5. Pasahat Batu ni sulang (Adat marboru ni Tulang)

Najolo, andorang terisoler halak Batak, mansai maol do mangalului borua bahen dongan saripe, gabe diringkoti halak Batak Toba ma marboru ni Tulang. Dung mardeka Indonesia taon 1945, masuk ma halak Batak di pergaulan antar suku dohot antar bangsa, gabe dang haru diringkoti be na marboru ni Tulang, ai nungnga godang alternatip pilihan. Sejalan tu perkembangan zaman, lam jarang ma halak Batak mangalap boru ni Tulang. Leleng, lam leleng, dang piga be halak Batak na marningot ruhut ruhut ni paradaton mar boru ni Tulang ; jadi, molo kebetulan adong na marboru ni Tulang, gabe gamang ma mangulahonsa.

     

Mangihuthon na niida sandiri, nungnga  sipata  gabe ummaol prosedur   pelaksanaan ni adat  marboru ni Tulang sian na marboru ni halak, hape ianggo mangihuthon logika,  ingkon ummura ma nian marboru ni Tulang ; Pamakeon ni pandohan/istilah pe, nungnga  gabe dipake istilah na haduk begeon.

Molo dipangido parboru ma panandaon tu suhi ni ampang naopat sian berena, gabe hira  naso masitandaan ma berena dohot Tulang na, nda haduk do i begeon ?

Adong nadeba mambahen di undanganna: dung sidung martumpol laos……………. Marpudun saut/marhata sinamot;  hape umpasa ni halak Batak mandok: Dangka  dupang, amak do rere; Ama Tulang, anak do Bere; Tontu dang pola sihataan sinamot, ai dang sala nang Tulangna pangolihon berena.

Manjaga   unang   nihatahon   angka   pandohan / istilah nahaduk begeon, nungnga adong hinan dibahen ompu sijolojolo tubu angka pandohan/istilah na bersifat spesifik /   khusus tu adat marboru ni Tulang.

      

Di paradatan ni halak Batak Toba, dang adong unsur paksaan, alai na patutna do masipasangap sangapan. Molo marboru ni halak ma bere ni parbere, na patut ma parmisi ibana tu Tulangna. (mohon doa restu). Adat parmisi tu Tulang i, digoari do i Manulangi Tulang.

Molo naung dos roha ni namarpariban naeng mamungka parsaripeon, dipasahat be ma sangkap nasida i tu natorasna.

Udut tusi, langsung do  manghatai suhut na mariboto i taringot tu batu ni sulangna. Jadi, dang masa marhorihori dingding/Patuahon hata/marhusip songon na masa nuaeng on. Dang masa  marhata sinamot/marpudun saut, alai di ganti do istilah i, didok ma Pasahat Sulangsulang ;  jadi, molo didok manulangi Tulang, ba,  na parmisi ma i tu Tulangna, ala naeng mangalap boru ni halak na asing, alai molo didok Pasahat sulangsulang, ba na pasauthon boru ni Tulangna ma i. (istilah pasahat sulangsulang di adat marboru ni Tulang, sarupa ma i dohot istilah marhata sinamot/marpudun saut di adat marunjuk/marboru ni halak, holan istilahna do na marbeda) Taringot tu adat manulangi Tulang (parmisi), nungnga ni paandarhon i di jolo ni on, ima di ulaon adat sisada hasuhuton (Adat Napuran/Adat marsantabi), jadi, tataringoti ma tu napasauthon boru ni Tulang.

5.1. Pasahat Sulang sulang (=Marpudun saut)

     

Dung mardos niroha na marpariban naeng mamungka parsaripeon, dipaboa be ma i tu natorasna.

(Dang suman/dang patut molo suruon boru domudomu/ delegasi marhorihori dingding laho manghatai parbogason ni na marpariban, ai so na hulinghuling nilangkophon i manang imbulu ni suanhon. Songon singkat ni na marhorihori dingding,langsung do orangtua ni nadua pihak na mariboto i manghatai/ marunungunung, mangaranggi nasa naringkot namardomu tu parbogason ni ianangkon nasida;. Jadi, urusan keluarga do i, dang porlu melibatkan pihak lain).

     

Ditingki na halehetanna, borhat ma natoras ni si Doli mandapothon ibotona. (Ala pertemuan antar keluarga dope i, holan suhut paranak do na borhat tu si,  dang pola marhara. Taringot tu siboanon nasida laho mandapothon Hulahula/Ibotona  i pe , bebas do, dang pola ingkon marsipanganon masak. Molo tung pe adong diboan nasida sipanganon masak ala dang hum rohana mandapothon ibotona so adong tioptioponna,ba singkat ni lampet do goar ni i, jala surungsurung ni ibotona i  do i. Dang pola hatahononna laho pasahathon i tu Hulahulana i, langsung do diboan tu dapur, laos sian i do dipadalan laho mangan. Hulahulana i pe, dang pola haraonna dalihan natoluna, songon i nang dongan sahuta pe, jala dang pola ingkon paradeonna dengke; Molo tung adong pe dengke diparade, ala dang pulut rohana so mangalehon dengke tu ibotona, ba, lompan do goar ni i. Dang pola dihatahon i laho pasahathon tu ibotona, langsung do dibagihon hombar tu goarna i, lompan.  Alai dinalaho mulak ibotona i, dibahen ma deba dengke i tu pansi ni ibotona i, asa unang mulak kosong.

     

Dung dapot tingkina, mangan ma nasida, (Na mangan do goarna, dang na marsipanganon, alana, dang pola dipadalan Tudutudu ni sipanganon, paling paling olat ni na dipiringhon do). Dung sidung mangan, langsung do nasida manghatai/marunung unung masielehan taringot tu godang ni batu ni sulangna. (Godang manang otik pe batu ni sulang i, dang porlu botoon ni pihak ketiga i, termasuk suhi ni ampang na opat. Rahasia ni namariboto i do i, asa unang siat hata tihatiha  sian pihak ketiga.

Laho pasahathon batu ni sulang i pe, adong do istilah na spesifik dibahen sijolo jolo tubu, ima: 

Manigati Gajut;

dang diatas pinggan dibahen, asa unang diboto halak manang na sadia godangna. Hata ni umpasa mandok : Dangka dupang, amak do rere. Ama Tulang, anak do Bere; Jadi, dang sala Tulangna pangolihon berena).

     

Dung dos roha ni namariboto i dihata ni husip husipna, di titi nasida ma ari laho Pasahat Sulang sulang (=Marpudun saut). Di ari naung binuhul nasida, borhat ma natoras ni si doli dohot rombonganna (Dongantubu, Dongansahuta dohot Boru.) manopot Hulahulana; diboan nasida do sipanganon masak (indahan las dohot lompan juhut namarpanggoari Tudutudu ni sipanganon). Ala sian dos ni roha nasida do manontuhon ari nauli laho patupahon ulaon i, Hulahula parboru pe, nungnga mangarade paimahon haroro ni ibotona. Dung sahat rombongan ni pamoruon paranak i dijabu ni ibotona/Hulahula parboru, masipatangkasan ma jolo nasida laho mamulai acara. Dipasahat paranak ma Tudutudu ni sipanganon i tu jolo ni Hulahula, huhut didok ma hatana, ninna ma : 

Di hamu Hulahula nami, Lae tunggane dohot Inang bao, dison, ro hami pasahathon Tudutudu ni sipanganon Sulang-sulang ni bere muna si ……, dalan nami ma i rajanami pasangaphon hamu Hulahula nami; jala songon nidok ni situatua ma dohonon nami :

godang sibutong butong otik sipirnitondi

Sitiktik ma na gompa, hodong palupaluna

0tik so sadia pe na tupa, sai godang ma pinasuna.

las ma rohamuna, ima tutu. 

     

Udut tusi, dipasahat Hulahula parboru ma Dengkena huhut didok ma hatana, ninna ma: Di hamu pamoruon nami, Lae dohot ibotongku, dison hupasahat hami Dengke sahat jala dengke simudurudur, songon nidok ni umpasa ma dohonon nami :

Sitiktik ma na gompa, hodong lais ni ruma,

otik so sadia pe na tupa, sai godang ma pinasuna.

las ma rohamuna, imatutu.

     

Dung sidung napasahat Tudutudu ni sipanganon dohot Dengke, dibagihon/dipadalan ma panganan, jala sian pihak paranak ma  mambahen tangiang mangan dohot huhuasi ni sipanganon (Sitiktik ma na gompa …dst).

Dung sidung marsipanganon, ditutup ma jolo parmanganon i dohot tangiang simpul mangan sian pihak paranak/Pangula ni Huria. Marudut ma muse tu na masiparenggetan mamillit raja parsinabung. Dung tarpillit raja parsinabung ni nadua pihak,sahat ma tu na marbagi parjambaran. Dipasahat parboru ma deba sian Tudutudu ni sipanganon i tu paranak, ima na gabe singkat ni Dengke sitiotio/Ulu ni dengke, jala digoari ma i Ulu ni dengke mulak, laos masibagihon na di pihakna be ma, hombar tu adat ni suhut sihabolonanna.

Dung sidung marbagi parjambaran, diuduti ma tu na marhata. (Raja sungkun sian parboru = Rs ; Raja alus sian paranak = Ra.)

Rs : Manghatai ma hita raja ni boru.

Ra : Manghatai ma hita tutu rajanami, nungnga rade hami.

Rs : Nungnga bosur hita mangan mahap marlompan juhut,

       pamurnas ma i tu daging, saudara tu bohi

       sipasindak panaili ma i, sipaneang holiholi.

       taringot di sipanganon i raja ni boru,

       dia ma i langkatna, dia unokna, dia ma i hatana, dia ma i nanidokna, botima.

Ra : Gabe jala horas ma hita rajanami tumpahon ni amanta namartua Debata, ia marpanungkun ma nuaeng raja i, disintuhu ni indahan masak na sosadia i, Rajanami, songon nidok ni situatua ma dohononnami, godang sibutong-butong otik sipir ni tondi,

Sitiktik ma nagompa, hodong lais ni ruma,

otik so sadia pe natupa i, sai godang ma pinasuna,

ianggo hata ni i rajanami, panggabean parhorasan do nanidokna, botima.

Rs : Horas jala gabe ma hita tutu raja ni boru,hami pe dohonon nami ma songon nidok ni umpasa :

Bagot na marhalto ma i na niagatan di robean

sai horas ma na manganhon, tu tambana dihamu namangalean.  Alai amang boru, didok situatua: marangkup do nauli mardongan nadenggan, asa tangkas uju purba tangkasan uju angkola, anggiat tangkas hita maduma tumangkasan ma na mamora; disihombarna songon na hundul, disiudurna songon na mardalan, siangkup ni parhorasan panggabean i, tangkas ma dipaboa raja ni boru, botima.

Ra : Horas jala gabe ma hita rajanami tumpahon ni amanta na martua Debata, ia marpanangkasi ma nuaeng raja i, disiangkup ni panggabean parhorasan i, ba tangkas ma tutu nang hami marboaboa.

Rajanami, bangko doi di hita jolma, molo balga anak pangolihononhon, magodang boru pamulion; Tangkas songon nabinoto muna rajanami, ia anaknami beremuna si …. nungnga patutna marhasohotan jala boaboana tu hami namambahen las rohanami, nungnga sian dos ni rohana dohot paribanna, ima boru ni raja i, maen nami si … naeng mamungka parsaripeon naimbaru. (Molo jolo martumpol do asa dipatupa ulaon i, didokma:Ia beremuna anak nami si …dohot paribanna boru ni Raja i, maen nami, nungnga marpadan naeng mamungka parsaripeon naimbaru ima na tairingkon nangkiningan tu Gareja, jadi, naeng Helamuna ma Beremuna i jala naeng Parumaen nami ma Maen nami boru ni Raja i).

Hombar tu si do rajanami, ro hami manungkun adat sisombahonon nami, dalan pasangaphon hamu Hulahulanami, ima rajanami sitangkasna siangkup ni panggabean parhorasan i, botima .

Rs : Horas jala gabe ma hita amangboru/raja ni boru, ido tingkosna songon nanidokmuna i, balga anak pangolihononhon, magodang boru pamulion, ia nungnga tangkas dipaboa amangboru taringot di ulaonta sadarion, ima di naung masihaholongan anakmuna berenami nanaeng Helanami dohot paribanna borunami maen muna nanaeng Parumaen muna; (Molo naung jolo martumpol, didokma: Jala nungnga marpadan nasida dijolo ni Tuhanta nang dijolo ni Huria i, ima na taudurhon i tu Gareja), mardomu tu si amangboru/raja ni boru, songon nidok ni umpasa do dohonon nami:

Dangka ni hau dapdap ma i, tu dangka ni arirang,

sai saut do na marrongkap, tung naso jadi sirang.

Sai marrongkap ma nasida songon bagot,

marsibar songon ambalang,

masigomgoman tondina

saut nasinangkap niroha.

Nuaeng pe amangboru/ raja ni boru, ala marpanungkun ma hamu diadat sipasahaton muna tu hami Hulahulamuna; ala dang na imbulu nisuanhon manang hulinghuling nilangkophon i berenami i, songon nidok ni umpasa:

Dangka do dupang, amak do rere.

Ama do Tulang, anak do Bere,

ba balga ma pasahat hamu batu ni sulang muna tu hami, botima.  

Ra : Horas jala gabe ma hita rajanami,taringot tu pangidoan ni raja i, dang napola manjua hami disi, ai dang na huling huling nilangkophon tutu jala ndang imbulu sinuanhon bere muna i, sandok nasa na adong di gajut nami i, tung pasahaton nami do i tu raja i, pos ma rohamuna rajanami, botima.

Rs : Molo songon i ma hata muna amangboru/raja ni boru, nauli ma i, alai amangboru, ingkon sahat do batu ni sulang i tu suhi ni ampang naopat.  Tamba ni i amang boru, tangkas do bahenon muna “pasituak na tonggi” tu angka pangalambungi dohot panauri, botima. (Panandaon tu suhi ni ampang na opat,  tong do digoari batu ni sulang, alai ianggo panandaon tu angka pangalambungi dohot panauri, digoari ma pasituak na tonggi. Jadi, dang dipangke istilah panandaon di adat marboru ni Tulang, unang gabe didok halak naso masitandaan berena tu Tulang na).

Ra : Nauli jala nadenggan rajanami, rade ma hami disi, botima.

Rs : Horas jala gabe ma hita amangboru/raja ni boru, nuaeng pe, paboa hamu ma tu hami taringot tu rencana si ulaonta, nungnga adong ra konsepna dipatupa hamu, botima.

Ra : Mauliate ma rajanami, songon on ma nian naung hukonsep hami (laos ditariashon ma sude rencana na mardomu tu ulaon pesta pasahat batu ni sulang nanaeng patupaon i. ; partingkianna, bolahan amak, inganan /lokasi, torop ni undangan dohot angka na asing dope na marhadomuan tu ulaon i), songon i ma rajanami naung hukonsep hami, laos mangido ma hami rajanami asa tuturi hamuna hami mambahen tu na dumenggan, botima.

Rs : Mauliate ma amangboru/raja ni boru,molo songon i ma pangidoan ni amang boru, hualap hata ma sian angka donganhu (laos didok ma hatana ninna ma) : Dihita na marhaha mar anggi/na mardongan tubu, Dongan sahuta dohot Boru nami, lumobi ma di Hulahula nami, nungnga rampak mambege hita, di rencana siulaon na pinatolhas ni amangboru/pamoruan, jala dipangido nasida paniroion sian hita, nuaeng pe pinasahat ma hataon tu :

* Boru  (dialusi)

* Dongan sahuta (dialusi)

* Dongantubu (dialusi)

* Suhi ni ampang na opat ( dialusi)

* Suhut sihabolonan ( dialusi)

Dung sidung dibahas/dipature nasida rencana siulaon i, diuduti parhata ni parboru i ma hatana ninna ma:

Amang boru/raja ni boru, nungnga hira rimpun tahatai angka naringkot namarhadomuan tu ulaon nanaeng patupaonta, molo tung pe adong natading nalupa, sai naboi dope hita masipaingotan paima so dapot ulaon; nuaeng pe, asa gomos di rahutrahutna songon nidok ni situatua “hori ihot ni doton, hata si ingoton”dipasahat amang boru ma ingotingot , botima.

Ra : Nauli rajanami, (dipangido ma hepeng sian suhut paranak laos dipasahat ma i tu parsinabung ni parboru) huhut didok hatana, ninna ma: dion ma rajanami ingotingot dihita, anggiat ma sude hita marningot naung tahatai i, botima.

Rs : Mauliate amangboru/rajani boru, (Ditambai suhut parboru ma satonga ni nanilehon ni paranak laos dipasahat ma hepeng ingotingot i tu dongan sahuta/STM asa dihatahon nasida)

Dijalo dongan sahuta ni parboru ma ingotingot i jala dipangido ma asa dohot dongan sahuta ni paranak jongjong rap dohot nasida, alai dongan sahuta ni parboru do ianggo na manghatahon, ala di alaman /dijabu nasida do dipatupa ulaon pasahat Sulangsulang. Dihatahon dongan sahuta/STM ma ingotingot i, ninna ma : Sadarion diari nauli diari na denggan on, ari… tanggal …bulan … taon …nungnga sahata satolop paranak marga… dohot parboru marga… patupahon pesta adat “Pasahat batu ni sulang” di ari … tanggal …bulan … taon … inganan di… mulai pukul….torop ni undangan sian pihak parboru/paranak hirahira ….halak, parjuhutna….., bentuk ni parjambaran: ulu ni dengke mangihut/niadopan. Godang ni batu ni sulang, marsigat di gajut. Ulos herbang sipasahaton ni parboru tu paranak godangna…….

Marsibuhabuha i pukul …..…

Songon i ma naung husurathon hami dison, molo adong dope nahurang masipaingotan hita

(molo adong nahurang/sitambaan, dipasahat/dipaboa ma i tu Dongansahuta  asa disurathon/dihatahon).

Dung hira singkop sude, didokma hata nauli nadenggan, ninna ma : Dihamu suhut nami nadua pihak, paranak dohot parboru, songon nidok ni umpasa ma dohonon nami:

Balintang ma pagabe

tumundalhon sitadoan,

ari muna do horas jala gabe

ai tangkas do hamu masipaolo oloan

Eme sitambatua parlinggoman ni siborok,

amanta Debata do pangalapantua,sai horas ma hita saluhutna diparorot.

Dison nungnga hujalo hami ingotingot sian suhut paranak dohot sian suhut parboru godang na Rp… , rap marningot ma hita di ulaonta nanaeng ro.Hori ihot ni doton, hata si ingoton, rap mandok ma hita “ingotingot”3x.

Panimpuli ni ulaon i, sian Hulahula/Tulang ni si boru ma mambahen tangiang panutup, jala dung sidung tangiang dibagihon ma ingot ingot.

-   Dung ro hakristenon tu tano Batak,dipadomu ma ulaon pasahat sulangsulang (Marpudun saut) dohot partumpolon. Najolo, diparmulaan ni hakristenon i, jolo marpudun saut do asa martumpol, alai di angka tingki na parpudi on, nungnga jolo martumpol asa marpudun saut, laos songon i ma nang na pasahat sulangsulang (adat marboru ni Tulang)

-   Di ulaon pasahat sulangsulang, (marpudun saut), dang pola ditaringoti parhata ”Patujolo ni batu ni sulang (Patujolo ni sinamot), olat ni nasida namariboto i do na marsipaune unean disi, unang gabe saksi pihak ketiga). 

Dinalaho borhat mulak paranak, dipaborhat parboru ma nasida mamboan tandok naung ditimpus (dirahut) namarisi indahan dohot dengke, dipataru calon parumaen i ma sahat tu harbangan. Tandok i ma na gabe tanda/simbol  paboahon naung dipudun hata saut, naso jadi muba naso jadi mose .

5.2. Pesta adat, pasahat  Batu ni sulang.

        

Dung salpu ulaon pasahat sulangsulang, mardalan ma gonghon dohot joujou tu angka tutur dohot tondong, dipihak ni paranak, songon i nang dipihak ni parboru. Diari naung binuhul, dipartingkian naung tinontuhonna i, jongjong ma hasuhuton bolahan amak rap dohot ianakhonna (penganten) dilambung pintu, manomu/ manjalo haroro ni angka tutur dohot tondong/ undangan. Digorahon protokol ma asa masuk parjolo, sude undangan ni suhut bolahan amak. Udut tu si, dilehon ma tingki tu suhut na ro, asa digora nasida masuk uduranna, jala dipatudu protokol ma inganan parhundulan nasida. Dung masuk sude tutur/ undangan, hundul ma hasuhuton di inganan parhundulanna; songon i ma marpungu undangan i di inganan naung pinarade ni hasuhuton bolahan amak (dijolo jabu manang pe di wisma).

Mangalap hata ma paranak tu Hulahulana manungkun manang na boi jolo martangiang mangan asa dipasahat Tudutudu ni sipanganon; umumna pintor dioloi Hulahula do i, ala manghilala di haporluan ni situan natorop. Dung sidung tangiang mangan, dipasahat paranak ma Tudutudu ni sipanganon, huhut didok ma hatana ninna ma: Dihamu Hulahula nami nahuparsangapi hami, dison hupasahat hami Tudutudu ni sipanganonta, parhitean nami pasangaphon raja i Hulahula nami; songon nidok ni umpasa ma dohonon nami,

Sitiktik ma na gompa, hodong lais ni ruma.

otik so sadia pe natupa, sai godang ma pinasuna.

las ma roha muna, ima tutu.

     

Udut tusi, dipasahat parboru ma Dengkena tu pamoruanna, huhut didok hatana, ninna ma: Dihamu pamoruon nami, dison hupasahat hami Dengke sitiotio (ulu ni dengke simbol ni siboru muli) rap dohot Dengke Simudurudur (simbol ni panaru), sai tio ma parnidaan muna mangalului siluluan muna, rap mudur hamu tu dolok dapotan las ni ari, mudur tu toruan dapotan mual natio, songon nidok ni umpasa ma dohonon nami :

Sitiktik ma na gompa, golanggolang pangarahutna.

otik so sadia pe na tupa, sai godang ma pinasuna.

las ma roha muna, ima tutu.

( masijalangan laos mulak tu angka ingananna be).

Molo naung disepakati hinan ditingki na pasahat sulangsulang, bentuk ni parjambaran Ulu ni dengke mangihut/jambar mangihut, pintor langsung nama hasuhuton nadua pihak masibagi parjambarannabe hombar tu adat ni suhut sihabolonanna, alai molo dang di seat hata hinan dope, berlaku ma marjambar niadopan, ingkon jolo hataan ma songon dia parbagina.

Asa boi nitorushon manurathon, ta anggap ma jolo naung disepakati parjambaran Ulu ni dengke mangihut/jambar mangihut.

     

Dung sidung marsipanganon, ditutup ma jolo parmanganon i dohot tangiang simpul mangan sian pihak paranak/Pangula ni Huria (somalna na niida sai jolo dibahen do ende sa ayat dua ayat). Dung sidung i mangalap hata ma paranak tu parboru mangido tingki laho mangido /manjalo Pangurupion/Tumpak; sidung i diatur ma parhundulon laos marudut ma tu na masiparenggetan mamillit raja parsinabung.

Dung tarpillit raja parsinabung ni na dua pihak, dipaborhat paranak ma pinggan na marisi Boras siriburribur, Tangotanggo na bolon, Ringgit na mardiring dohot Napuran daonbari, tu raja parsinabung ni parboru, ima nanigoaranna Pinggan panungkunan; laos dipungka /dimulai ma marhata. (Raja sungkun sian parboru=Rs ; Raja pangalusi sian paranak=Ra):

Rs : Manghatai ma hita amangboru/raja ni boru.

Ra : Manghatai ma hita tutu rajanami, nungnga rade hami.

Rs : Ompu raja ijolo martugkot sialagundi,

adat napinungka ni parjolo, ido ihutihuton ni na dipudi.

Adat i do nataula, elek marboru somba marhulahula

manat mardongantubu, burju mardongan sahuta

Asa tu sanggar antong amporik, tu ruang ia satua,

anggiat sinur napinahan, gabe naniula,

Horas ma antong hita jolma.

Gonghon do sipaimaon joujou sialusan,

nungnga marpungu angka raja nanigonghon

rade maniroi di inganan hinundulan

diloloan na bolon di antaran nabidang,

pangantaran ni anak pangantaran ni boru,

Balintang ma i pagabe, tumundalhon sitadoan,

sai na horas do hita jala gabe,

molo olo hita masipaolo oloan.

Nungnga bosur hita mangan mahap marlompan juhut,

pamurnas ma i tu daging, sudara tu bohi,

sipasindak panaili ma i, sipaneang holiholi 

Nuaeng pe, nungnga dison pinggan panungkunan,

pinggan na hot di ojahan.

Panungkunan di panggabean,

panungkunan di parhorasan.

pinggan na marisi:

* Boras siriburribur, boras sipirnitondi,

   asa pir ma tondi madingin, horas tondi matogu,

   saluhut na ma hita madingin, jala leleng mangolu

* Tanggo tanggo nabolon, dalan patogu partuturon,

   sai tanggo jala togu ma partuturonta

   tumpahon ni amanta namartua Debata.

   asa sinuan bulu ma i sibahen na las,

   sinuan ruhut partuturon sibahen na horas.

   Sitorop ma i bonana sitorop ma nang bulung na,

   torop ma Hulahulana mangihut ma dohot Boruna

* Ringgit na mardiring, ringgit sitio soara,

sai pasupasu nauli ma ro mariring-iring,

tu hita on saluhutna,

tumpahon ni amanta namartua Debata,

   asa lomak ma silinjuang, lomak so binaboan

   sai dapot angka naniluluan, jumpang na jinalahan

* Napuran daonbari, atuk ni alumniate/napuran  mauliate,

   sai manumpak ma Debata sibahen na jadi (Mulajadi),

   patutna ma antong dohononta mauliate,

Eme sitambatua ma i parlinggoman ni siborok,

Amanta Debata do pangalapan tua,

sai horas ma hita  diparorot,

Mauliate ma di Tuhanta.

(laos dilapik ma hata ni pinggan panungkunan i, manjaga atik tung adong na tading/nahurang/ nasala, ninna ma):

Siup do mula ni tabas hata marhuhuasi,

mangunduk simanjujung marsomba jarijari,

jarijari sampulu namarsiganjangganjangi.

Asa ampang ma i dijolojolo, panguhatan dipudipudi,

atik tung adong hata ni pinggan panungkunan on nahurang hupandohi, amanta namartua Debata ma na tangkas manggohi.

Amang boru/raja ni boru, jolo hu pahot ma jolo hata i atehe, asa hupahehe pinggan panungkunan on tu hamu

.

Ra : gabe rajanami.

Rs : (Dipangido/dijalo ma hepeng sian suhut parboru laho ulak ni pinggan panungkunan i, satonga ni na nilehon ni paranak jala dibahen/dipamasuk tubagasan pinggan panungkunan i. Jongjong ma parsinabung i ditiop pinggan i, huhut didok ma hatana, ninna ma) :

  

Martua hupahot, sai hot ma hata ni angka raja

napinahot ni amanta na martua Debata.

martua hupahehe, sai hehe ma panggabean parhorasan

dihita on saluhutna, ima tutu.

(laos dijou ma sahalak pamoruanna pasahathon pinggan panungkunan i tu parsinabung ni paranak, jala diuduti ma muse ninna ma) : Amangboru/raja ni boru nungnga pinasahat pinggan panungkunan tu jolomuna, mangihut ma sungkunsungkun nami, dia ma i langkat na dia ma i unok na, dia ma i hatana, dia ma i nanidokna.Botima.

Ra : Gabe jala horas ma hita rajanami, ia marpanungkun ma raja i di sintuhu ni indahan masak nasosadia i, songon nidok ni situatua ma dohonon nami rajanami, godang sibutongbutong otik sipir ni tondi,

Sitiktik ma na gompa, hodong lais ni ruma,

otik so sadia pe natupa, sai godang ma pinasuna

ianggo hata ni i rajanami, sigabegabe sihorashoras do nanidokna, botima.

Rs : Horas jala gabe ma hita tutu amangboru/ rajaniboru, dohonon nami ma songon nidok ni umpasa:

Bagot namarhalto ma i, naniagatan di robean,

sai horas ma namanganhon, tutambana dihamu namangalean.

Alai amangboru/rajani boru, songon nidok ni situatua, marangkup do nauli mardongan nadenggan, asa tangkas uju purba tangkasan uju angkola, anggiat tangkas hita maduma tumangkas ma namamora, disihombarna songon na hundul, siudurna songon na mardalan, siangkup ni parhorasan panggabean i tangkas ma rajani boru marboaboa, botima.

Ra : Horas jala gabe ma hita rajanami, ia marpanangkasi ma nuaeng raja i disihombarna songon na hundul di siudurna songon na mardalan, di siangkup ni panggabean parhorasan i, ba tangkas ma tutu nang hami marboaboa.

Rajanami, tangkas songon naung binoto muna, ia beremuna si …dohot paribanna boru ni rajai ima maen nami, nungnga manjalo pasupasu parsaripeon sian Tuhanta napinasahat ni naposona Pangula ni Huria i, ima na taudurhon nangkiningan tu gareja, jadi nungnga gabe Helamuna anak nami beremuna i, jala nungnga gabe Parumaen nami boru ni raja i ima maen nami.Rajanami, mangihuthon adat dohot uhum, pasahaton nami ma adat na gok tu hamu Hulahula nami, ima batu ni sulang nami, jala saonari ma i pasahaton nami, botima.

Rs : Horas jala gabe ma hita amangboru/raja ni boru, taringot di ulaonta sadarion nungnga tangkas hamu marboaboa, jala nungnga sude hami umbotosa, naung manjalo pasupasu parsaripeon do ianakhonta, anakmuna berenami i gabe Helanami jala borunami maen muna i gabe Parumaen muna.

Mauliate ma di Tuhanta dohot di naposona i, napasahathon pasupasu parsaripeon i; sai anggiat ma gabe rumatangga nahasea nasida dijolonta, lumobi di jolo ni Tuhanta;

           

Sai marurat tu toru i marpusuk tu ginjang,

mangerbang tu siamun mangerbang tu hambirang.

Giringgiring ma gostagosta,

sai tibu nasida mangiringiring jala mangompaompa.

Bintang  na rumiris tu ombun na sumorop,

anak dinasida riris dohot boru pe antong torop. ima tutu.

Amangboru/raja ni boru, hombar tu boaboa muna, pasahaton muna ma saonari adat na gok tuhami Hulahulamuna, ima batu ni sulangmuna, borhat ma hamu amangboru, boan hamu ma gajut muna i, asa disigati suhut sihabolonan nami,botima.

Ra : Gabe rajanami, borhat pe hami. (laos disuru ma suhut paranak i borhat mandapothon suhut parboru pasahathon gajut/Tas namarisi hepeng batu ni sulang i. Dang dibagasan pinggan dibahen batu ni sulang i asa unang pola dibereng halak/pihak ketiga). Dipasahat paranak i ma gajut/Tas namarisi hepeng batu ni sulang i huhut didok ma hatana, ninna ma : Mauliate ma di Lae/Tunggane niba dohot Inang bao, ala dijangkon hamu beremuna i gabe Helamuna; on ma na dibagasan gajut on, batu ni sulang ni beremuna i, naung gabe Helamuna,

Sitiktik ma na gompa, golanggolang pangarahutna

otik so sadia pe natupa, sai godang ma pinasuna. 

las ma rohamuna, ima tutu.

Dijalo suhut parboru ma gajut/Tas namarisi hepeng batu ni sulang i, huhut didok hatana, ninna ma : mauliate ma di Lae dohot ibotonami, ala sai tongtong do di parsangapi hamuna Hulahulamuna, dijangkon hamuna maen muna i gabe Parumaen muna, jala dipasahat hamu batu ni sulangmuna tu hami, las rohanami manjalo i. (Disigat ma gajut/Tas i jala dibuat hepeng batu ni sulang i, alai ditinggalhon do saotik, sekedar unang mulak kosong gajut/Tas i, ima nanigoaranna “anak ni pinahan sipahanon ni boru”). Dung jolo masijalangan, mulak ma nasida tu inganan parhundulanna.

Rs : Amang boru/raja ni boru, nungnga dipasahat hamu batu ni sulang, tu suhut sihabolonan nami, pasahat hamu ma batu ni sulang, tu suhi ni ampang naopat:

* Pamarai. (sada sian haha anggi ni suhut)

* Tulang. (sada sian tulang ni na muli)

* Simolohon. (sada sian iboto ni na muli)

* Pariban (sada sian haha anggi/pariban ni na muli).

Diuduti ma muse ninna ma : Amangboru/raja ni boru, nungnga sahat batu ni sulang tu suhut sihabolonan dohot tu suhi ni ampang naopat, sipasahaton muna dope pasituak na tonggi (=panandaon) tu angka pangalambungi dohot panauri, alai ala tumangkas ma i partording ni parsolhoton partuturon i di paidua ni suhut nami, didok roha dumenggan ma paidua ni suhut i manggorahon i (laos didok ma hatana tu paidua ni suhut parboru ninna ma):

Dihamu paidua ni suhut nami, nungnga dipasahat pamoruanta batu ni sulang, tu suhut sihabolonan dohot tu suhi ni ampang naopat, alai sipasahaton nasida pamoruanta dope pasituak natonggi (panandaon) tu angka hita pangalambungi dohot panauri. Ala tumangkas do dihamu partording ni parsolhoton di partuturon i, dihilala roha dumenggan ma molo hamu na manggorahon/mangidohon i tu pamoruanta, nuaeng pe pinasahat ma tu hamuna, botima.

     

Dijalo paidua ni suhut ma hata i ninna ma : mauliate ma dihamu parsinabung nami, hujalo hami ma hata i. Udut tusi didok ma hatana tu paranak ninna ma : Amang boru/raja ni boru, nungnga hujalo hami batu ni sulang sahat tu suhi ni ampang naopat, udut tusi amangboru/rajani boru, pasahat hamu ma jolo parjolo panggurguri tu raja parsinabung nami. (laos diuduti digorahon paidua ni suhut i ma angka pasituak natonggi/panandaon tu sude pangalambungi dohot panauri na patut manjalosa, mulai sian na sumolhot, tontu nungnga di konsep paidua ni suhut hinan i).

Dung sidung dipasahat pasituak natonggi/panandaon i tu angka pangalambungi dohot panauri di pihak parboru, dipasahat ma tu Hulahula/Tulang, asa nasida manggorahon di angka uduranna, ninna ma : dihamu Hulahula/Tulang nami, hamu ma Tulang, na manggorahon pasituak natonggi /panandaon tu angka uduranmuna, nuaeng pe pinasahat ma tu hamu, botima.

Dijalo Tulang ma hata i, ninna ma : mauliate ma dihamu pamoruan nami, sai tongtong do dipasangap hamuna hami Hulahulamuna, hujalo hami ma hata i, (laos didok ma hatana tu pihak paranak ninna ma) : dihamu berenami pamoruan ni boru nami, pasahat hamu ma pasituak natonggi/panandaon tu hami (digoari ma angka na patut manjalo i dipihak ni Tulang. Dung singkop sude, didok ma hatana tu pihak parboru ninna ma): Dihamu pamoruan nami, nungnga sahat hujalo hami pasituak na tonggi/panandaon tu hami Tulang/Hulahula muna, nuaeng pe pinasahat ma tu hamu, botima.         

Dijalo paidua ni suhut parboru ma hata i laos dilapik hata ma atik tung adong dope panggoraon nahurang asa masipaingotan. Udut tusi, didok ma hatana tu paranak ninna ma : Amangboru/rajani boru, nungga singkop be hujalo hami napatut jaloon nami, asa nuaeng pe  tauditi ma, botima. (Pada umumna, sai adong do nasala di konsep ala ni na lupa ditingki manusun daftar nama sijalo pasituak natonggi/panandaon, jadi, asa boi diatasi paidua ni suhut molo adong namanuntut, dipangido paidua ni suhut ma tu paranak nanigoaranna panggohi ni nahurang gok. Suang songon i do nang paranak laho manusun daftar sijalo ulos/ulos-ulos, dipangido parhatana i ma panggohi ni nahurang gok. Dilehon parboru ma satonga ni nanilehon ni paranak). Mangihuthon na somal, digoari do i si rambe manis.

Ra : Mauliate ma rajanami, songon nanidok muna i nungnga singkop be sude sahat na aturan sipasahaton nami, nuaeng pe rajanami, ala Tulang ni anak nami do nagabe simatuana, dang mardalan be Tintin marangkup. Nuaeng pe nungnga rade hami parulosan muna; pasahat hamu ma jolo :

* Ulos pansamot.

* Ulos Hela.

* Ulos tu suhi ni ampang naopat:

- Pangamai/siungkap bahal. (sada sian haha anggi ni  suhut)

   - Parorot. (sada sian iboto ni suhut)

   - Simandokhon. (sada sian haha anggi ni pangoli)

   - Sihunti ampang (sada sian iboto ni pangoli).

(diuduti parsinabung ni paranak i ma muse ninna ma); Rajanami, nungnga sahat hujalo hami ulos pansamot, Ulos Hela dohot Ulos tu sude suhi ni ampang naopat, mangido dope hami rajanami asa pasahaton muna nian ulos tu angka hami pangalambungina dohot tu panaurina, alai ala tumangkas do partording ni parsolhoton partuturon i di paidua ni suhut nami, didok roha, tumangkas ma paidua ni suhut nami annon mangidohon i tu raja i Hulahulanami. (laos didok ma hatana tu paidua ni suhut paranak ninna ma) : Dihamu paidua ni suhut nami, nungnga dipasahat Hulahulanta Ulos, tu pansamot, Hela dohot tu sude Suhi ni ampang naopat, udut tusi sipangidoonta dope Ulos, sian Hulahula i, tu angka hita pangalambungi dohot panauri. Ala tumangkas do partording ni parsolhoton partuturon i di hamu, dihilala roha, tumangkas ma i molo hamu na mangidohon tu Hulahulanta, nuaeng pe pinasahat ma tu hamu, botima.

(Dijalo paidua ni suhut paranak ma hata i, ninna ma): Mauliate ma dihamu raja parsinabung nami, hujalo hami ma hata i ; laos diuduti ma hatana tu parboru ninna ma : Rajanami, asa di tiur ni ari nian ulosan muna Hela dohot Borumuna, molo tung siat pangidoan nami rajanami, parjolo ma jolo ulos holong pasahat hamu, botima .

Rs : Nauli raja ni boru (laos diaturhon ma partording ni na pasahat ulos holong/ulos panoropi. Mangihuthon nasomal ni ida tar songon on ma partording na):

* Kelompok suhut parboru (anak dohot boru)

* Dongantubu

* Boru.

* Dongan sahuta

* Hulahula Tulang, bona tulang, bona ni ari dohot tulang 

   rorobot, masiaturan ma nasida.

Dung sidung pihak parboru pasahat Ulos panoropi/Ulos holong, dipaboa nasida ma i tu pihak paranak, udut tusi djouhon paranak ma asa ro Hulahula nasida pasahathon ulosna. (Hulahula / Tulang rorobot, Tulang, Bona tulang dohot Bona ni ari.)

Dung sidung na pasahat Ulos panoropi/Ulos holong, di uduti ma muse mulak tu na pasahat Ulos herbang molo adong dope, dohot Ulos tinonun sadari/Ulosulos ; jala dung sidung na pasahat Ulosulos dohot panggohi ni nahurang gok, (si rambe manis), sahat ma tu na marhata si gabegabe.

Najolo, ganup horong Hulahula do mandok hata sigabe-gabe tu pihak paranak, alai diangka tingki na parpudion, mardos ni roha ma pihak Hulahula asa holan suhut parboru ma na pasahathon hata sigabegabe i, laos paampuhonsa, jala hirahira songon on ma didok hatana.  

Dihamu pamoruan nami, dohonon nami ma tu hamu songon nidok ni umpasa:

Tampuk ni si baganding didolok ni pangiringan,

Horas jala gabe hamu na marhaha maranggi

tu dolok tu toruan sai masipairing iringan.

Songon ansimun sisada holbung,

tu pege na sangkarimpang,

tu toru rampak manimbung

mangangkat rampak tu ginjang

Sitorop ma bonana, sitorop nang bulungna.

Torop ma Hulahulana, songon i ma dohot boruna.

Horbo sitingko tanduk ma i sisapang na ualu

parbutuha mangalilit parmata mangalualu

Marjampal i di balian, mulak tu bara i marngalungalu

angka hata parsaulian i, namardongan hata Pasupasu

sai ampu ma i diampuan muna, tangkas martonga ni jabu.

Sahat ma solu tinogu tu bontean,

sai leleng ma hita mangolu di parhorasan di panggabean,

Gabe ma na manggabei, gabe ma na nigabean, Botima.

(Jolo dijalo parhata ni paranak ma hata i asa dipasahat tu suhutna ninna ma):

Harbangan ma i dalan tu huta,balatuk dalan tu jabu.

Hata nauli napinasahat muna, ampuon nami ma i martonga ni jabu.

Turtu ma ninna anduhur, tiotio ninna lote,

hata pasupasuan na uli i, sai unang ma muba unang mose.

Tingko ma inggir inggir, bulungna i ratarata,

hata pasupasuan nauli i, sai pasauthon ma amanta namartua Debata.

Nuaeng pe dihamu hasuhuton nami,  ampu hamu ma panggabean parhorasan i, botima.

(Rampak jongjong ma hasuhuton paranak huhut ditiop rambu ni ulosna songon na pataridahon rasa hormatna somba marhulahula, diampu nasida ma hata pasupasuan i ninna ma :

Naung sampulu pitu mai jumadi sampulu ualu,

hata pasupasuan na uli i,

huampu hami ma i martonga ni jabu.

Ampu ma i diampuan nami, puak di abara nami.

Sahat ma solu tinogu tu bontean,

nungnga sahat huampu hami hata pasupasuan i,

sai sahat ma hita tu parhorasan panggabean.

Botima.

Udut tusi, dipasahat nadua pihak ma hepeng tu dongan sahuta/STM ima nanigoaranna Olopolop. Rampak jongjong ma Dongan sahuta/STM ni nadua pihak, alai STM bolahan amak ma ianggo na manghatahon olopolop i. Ditariashon ma disi, paboa naung dipasahat paranak adat na gok tu parboru, laos didok ma tu situan natorop asa rampak mandok Olopolop 3x.

Manimpuli ulaon i dibahen Tulang ma tangiang panutup, sidung i dibagihon ma hepeng olop olop i.

Sian nasai godang ragam ni tangiang panutup, sekedar parbandingan, pinatedek ma ditoruon tangiang ni sahalak natuatua parhata.

Ale Ompung na martua Debata, (Ompung Mulajadi nabolon)

Ho do na jumadihon dolok asa timbo

na mangungkap mata mual natio.

Ho do na palambok Ateate, napahibul Pusupusu

na palomak sitarupon (jambulan), na mamopap salimbubu (parsambubu)

na mangaramping Jarijari, mangatur marbuhu buhu

na parintar mata ni ari, na manontuhon balik kuhu.

Dijadihon Ho saluhut natinompaMi

nasiat marpangidoan tu Ho.

Hutonggo hupio Ho di ombas on, tangkas martinangi marbinege ma Ho di hata ni pangidoanhon (alualukon), sai sahaphon jala sampehon ma panggabean parhorasan i, napinasahat ni Hulahula marga … tu pamoruanna marga …

Nang di na rap mangido dope hami napunguon tu Ho, sai tangihon jala olo i ma pangidoan nami (rap mandok ma di tangiang na ni ajarhon ni Jesus : Ale Ama nami … dst).

*  Di ulaon pasahat batu ni sulang /adat marboru ni tulang,  dang patutna be bahenon adat paulak une dohot tingkir tangga (ulaon sadari), ai dang hulinghuling nilangkophon manang imbulu ni suanhon.

*  Goar pandohan/istilah “Panandaon” diganti do i gabe “Pasituak natonggi”, ai haduk/dang suman molo so masitandaan bere dohot tulang.

         Dang mardalan tintin marangkup, ai Tulangna do gabe simatuana jala Berena gabe Helana. 

Tweet

Subscribe to receive free email updates: