6. Mebat / Paebathon

Dung sorang anak/boru buhabaju di sada keluarga, diringkoti ma laho paebathon buhabaju na i tu Hulahulana/ Ompung bao. Ditingki na halehetanna, borhat ma keluarga paranak na ni udurhon ni natorasna, manopot Hulahulana. Mamboan sipanganon masak do nasida. (indahan las dohot lompan juhut na marpanggoari Tudutudu ni sipanganon). Dung sahat nasida di jabu ni Hulahulana i, masipatangkasan ma jolo nasida laho mamulai acara, jala hirahira songon on ma partording ni acara i.

      

Dipasahat paranak ma Tudutudu ni sipanganon i tu jolo ni Hulahula (Ompung bao) huhut didok hatana ninna ma : Rajanami Hulahula nami, sadari on di ari nauli di ari na denggan on, ro do hami pamoruon muna paebathon pahompunta on tu jolomuna, jala songon dalan parhitean nami pasangaphon hamu Hulahula nami, dison hupasahat hami Tudutudu  ni sipanganonta;

Sitiktik ma na gompa, golanggolang pangarahutna.

Otik so sadia pe natupa, sai godang ma pinasuna.

Las ma rohamuna. Ima tutu.

       

Dung sidung dipasahat Tudutudu ni sipanganon i, dibagi/ dipadalan ma panganan, jala sian paranak ma mambahen tangiang mangan dohot huhuasi ni sipanganon (sitiktik ma na gompa .. dst).  Dung sidung marsipanganon, ditutup ma jolo parmanganon i dohot tangiang simpul mangan, sian paranak (boi  do nang sian parboru asal ma dos roha); udut tusi, sahat ma tu na marhata.

Manungkun ma Dongantubu manang Dongan sahuta tu suhut na manjou nasida, taringot di parpunguan i (apa maksud dan tujuan); Dialusi suhut/paidua ni suhut ma, na ro do pamoruan nasida mamboan    sipanganon ,  jala laos dipangido ma asa    Dongantubu /Dongansahuta i, langsung manungkun paranak, taringot di haroro nasida. (Raja sungkun = Rs; Raja alus = Ra.)

Rs : Manghatai ma hita raja ni boru

Ra : Manghatai ma hita tutu rajanami,nungnga rade hami.

Rs : Nungnga bosur hita mangan mahap marlompan juhut,

pamurnas ma i tu daging saudara tu bohi,

sipasindak panaili ma i, sipaneang holiholi,

taringot di sipanganon i raja ni boru,

dia ma i langkatna dia unokna,

dia ma i hatana, dia nanidokna. Botima.

Ra : Horas jala gabe ma hita raja nami, tumpahon ni amanta namartua Debata, horas do hami na ro, horas do nang hamu Hulahulanami nahudapothon hami; ia marpanungkun ma nuaeng raja i, di sintuhu ni indahan masak nasosadia i ;

Sitiktik ma na gompa, hodong lais ni ruma.

otik sosadia pe natupa i, sai godang ma pinasuna.

Las ma rohamuna, Ima tutu.

ianggo hata ni i rajanami, panggabean parhorasan do nanidok na, botima.

Rs : Horas jala gabe ma hita tutu raja ni boru, hami pe dohonon nami ma   songon nidok ni umpasa :

Bagot na marhalto ma i na niagatan di robean,

horas jala gabe ma namanganhon, 

sai lam tu tambana  dihamu na mangalean.

Alai amang boru/raja ni boru, songon nidok ni situatua:

Marangkup do nauli mardongan na denggan,

asa tangkas uju purba tangkasan uju angkola;

asa tangkas  hita maduma, tumangkasan ma namamora.

Di sihombarna songon na hundul,

di siudurna songon na mardalan,

siangkup ni parhorasan, sirongkap ni panggabean i,

tangkas ma i dipaboa raja ni boru. Botima.

Ra : Horas jala gabe ma hita rajanami, ia marpanangkasi ma nuaeng raja i di sitangkasna, di siangkup ni parhorasan panggabean i, ba tangkas ma tutu nang hami marboaboa. Rajanami, mauliate ma di Tuhanta, mauliate ma nang dihamu Hulahula nami, ai marhite tangiang muna i rajanami, marpanangi do Debata, nungnga dibasabasahon si ucok/sibutet tu jolonta.

       Mangihuthon adat dohot uhum do rajanami, ro hami di ari nauli di

      ari nadenggan on, paebathon pahompu on tu jolomuna Hulahulanami,   laos dalan nami ma i, mangido tangiang pasupasu sian hamu Hulahulanami, anggiat simbur magodang i penggeng laho matua, gabe jolma nahasea i dijolonta  lumobi dijolo ni Tuhanta, ima rajanami sitangkasna siangkup ni panggabean parhorasan i, botima.

Rs : Gabe jala horas ma hita tutu Amangboru/raja ni boru, nungnga tangkas amangboru marboaboa, jala nungnga sude naumbegesa umbotosa, taringot diharoromuna, na paebathon pahompunta i do hape tu ompungna, dohot tu sude hami Hulahulamuna, nauli jala nadenggan ma i antong Amangboru, ai ompungna pe nungnga tung mansai masihol naeng mamereng pahompuna; hombar tusi Amangboru, dohonon nami ma songon nidok ni situatua :

Tubu ma bulu godang, didolok ni Purbatua.

sai simbur ma ibana magodang, penggeng laho matua.

Dangka ni hariara, tanggo pinangaitaithon.

sai dao ma ibana sian mara, sitongka panahitnahiton. Botima.

      (Didokma : Hatangki hata tambaan, laos dipasahat ma hata i tu paidua ni suhut parjabu, asa nasida namangaturhon parjojor ni sidok hata).

Mangihuthon nasomal ni ida, tar songonon ma parjojorna:

*      Hata tambaan sian dongan tubu (molo adong dope)

*      Hata nauli sian Boru/Bere/Ibebere

*      Hata nauli na denggan sian dongan sahuta

*      Hata pasupasuan sian suhut parboru/ parjabu laos paampuhon, ninna ma :

Tubu ma bulu godang, didolok ni purbatua.

sai simbur ma pahompu on magodang,penggeng laho matua.

Dangka ni Hariara, tanggo pinangaitaithon.

sai dao ma ibana sian mara, sitongka panahitnahiton.

Lomak ma silinjuang, lomak so binaboan.

Sai dapot ma naniluluan, jumpang na jinalahan.

Eme si tambatua, parlinggoman ni siborok.

Amanta Debata do pangalapan tua,

sai horas ma hamuna diparorot.

Horbo sitingko tanduk ma i, sisapang na ualu,

parbutuha mangalilit, parmata mangalualu.

Marjampal i di balian, mulak tu bara marngalungalu.

Angka hata parsaulian na mardongan hata pasupasu,

ampu ma i diampuan muna, tangkas martonga ni jabu.

Sahat ma solu i tinogu tu bontean,

nungnga hupasahat hami hata nauli i,

sai sahat ma hamuna tu parhorasan, sahat tu panggabean. Botima.

*      Natoras ni paranak/ na mewakili, manjalo pangampuon, ninna ma :

Harbangan ma i dalan tu huta,

Balatuk dalan tu jabu.

Hata panggabean parhorasan napinasahat muna,

huampu hami ma i martonga ni jabu.

Turtu ninna anduhur, tiotio ninna Lote.

Hata nauli na pinasahat muna,

sai unang ma muba unang mose.

Tingko ma inggiringgir, bulung na i ratarata.

Angka hata pangidoan nauli i,

sai pasauthon ma amanta namartua Debata.

Nuaeng pe, di anak dohot parumaen nami, ampu hamu ma hata panggabean parhorasan i, botima.

*      Jongjong ma Hela dohot Boru mangampu, ninna ma :

Mauliate ma di hamu  Hulahula nami, na manghaholongi

hami, na pasahathon hata nauli na denggan tu hami.

Songon nidok ni umpasa ma dohonon nami:

Naung sampulupitu ma i, jumadi sampulu ualu.

Hata nauli napinasahat muna i,

huampu hami ma i martonga ni jabu.

Ampu mai diampuan nami, puak di abara nami

Sahat ma solu tinogu tu bontean,

sai leleng ma hita mangolu,

di parhorasan di panggabean. Botima.

(Molo adong sipangidoon ni boru i, isara ni indahan arian dohot andor ni ansimun, jolo dihatahon ma pangidoan i andorang so diampu)

Dung sidung pangampuon i, dibahen pihak Hulahula parboru ma tangiang panutup.

*   Mangihuthon hatorangan ni angka natuatua, di ulaon parmebaton najolo, dang manggonghon Hulahula parboru, olat ni nasida nasahuta i do dijou (dongantubu/dongan sahuta dohot boru diampuan) asa dohot marsaulihon sipanganon nabinoan ni pamoruanna i, jala dang pola manghatahon dengke parboru tu paranak pamoruanna i, tu pansi inganan ni tudutudu ni sipanganon i do dipamasuk, unang mulak kosong boanon nasida, jala dang pola maruduran pamoruan na ro i.

*   Hata sian pangalambungi/panauri, sarupa do, jadi dang pola nisurathon jojor dison, alai pinarade do angka umpasa na mardomu tusi songon naditoruon :

Habang anduhur titi tudolok tu toruan.

Sai na olo mangihut ma dakdanak i, naolo pangihutan.

Pidong sirubaruba, diluat parsambilan,

sai lam manaek ma ulaon muna,

martambatamba nang pansarian.

Nahinunti hirang, marisi gadong sihapua,

sai lam tu gabena ma hamuna, sahat tu na saur matua.

Tinaba hau toras, bahen soposopo di balian.

     halak naburju marnatoras, sai na jaloonna do parsaulian.

Tweet

Subscribe to receive free email updates: