BAB. IV PARTORDING NI ADAT SIDUA HASUHUTON

Digoari pe ulaon i sidua hasuhuton, ala na dua pihak do suhut sihabolonan, na manghasuhuthon ulaon i. (Suhut paranak dohot Suhut parboru). Andorang so tataringoti prosedur pelaksanaan ni ulaon i marsadasada, manaili ma jolo hita satongkin tu pudi, mamereng kondisi masyarakat Batak Toba diangka tingki najolo i.       

     

Umumna halak Batak najolo, poligami do, Ugamo Malim do ugamo hatopan, alai mangolu dope faham animisme.

     

Molo mabalu sada Ina najolo, wajib do haha angina pagodanghon/paturehon nasida, angka haha angginaima nani goaranna Tali magulang.  Ende mehet ni na marbaju najolo mandok :

Dang olo ahu marhitehon hau sada,

masuak i annon, sitiopan pe soada.

Dang olo ahu muli tu anak sasada,

molo mate i annon, talimagulang pe soada.

Dianggap songon na magulang do namabalu i, jadi hahaanggina ma mambahen tali sitiopan, manogu ibana sian hagulanganna i, gabe digoari ma angka hahaanggina i Tali magulang na. Dung hirahira tolu bulan mabalu Ina i, ro ma Hahana/Anggina, manangkothon hohosna dipintu jabu ni Ina namabalu i, songon tanda manungkun ma i, manang na olo pagodangonna/patureonna. (prioritas mulai sian siangkangan). Molo olo do Ina namabalu i, dipasombu ma songon i hohos i disi, sahat tu manogotna, alai molo so olo ibana, disampathon ma hohos i tu alaman, asa dibereng na mamereng.

      

Songon naung ni arbis di jolo ni on, taringot tu torsa sejarah parbagason (perkawinan) ni masyarakat Batak Toba, dimulana i, masa do manangko boru, hirahira 100 taon lelengna, nigoaran ma i zaman penculikan  Panghorhon ni zaman penculikan i, masitabuni hon boruna be ma halak Batak, nigoaran ma i zaman gadis pingitan.

       

Di zaman gadis pingitan i, maol situtu ma mangalului borua bahen dongan saripe, gabe masa ma Sitompas huta, (ditingki i, dang piga dope sahuta) alai dang berlaku umum i, ai holan jolma nabegu (para pendekar) do nabarani mangulahon i; laos di zaman i ma parmasa ni porang huta, namangalehon kesempatan tu angka jolma nabegu menawarkan jasa, untuk mendapatkan wanita dan harta ; masa ma dohot na mambuat boru ni dongan samarga/Dongantubu, asal ma pulikpulik be hutana, jala dibahen ma goar ni huta haroroan ni siboru i gabe margana.

      

Dung songon i maolna mangalului borua bahen dongan saripe di zaman gadis pingitan i, tubu ma pamikirion pajongjong domudomu (perantara) nagabe tugas/siulaon ni boru/pamoruan. Hasomalan ni halak Batak do marpungupungu manghatahatai di partungkoan dohot di kode tuak, disi ma angka Boru/Domudomu i masipadomuan /masitungkaran informasi.

      

Dung sahat informasi i tu paranak, langsung do najolo suhut paranak mandapothon suhut parboru dibalian ni huta, disi ma nasida masitawaran taringot tu tuhor ni siboru i, songon panuhor tu partigatiga, (transaksi jual beli). Marmula sian i do gabe adong hata namandok : Natinuhor do ripe, dianggap do sinamot i tuhor ni siboru.

Dimasa i, jotjot do sundat parbagason ala sinamot na hurang godang, gabe songon na maila (tarila) ma paranak.

       

Ala ni angka pengalaman nasongon i, dipudian ni ari, Dongan tubuna naditoru ni partuturonna ma disuru paranak mandongani pamoruanna. Saksi/pandongani do fungsi ni  Dongantubu disi, Boru do ianggo na berperan/penanggung jawab.

       

Ala naung didelegasihon angka paranak ulaon sisongon i tu boru dohot dongantubuna, angka parboru pe, tong ma didelegasihon tu boru dohot dongantubuna, gabe terbentuk ma domudomu na formal.  

       

Ditingki i, di zaman gadis pingitan i, dang na marsitandaan dope si Doli  dohot si Boru nanaeng padomuon i, gabe sipata masa do haurahon, ala manjua sidoli manang siboru, dung dibereng dang suman tu rohana nanaeng dongan saripena i, ai tupa namartihas (cacat) do. Olo ma sipata lintun penganten sian pesta, hape nungnga rade sipanganon parjuhutna dihobasi. Dung masa nasongon i, marria ma raja, dibahen ma uhum parpatihan namandok :

Sidangka sidangkua, sidangka ni singgolom.

Nasada gabe dua, utang ni si pahilolong.

       

Molo sidoli na manjua, dang jadi mulak naung nilehon ni paranak dohot sude harugianna, alai molo siboru do na manjua,  ingkon gararon ni parboru ma silompitdua harugian ni paranak. 

       

Dijolo ni on, nungnga niarbis/tinaringotan angka ulaon adat na tarmasuk tu kelompok ulaon sidua hasuhuton ima : 

Tweet

Subscribe to receive free email updates: