6. Mangampu boru / anak

Mangihuthon pandok ni angka natuatua, dang masa najolo mangain anak, laos dilehon nasida do hatoranganna songon on : Partalian ni mudar do marga ni halak Batak,jadi dang mungkin sisada mudar halak Batak dohot halak na asing/halak Sileban..

        

Najolo, masa do hata Marpadan, jala tarida do i di ulaon paradatan, ima di panjouon ni parjambaran, alai somalna tu na pulik marga do i dipamasa (berlaku).  Mangihuthon pandapot ni angka dongan natuatua, marasing (marbeda) do lapatan ni mangampu dohot mangain, marasing muse do i tu na mangadopsi.

Mangampu, ima: Manjalo/manjanghon, manang menempatkan seseorang  menjadi tanggung jawabnya dalam hal tertentu, tanpa mengganggu hubungan kekeluargaan ni na ni ampu. (Mangampu hata = manjalo hata)

Mangain, ima : Mengambil alih secara menyeluruh, hak dan kewajiban, tugas dan tanggung jawab ni haha anggi na punu (holan marboru alai dang adong anak), termasuk harta benda.

Mangadopsi, ima : Menempatkan seseorang dibawah pertanggung jawaban ni na mangadopsi secara keseluruhan, yang mengakibatkan putusnya hubungan anak yang diadopsi itu dengan orangtua kandungnya. (adopsi total).  Najolo, boi dohonon, terisolir do pergaulan ni halak Batak maradophon halak luar (naso halak Batak), alai dipudian ni ari, lumobi dung mardeka Indonesia taon 1945, lam tarbuka ma  pargaulan ni halak Batak; terbentuk ma kondisi kemasyarakatan na memungkinkan  halak Batak mangalap boru ni halak sileban; mangihut ma muse dipudina kondisi kemasyarakatan na memungkinkan boru ni halak Batak muli tu halak sileban (naso halak Batak).

       

Asa boi dilangsungkan perkawinan i dibagasan adat Batak, tontu ingkon jolo di Batakhon (di margahon) do jolo halak sileban i, ima nanigoaran dison Mangampu.

       

Molo mamereng hita sian kronologis ni na masa i, boi dohonon, ianggo pangantusion dohot cakupan ni adat mangampu naung masa nuaeng on, holan sebatas adat peradatan do i, tanpa menyangkut tarombo maupun harta warisan. Jadi, hot do status ni halak na niampu i selaku anak na niampu/boru na niampu. (Bandingkan : anak asuh dan orang tua asuh)

      

Mangihuthon nabinereng sandiri, lebih matang/lebih mantap do pelaksanaan ni adat mangampu boru dibandingkon tu pelaksanaan ni adat mangampu anak; marhite sian i, nungnga boi dianto roha, tontu parjolo do baoa ni halak Batak mangalap boru sileban, mangihut ma muse dipudi ni i, boru ni halak Batak muli tu halak sileban; mungkin ala na parjolo do baoa borhat tu pangarantoan, gabe parjolo ma masa adat mangampu boru / mamboruhon.       

6.1.  Mamboruhon, laos pasahat Sulangsulang.

      

Molo mangalap boru sileban halak Batak, somalna, sai jolo  dipaboruhon do parumaen/calon parumaen na i tu Hulahulana (Tulang ni pangoli), asa boi adathononna dibagasan adat Batak. Paranak do na mamboruhon , Hulahula ma na mangampu boru/manjangkon siboru i gabe boruna sandiri. Hata ni situatua mandok : Hot do jabu i dimpos margulanggulang, boru ni ise pe dialap bere i, hot do i boru ni Tulang. Marojahan tu hata i do dipahombar adat mamboruhon/ mangampu boru.

       

Dang sarupa mangampu boru dohot adopsi hukum Negara, ai dang putus hubungan ni siboru na ni ampu dohot natorasna (dang adopsi total). Mangihuthon adat sihabatahon, molo naeng pasauthon boru ni Tulang, ro ma paranak pasahathon Sulangsulang,  jala laos ido ganti ni istilah pudun sautna. (dang masa marhata sinamot/pudun saut di adat marboru ni Tulang).        

        

Sadalan do adat pasahat Sulangsulang dohot adat mamboruhon/ mangampu boru, ima nanigoaranna dua saihot, sipata didok sada tinembak dua hona.  

       

Laho mangulahon adat mamboruhon, sai jolo mardos ni roha do paranak dohot Hulahulana, jala dibuhul nasida do sada ari peresmianna.

       

Di ari naung binuhul i, borhat ma paranak rap dohot uduranna manopot Hulahulana, diboan nasida do sipanganon masak (indahan las dohot lompan juhut na marpanggoari Tudutudu ni sipanganon). Ala naung sian hata, Hulahula pe, nungnga diparade Dengke dohot ulos sipasahatonna.

       

Dung sahat uduran ni paranak i di jabu ni Hulahulana, hundul be ma nasida hombar tu na ni aturhon ni parjabu. Dung masipatangkasan nasida, dimulai ma acara.

        

Dipasahat par anak ma Tudutudu ni sipanganon i, tu jolo ni Hulahulana huhut didok hatana, ninna ma : Rajanami, dison ro hami pasahathon Tudutudu ni sipanganon Sulangsulang sian beremuna si ----------

Songon nidok ni situtua ma rajanami dohonon nami ;

godang sibutongbutong, otik sipir ni tondi,s

Sitiktik ma na gompa, golanggolang pangarahutna

otik so sadia pe na tupa, sai godang ma pinasuna.

Las ma rohamuna, imatutu.

Udut tusi, dipasahat Hulahula ma Dengke, tu pamoruonna, huhut didok ma hatana, ninna ma : Dison hupasahat hami Dengke sahat jala dengke simudurudur, anggiat sahat ma nasininta ni rohanta.

Sitiktik ma na gompa, golanggolang pangarahutna.

otik so sadia pe na tupa, sai godang ma pinasuna.  

Las ma rohamuna, ima tutu.

       

Dung sidung na pasahat Tudutudu ni sipanganon dohot Dengke, dibagihon dipadalan ma panganan; sian pihak paranak ma mambahen tangiang mangan dohot huhuasi ni sipanganon (sitiktik ma na gompa …dst.).

       

Dung sidung marsipanganon, ditutup ma jolo parmanganon i dohot tangiang simpul mangan, sian pihak paranak/Pangula ni Huria. Udut tusi dipasahat Hulahula ma deba/sabagian sian Tudutudu ni sipanganon i tu paranak pamoruanna ima singkat ni Ulu ni dengke jala digoari do i Ulu ni dengke mulak. (ala sarupa/satarap do adat pasahat Sulangsulang dohot adat marpudun saut); dibagihon be ma i dipihakna hombar tu adat ni suhutna .

Marudut ma muse tu na manghatai/marhata, jala hirahira songon on ma partordingna. (Raja parhata sian pihak Hulahula/na mangampu boru = Rs ; Raja parhata sian pihak paranak/na mamboruhon = Ra).

Rs : Manghatai ma hita raja ni boru.

Ra : Manghatai ma hita tutu rajanami, nungnga rade hami.

Rs : Nungnga bosur hita mangan, mahap marlompan juhut, pamurnas ma i tu daging, saudara tu bohi.

       sipasindak panaili ma i, sipaneang holiholi.

       taringot di sipanganon i raja ni boru,

       dia ma i langkatna, dia unokna.

       dia ma i hatana, dia ma i nanidokna,botima.

Ra : Gabe jala horas ma hita rajanami tumpahon ni amanta namartua Debata, ia marpanungkun ma nuaeng raja i di sintuhu ni indahan masak na sosadia i; rajanami, songon nidok ni situatua ma dohononnami, godang sibutong-butong otik sipir ni tondi,

       Sitiktik ma nagompa hodong lais ni ruma,

       otik so sadia pe natupa i, sai godang ma pinasuna,

       ianggo hata ni i rajanami, panggabean parhorasan do nanidokna, botima.

Rs : Horas jala gabe ma hita tutu raja ni boru, hami pe dohonon nami ma songon nidok ni umpasa :

       Bagot na marhalto ma i na niagatan di robean, sai horas ma na manganhon, tu tambana dihamu namangalean 

       Alai amang boru, didok situatua, marangkup do nauli mardongan nadenggan, asa tangkas uju purba tangkasan uju angkola, anggiat tangkas hita maduma tumangkasan ma na mamora; Disihombarna songon na hundul, di siudurna songon na mardalan, siangkup ni parhorasan panggabean i, tangkas ma dipaboa raja ni boru, botima.

Ra : Horas jala gabe ma hita rajanami tumpahon ni amanta na martua Debata, ia marpanangkasi ma nuaeng raja i disiangkup ni panggabean parhorasan i, ba tangkas ma tutu nang hami marboaboa. Rajanami, bangko doi di hita jolma, molo balga anak pangolihononhon, magodang boru pamulion;  rajanami, ia anak nami, ima beremuna si ---nungnga patutna marhasohotan. Marningot hata ni situatua namandok :

Hot do jabu i, dimpos margulanggulang.

boru ni ise pe dialap bere i, hot do i boru ni Tulang. 

Dison, huboan hami tu jolomuna na naeng parumaen nami, ba, boru sian dia pe i rajanami, tong do borumuna i.

Asa tangkas botoon ni angka raja, songon i dohot Inanta soripada, ido apala na parjolo na huharohon hami pamoruon muna, asa jalo hamu ma i gabe borumuna situtu/borumuna sandiri, jala sada tinembak dua na hona ma on rajanami ulaonta on, laos on ma adatna pasahat Sulangsulang ni Bere muna i.. Songon i ma rajanami sitangkasna siangkup ni panggabean parhorasan i, botima.

Rs : Horas jala gabe ma hita amangboru/raja ni boru, ido tutu tingkos na, songon na nidokmuna i : Hot do jabu i, dimpos    margulanggulang,    boru  ni  ise pe  dialap bere i,

hot do i boru ni Tulang. Amang boru/Raja ni boru, hombar tu hata muna na mandok: sada tinembak dua na hona ma ulaonta sadari on, ala laos on nama adatna pasahat Sulangsulang. Taringot di adat marsipanganon amang boru, na boi ma i tapasada, alai ianggo adat ni parhataan, dumenggan ma ra margollitgollit. Jolo sidung ma jolo huampu hami borunami (Pembicaraan tahap I), dung pe i asa tauduti annon tu hata ni napasahat sulang sulang (Pembicaraan tahap II).

Nuaeng pe Amang boru/Raja ni boru, asa huampu hami boru nami, pasahat hamu ma tu hami, botima.

Ra : Horas jala gabe ma hita rajanami, mauliate godang ma dihamu Hulahulanami. (laos ditogu/dipasahat ma siboru i, tu jolo ni Hulahulana i)

Rs : Dung dipahundul siboru i di jolo nasida, jongjong ma Hulahula suhut (Suami istri) mangampu siboru i, didok ma hatana, ninna ma : Mulai sian ombas on, borungku ma ho; si …. do goarmu nasai leleng na on, gabe si … boru … ma ho olat ni on. (laos dihohophon ma ulos tu borunai, ima nanigoaranna Ulos Hohop.

Dijomput ma boras si pir ni tondi tu simanjujung ni siboru i, huhut didok hatana, ninna ma : Pir ma tondi ni boru kon, dijangkon jala digomgom tondinami ma ibana, imatutu. (laos dipahundul ma siboru i dilambung nasida.)

Udut tusi, dibahen ma tangiang panutup sian Hulahula ni parboru ; sidung i, sude ma natorop i manjalang siboru na niampu i. Olat ni i do ulaon mangampu boru (Pembicaraan tahap I).

Andorang so masuk tu Pembicaraan tahap II, jolo istirahat (reses) ma jolo satongkin, ima na gabe gollit/batas ni ulaon dua saihot.

Dung istirahat (hirahira lima menit), diuduti ma muse tu Pembicaraan tahap II, ima nanigoaranna ulaon Pasahat Sulangsulang. Taringot tu adat marsipanganon, nungnga dipasada i tu ulaon mamboruhon/mangampu boru, jadi langsung nama tu na marhata. (Raja sungkun sian parboru = Rs; Raja alus sian paranak = Ra.)

Rs : Amangboru/Raja ni boru, nungnga sidung huampu hami boru nami jala nungnga dijolo nami, molo tung adong dope sihataanta, ba dihatahon amangboru ma. Botima.

Ra : Mauliate ma rajanami,gabe jala horas ma hita tumpahon ni amanta namartua Debata, songon napatangkashon boaboa nami nangkiningan i, na sada tinembak dua nahona do ulaonta sadarion. Nungnga dijolo muna borumuna ima maen nami, jadi nungnga sidung ulaon parjolo. Udut tusi Rajanami, bangko ni hita jolma do i, molo balga anak pangolihononhon, magodang boru pamulion. Tangkas songon na binoto muna, ia anaknami beremuna si--- nungnga patutna marhasohotan jala boa-boana tu hami, nungnga sian dos ni rohanasida dohot maen nami si--- naeng mamungka parsaripeon naimbaru. Hombar tu si do rajanami, ro hami nuaeng manungkun adat sisombahonon nami laho pasangaphon hamu Hulahulanami, ima rajanami sitangkasna siangkup ni panggabean parhorasan i, botima .

Rs : Horas jala gabe ma hita amangboru/raja ni boru, ido tingkosna songon nanidokmuna i, balga anak pangolihononhon, magodang boru pamulion, ia nungnga tangkas dipaboa amangboru, naung masihaholongan anakmuna berenami nanaeng Helanami dohot paribanna borunami nanaeng Parumaen muna, mardomu tu si amangboru/raja ni boru, songon nidok ni umpasa do dohonon nami :

Dangka ni hau dapdap ma i, tu dangka ni arirang,

sai saut do na marrongkap, tung naso jadi sirang.

Sai marrongkap ma nasida songon bagot,

marsibar songon ambalang,

masigomgoman tondina

saut nasinangkap niroha.

Nuaeng pe amangboru/ raja ni boru, ala marpanungkun ma hamu, diadat sipasahaton muna tu hami Hulahulamuna, ba balga ma pasahat hamu, batu ni sulang muna tu hami. botima.  

Ra : Horas jala gabe ma hita rajanami, taringot tu pangidoan ni raja i, dang napola manjua hami disi, ai dang na hulinghuling nilangkophon jala ndang imbulu sinuanhon bere muna i, sandok nasa na adong di gajut nami i, tung pasahaton nami do i tu raja i, pos ma rohamuna rajanami, botima.

Rs : Molo songon i ma hata muna amangboru/raja ni boru, nauli ma i, alai amangboru ingkon sahat do batu ni sulang i tu suhi ni ampang naopat;  tamba ni i amang boru, tangkas do bahenon muna Pasituak na tonggi tu angka pangalambungi dohot panauri, botima.

Ra : Nauli jala nadenggan rajanami, rade ma hami disi, botima.

Rs : Horas jala gabe ma hita amangboru/raja ni boru, nuaeng pe, paboa hamu ma tu hami taringot tu rencana si ulaonta, nungnga adong ra konsepna dipatupa hamu, botima.

Ra : Mauliate ma rajanami, hirahira songon on ma naung hukonsep hami (laos ditariashon ma sude rencana na mardomu tu ulaon pesta pasahat batu ni sulang nanaeng patupaon i: partingkianna, bolahan amak, inganan/lokasi, torop ni undangan dohot angka na asing dope na marhadomuan tu ulaon i), songon i ma rajanami naung hukonsep hami, laos mangido ma hami rajanami asa tuturi hamuna hami mambahen tu na dumenggan, botima.

Rs : Mauliate ma amangboru/raja ni boru, molo songon i ma pangidoan ni amang boru, hualap hata ma jolo sian angka donganhu (laos didok ma hatana ninna ma) : Dihita na marhaha mar anggi/na mardongan tubu, Dongan sahuta dohot Boru nami, tarlumobi ma di Hulahula nami, nungnga rampak mambege hita di rencana siulaon na pinatolhas ni amangboru/ pamoruan, jala dipangido nasida paniroion sian hita, nuaeng pe pinasahat ma hataon tu :

* Boru  (dialusi)

* Dongan sahuta (dialusi)

* Dongantubu (dialusi)

* Suhi ni ampang na opat ( dialusi)

* Suhut sihabolonan ( dialusi)

Dung sidung dibahas/dipature nasida rencana siulaon i, diuduti parhata ni parboru i ma hatana,ninna ma: Amang boru/raja ni boru, nungnga hira rimpun tahatai angka naringkot namarhadomuan tu ulaon nanaeng patupaonta, molo tung pe adong natading nalupa, sai naboi dope hita masipaingotan paima so dapot ulaon; nuaeng pe, asa gomos di rahutrahutna, songon nidok ni situatua Hori ihot ni doton, hata si ingoton” dipasahat amang boru ma  ingotingot, botima.

(Mangihuthon pandok ni pigapiga halak natuatua,boi do holan sian paranak hepeng ingotingot i.)

Ra : Nauli rajanami, (dipangido ma hepeng sian suhut paranak laos dipasahat ma i tu parsinabung ni parboru huhut didok hatana ninna ma: dion ma rajanami ingotingot dihita, anggiat ma sude hita marningot naung tahatai i, botima.

Rs : Mauliate amangboru/rajani boru, (laos dipasahat ma hepeng ingot ingot i tu dongan sahuta/STM asa dihatahon nasida). Dijalo dongan sahuta ni parboru ma ingotingot i laos dipangido ma asa dohot dongan sahuta ni paranak jongjong rap dohot nasida, alai dongan sahuta ni parboru do ianggo na manghatahon, ala di alaman /dijabu nasida do dipatupa ulaon pasahat Sulang sulang.

Dihatahon dongan sahuta/STM ma ingot ingot i, ninna ma : Sadarion diari nauli diari na denggan on, ari---tanggal ------bulan --- taon ---, nungnga sahata satolop paranak marga---dohot parboru marga---, patupahon pesta adat Pasahat batu ni Sulang di ari ---tanggal---bulan --- taon --- inganan di----mulai pukul---torop ni undangan sian pihak parboru/paranak hirahira ---. halak, parjuhutna---, bentuk ni parjambaran: ulu ni dengke mangihut/niadopan.Godang ni batu ni sulang: Marsigat di gajut. Ulos herbang sipasahaton ni parboru tu paranak godangna ---.

Songon i ma naung husurathon hami dison, molo adong dope nahurang, masipaingotan hita (molo adong nahurang/sitambaan, dipasahat/dipaboa ma i tu dongansahuta i, asa disurathon/ dihatahon). Dung hira singkop sude, didokma hata nauli nadenggan ninna ma : Dihamu suhut nami nadua pihak, paranak dohot parboru, songon nidok ni umpasa ma dohonon nami:

Balintang ma pagabe, tumundalhon sitadoan.

Ari muna do horas jala gabe,

ai tangkas do hamu masipaolooloan.

Eme sitambatua, parlinggoman ni siborok,

Amanta Debata do pangalapantua,

sai horas ma hita saluhutna diparorot. Ima tutu.

Sahat ma Solu, tinogu tu Bontean,

Sai leleng ma hita mangolu, diparhorasan panggabean.

Dison nungnga hujalo hami ingotingot, godang na Rp…, rap marningot ma hita di ulaonta nanaeng ro.

Hori ihot ni doton, hata si ingoton, rap mandok ma hita  ingot, ingot,  3x.

       Panimpuli ni ulaon i, sian Hulahula ni parboru ma mambahen tangiang panutup, jala dung sidung tangiang dibagihon ma ingot ingot.

*Adong do deba namambahen songon on : Parjolo Acara mangampuboru(Pelantikan/Penabalan),dung pe sidung i asa marsipanganon, laos marudut ma tu na marhata Pasahat Sulangsulang.

* Dinalaho borhat mulak paranak, dipaborhat parboru ma nasida mamboan tandok naung ditimpus/dirahut) namarisi indahan las dohot dengke, dipataru calon parumaen i ma  sahat tu harbangan. Tandok i ma na gabe tanda/simbol  paboahon naung dipudun hata saut, naso jadi muba naso jadi mose.

* Molo naung mar rumatangga do nasida, langsung ma siboru i dohot tu huta ni paranak.

* Ditingki mamestahon pasahat adat na gok, berlaku ma ruhut ni paradaton marboru ni Tulang, ima adat pasahat batu ni sulang, alai, molo dang Hulahula tangkas na mangampu Siboru i, berlaku ma ruhutruhut ni paradatan Marunjuk

6.2. Mangampu anak (Mamargahon).

        

Diangka tingki na parpudi on, sesuai tu perkembangan ni zaman, nungnga lam torop boru ni halak Batak, muli tu  halak sileban. Asa boi tulus sangkap ni naposo i mardalan dibagasan adat Batak Toba, dilului ma jalan keluarna, marhite sian na ma ngampu anak (mamargahon halak sileban nanaeng mangoli i).

       

Diparmulaan ni paradatan i, diusahahon parboru do asa gabe anak ni pamoruanna (prioritas ibotona kandung) halak sileban nanaeng Helana i, gabe boi ma pestahononna hombar tu adat marboru ni Tulang (Pasahat batu ni sulang), alai adong do deba na berpendapat jala namandok: dang pola ingkon sai muli tu anak ni namboru.

(Porlu ingotonta, molo adat marboru ni Tulang do na berlaku, dang mardalan Tintin marangkup, jala dang dipake istilah panandaon; molo marga na asing do na mamargahon nanaeng hela i, dang marga ni pamoruan kandung, mardalan ma menurut prosedur ulaon adat marunjuk).

Molo dung satahi saoloan (sepakat) nanaeng mangampu anak dohot sipangoli nanaeng ampuonna i, dirasmihon ma i marhite adat nanigoranna Mangampu anak manang Mamargahon. Mangihuthon na ni ida dohot na binege, marragam do tanggapan dohot pangantusion taringot tu lapatan ni mangampu, adong do deba na manganggap ulaon pangampuon i, sarupa songon na mangharoani anak na tubu; na deba, holan sekedar mangarasmihon pangam puon i do. (pelantikan/penabalan).

Porlu ingotonta, marbeda/marasing do pangantusion ni Mangain, Mangampu dohot Adopsi, jala partalian ni mudar berdasarkan biologis do Tarombo. Dang mungkin samudar anak na niampu dohot na mangampu, jala dang sipardohot anak na niampu marbagi harta warisan ni na mangampu.

      

Hombar tu na ni ida, na binege dohot naung hea ni ihuthon, boi ma ni paandarhon dua ragam (dua versi) partording ni ulaon i, songon na di toru on :

Versi I.

     

Di ari naung binuhul/dipartingkian naung tinontuhon laho manga rasmihon pangampuon i, marpungu ma angka tutur dohot tondong na nigonghon/na ni jou ni hasuhuton mandohoti ulaon i.

(Mangihuthon pandapot ni angka dongan natuatua, ala dang pola berkaitan pangampuon on tu tarombo dohot harta warisan, holan  ulaon tingkat sakeluarga do ulaon sisongon on, jala boi do nang so pola mar Tudutudu ni sipanganon)

      

Dung jolo mardos ni roha nasida, dimulai ma acara. Jongjong ma si ungkap hata sian haha anggi ni suhut pangampu, didok ma hatana, ninna ma: Santabi ma diangka raja na huparsangapi hami; didok situatua: molo mardalan raja, ingkon jolo patiuron do dalan sidalananna, asa unang sungkotsungkot manang tartuktuk patna. Jadi, andorang so tamulai acara, parjolo ma jolo hupaandarhon hami konsep partording ni ulaonta sadarion/dimanogot on. Mangihuthon naung masa huulahon hami, songon on ma partordingna :

* Hata huhuasi sian suhut/paidua ni suhut.

* Acara mangampu (penabalan/pelantikan)

* Marsipanganon/mangan.

* Tangiang simpul mangan.

* Marhata sigabegabe.

* Tangiang panutup.

Songon i ma konsep partording ni ulaonta, (Laos dipangido ma panolopion sian angka raja na ro/natorop).

     

Dung satolop sude, dimulai ma acara. Ro ma anak siampuon i tu jolo ni suhut pangampu. Udut tusi, didok suhut pangampu i ma hatana, ninna ma : Ale adu i----(didok goar ni anak siampuon i), huampu ma ho gabe anakku, Si --- do goarmu nasai leleng on, alai mulai sian ombas on, Si --- marga --- ma goar panjouonmu. Dibuat ma Ulos, laos diuloshon ma i huhut didok hatana, ninna ma : On ma Ulos hohop jala ulos manjanghon, sai dijanghon jala digomgom tondinami ma ho. Udut tusi, dijomput ma boras pir tu simanjujung ni anak siampuon i huhut didok hatana, ninna ma : Pir ma tondi ni anakhon, sai didongani jala diramoti Debata ma ibana, ima tutu. Dipahundul ma anak na ni ampu i dilambung nasida. Dung sidung i, dipadalan dibagihon ma panganan. Tangiang mangan dohot huhuasi ni sipanganon, sian pihak suhut pangampu, manang sian wali ni naniampu.

(Molo adong do dipatupa Tudutudu ni sipanganon, ditingki na marsipanganon i do dipasahat tu angka hasahatanna, hombar tu adat ni suhut na mangampu, langsung sian jolo ni suhut; sipanganon surung surung do i sian anak na niampu i, songon i ma godangan pandapot ni angka dongan natuatua/dongan saparsaoran).

Dung sidung mangan, ditutup ma jolo parmanganon i dohot tangiang simpul mangan, Udut tusi, marhata sigabe-gabe ma, anggiat horas jala gabe anak na ni ampu, songon i nang na mangampu. Dung sidung marhata sigabegabe, ditutup ma dohot tangiang panutup sian Dongantubu/ Dongan sahuta/STM.

(Ala ulaon sakeluarga dope ulaon on, jala sipanganon pe, sipanganon Surungsurung do goarna, dang patutna dope sahat jou jou tu Hulahula).

Versi II.

Dung marpungu angka na nijou i di jabu/inganan na pinarade ni suhut pangampu, jolo mardos ni roha ma nasida laho mamulai acara. Andorang so dimulai acara, jongjong ma si ungkap hata sian haha anggi ni suhut pangampu, didok ma hatana, ninna ma: Santabi ma diangka raja na huparsangapi hami, didok situatua, molo mardalan raja, ingkon jolo patiuron do dalan sidalananna asa unang sungkotsungkot manang tartuktuk patna. Jadi, andorang so tamulai acara, parjolo ma jolo hupaandarhon hami konsep partording ni ulaonta sadarion/dimanogot on. Mangihuthon naung masa huulahon hami, songon on ma partordingna :

* Parjolo ma acara mangampu anak.

   - Mangupahon Tudutudu ni sipanganon tu anak si ampuon.

   - Mandok hata pangampuon.

   - Manghohop(Pasahat Ulos hohop/ulos manjanghon).

   - Manjomput boras si pir ni tondi.

* Hulahula pasahat Dengke (na gabe Tulang ni anak na  ni   ampu).

*  Pasahat Tudutudu ni sipanganon tu jolo ni Hulahula.

* Marsipanganon.

* Tangiang simpul mangan.

* Marhata sigabegabe.

Songon i ma konsep partording ni ulaonta, (Laos dipangido ma panolopion sian angka raja na ro/ natorop).

     

Dung satolop sude, dimulai ma acara. Ro ma anak siampuon i tu jolo ni suhut pangampu. Udut tusi, didok suhut pangampu i ma hatana, ninna ma : Ale adu i----(didok goar ni anak siampuon i), huampu ma ho gabe anakku, Si --- do goarmu nasai leleng on, alai mulai sian ombas on, Si --- marga --- ma goar panjouonmu. Dibuat ma Ulos, laos dihohophon ma i huhut didok hatana, ninna ma : On ma Ulos hohop jala Ulos manjanghon, sai dijanghon jala digomgom tondinami ma ho. Udut tusi, dijomput ma boras pir tu simanjujung ni anak siampuon i huhut didok hatana, ninna ma : Pir ma tondi ni anakhon, sai didongani jala diramoti Debata ma ibana, ima tutu. Dipahundul ma anak na ni ampu i dilambung nasida. Udut tu si, dibuat ma Tudutudu ni sipanganon i sian jolo ni anak na niampu i, laos dipasahat dipaadophon tu jolo ni Hulahula ni suhut pangampu.

(Mangihuthon pandapot ni angka dongan natuatua/ dongan saparsaoran, sistim na songon on, (duahali paadophon Tudutudu ni sipanganon), tada/maralo do on tu hata ni situatua na mandok:

Naung sinuan dang jadi butbuton,

naung pinantikhon dang jadi umpaton,

naung nilean dang jadi jaloon.)

Dung sidung i, ro ma Hulahula ni pangampu (ima na gabe Tulang ni anak na niampu i) pasahathon dengke dohot Ulos, laos manjomput boras si pir ni tondi. Udut tu si, dipadalan dibagihon ma panganan.

Tangiang mangan dohot  huhuasi  ni sipanganon, sian  pihak suhut pangampu manang sian wali ni na niampu.  Dung sidung mangan, ditutup ma jolo parmanganon i dohot tangiang simpul mangan. Andorang so marhata sigabegabe, jolo dibagi nasida ma Tudutudu ni sipanganon i, udut tu si, marhata sigabegabe ma, anggiat horas jala gabe anak na ni ampu, songon i nang na mangampu.

     

Dung sidung marhata sigabe gabe,ditutup ma dohot tangiang panutup sian raja ni tutur na tumimbo (Hulahula  ni suhut pangampu).

* Hira sarupa do partording ni ulaon mangampu anak dohot partording ni ulaon mangampu anggi (Mengangkat Saudara), jadi nianggap dang pola porlu surathononhon dison.

Tweet

Subscribe to receive free email updates: