ni boru, jolo hualap hata ma jolo sian angka Dongan tubungku, Dongansahuta, Boru, Pariban songon i nang sian Hulahula, lumobi sian suhi ni ampang na opat, sahat tu Suhut sihabolonan nami. (laos dipasungkunhon ma pangidoan ni pamoruon i tu sude pihak ni parboru mangihuthon horong na be ; Molo dang satolop nasida, diparis ma jambar hata masibahen penawaranna be, alai molo satolop sude, dihatahon ma i tu paranak ninna ma)

Amang boru/Raja ni boru, nungnga denggan hami masialapanhata jala nungnga satolop hami mangoloi pangidoan muna i, nuaeng pe undukhon hamuma amangboru/Raja ni boru, sinamot na hudok i si Rp…juta i, botima.

Ra : Rajanami, marsomba hami dijarijari sampulu pasampulusada simanjujung, suang songon nahudok sinangkiningan rajanami, hansit do tangan mandanggurhon nasoada, holan mangasahon asi ni roha do rajanami umbahen na barani hami ro mandapothon hamuna Hulahulanami, jala, jolo marpungu do hami dipapungu suhut nami martangiang mangido pangurupion sian Debata parasiroha i, mardomu tusi rajanami, napinaborhat ni tangiang i ma naboi huhatahon hami, botima.

Rs : Molo songon i ma pangidoan muna amangboru/raja ni boru, jolo hualap hata ma jolo sian angka donganhu (laos dipasungkunhon ma pangidoan ni paranak i tu sude pihak parboru ninna ma )

Nuaeng pe dihita namarhaha maranggi/ namardongantubu, Boru, Dongan sahuta, Pariban, songon i nang Hulahula nami, lumobi di suhi ni ampang naopat dohot suhut sihabolonan nami, nungnga rampak mambege hita dipangidoan ni pamoruanta, asa napinaborhat ni tangiang ma dipangido nasida sihatahonon nasida. Songon dia dos ni rohanta, pinasahat ma hataon tu :

* Dongantubu (dialusi)

* Boru (dialusi)

* Dongan sahuta (dialusi)

* Pariban  (dialusi)

* Hulahula (dialusi)

* Suhi ni ampang na opat  (dialusi)

* suhut sihabolonan (dialusi) 

(molo dang satolop nasida, diparis ma hata i masibahen pandapotna be, alai molo satolop do sude, dihatahon ma i tu paranak) ninna ma: Amangboru/rajani boru, nungnga denggan hami masialapanhata jala nungnga satolop hami mangoloi pangidoan muna i, hatahon hamu ma napinaborhat ni tangiangmuna i dohot sude rencana naung ni konsep muna, botima.

Ra : Mauliate godang ma rajanami, sai horas ma hita jala gabe, tumpahon ni amanta namartua Debata parholongroha i; jadi songon on ma rencana nami rajanami :

*  Sinamot (rambu pinungu/sitombol)

*  Godang ni sinamot Rp. …..

*  Bolahan amak

*  Mata ni ulaon/Pesta (arina, bulan, taon, mulai pukul piga)

*  Inganan ni Pesta.

*  Torop ni undangan.

*  Parjuhutna.

*  Bentuk ni parjambaran.

*  Godang ni ulos herbang.

*  Ulaon sadari (dohot angka na asing na mardomu tu pesta unjuk nanaeng sipatupaon); songon i ma rajanami naung hurencanahon hami, botima.

Rs : Mauliate ma amangboru/raja ni boru, nungga dipatorang hamu tu hami angka rencana muna, nuaeng pe, pinangido ma paniroion sian angka dongan (laos dipaliat ma hata i tu sude pihak parboru, asa masibahen tanggapanna/paniroionna), sidung i ninna ma:

Amangboru/raja ni boru, nungnga singkop sude tahatai jala tatolopi angka namardomu tu ulaon nanaeng sipatupaonta, molo tung adong angka natinggal angka nalupa, ba sai naboi dope masipaingotan suhut sihabolonanta, jadi nuaeng pe, paboa naung satolop hita diangka naung tahatai i, pasahat hamu ma patujolo ni sinamot, botima.

Ra : Nauli rajanami nungnga rade hami (dijalo ma hepeng patujolo ni sinamot i sian suhut paranak, laos disuru ma sahalak pamoruanna pasahathon i tu parhata ni paboru) huhut didok ma hatana ninna ma : ima rajanami patujolo ni sinamot godangna Rp…, jala panggohina Rp…. nari, pasahaton nami ma i di mata ni ulaon/pesta, las ma roha ni raja i manjalo i, botima

Rs : Mauliate amangboru/raja ni boru, dison nungnga sahat hujalo hami patujolo ni sinamot godangna Rp… jala panggohina Rp……. nari pasahaton muna dope di mata ni ulaon/pesta i, nungnga las rohanami manjalo i. (udut tusi dipasahat ma patujolo ni sinamot i tu suhut sihabolonan huhut didok ma hatana ninna ma). Dihamu suhut sihabolonan nami, dison nungnga dipasahat pamoruanta marga… patujolo ni sinamot godang na Rp.  …jala pasahaton nasida dope panggohina dimata ni ulaon/pesta gadangna Rp. …….. nari, sai manumpak tu nauli manumpak tu nadenggan ma on sinamot ni borunta on pangkeon muna laho patulus ulaonta nanaeng ro, las ma rohamuna manjalo; (udut tusi didok ma muse hatana tu paranak ninna ma) Amangboru/raja ni boru, asa rasmi angka naung tahatai i, songon nidok ni situatua:  Hori ihot ni doton, hata si ingoton, tapasahat ma ingotingot, asa dihatahon dongan sahutanta. Lehon hamu ma nasian hamu asa hutambai hami, botima.

Ra : Nauli rajanami, nunga huparade hami, indion ma ingotingot sian hami godang na Rp…. (laos disuru ma sahalak pamoruanna pasahathon i tu parhata ni parboru)

Rs : Mauliate ma amangboru/rajani boru, (laos didok ma tu suhut parboru asa ditambai ingotingot nasian paranak i satonga ni na nilehon nasida i ), udut tusi dipasahat ma ingotingot i tu Dongan sahuta/STM/ Dongantubu molo dibona pasogit.

Dijalo dongan sahuta ni parboru ma ingotingot i jala dipangido ma asa dohot Dongan sahuta ni paranak jongjong rap dohot nasida, alai dongan sahuta ni parboru do ianggo na manghatahon, ala di alaman/ dijabu nasida do dipatupa ulaon marpudun saut i.. 

Dihatahon Dongan sahuta/STM ma ingotingot i, ninna ma: Sadarion diari nauli diari na denggan on, ari… tanggal …bulan … taon …nungnga sahata satolop paranak marga… dohot parboru marga… patupahon pesta unjuk/parunjuhon ni anak dohot boru, di ari … tanggal …bulan … taon … inganan di… mulai pukul…. sinamot rambu pinungu/sitombol/sinamot hibul godangna Rp.., patujolo ni sinamot nungnga dipasahat paranak tu parboru godangna Rp…, panggohina Rp…. nari, pasahaton ni paranak ma i tu parboru dimata ni ulaon/pesta;torop ni undangan sian pihak parboru/par anak, hirahira ….halak, parjuhutna….., bentuk ni parjambaran: ulu ni dengke mangihut/niadopan, ulos herbang sipasahaton ni parboru tu paranak godangna …Songon ima naung husurathon hami dison, molo adong dope nahurang, masipaingotan hita (molo adong nahurang/ sitambaan, dipasahat/dipaboa ma i tu dongansahuta asa disurathon/ dihatahon). Dung hira singkop sude, didokma hata nauli nadenggan, ninna ma : Dihamu suhut nami nadua pihak paranak dohot parboru, songon nidok ni umpasa ma dohonon nami :

Balintang ma pagabe ,tumundalhon sitadoan,

ari muna do horas jala gabe

ai tangkas do hamu masipaolo oloan.

Eme sitambatua,

parlinggoman ni siborok,

amanta Debata do pangalapantua,

sai horas ma hita saluhutna diparorot.

Sahat ma Solu tinogu tu Bontean,

sai leleng ma hita mangolu, diparhorasan di panggabean

Dison nungnga hujalo hami ingot ingot sian suhut paranak dohot sian suhut parboru, godang na Rp… , rap marningot ma hita di ulaonta nanaeng ro. Hori ihot ni doton, hata si ingoton, rap mandok ma hita 3x ingot ingot

Panimpuli ni ulaon i, sian Tulang/Hulahula ni parboru ma mambahen tangiang panutup, jala dung sidung tangiang, dibagihon ma ingotingot.

Dinalaho borhat mulak paranak, dipahuntihon parboru ma tandok naung ditimpus/dirahut, namarisi indahan dohot dengke, dipataru calon parumaen i ma sahat tu harbangan. Tandok i ma na gabe tanda/simbol  paboahon naung dipudun hata saut, naso jadi muba naso jadi mose.

4.3.  Pesta Unjuk

       

Hombar tu tingki naung tinontuhon di ulaon marpudun saut, mardalan ma gonghon dohot joujou tu angka tutur dohot tondong, dipihak ni paranak, songon i nang dipihak ni parboru. Diari naung binuhul, dipartingkian naung tinontuhon dibagasan gonghon dohot joujou i, dung sidung pamasumasuon sian Gareja, jongjong ma hasuhuton bolahan amak, dilambung pintu manomu/ manjalo haroro ni angka tutur dohot tondong/undangan; Jala digorahon Protokol ma asa parjolo masuk sude undangan ni suhut bolahan amak (molo parboru bolahan amak, digoari ma ulaon i dialap jual, alai molo paranak do bolahan amak, digoari ma ulaon i ditaruhon jual)  udut tu si digora suhut na ro ma asa masuk Suhut parboru dohot uduranna Hulahulana, Boruna dohot Dongan sahutana, jala dipatudu Protokol ma inganan parhundulan nasida. Dung masuk sude tutur/undangan, hundul ma hasuhuton di inganan parhundulannabe, songon i ma marpungu undangan i di inganan naung pinarade ni suhut bolahan amak.

Mangalap hata ma paranak tu Hulahula parboru, manungkun/mangido manang naboi/asa jolo martangiang mangan asa dipasahat Tudutudu ni sipanganon.  Umumna pintor dioloi Hulahula do i, ala manghilala di haporluan ni situan natorop, jadi dibahen ma tangiang mangan sian paranak, laos diuduti dohot huhuasi ni sipanganon (Sitiktik ma na gompa …d s t). Dung sidung tangiang mangan, dipasahat paranak ma Tudutudu ni sipanganon, huhut didok ma hatana ninna ma: Dihamu Hulahula nami nahuparsangapi hami, dison hupasahat hami Tudutudu ni sipanganonta, parhitean nami pasangaphon raja i Hulahula nami; songon nidok ni umpasa ma dohonon nami  

Sitiktik ma na gompa, hodong lais ni ruma.

Otik so sadia pe natupa, sai godang ma pinasuna.

las ma rohamuna, ima tutu.

      

Udut tusi dipasahat parboru ma Dengkena tu Pamoruanna huhut didok hatana, ninna ma: dihamu Pamoruon nami, dison hupasahat hami dengke Sitiotio (ulu ni dengke simbol ni siboru muli) rap dohot dengke Simudurudur (simbol ni panaru), sai tio ma parnidaan muna mangalului siluluan muna, rap mudur hamu tu dolok dapotan las ni ari, mudur tu toruan dapotan mual natio, songon nidok ni umpasa ma dohonon nami .

      

Sitiktik ma na gompa, golanggolang pangarahutna.

Otik so sadia pe na tupa, sai godang ma pinasuna.

las ma roha muna, ima tutu.

(masijalangan laos mulak tu angka ingananna be).

      

Udut tusi dipasahat Tulang ma Dengkena (sijalo Tintin marangkup, songon i nang sijalo Upa Tulang) huhut didok hatana ninna ma : Di ho Bere / di ho Boru, dison rodo hami Tulangmu pasahathon Dengke sahat, sai rap mudur tu dolok hamu dapotan las ni ari mudur tu toruan dapotan mual natio.

Sitiktik ma na gompa, golanggolang pangarahutna.

otik so sadia pe natupa, sai godang ma pinasuna.

las ma rohamuna, ima tutu.

Diingki na marsipanganon i, dipadalan ma pinggan panganan/pinggan bolak/Ulu panganan dohot pinggan parlompanan. Dibagihon paranak ma dengke na sian Hulahula na i. Molo naung disepakati hinan ditingki na marpudun saut bentuk ni parjambaran ulu ni dengke mangihut/jambar mangihut, pintor langsung nama hasuhuton nadua pihak masibagi parjambaranna be hombar tu adat ni suhut sihabolonanna, alai molo dang di seat hata hinan dope, berlaku ma marjambar niadopan, ingkon jolo hataan ma songon dia parbagina.

     

Dung sidung marsipanganon, ditutup ma jolo parmanganon i dohot tangiang simpul mangan sian pihak paranak/Pangula ni Huria (somalna na ni ida, sai jolo dibahen do ende sa ayat dua ayat). Dung sidung i, mangalap hata ma paranak tu parboru mangido tingki laho manjalo Tumpak/Pangurupion.  Dung  sidung manjalo tumpak, diatur ma parhundulon, laos marudut ma tu na masiparenggetan mamillit raja parsinabung. Dung tarpillit raja parsinabung ni na dua pihak, dipaborhat paranak ma pinggan na marisi Boras siriburribur, Tangotanggo na bolon, Ringgit na mardiring dohot Napuran daonbari, tu raja parsinabung ni parboru, ima nanigoaranna Pinggan Panungkunan, laos dipungka/dimulai ma marhata. (Raja sungkun sian parboru = Rs : Raja pangalusi sian paranak = Ra ):

Rs : Manghatai ma hita amangboru/raja ni boru.

Ra : Manghatai ma hita tutu rajanami, nungnga rade hami.

Rs : Ompu raja Ijolo martugkot sialagundi,

       adat napinungka ni parjolo, ido ihutihuton ni na dipudi.

       Adat i do nataula, elek marboru somba marhulahula

       manat mardongantubu burju mardongan sahuta

       asa tu sanggar antong Amporik tu ruang ia Satua,

       anggiat sinur napinahan gabe naniula,

       Horas ma antong hita jolma.

Gonghon do sipaimaon joujou sialusan,

nungnga marpungu angka raja nanigonghon

rade maniroi, di inganan hinundulan

diloloan na bolon, di antaran nabidang,

pangantaran ni anak pangantaran ni boru;

asa balintang ma i pagabe, tumundalhon sitadoan,

sai na horas do hita jala gabe,

molo olo hita masipaolooloan.

Nungnga bosur hita mangan, mahap marlompan juhut,

pamurnas ma i tu daging, sudara tu bohi,

sipasindak panaili ma i, sipaneang holiholi 

Nuaeng dison pinggan panungkunan,

pinggan na hot di ojahan.

Panungkunan di panggabean,

panungkunan di parhorasan;

pinggan na marisi :

* Boras siribur ribur, boras sipir ni tondi,

   asa pir ma tondi madingin, horas tondi matogu,

   saluhut na ma hita madingin, jala leleng mangolu

* Tanggo tanggo nabolon, dalan patogu partuturon,

   sai tango jala togu ma partuturonta,

   tumpahon ni amanta namartua Debata,

   asa sinuan bulu ma i sibahen na las,

   sinuan ruhut partuturon sibahen na horas.

  

   Sitorop ma i bonana, sitorop ma nang bulung na,

   torop ma Hulahulana, mangihut ma dohot Boruna

* Ringgit na mardiring, ringgit sitio soara,

sai pasupasu nauli ma ro mariringiring, tu hita on saluhutna, tumpahon ni amanta namartua Debata,

asa lomak ma silinjuang, lomak so binaboan

sai dapot angka naniluluan, jumpang na jinalahan

* Napuran daonbari, atuk ni alumniate/napuran mauliate,

   sai manumpak ma Debata sibahen na jadi (Mulajadi),

   patutna ma antong dohononta mauliate,

     Eme sitambatua ma i, parlinggoman ni siborok,

   Amanta Debata do pangalapan tua, sai horas ma hita   

   diparorot,

Mauliate ma di Tuhanta.

(laos dilapik ma hata ni pinggan panungkunan i manjaga atik tung adong na tading/nahurang/ nasala, ninna ma):

Siup do mula ni tabas hata marhuhuasi,

mangunduk simanjujung marsomba jarijari,

jarijari sampulu namarsiganjang ganjangi.

Asa ampang ma i dijolojolo, panguhatan dipudipudi,

atik tung adong hata ni pinggan panungkunan on nahurang hupandohi,

amanta namartua Debata ma na tangkas manggohi.

Amang boru/raja ni boru, jolo hu pahot ma jolo hata i atehe, asa hupahehe pinggan panungkunan on tu hamu?

Ra : gabe rajanami.

Rs : Dipangido/dijalo ma hepeng sian suhut parboru laho ulak ni pinggan panungkunan i satonga ni na nilehon ni paranak jala dibahen/dipamasuk tubagasan pinggan panungkunan i. Jongjong ma parsinabung i ditiop pinggan i huhut didok ma hatana ninna ma : Martua hupahot, sai hot ma hata ni angka raja, napinahot ni amanta na martua Debata. Martua hupahehe, sai hehe ma panggabean parhorasan dihita on saluhutna, ima tutu. (laos dijou ma sahalak pamoruanna pasahathon pinggan panungkunan i tu parsinabung ni paranak, jala diuduti ma muse ninna ma) : Amangboru/raja ni boru, nungnga pinasahat pinggan panungkunan tu jolomuna, mangihut ma sungkun sungkun nami: dia ma i langkat na, dia ma i unok na, dia ma i hatana, dia ma i nanidokna.

Ra : Gabe jala horas ma hita rajanami, ia marpanungkun ma raja i di sintuhu ni indahan masak nasosadia i, songon nidok ni situatua ma dohonon nami rajanami, godang sibutongbutong otik sipir ni tondi,

Sitiktik ma na gompa, hodong lais ni ruma,

otik so sadia pe natupa, sai godang ma pinasuna;

ianggo hata ni i rajanami, sigabegabe sihorashoras do nanidokna, botima.

Rs : Horas jala gabe ma hita tutu amangboru/ rajaniboru, ba dohonon nami ma songon nidok ni umpasa:

Bagot namarhalto ma i naniagatan di robean,

sai horas ma namanganhon,

lam tutambana dihamu namangalean.

Alai amangboru/rajani boru, songon nidok ni situatua, marangkup do nauli, mardongan nadenggan, asa tangkas uju purba, tangkasan uju angkola, anggiat tangkas hita maduma, tumangkas ma namamora ; disihombarna songon na hundul, siudurna songon na mardalan, siangkup ni parhorasan panggabean i tangkas ma rajani boru marboaboa, botima.

Ra : Horas jala gabe ma hita rajanami, ia marpanangkasi ma nuaeng raja i disihombarna songon na hundul di siudurna songon na mardalan, di siangkup ni panggabean parhorasan i, ba tangkas ma tutu nang hami marboaboa.

Rajanami, tangkas songon na taboto, ia anak nami dohot boru ni raja i nungnga manjalo pasupasu parsaripeon sian Tuhanta napinasahat ni naposona, ima na taudurhon nangkiningan i tu gareja. Mangihuthon adat dohot uhum rajanami, ala naung gabe Parumaen nami boru ni raja i jala gabe Helamuna anaknami, pasahaton nami ma adat na gok tu hamu Hulahula nami, laos dalan nami ma i mangido tagiang pasupasu sian hamu Hulahulanami, asa anggiat gabe rumatangga nahasea nasida di jolonta lumobi dijolo ni Tuhanta, jala saonari ma pasahaton nami adat na gok i tu hamu Hulahulanami, i ma rajanami sitangkasna siangkup ni panggabean parhorasan i, botima.

Rs : Mauliate amangboru/Raja ni boru, nungnga pitu lilinami paualu jugia nami, nungnga uli nipinami ala ro hamu pasahat adat na gok tu hami. Nuaeng pe pasahat hamu ma amangboru/raja ni boru sinamot nagodang i laho palashon rohanami Hulahulamuna, botima.

Ra : Nauli rajanami (laos dijalo ma panggohi ni sinamot sian suhut paranak jala disuru sahalak pamoruanna manaruhon i tu parsinabung ni parboru huhut didok hatana ninna ma) : Dison rajanami hupasahat hami sinamot, panggohi ni nahurang gok, godang na Rp…. Las ma rohamuna manjalo, botima

Rs : Mauliate ma Amang boru/ raja ni boru, (laos dipasahat ma tu suhut parboru i ninna ma) : Dison nungnga dipasahat pamoruanta, sinamot, panggohi ni na hurang gok, godang na Rp…   sai manumpak tu nauli manumpak tu na denggan ma sinamot ni borunta on pangkeon muna, tumpahon ni amanta na martua Debata, las ma rohamuna, botima.

 Udut tusi didok ma muse hatana tu paranak ninna ma :  

 Amangboru/raja ni boru, pasahat hamu ma panandaon tu 

 suhi ni ampang naopat :

* Pamarai (sada sian haha anggi ni suhut)

* Tulang (sada sian Tulang ni na muli)

* Simolohon (sada sian Iboto ni na muli)

* Pariban (sada sian pariban ni namuli)

Diuduti ma muse ninna ma : Amangboru/raja ni boru, nungnga sahat panandaon tu suhi ni ampang naopat i, ba sipasahaton muna dope panandaon tu angka pangalambungi dohot panauri, alai ala tumangkas ma i  partording ni parsolhoton partuturon i di paidua ni suhut nami, didok roha, dumenggan ma paidua ni suhut i manggorahon i (laos didok ma hatana tu paidua ni suhut parboru ninna ma): Dihamu paidua ni suhut nami, nungnga dipasahat pamoruanta sinamot ni borunta, jala nungnga sahat panandaon tu suhi ni ampang naopat, alai sipasahaton nasida pamoruanta dope panandaon tu angka hita pangalambungi dohot panauri. Ala tumangkas do dihamu partording ni parsolhoton di partuturon i, dihilala roha dumenggan ma molo hamu na manggorahon /mangidohon i tu pamoruanta, nuaeng pe pinasahat ma tu hamuna, botima.

Dijalo paidua ni suhut ma hata i, ninna ma : mauliate ma dihamu parsinabung nami, hujalo hami ma hata i; udut tusi didok ma hatana tu paranak: Amang boru/raja ni boru, nungnga sahat tu hami sinamot ni boru nami dohot panandaon tu suhi ni ampang naopat, udut tusi amangboru/rajani boru, pasahat hamu ma jolo parjolo panggurguri tu raja parsinabung nami, (laos diuduti ma, digorahon paidua ni suhut i ma angka panandaon tu sude pangalambungi dohot panauri na patut manjalosa mulai sian na sumolhot, tontu nungnga di konsep paidua ni suhut hinan i).

            

Dung sidung dipasahat panandaon i tu angka pangalambungi dohot panauri di pihak parboru, dipasahat ma tu Hulahula/Tulang ni namuli asa nasida manggorahon tu angka uduranna, ninna ma : dihamu Hulahula/Tulang nami, hamu ma Tulang na manggorahon panandaon tu angka uduranmuna, nuaeng pe pinasahat ma tu hamu, botima.

     

Dijalo Tulang ma hata i ninna ma : mauliate ma dihamu pamoruan nami, sai tongtong do dipasangap hamuna hami Hulahulamuna, hujalo hami ma hata i, (laos didok ma hatana tu pihak paranak ninna ma) : Dihamu Berenami, pamoruan ni boru nami, pasahat hamu ma panandaon tu hami Tulang ni parumaenmuna (digoari ma angka na patut manjalo i dipihak ni tulang), dung singkop sude, didok ma hatana tu pihak parboru ninna ma: Dihamu pamoruan nami, nungnga sahat hujalo hami panandaon tu hami Tulang/Hulahula muna, nuaeng pe pinasahat ma tu hamu, botima.         

     

Dijalo paidua ni suhut parboru ma hata i, laos dilapik hata ma, atik tung adong dope panggoraon nahurang, asa masipaingotan, udut tusi, didok ma hatana tu paranak, ninna ma : Amangboru/rajani boru, nungga singkop be nian Panandaon tu hami dohot tu Tulang/Hulahula nami, alai bangko ni jolma do, sai adong nahurang gok, jadi pasahat hamuma jolo panggohi ni nahurang gok (sipata digoari do i Sirambe manis jala satonga ni ido muse panggohi ni Ulosulos/Ulos tinonun sadari tu paranak), dung dipasahat paranak panggohina i, ninna ma: nungnga tung sirsir be Amangboru/Raja ni boru, tauduti ma, botima.

Ra : Mauliate ma rajanami, songon nanidok ni Raja i, nungnga singkop be sude sahat, na aturan sipasahaton nami, nuaeng pe rajanami, andorang so hupangido hami sipangidoon nami, parjolo ma jolo nian tapasahat Tintin marangkup, tu Tulang ni Helamuna, songon ima pangidoan nami rajanami, botima.

Rs : Nauli ma i amangboru/rajani boru, alai pasahat hamu ma jolo tu hami asa hutambai hami, jala rampak borhat ma hita raja ni boru, asa patandahon hamu tu hami, Tulang ni Helanami i, naung gabe ampara nami, botima. (nasomal ni ida, satonga ni nasian paranak do ditambai parboru. Dibahen ma hepeng Tintin marangkup i tubagasan pinggan, rap hehe borhat ma nasida mandapothon Tulang ni Hela, laho pasahathon Tintin marangkup i.). Laho pasahathon i, didok parboru i ma hatana, ninna ma :

Didok situatua: Hot do jabu i,  dimpos margulang gulang,

boru ni ise pe dialap bere i, hot do i boru ni Tulang.

Nungnga dialap beremuna borunami, ba tong do borumuna nang boru nami i, gabe sisada boru ma hita, hami pangintubu hamu do ianggo painundun, haha nami ma hamu, anggimuna hami, diparadatan. Nungnga hujalo hami sinamot ni borunta i sian pamoruanta, jadi songon tanda ni naung sisada boru hita, hupasahat hami ma tu hamu Tintin marangkup, jala songon nidok ni umpasa ma dohonon nami :

Sitiktik ma nagompa, hodong lais ni ruma,

otik so sadia pe na tupa, sai godang ma pinasuna.

las ma rohamuna, botima

(Dijalo Tulang ni hela i ma hepeng Tintin marangkup i laos didok ma hatana, ninna ma): I do tutu nang mangihuthon ruhut ruhut ni paradatonta; Hot do jabu i, dimpos margulanggulang, boru ni ise pe dialap bere i, hot do i boru ni Tulang : Jadi, boru nami do tutu nang boru muna i, toho ma i sisada boru hita, hamu pangintubu, hami painundun. Dison dipasahat hamu Tintin marangkup tu hami, tanda naung sisada boru hita, mansai las rohanami manjaloi. Nuaeng pe mangido ma hami tu amanta namartua Debata, sai disahaphon jala disampehon ma tu nasida songon nidok ni umpasa on:

Marurat tu toru ma borunta i, marpusuk tu ginjang,

mangerbang tu siamun, mangerbang tu hambirang,

Tubuan laklak i, tubu singkoru, solotan bungabunga,

Tubuan anak i, tubuan boru, togutoguon nasida sahat tu na saur matua.

Giringgiring ma gostagosta,

tibu nasida mangiringiring, jala mangompa ompa.

Bintang na rumiris, tu ombun na sumorop,

anak dinasida riris, dohot boru pe antong torop.

Sahat ma solu tinogu tu bontean,

nungnga sahat hujalo hami Tintin marangkup on,

sai sahat ma hita, tu parhorasan panggabean, botima.

(masijalangan ma nasida laos mulak hundul tu ingananna be.)

Ra : Rajanami, nungnga sahat be Tintin marangkup tu Tulang ni Helamuna, ima Hulahulanami, nuaeng pe nungnga rade hami parulosan muna; pasahat hamu ma jolo :

* Ulos pansamot.

* Ulos Hela.

* Ulos tu suhi ni ampang naopat :

- Pangamai/siungkap bahal. (sada sian haha anggi ni  suhut)

- Parorot. (sada sian iboto ni suhut/namboru ni pangoli)

- Simandokhon. (sada sian haha anggi ni pangoli)

- Sihunti ampang (sada sian iboto ni pangoli).

Diuduti parsinabung ni paranak i ma muse ninna ma);    

Rajanami, nungnga dipasahat hamu Ulos Pansamot, Ulos Hela dohot Ulos tu sude suhi ni ampang naopat, mangido dope hami rajanami, asa pasahaton muna nian Ulos tu angka hami pangalambungina dohot tu panauri, alai ala tumangkas ma partording ni parsolhoton partuturon i di paidua ni suhut nami, didok roha, tumangkas ma paidua ni suhut nami annon mangidohon i tu raja i Hulahulanami. (laos didok ma hatana tu paidua ni suhut paranak ninna ma) : Dihamu paidua ni suhut nami, nungnga dipasahat Hulahulanta Ulos tu Pansamot, Hela dohot tu sude Suhi ni ampang naopat, udut tusi sipangidoonta dope Ulos sian Hulahula i, tu angka hita pangalambungi dohot panauri ; Ala tumangkas do partording ni parsolhoton partuturon i di hamu, dihilala roha, tumangkas ma i molo hamu na mangidohon; nuaeng pe pinasahat ma tu hamu, botima. (Dijalo paidua ni suhut paranak ma hata i ninna ma): Mauliate ma dihamu raja parsinabung nami, hujalo hami ma hata i. ( laos diuduti ma hatana tu parboru ninna ma) : Rajanami, asa di tiur ni ari nian ulosan muna Hela dohot Borumuna, molo tung siat pangidoan nami rajanami, parjolo ma jolo pasahat hamu Ulos Panoropi/Ulos holong, botima.

Rs : Nauli raja ni boru. (laos diaturhon ma partording ni na pasahat Ulos. Mangihuthon nasomal ni ida, tar songon on ma partording na) :

* Kelompok suhut parboru.

* Dongantubu

* Boru.

* Dongan sahuta

* Hulahula, Tulang, Bona tulang, Bona ni ari Tulang rorobot dohot Pariban, masiaturan ma nasida. Dung sidung pihak parboru pasahat Ulos, dipaboa nasida ma i tu pihak paranak. Udut tusi dijouhon paranak ma asa ro Hulahula nasida pasahathon ulosna. (Hulahula /Tulang rorobot, Tulang, Bona tulang dohot Bona ni ari)

Dung sidung na pasahat Ulos panoropi/Ulos holong, di uduti ma muse mulak tu na pasahat Ulos herbang molo adong dope, dohot ulos tinonun sadari/ulos ulos.

Dung sidung na pasahat ulosulos, sahat ma tu na marhata si gabegabe. (Najolo, ganup horong Hulahula do mandok hata sigabegabe tu pihak paranak, alai diangka tingki na parpudion, mardos ni roha ma pihak Hulahula asa holan suhut parboru ma na pasahathon hata sigabegabe i laos paampuhonsa, jala hirahira songon on ma didok hatana )

Dihamu pamoruan nami marga …dohonon nami ma tu hamu songon nidok ni umpasa:

Tampuk ni si baganding, didolok ni Pangiringan,

horas jala gabe ma hamu na marhaha maranggi

tu dolok tu toruan hamu, sai masipairingiringan.

Songon ansimun sisada holbung,

tu pege na      sangkarimpang.

tu toru rampak manimbung,

mangangkat rampak tu ginjang.

Sitorop ma bonana, sitorop nang bulungna.

Torop ma Hulahulana, mangihut ma  dohot boruna.

Horbo sitingko tanduk ma i sisapang na ualu,

parbutuha mangalilit parmata mangalualu.

Marjampal i di balian, mulak tu bara i marngalungalu.

angka hata parsaulian , namardongan hata pasupasu ,

sai ampu ma i diampuan muna tangkas martonga ni jabu.

Sahat ma solu, tinogu tu bontean,

sai leleng ma hita mangolu, di parhorasan di panggabean.

Gabe ma na manggabei, gabe ma  na nigabean, Botima.

(Jolo dijalo parhata ni paranak ma hata i asa dipasahat tu suhutna, ninna ma):

Harbangan ma i dalan tu huta, balatuk dalan tu jabu.

Hata nauli napinasahat muna, ampuon nami ma i martonga ni jabu.

Turtu ma ninna anduhur, tiotio ninna lote,

hata pasupasuan na uli i, sai unang ma muba unang mose.

Tingko ma inggiringgir, bulungna i ratarata,

hata pasupasuan nauli i, sai pasauthon ma amanta

namartua Debata.

Nuaeng pe dihamu hasuhuton nami,  ampu hamu ma panggabean parhorasan i, botima.

(Rampak jongjong ma hasuhuton paranak huhut ditiop rambu ni ulosna, songon na pataridahon rasa hormatna somba marhulahula, diampu nasida ma hata pasupasuan i, ninna ma :

Naung sampulu pitu ma i, jumadi sampulu ualu.

Hata pasupasuan na uli i, huampu hami ma i martonga ni jabu.

Ampu ma i diampuan nami, puak di abara nami.

Sahat ma solu, tinogu tu bontean,

nungnga sahat huampu hami hata pasupasuan i,

sai sahat ma hita tu parhorasan panggabean. Botima.

     

Udut tusi, dipasahat nadua pihak ma hepeng tu dongan sahuta/STM ima nanigoaranna Olopolop. Rampak jongjong ma Dongan sahuta/STM ni nadua pihak alai STM ni bolahan amak ma ianggo na manghatahon olopolop. Ditariashon ma disi paboa naung dipasahat paranak adat na gok tu parboru, laos didok ma tu situan natorop asa rampak mandok: Olopolop 3x. 

Manimpuli ulaon i dibahen Tulang ma tangiang panutup; sidung i dibagihon ma hepeng olopolop i.

Olat ni hata olopolop do panimpuli ni ulaon pesta unjuk, molo diuduti pe tu ulaon paulak une dohot tingkir tangga, na pinangpangkon nama i, ala ni i do umbahen na didok ulaon sadari, jala songon on ma pangulahonna.

4. 4. Paulak une (Formalitas)

     

Borhat ma paranak manopot Hulahulana mamboan sipanganon masak (indahan las dohot lompan juhut na marpanggoari Tudutudu ni sipanganon). Dung sahat nasida di jabu ni Hulahula, dipasahat ma boanboan/ nabinoan na i, ninna ma : Rajanami, dibagasan las ni roha do hami ro mandapothon hamu Hulahula nami, ala une do sude ulaonta i ditumpak asi ni roha ni Tuhanta. Dison adong saotik huboan hami sipanganon, dalan nami pasangaphon hamu Hulahulanami;

Sitiktik ma na gompa, hodong lais ni ruma,

Otik so sadia pe na tupa, sai godang ma pinasuna,         

las ma rohamuna, botima.

4.5. Tingkir tangga (Formalitas)

     

Borhat ma parboru manopot pamoruanna, mamboan sipanganon masak (indahan las dohot Dengke Simudur-udur). Dung sahat nasida dijabu ni pamoruanna, dipasahat ma sipanganon naniboannai, huhut didok ma hatana, ninna ma : Mauliate ma di Tuhanta na sai tongtong mangaramoti hita, hipashipas do hami na ro, hipashipas do nang hamu pamoruan nami na hudapothon hami. Dison adong saotik sipanganon huboan hami, dalan nami maningkir tangga ni bagas muna, ba songon nidok ni umpasa ma dohonon nami

  

Sitiktik ma na gompa, golanggolang pangarahutna,

otik so sadia pe natupa, sai godang ma pinasuna,

las ma rohamuna, ima tutu.

Udut tusi, dipasahat parboru ma hata sigabegabe tu pamoruanna ninna ma: Dihamu pamoruan nami, songon nidok ni umpasa ma dohonon nami:

Tampuk ni si baganding didolok ni pangiringan,

sai horas hamu, pamoruan nami namarhaha maranggi

tu dolok tu toruan, sai masipairingiringan;

songon ansimun sisada holbung,

tu pege na sangkarimpang,

tu toru rampak manimbung,

mangangkat rampak tu ginjang.

Borhat ma hami tu hutanami, tinggal ma hamu di hutamuna on;

Napuran tanotano ma i , rangging masiranggongan,

badanta padaodao, tondi ma, masigomgoman, ima tutu

Udut tusi, dipasahat pamoruan i ma hepeng tu Hulahulana, ima nanigoaranna Pasituak na tonggi.

Manimpuli ulaon i dibahen Hulahula/Tulang ma tangiang panutup, laos marhehe nauli ma huhut masijalangan.

* Sian nasai godang ragam ni tangiang panutup, sekedar parbandingan, pinatedek ma ditoruon, tangiang ni sahalak natuatua parhata.

Ale Ompung na martua Debata, (Ompung Mulajadi nabolon)

Ho do na jumadihon dolok asa timbo,

na mangungkap mata mual nation;

Ho do na palambok Ateate, napahibul Pusupusu, na palomak sitarupon, (jambulan), na mamopap salimbubu (parsambubu);

na mangaramping jarijari, mangatur marbuhubuhu

na parintar mata ni ari, na manontuhon balik kuhu.

Dijadihon Ho saluhut natinompaMi, nasiat marpangidoan tu Ho. Hutonggo hupio ma Ho di ombas on, tangkas martinangi marbinege ma Ho, di hata ni pangidoanhon (alualukon), sai sahaphon jala sampehon ma panggabean parhorasan i, napinasahat ni Hulahula marga … tu pamoruanna marga …

Nang di na rap mangido dope hami napunguon tu Ho, sai tangihon jala olo i ma pangidoan nami (rap mandok ma di tangiang na ni ajarhon ni Jesus : Ale Ama nami … dst.).

Tweet

Subscribe to receive free email updates: