8. Tardidi

Dimasa ni pandidion nabadia di Gareja, diboan natorasna ma dakdanakna asa dohot manjalo pandidion nabadia. Nungnga gabe adat i di halak Batak Toba, dung sidung pandidion nabadia di Gareja, dipatupa ma pesta las ni roha, ima nanigoaranna nuaeng Adat Tardidi (Syukuran). Mangihuthon pandok ni angka natuatua, ianggo najolo ninna, diparmulaan ni hakristenon i: molo dipestahon natorasna pe ianakhonna ala tardidi, olat ni pesta sakeluarga do; jala na dianggap sakeluarga, olat ni namarhaha maranggi do, satimbotimbona sisada ompung, naso tardok dope dongantubu. Ditingki naparpudion (di zaman saonari), nungnga torop napabidanghon ulaon i gabe pesta bolon, nungnga masa marhara Hulahula sahat tu tingkat Dalihan Na Tolu paopat sihal-sihal, gonghon ni suhut pe, gabe sahat do tu Bonaniari dohot boru natuatua. Songon i ma i namasa i, dang tardok manang aha, ai tong do mulak tu hata ni umpasa namandok:

Gaja pinagajagaja, duhutduhut do gagatonna.      

Raja pinarajaraja, guru di suhut do hasuhutonna.

Metmet manang balga pe pesta tardidi, ianggo partording ni ulaonna, sarupa do, holan bidang na do na tamba.

       

Dung sidung pandidion i sian Gareja, marudut ma tu ulaon Pesta. Sai tar dipatangkas paidua ni suhut do jolo Hulahula i (Tulang ni na tardidi) manang na adong dope sipaimaon. Dung dos rohanasida dimulai ma acara. Jongjong ma sibuka hata/Paidua ni suhut/Protokol, didok ma hatana ninna ma: Santabi ma di Amanta Rajaraja dohot Inanta soripada nahuparsangapi hami; didok situatua, molo mardalan raja, ingkon jolo patiuron do dalan sidalananna, asa unang sungkotsungkot manang tartuktuk patna. Jadi, andorang so tamulai acara, parjolo ma jolo hupaandarhon hami konsep partording ni ulaonta sadarion. Mangihuthon adat naung huhasomalhon hami songon on ma partordingna

 *  Mangambangi na tardidi :

-   Suhut/Paidua ni suhut pasahat Tudutudu ni sipanganon tujolo ni   na tardidi.

-    Hulahula (Tulang ni na tardidi) pasahat sipasahatonna  (Dengke dohot Ulos) laos marudut ma tu haha anggi nasida, pasahat  sipasahatonna.

* Marsipanganon (makan bersama). Tangiang mangan   dohot   

huhuasi ni sipanganon sian pihak suhut.

Santabi ma di raja i Hulahula nami, dang namangorui disangap

ni raja i, alai ala ulaon sisada hasuhuton do ulaonta sadarion, na

rap mangambangi do hita di si Ucok/si Butet on (didok goar ni

na tardidi i), mangihuthon naung somal huulahon hami,

ditingki na marsipanganon i ma hita, hupadalan hami

namargoar ni Tudutudu ni sipanganon, langsung ma i sian jolo

nami jala mangihuthon adat ni suhut nami.

* Tangiang simpul mangan sian pihak suhut.

* Mangulon satongkin huhut mangalehon tingki tu angka dongan    na naeng manjalang suhut.

* Marhata sihorashoras/hata sigabegabe 

* Hulahula paampuhon (ianggo najolo ninna, paidua ni

suhut/Rajatinonggo sian dongantubu do na paampuhon tu suhut sihabolonan, hata pasu-pasu do sian Hulahula.

* Mangampu suhut.

Songon i ma konsep partording ni acara dihita, molo adong nahurang lobi, ba rap ma hita padengganhon (laos dipangido ma panolopion sian angka raja). Molo dung satolop angka raja, dimulai ma acara i.

       

Dipasahat / dipeakhon,  ma Tudutudu ni sipanganon i tujolo ni na

tardidi(holandipeakhon pe boi ma i ala dang diantusi dope hata, holan

na patari dahon na ibana do na ni ambangan),

Udut tusi, dipasahat Hulahula/Tulang ma  Dengke huhut didok hatana

ninna ma:  Dison hupasahat hami Dengke Simudurudur paboa las ni

roha nami, ala naung tardidi/mangalap goarna Bere / Ibebere    nami;

anggiat ma, rap mudur  tudolok  hamu   dapotan  las  ni ari, mudur tu

toruan,dapotan mual natio jala songon nidok ni umpasa ma dohonon

nami :

           

Sitiktik ma nagompa, hodong lais ni ruma.

Otik so sadia pe natupa, sai godang ma pinasuna.

Las ma rohamuna. Ima tutu.           

Udut tusi, dipasahat ma ulos, huhut didok hatana ninna ma: Onma ulos si ganjang rambu  di Bere/Ibebere nami on, asi ma roha ni Tuhan, sai jolma siganjang umur ma on sogot pairing-iringonta, imatutu; laos mangihut ma uduran/ hahaangina pasahat sipasahatonna.

Dung sidung dipasahat Hulahula sipasahatonna i,dibagihon /dipadalan ma panganan, jala sian pihak suhut ma tangiang mangan dohot huhuasi ni sipanganon (sitiktik ma na gompa--dst). Ditingki na marsipanganon i, dipadalan ma na margoar ni Tudutudu ni  sipanganon i tu angka hasahatanna, hombar tu adat ni hasuhuton. Laho pasahathon  i di dokma  hatana : Onma namargoar ni lompan tu… (dang didok “ jambar” ).

Dung sidung marsipanganon, ditutup ma jolo parmanganon i dohot tangiang simpul mangan sian pihak  Suhut / Pangula ni Huria; udut tusi, didok Paidua ni suhut/Protokol ma hatana ninna ma: andorang so ta uduti tu na marhata sigabegabe/sihorashoras, nilehon ma tingki tu angka dongan nanaeng parmisi /manjalang suhut.

      

Laho mamungka panghataion, sai tar jolo di sungkun Paidua ni suhut do angka raja, manang songon dia partording ni parhataan sipamasaon: (Pilih  satu).

8.1.  Sirambe manis/dang pola masisisean

*      Hata huhuasi sian paidua ni suhut  mandok mauliate tu angka raja dohot inanta soripada laos patorangkon maksud dohot tujuan ni parpunguan, na manghalashon haroan lasniroha do, ala naung tardidi ianakkon nasida/mangalap goarna sian Gareja/Huria.

*      Mandok hata nauli nadenggan sian horong Boru/Bere/Ibebere.

*      Mandok hata nauli nadenggan sian Dongan sahuta.

*      Mandok hata nauli na denggan sian Dongantubu.

*      Dilehon kesempatan mandok hata tu raja na ro. (diluar ni dalihan na tolu; isarani organisasi dohot   Aleale).

*      Pasahat hata pasupasuan/hata sigabegabe sian horong Hulahula tarmasuk Tulang rorobot dohot Pariban, marsagi marsiaturan ma nasida mandok hata alai parpudi ma Hulahula tangkas laos mambahen pangarimpunina (Molo adat namasa nuaeng on, laos Hulahula i do paampuhon hata panggabean  parhorasan i).

*      Jolo dijalo Paidua ni suhut/Protokol ma hata sigabegabe i, dung i pe asa dipasahat/dipaampuhon tu Suhut sihabolonan. (Adat najolo)

*      Jongjong ma suhut mangampu.

8.2. Marhata sise/Masisisean.

Mardos niroha ma jolo Dongantubu dohot Dongan sahuta, manontuhon, ise nagabe Raja sungkun. Doshon na marhaha maranggi do na mardongantubu dohot na mardongan sahuta, alai siangkangan ma dongantubu ala parjolo do i adong, dipudian ni ari pe asa masa na mardongan sahuta. Denggan do nang sian dongan sahuta na gabe raja sungkun alai berpedoman iba tu hata namandok: Marguru tu hahana do angina, jadi, sian dongantubu ma jolo nagabe Raja sungkun binahen dison, ianggo Raja alus, Paiduanisuhut ma. (Rajasungkun = Rs; Raja alus = Ra).

Rs : Manghatai ma hita suhut nami

Ra : Manghatai ma hita tutu, nungnga rade hami.

Rs : Nungnga bosur hita mangan, mahap marlompan juhut, pamurnas ma i tu daging, saudara tu bohi, sipasindak panaili ma i, sipaneang holiholi. Taringot di sipanganon i suhut nami, dia ma i langkatna dia unokna, dia ma i hatana dia  nanidokna, botima.

Ra : Gabe jala horas ma hita Raja nami, ia marpanungkun ma hamu taringot di sipanganon nasosadia i, songon nidok ni situatua ma dohonon nami :

godang sibutong butong otik sipir ni tondi

Sitiktik ma na gompa, hodong lais ni ruma.

Otik so sadia pe sipanganon natupa i,  sai godang ma pinasuna.

Las ma rohamuna. Ima tutu. ianggo hata ni sipanganon i rajanami,  

sigabegabe si horashoras do nanidokna. Botima

Rs : Gabe jala horas ma hita saluhutna tumpahon ni amanta namartua Debata, dohonon nami ma songon nidok ni umpasa :

       Bagot na marhalto ma i,   naniagatan di robean.

       Sai horas ma namanganhon,

       tu tambana  di hamu namangalean.

       Didok situatua, marangkup do nauli mardongan nadenggan, asa tangkas uju purba tangkasan uju angkola; asa tangkas hita maduma tumangkas ma na mamora. Di sihombarna songon na hundul, di siudurna songon na mardalan, disirongkap ni panggabean siangkup ni parhorasan i, tangkas ma suhut nami   marboaboa.

Ra : Gabe jala horas ma hita raja nami, ia marpanangkasi ma nuaeng hamu/raja i di sihombarna songon na hundul di siudurna songon na mardalan, di sirongkap ni panggabean siangkup ni parhorasan i, tangkas ma tutu hami marboaboa. 

       Dinasadarion nasogotan, tardidi/mangalap goarna do anakkon nami sian Huria ni Tuhanta, jala nungnga dijalo goarna Si ----

       Ala naung tarsurat goarna di Huria i, marlasniroha do hami, jala dipangido rohanami asa rampak hita manghalashon i mandok mauliate tu Tuhanta, ima rajanami sitangkasna di sirongkap ni panggabean siangkup ni parhorasan i, botima.

Rs : Mauliate ma di Tuhanta, songon i nang dihamu hasuhuton nami, nungnga tangkas hamu marboaboa, na tardidi do hape ianangkonta, mangalap goarna sian Gareja/Huria ni Tuhanta, nuaeng pe dohonon nami  ma songon nidok ni umpasa :

       Dangka ni Hariara, tanggo pinangaitaithon.

       Sai dao ma ibana sian mara, sitongka panahitnahiton

Suang songon i ma nang dihamu suhut nami, sai diparbisuhi jala di pargogoi Tuhanta ma hamu mamingkiri sipingkiran muna nang mangula ulaon muna, asa dapot songon nidok ni umpasa :

Lomak ma silinjuang, lomak so binaboan.

Sai dapot naniluluan, jumpang na jinalahan

(laos didok ma: hatangki, ditambai dongan, dipaliathon ma hata i tu dongan tubu molo adong dope namanambai).

Dung sidung sian dongantubu mandok hata, dipaulak ma panghataion i tu paidua ni suhut, asa nasida paliathon/ mangaturhon partording ni sidok hata. Dung dijalo paidua ni   suhut hata i sian Dongantubu, dipaliat ma tu horong horong na mangihut songon  parhataan di sirambe manis:  

*      Hata sigabegabe/sihorashoras sian Boru/Bere/ Ibebere   

*      Hata sigabegabe/sihorashoras sian dongan sahuta

*      Hata sigabegabe/sihorashoras sian Aleale/organisasi

*      Hata si gabegabe/ sihorashoras sian horong Hulahula, marsagi marsiaturan ma nasida mandok hata, alai parpudi  ma  Hulahula tangkas,  laos paampuhonsa tu suhut.

(ianggo najolo ninna, paidua ni suhut/Raja tinonggo sian Dongantubu do na paampuhon tu suhut sihabolonan, hata pasupasu do sian Hulahula).

Jolo dijalo paidua ni suhut ma jolo hata panggabean parhorasan i, dung i pe asa di pasahat/dipaampuhon tu suhut sihabolonan, ninna ma :

Mauliate ma di amanta raja dohot inanta soripada na manghaholongi hami, namangalehon hata nauli na denggan/hata pasupasu panggabean parhorasan tu hami. Andorang so hupaampuhon saluhutnai tu suhut sihabolonan, dohononku ma tu hamu songon nidok ni umpasa :

Harbangan ma i dalan tu huta,

Balatuk dalan tu jabu

Hata panggabean parhorasan napinasahat muna,

huampu hami ma i martonga ni jabu.

Turtu ninna anduhur, Tiotio ninna Lote.

Hata nauli na pinasahat muna,

sai unang ma muba unang mose.

Tingko ma inggiringgir, bulung na i ratarata.

Angka hata pangidoan nauli i,

sai pasauthon ma amanta namartua Debata

Nuaeng pe, di hamu hasuhuton nami, ampu hamu ma hata panggabean parhorasan i, botima. 

Jongjong ma suhut mangampu, huhut ditiop rambu ni ulosna, patuduhon rasa hormatna, ninna ma : Mauliate ma di Amanta raja dohot Inanta soripada na manghaholongi hami, na pasahathon hata nauli na denggan tu hami. Songon nidok ni umpasa ma dohonon nami:

Naung sampulupitu ma i, jumadi sampulu ualu.

Hata nauli napinasahat muna i,

huampu hami ma i martonga ni jabu.

Ampu ma i diampuan nami, puak di abara nami

Sahat ma solu tinogu tu bontean,

       sai leleng ma hita mangolu. di parhorasan di panggabean Botima.

Manimpuli ualon i, dibahen Hulahula ma tangiang panutup.

Tweet

Subscribe to receive free email updates: